ياعازف العُود صحّيت جفن الحزن من دقت اوتارك

١١

سبحان الله وبحمده سبحان الله العظيم
.
.
زينة سوت عجين الرصيع وخلته وراحت ومعها الابريق للغدير وماهيب زينة اللي قبل ساعه
نزلت بأول الغدير ودنقت تملى الابريق بالماء وعقب ماخلصت .. جمعت من ماء الغدير بيدينها وغسلت وجهها وهي تشهق من برودته /يازييين هالماء وياصفاوته
على طريقها .. مرت خيمة الشيخ وتكوّم الرجال عنده .. رفعت طرف شيلتها وهي ترقّبه من بينهم .. مرت دقايق ولاظهر ولازالت واقفه
مرن جنبها بنتين وحد منهن نطقت وهي تمشي / ماهو يكفيكن عايشة اخذت ابن الشيخ واختها خذت ولد عمه .. -ضحكت ولفت عليها-
لاتحطين الامل على عزام ، غيرش اولى به
لفت عليها زينة وتركت الابريق بالارض
وماجداها غير كف حامي جمد ملامح البنت اللي معها
تجمعوا الوغدان حولهم بصمت
زينة /اوزني كلامش يابنت علي .. واعرفي من اللي تهرجينه ياقليلة الحيا ،
اشهد انش ماتربيتي يالحسوده
شالت ابريقها ومشت
-
ركضوا اثنين من الوغدان لخيمة الشيخ وقابلهم عزام وصقعوا به من العجله
عزام دنق لهم وشالهم لصغرهم ، الواحد مايتعدى ٦ سنين /بسم الله ، اركدوا بلا هالعجله .. العجله من الشيطان انت وياه
صرخ واحد منهم /زينة ضربت بنت علي زينه ضربت بنت علي
عقد حواجبه وابعد عن الخيمة لايسمعهم احد /وشلون ؟ متى
تكلم الثاني وهو يلهث / وتقول قليلة الادب ماتربيتي يابنت علي من شوي
عزام ناظر الثاني بإستغراب وضحك
الوغد الثاني رفع يده الصغيره وصفق عزام /كذااا كفف قوووي قووه
عقد حواجبه ومسك خده /اححح الله لايبارك بعدوانك ، زين وش عندكم جايين صوب الشيخ
تحرك بشقاوه يبي يفك نفسه منه /نبي نقووله
عزام جوّدهم وناظر كل واحد منهم /اسمعني انت وياه ابتفق معكم .. اذا ماعلمتوا احد اباخذ كل واحدٍ منكم على ظهر الفرس وادور به الباديه كلها
طير عيونه بحماس /متى نبي نركب ظهر الفرس .. ماحنا قايلين لحد ماانقول
عزام نزلهم بالارض /مهو اليوم بعد يومين لجل اتأكد انكم ماتلعبون علي
رفع سبابته الصغيّره وبتوعّد لذيذ /والله لو تلعب علينا اعلم عليك حاتم يزعل عليك
مسك سبابته وعضها بخفه وهو يضحك /ماصغرك وماطول لسانك ، هها عطني قفاك
-
بعد ماصلّوا المغرب ..
اقبلت عليهم سيّارة حاتم وجاء له مصعب وعزام يسلمون
عزام من جهة عايشة /ارحبي ياعويش
عايشة /تبقى ياهلاا
عزام /شحالش عسى حاتم مايضايقش
عايشة /توّنا ثلاث ايام اصبر علي ان كان ازعلني ف انت اول من يدري
عزام ضحك /ابشري بالخيرر اجل
عايشة/ تسلم
راح حاتم معها يوصلها ويسلم على ام عقاب وعقب راح هو وعزام ومصعب للرياجيل
زينة اول ماشافت عايشة فزت بين الحريم وخممتها بشوووق /ياالبييه هالرييحه والله انش فقيييدهه ، متى بتعوّدون .. وتبي تطولووننن ومتى عرس سعود
عايشة صفقت جبهة زينة بظهر يدها /بس يابنت خليني اخذ نفس
وراحت تسلم على ام حاتم وام عقاب وسهام
زينة راحت تمشي وراها /ووش اسويي ماودي افقدشش ودي ادري متى تجين ومتى تروحين الله اعلم بحالي وانا هناك
عايشة ابتسمت وجت تبي تجلس جنب زينة .. نادتها ام حاتم تجلس بينها وبين ام عقاب وتسولف عليهم
اما زينة اللي لافه جهة عايشة تبي تسوولف عليها تبي تسألها تبي تخطط معها مثل كل مره ضاق صدرها يوم قامت جنب ام حاتم .. تنهدت وجلست ساكته وتضحك غصبٍ عليها لسوالف عايشة
‏-
يوم جديد بعد جيّة حاتم وعايشة .. ودّعوهم من جديد العصر
زينة بضيق وهي ماسكة يد عايشة /البارح مامداني اتونس معش .. سولفتي مع الحريم ورحتي لبيتش .. وذالحين تروحين لعرس سعود ونهله .. متى تجين جية على شاني
عايشة دنت وخمتها بحنان /ابشري ، اني لا اجي واملى عينش بالجية
تنهدت وهي تشد عليها وعقب ابعدت /يالله روحي لايشيش حاتم
ضحكت من قلب /ههههههههههههههههههههههههههههههه ويش ! يرحم هالزول لاتعيدينها ههههههههههههههههههه
ضحكت بخفه /زين روحي وسلميني على نهله قولي لها لو اقدر اجي جيت لكن تدري ان دعاي معها الله يوفقها يارب
-
المغرب .. هدوء غريب داخلها .. الدنيا ملونه الا هي لحالها المظلمه
العرب كلها فَرحه لبن الشيخ ... من زمن مااعرس للشيخ ولد عقب صقر ابوعايشة
جلست عايشة جنبها بإبتسامة وبزينتها البسيطه /ارحبي ياعروس .. هاه وش الحال
نهله قطعت سرحانها بالمرآيه ولفت على عايشة وابتسمت /العروس اللي يقال عنها عروس هي انتي ياعايشة .. لاتلعبين على عمرش .. اخذته لجل ارتاح ببيت ابوي .. واخذني لجل يرضي امه وابيه
عقدت حواجبها من رد نهله ،/وش هالكلام يانهيّل .. سعود والله ماتلقين اطيب من قليبه بالعرب كلهم وش اللي مضيق خاطرش يابعدي تونسي وقومي اطلعي للعرب وارقصي وتونسي هاليوم مرة وحده بالعمر تبين تخربينه بالحزن
بدت دموعها تغشى عينها /امي وابي مالهم الا كم اسبوع تحت التراب حتى ترابهم ماجفت ماه ، وتقولين لي قومي ارقصي وتونسي هاليوم مره !
لا بالله تحرم علي ياعويش الوناسه بعدهم
قالت جملتها الاخيرة وهي تمسح دموعها /انا ابروح بيت ابوي مجهّز وكل شي .. مانيب طالعةٍ لحد والا انتهى عرس الرجال يجي ولا تلزّمين علي .. هالسالفه متفقين عليها انا وياه
عايشة تنهدت /اللي يريحش
-
بعد العرس .. بدوا الرجال يتفرقون والحريم .. وعايشة ببيت ابوها مع حاتم
ابوسيف سلم على سعود /الله الله ببنت الغالي ياسعود ،
قبل راس امه وهي ترد عليه نفس الجمله /ارفق بها يتيّمه وقليبها قليب عصفور الله يوفقكم يالله رح تلقاها تعبت وهي تحرّى
طلع من عندهم بصمت وبيت ابونهله اللي صار بيت نهله وبيته مايبعد عن بيتهم الا كم خطوه
دخل وهو يتنحنح لجل تسمعه .. ماسمح صوتت دخل صوب منامها ... راقده .. عقد حجاجه وهو يطالعها .. نزل غترته وبشته ونعوله "كرمتوا" وانسدح جنبها بالثوب ثواااني ومن التعب غفت عينه
فتحت عيونها المورّمه بهدوء .. وهي مغطيه جزء من وجهها بشعرها .. رفعت خصل شعرها واخذت نفس بهدوء وانقلبت على ظهرها .. لفت وجهها جهة سعود وهو منسدح على ظهره ومغطي عيونه بالغتره .. اوجست رجفة جسدها وهي تدقق بعرض جسمه وفرقه عنها .. ماهو عريض ولكن بالنسبه لها فرق
سكرت عيونها بهدوء وكلها اماني بإن عينها تغفي وهو ساعه !
-
الصبح .. فتّحت عينها من نور شمس الصبح  اللي ازعجتها
انقلبت للجهه الثانيه وهي تشد اللحاف سمعت قرقعه وصوت حولها .. استغربت وقامت تشوف وش يسوي .. شافته بأول الخيمة لابسٍ فروه ولاف شماغه على وجهه  وشابٍ ناره ويسوي القهوة
ابتسم اول ماشافها /صبحش الله بالخير ، اقربي تقهوي
ناظرت به لثواني صدت ورجعت مكانها ظفرت شعرها وغيرت جلابية العرس اللي من امس عليها وحطت شيلتها على راسها وراحت بعيدٍ عن العرب تجمع لها حطب .. مرت ساعه ونص مابيت التخيّل والتمشّي  وجمعت لها حطب
ردّت وشمس الضحى قد انتهى موعدها ومابقى على الظهر الا القليل
كان واضح عليها التعب من جسمها المفحمم ووجهها المحمر .. رمت الحطب وهي تاخذ نفسس وحطت يدينها على ظهرها
صح انها تعبت بس تحس بحجر متين انزاح عن صدرها
سمع صوت الحطب وفز من مكانه وطول الصبح يحاتي وشوي يعصب ويتوعد وشوي يستغفر ويهدي ويتذكر وصاة امه وابيه
عروس بصباحيتها اللي مفروض تكون معي وتقهوى معي رايحةٍ تمشى ولو لمحها حدٍ من العرب وش يقول !!؟
وقف قدامها /وينش فيه كل هالوقت
عدّته وهي ترمي شيلتها .. لتشرق شمس الضحى في نحرها او يشرق نحرها على ارض العرب /جمعت الحطب وتمشيت شوي
كان من حقه يعصب عليها يرفع صوته لكن اخذ نفس ودخل وراها غرفة منامهم وهي تظهر لها جلابية ثانية /يانهيّل .. انتي عروس وش يقولون العرب للعروس اللي بصباحية عرسها تجمع الحطب
نهله بقهر من اسلوبه الطيب معها وهي ماتستاهله /العروس اللي تقول عنها عروس .. انت ماخذها لغلاة ابيها المرحوم ماهو لجلها .. ولانيب اعد نفسي عروس لاعاد تجيب لي هالطاري ، واما عن هرج العرب فظني ان العرب مانتب سالمٍ من لسانها لو انك طاهر عيوب
حز بخاطره كلامه وعقد حجاجه بعتب / هذي هقوتش فيني يانهيل .. ماتقصرين هذا جزى اللي يحاتي ويتعلث بالعرب
ظهر عنها وتوضى وتوجه للمسجد .. وهو يحس كلامها صحيح .. لكن حز بخاطره وشلون تناظره وترمي الكلمة وكنها تطفي لهب صدرها فيني .. تنهد وفتح المصحف يقرأ له كم آيه لين يحين وقت الصلاة
اما عن نهله فدخلت تسبّح وتحاول تنسى اخر نظره منه
-
اما ببيت ابوعايشة .. وكن البيت ردت به الروح .. سقفه اشتد وتماسك عقب سنين الرخو
ناييمة عقب ليلة طويييله ومتعبه بجميع تفاصيلها .. وزودٍ على ذا كله
نومتها دافيه وكلها حنان دامها ببيت ابوها وعلى ذراع حاتم
خمها ودنى لاذنها بصوته الراكد ولحيته تكاد تجرّح خدها الناعم /عويش هوهه ، عايشة ،يا ام صقير
عضت كتفه بإنزعاج لين فك عنها ومسك كتفه /اعقب ي ذالزوول ااححح
ضحكت على وجهه / لاعاد تزعجني وانا راقده.. ابتس انا الايام اللي رقدت بها في عمري كم مره خخلني اتلذذ بنومي
قبّلها بين عيونها على خدوها وجبينها وخشمها .. ثبت خشمه على خشمها ويطالع عيونها /انتي تلذذين بالنوم وانا وش لي
قرصته من ذراعه وقامت /ماعاد به نوم خلاص هونّا
ضحك بقوة لين بانت زوايا اسنانه .. وسواد عينه يضيق من الضحك
ابتسمت عايشة لضحكته/وانا صادقه
-
اما عند اللي تخربط حالها ولاتدري وين مرساها .. جالسه على ظل الشجرة المنشوده
شجرة عويش .. وهواجيس توديها والاخرى تجيبها ،
لفحت ريحته على وجهها لفت الا هذا زوله
ماتدري هي تفز وتضحك مثل كل مره وتهلي به .. لكن رجعت عينها على روس الجبال اللي على مد نظر عينها بتنهيدة حيره
عقد حجابه وجلس جنبها وبينها مسافه ، وجسمه جهتها
حط يدينه على ركبها / افا يذالعلم ، وش هالعبوس الله يدمر مبانيه ، وش هالزعل طالبش  قولي يازينة خير ياوجه الخير ، بلاش
زينة /مانيب زعله ولكن الحيره ذبحتني ياعزام
عزام /تخسى الحيره ، من ويش محتاره .. -وبضحكه-وانتي ماشاءلله عليش واصلني علمش طاقتن النسوان ، وشهو لجهله
لفت عليه وبصدرها سباق خيول /لجلك .... بعد صمت وعينه عليها /وويش؟ وانا وش دخلني بينكن يالحريم
زينة /دخلّك ان قليلات الحيا مالهن سيره غيرك عقب عرس حاتم وعايشه ويغيظنني بالحكي وتبيني اسكت لهن !!
عزام عقد حواجبه /وانتي وش عليش منهن .. اسفهيهن وزيدي غبنهن .. بس عاد فكي هالعبوس مايهون علي
زينة ناظرته وعيونها نفس النظره .. وكنها تقولّه
متى نبي نجتمع ياعزام ؟ متى نبي نلطم افواههم !
متى تعمي عيونهن عنك .. صدت عنه بصمت
حس بضيق وسند جسمه على جذع الشجره
واستمر صمتهم
-
مر يومين .. نفس الحال
المغرب .. بخيمة الشّعر والنار قبالها حيّه .. ونسناس الهوا يلفح نحرها وشعرها
وعينها على الدلة .. والقهوة تفوح ... كما فوح روحك يانهيّل !
قاطع سجتها دخوله السريع وتوه جاي من مجلس ابيه ../قومي يانهيّل ، تزهبي امي ذالليل عندها حريم خليش معها من يدخلن لين يظهرن عاونيها "ماسمع رد ، بل كانت عينها بمكانها ولا كنه موجود ، وتصرفاتها بدت تنرفزه وتغيظه"
دنق لها وريحة ثوبه تفاوح عليها فزت من سحبها مع زندها .. ريحة الضو والعود الريحة اللي ماتفارقه .. رفعت عيونها له وعقدت حواجبها !!/خير! وش بغيت
هزها بيده وكله غبن وقهر وهو مايلاقي منها حسن اسلوب وحلو الحكي ، رص على سنونه وعينه بعينها /لاتحترميني .. ولاتكلميني ، واكرهيني .. اكرهيني .. كثرر ماتبين!! .. بس اليامن جبت طاري امي فزي "رفع صوته" ففززي لأمي ردي جميلهاااا ، انا مابي منش شي .. ولاتخلين اللي ماودي به يصير يصير يانهيّل!
لازالت في حالة صمتها وعينها تبحر وسط عينه
ترك يدها وهرب .. منها ، مدري من عيونها .. تنهد وهو بطريقه لأمه ويده على يسار صدره /ماتستاهلين يانهله ، ماتستاهليينه
-
اما عند عزام .. فاقدٍ شي بقلبه ، له يومين مارتوى من شوفها
كان جالس بعفوية ممدد رجوله ومتلفف بالفروه وولافّ الشماغ حول وجهه وماحوله احد
تنهد وكن ماله بال الا لها ، ولا له هم غيرها
هاجسه مافك عنه من اخر لقى لهم قبل يومين براس الجبل
سند راسه على مركاه وغفت عينه وخاطره ضايق ...
.
اما عند زينة اللي ماهيب اقل من حاله ...
طلبتها ام عقاب توصل غرض لأم حاتم وهذا اللي ماودها به
تبي تريح راسها عنه .. وماتدري انها تزيد بلاها بلا
لبست برقعها غديه لامن لمحها مايعرفها .. وسرت لأم حاتم
وصلت وصدرها تقل انشرح وطاب
-
جيت دارك وضيقة البال راحت
بأسباب زولك يا بوعقال مايل
ومع النّفس ريحة العطر فاحت
وانا مالمحتك لكنّ اتخآيل ..
المرجله وهيبة البشت باحت
انت اللذي حبه.. مثل الشموخ بجبال حايل
-
سكرت عيونها قدام المرايه .. وكحل عينها خطته عيون سعود والغبن فيها ممتلي
لجل حقها عليش يانهله .. روحي واحيي صيت امش وابيش ولا انخلق من يميته
لبست برقعها ولبست بشت ابوها اللي هيبته منه وفيه .. ياه يامنها لبسته
الرزه والهيبه .. كل من تمره لزومٍ تشده عيونه لها
-
كان واقف قبال امه ويسولف معها بهمس
وزينب تحوم حولهم ياما تودي وياما تجيب ، وام سعيد بصدر خيمة الحريم تزهب القهوة
ترخّص من امه وهو يعدل غترته /اجل انا ابروح لنهيّل اشوف وش هي عليه
ام سيف انشرح وجهها /حي هالزول ارحبي ارحبي يابنيتي يالله حيها هذاها جت الطيب عند ذكره
لف عليها وهي تدني من ام سيف وتقبل راسها وتخمها بشوق /ااااه ياريحة الغاليه ياعلّش تبقين
ام سيف /سبحان اللي رمى بحبتش في قلبي يايمه روحي روحي عند الحريم ارتاحي شوي وجايه
تبي تمشي متجاهلة وجوده مسك يدها وهمس لها /وانتي طالعةٍ عند الرياجيل تغنّجين قبالهم بلا عباة كذيه .. والكحل اللي على مد النظر اشوفه
رتبت فروة ابوها ووشدتها على جسمها وميلت راسها /ماقمت اتمشى واتغنج قبال الرياجيل الزم حدك ياسعود شيباني ربوني وعلموني الحيا .. اعقب! يقول اتغنج قبال الرياجيل
نزل عيونه ويطالعها من ساسها الى راسها .. ثبت عيونه على عينها .. وطوّل وعينه بعينها وقصده يربكها وكان يتقصد يزيح عينه لتقاسيم وجهها وجسمها
ترك يدها بيدون لاينطق بكلمه فقط ضحكه خفيفه اظهرها بعد ماسمع كلامها
-
عند عايشة اللي لازالت هي وحاتم ببيت ابوها بعد ماحلف عليهم سعود يحضرون عزيمته اللي بعد العرس بكم يوم
عايشه بعد مالبست وتزهبت ومعها علبة دهن العود .. مسحت ورى اذنها وكفوفها
نثرت شعرها على كتوفها ودخل حاتم ووقف جنبها بالمرايه يزين مرزامه وهي مبتسمه ..
حاتم /لزوم نثرة هالشعر ؟ خوفي عليش من هالنسا وغيضهن
عايشة /والله سعود يحب شعري .. وهذي عزيمته وانا ابسلم عليه واخمخمه لين اشبع هذا اخر يوم ومدري متى ابشوفه عقبها
لف عليها /ابتس انتي تدرين بيوم العرس وانتي تخمينه وتبكبكين على صدره ودي اتل هالرقبه عن مكانها انا لو ادري انش تبي تسمعين كلامي بس
عايشة لفت عليه بضحكه /هو انت تغار علي ياحاتم؟
ابتسم ابتسامة جانبية ودنى لين مالامس جبينه جبينها /ياعويش انا لو الود ودي كان خذيتش وحطيتش هنيّا -واخذ يدها على يسار صدره-
‏-
مرت فتره ماهيب طويله ولا قصيره.. مر
شهرين واسبوع .. اللي مبلي بالحب زاد عليه بلاه .. وشان حاله الين اصبح مايطاق
ماعاد به صبر يا صبري .. قده خلص
ولاعاد لي حيل والعمر يقدم بي
ماعاد هنا صبر ياعزام .. توكل على الله ومانت خايب
-
بعد سفرهم اللي قبل شهر .. احلا ايام نقدر نقول عنها .. حزنه من حزنها والسعد يوم يشوف وجهها يضحك .. الحب الطاهر النقيّ
الحب الحلال وكن ربي خلق لهم قليبٍ واحد وقسمه بينهم .. غير اخر يومين عايشه حالها ماهو حال .. كل ليلة يجيها تعبٍ تجهله تغي لون وجهها منه وماعادت عايشة الاوليه
دخل حاتم بعد صلاة العشاء وجلس جنبها ومسح على شعرها وهو ملاحظٍ حالها /ياعويش ، ويش حالش ذالليل
عايشة لفت عليه بإبتسامه /بخير ان شالله ، انت وشلونك
دنى لها وقبل خدها/انا بخير دامش حولي،الا ماتبين نطلع نشم الهوى سوى
عقدت حواجبها بأسف /خلنا نطلع بالخيمه .. مالي نفس بالطلعه
حاتم بضيق لامس خدها وعينه تراعي عينها/بلا وجهش كذيه ياعويش ،ماهو وجه عايشه اللي خابره، وين زولش الاوليّ اللي مغير استبشر به ، ولا ذا كله من الوله لام عقاب وزوينه وعم سعود
عايشه ضحكت / جازت لي عم سعود ، اي بالله ولهت عليهم
مسك يدها /قوم قومي يا اجمل من ضحك ، ابي استفرد فيش ويا القمر
-
سرحانه وغارقه بالهواجيس اللي توالى عليها .. والعصى بيدها ومقابله شبة النار الخامده وصوت الحطب ياكل بعضه... ساااجه !
ضحكت بخفه وحطت يدها على فمها وكن جاها خبر ماطرى على بالها ومالها به امل ...
لمحت بعيونها فرح متخبي تحت هدب عينها .. لولا الحيا الود ودها تركض له تلمّه لضلوعها قبال العرب كلهم .. وتضحك بعالي صوتها تعلمه بالفرح اللي غزا قليبها .. ياما بغت هالفرحه .. وجا يومها يازوين
قبل ساعه : دخلت ام عقاب لزينه وهي تخيط دراعه لأم عقاب /هاه يمه .. تبينها كذيه شووفي
ام عقاب مسكت يدينها /اتركي عنش هالحين واسمعي اللي بقوله لش ..
زينة اوقفت عن الترميش عينها وتطالع ام عقاب .. ضحكت زينه وجهها ماضحك .. تكلمت بربكه/ عزام .. ع ء عزام؟
ام عقاب /اييه..عزام خيرة الرجال ..لايكون ماودش به يايمه .. الرجال ماينعاف
زينه رفعت راسها /لاا .. عزام رجال وكفو
ام عقاب / اجل مبروك؟
زينه ناظرتها وضحكت
ام عقاب لمتها بالحيل/زين اللي جاني هاليوم يازينه الحمدلله .. يالله عسى السعد فالكم "نرجع"
زينه تنهدت وكن نفسها انقطع من الفرح .. الوله
-
بعد يومين زينه وافقت ووصل الخبر لهل الباديه .. وعيون البنيّ الحاسدات عليها .. واللي يتمنون لها الخير .. اما زينه ف هي تحس بروحها شيخه بين النسا والسعد فالها ويكتمل بجية عايشه الليلة
-
المغرب
وصلت عايشة ويا حاتم .. وقف حاتم ونزل مسك يدها بخوف عليها من التعب اللي اشتد عليها / ياجعله بروحي ولا فيش يابعد هالعرب
عايشةحبت خشمه /لاجاك التعب كنه بروحي .. وكاد انك ماودك تتعبني زود .. لاعاد اسمع هالهرج ياروحي
جت ام عقاب تهلي وترحب بعالي الصوت/هلا .. هلا يامرحبا بكم .. ياهلا بالغالي والغاليه
سكتت من شافت عايشه تعنّز بحاتم / عسى ماشر يامّي .. بلاش كذيه يالله تمشين
حاتم/البقى يمه.. عويش تعيبانه شوي .. لااوصيش عليها وتراي جاي الليل اتطمن ياعويش
عايشة ابتسمت وحبت جبينه وخشمه وحطت يدها على صدره /ماشبع من حبّك .. ولا اوصيك على روحي هنيّا
ضحك ولمها لحضنه/لاتوصين حريص
دخلت عايشة على يد ام عقاب وعين حاتم تراعيها
-
بعد اللقى الحار بين عايشه وزينه .. وفرحة عايشة بخبر خطبة زينه وعزام ..
ام عايشة وام عقاب وزينه جالسات على القهوة وام عقاب ساااجه ../عويش !
لفت لها وشدتها نبرة الصوت /لبيه !
ام عقاب /يابنيتي .. هو انتي حامل ؟
هدووء .. زينة ناظرت عايشة بتساؤل وعايشة ساكته ثم ضحكت بخجل /ويش؟ ههههههههه لا يايمه ماظنتي
ام عايشة /هو انتي ماحللتي ؟
"هزت راسها ب لا"
ام عقاب /ميخالف يمه .. خليني بكره انادي لش المداويه
عايشة سكتت وغيرت الجو زينة /بنت تعالي .. ابي اراويش الي شريته
‏-
حاتم دخل مجلس ابيه ابوراجح .. المجلس الحي وريحة الكرم تفوح من صفر الدلال المبهرة وبترحيب حار والمباركات اللي ماوقفت
-
الليل
جاها حاتم والوله وصل حده .. اول وهم ببيتهم هو وياها مقابلين بعضهم .. جلس قبالها ومابهغيرهم قبال الضو وهو ملحفها معه بفروته ../ابتس انا مامداني ياشيدة النسا .. من اقفت خطاي عنش وانا اتوجد عليش
عايشة بخجل بان بعيونها من ابعدت ناظريها عن عيونه / تقول امي بكره ابي اجيب لش المداويه .. لجل .. تظن اني حامل
توسعت عينه ... /ويش .. حامل .. رفعت عينها له وزاد خجلها بإحمرار خدها بعد ماشافت مبسمه توسع وبانت زوايا سنونه
-
اصبح العرب وطلعت المداويه من عند عايشة ..
وام عقاب وراها وام عايشة /بشري !؟
-
بيت ابوراجح
حاتم يفطر بعجله وعدان يطالعه ومبتسم/على هونك يارجل
حاتم ضحك ولحق لقمته برشفة شاهي /بس..الحمدلله دايمه يايمه
واسرع بخطاه لبيت ابوعقاب وشاف المداويه طالعه
تنهد بحب /يالله .. ترزقني منها ضنى وتقدم لأم عقاب /بشّري؟!!!
ام عقاب /وعايشة ماصدقت قالت لك .. مير ياوليدي المداويه تقول ان عايشة ماهي حامل .. مير مدري وش بها يمكن يبان بعد فتره
ابتسم بتنهاد /عساه خير .. ودي اشوفها
ام عقاب /ابشر يايمه .. وبإذن الله وبي يرزقكم بالضنى ..وتو الناس
دخل وراها لعايشة وهي سانده ظهرها وجنبها زينه .. طلعت زينه بعد مابارك لها  واختفت ابتسامته بعد مالمح زوايا عينها مرويه /تبكين؟
عايشة / مابكيت افدا ذالزول .. مير الوجع يزود عقب المداويه
حاتم ضاق صدره وقبل جبينها /لايابعد حيي وهالعرب .. مدري وش اسمي روحي والوجع توجسينه وانا حي
عايشة /مابي وجع دام زولك قبالي
-
بمكان بعيد عن ديار عايشة .. وعلى بعد المسافه ابتعدت القلوب .. قد هو عطاها من عمره .. عمره نقص بالعطى .. لين مل صبره ولا عاد بغى هالقرب
حتى هي لاحظت .. قل جلوسه معها .. ولاعاد هو يحط عينه بعينها .. والبلا ان مهو هذا اللي تبيه .. ماتببي قلبه وهو يبعد على قرب المسافه .. بعد ماتقهوى هز فنجاله وجا يبي يقوم وردته يدها .. لف عليها وابعدت يدها /تبي تروح بلا ماتفطر
عدل عمامته واخذ فروته/ماشتهي الفطور هنيّا
سكتت من ردّة /وانا مابي العرب تهرج عني .. اجلس افطر ثم تيسر على الله "وقامت"
ابتسم على جنب وجلس .. جابت فطوره ومسك ذراعها وجلسها /افطري معي يامره ماني افطر لحالي
جلست بلا كلام وتضيع عينها عن عينه .. اخذ من المعاميل بياله وصب لها شاهي وبدا يفطر وعينه عليها ..
ضحك بخفه ويدري بها خجله .. مير يزعجه شعرها يغطي عنه ملامحها ..رفع يده والهواجيس تسري به وشال شعرها اللي على وجهها ورفع يده بسرعه عقب ماحس على روحه .. ورفعت شعرها بيدها/تسلم يمناش
نهله /عوافي .. سكر عيونه بتنهيد وقام والود وده .. ماقام
لحقه صوتها /اتحراك بالغدى
-
سرى مجلس ابيه .. وقلبه على جمر يبي ميعاد الغدا وياها .. ضحك بنص طريقه ويتذكر خجلها .. خبّلته
زاد ضحكه بغرابه من الوضع اللي هو به .. يحس يحس بروحه ماهي معه .. لايوجس عقله براسه من يسري عنها ..
سكر عيونه ويده على صدره وكنه يعرف هالشعور .. ياماسولف سعيد عن حبه لعايشة اللي ماظنه بينتهي
وحب عايشة لحاتم اللي يشوفه بعيونها / الله لايجعل هذا بلاك ياسعود مانت ناقص زود بلا
-
اما عند نهله حالها تبدل عن اول ايامها معه ..
من مجلس بيوم من الايام وهي تسمع الحريم يقولون ان سعود يبي يعرس من بنت ابولافي .. من زياراته المتواصله له.. ونشدت عنه زينب وانكرت
من يومها وهي تهوجس وكل ماطلع ودها به يعوّد ... اخذت نفس وهي تبعد هالهواجيس من راسها .. تكاد تشعل بوسط صدرها نيران
-
لحقه عزام لبيت ابوعقاب قاصد زينه .. بعد ماسلم عليها نشدها عن عايشة /بشري عن عايشة
زينة هزت راسها والخجل كاسيها لاول مره .. /لا ابشرك ان ششاءلله انها بخير
-
وعند عايشة وحاتم وهو ساندها على كتفه
ابتسمت عايشة /بلاك نشبت .. ابك العرب وش يقولون جا من البلاد ويا حرمته ووصل وجلس مقابلها
لمها لصدره/خلي العرب تقول اللي تقوله .. دامي معش
عايشة قامت عنه ومسكت وجهه بكفوفها /طلبتك رح عود للرياجيل .. انا بعد ابي اشوف اهلي
فتح عيونه وضحك على ملامحها الصادقه .. /زين ززيين ياعويش مردوده "قبّل عيونها وطلع"
قابله عزام .. عزام بمزوح /ارحب .. اذن المغرب يارجال زين انك طلعت
حاتم وقف عنده /ياخوي طردتني .. تقول ابي اجلس عند اهلي تكفى
ضحك عزام وزينه معه /انشهد ياخوي ولهت على البنت .. ماقصرت فيك
حاتم /اييه ايه روحي وبلغيها سلامي
‏-
طلعت ام حاتم من بيتها بعد ماسوت الغدا وراحت لبيت ابوعقاب تطمن على عايشة وتغدى عندهم .. وسهام وراها
-
سلّم من صلاته وقام بعد ماقرأ اذكاره ووقفه صوت ابوه /سعود .. تعال ابيك بشغله
رجع لابوه بعجله واضحه /سم ، ويش بغيت
ابوسيف /بلاك كذيه عجل .. تو الغدى ،ولا عندك شي
سعود /لايابوي انا ابي اعود لبيتي ، بس امرني ويش بغيت
ابوسيف ابتسم /اييه ، اجل الليلة ببيتك ههههههه .. على خير ان شاءلله مير اليوم مر لابو لافي بعد العصر .. لك عنده امانه قدك تنطرها
سعود استغرب / عساه خير .. يالله ودعتك الله
وصل البيت ونهله مالها صوت والبيت هادي .. مغير صوت النار وهي تنهش الحطب .. وقدر الغدى فوقه ولجل يضل ساخن
تنهد وشال عمامته وفروته .. غرس يده وسط خصل شعره .. ومسكر عيونه .. ويشم ريحة طيب ومسك يفووح ماهو مثل العاده
فتح عينه وشعرها المنثور على متونها ونحرها يحيطه ذهبٍ مالبسه غيرها .. ولا شك بحرّ الدم في نحرها من ريحة المسك الفواحه ..
ولا ريب بأن الاماني عنده تحاوط نحرها وتسلل بخصل شعرها الراهيه .. والود وده يقول لها
اقربي يابنية .. هوني علي السقم والوله .. لعنبو الحب هذي سواته ولا له عندي ماضي ولا دين .. اقربي خلي الكبر
نهله والخجل ياكلها من عيونه اللي اول مره تشعر بعمقها ولا تبيّن .. /انت جـ جيت
"سكتت شوي على غباء سؤالها وصمت سعود اللي ماسمعها " /الحين اجيب الغدى
تأكد من هالشعور اللي به وتنهد بقل حيله وكنه يستسلم بمعركة مابينه وبينه وهو المهزوم فيها /ياويل حالك ياسعود
جابت الغدا وهي بكامل زينتها وريحتها الطيبه وعيونه مانزلت عنها .. تغدوا وهو ساكت طول الوقت وهذا اللي وترها
سوت الشاهي وشرب معها وهو يقصد بهرجه البدوي وبينهم مركى .. انسدح فجأة وغطى عيونه بالغتره /يانهيل
ارتعش جسدها وردت بهمس/نعم
كان متوقع منها .. لبيه .. سم . امر .. مسم يدها وحطها على جبينه وبمزح /همزي راسي تراني تعيبان .. يرضيش يانهيل
ارتخت اعصابه من لامست اطراف اصابعها جبينه وثواني .. وغط بنوم عميق
ونهله تطالعه وتحاول تهرب عن النظر له وكنه يراقبها .. مير شدها ملامحه الرجوليه .. به من عايشة
رموشه وخشمه وحتى رسمة حواجبه .. صدت بسرعه ووجهها يكتسيه الحيا
-
عند ابوراجح .. كان ساكت طوال الوقت .. وحاتم ومصعب وعزام حاسين به وهم يتغدون ماقال شي ماهو مثل العاده
ووجهه ضايق ..
تكلم حاتم بمزوح / يايبه .. بلاك كذيه ساج .. ولا الحب لعب بك ياششيخ
لف عليه يلطف جوهم /ايه يابوي ذبحي الحب .. قايلين لك حاتم ولد راجح
ضحك عزام ومصعب بضحكه/ليتك ساكت ياخوي
حاتم ضحك وهو يدري ان به شيٍ يخفيه
-
اذن العصر وشبت البخور والعود وطلعت وهذا حاله .. نايم
دنقت له تهزه/سعود .. سعود .. ياسعود اذن العصر
صحصح من هزها وقام يتوضى وطلع وهذا البخور قباله بيدها تزيده جمر /اييه عطيني لاهنتي
لفت عليه والماء يقطر منه من الوضوء .. نزلت عيونها ومسكت بشته المعتاد له ولهل القبيله كلها .. وجلست وعينه عيت تفارقها
نهله تكلمت تبي العلم اللي براسها /على وين عقب العصر
سعود //اباصل رجال عنده لي امانه
فتحت عيونها وردت ببرود /امانه .. رايحٍ لأبولافي
سعود استغزب /اي بالله هو ، بغيتي شي
نهله رجعت عينها وسط عينه ولا توجس روحها /ويش لك عنده .. ايه انا مشغوله العصر  ابيك عندي
ابتسم ودنى لها وكنه يبي هالفرصه /سمي.. على ويش تامرين؟ عيني تفداش
لازالت عيونها عليه/ كذووب!!
سعود رمش بخفه والله عليم باللي بقلبه /يشهد علي الله
نزلت عيونها عن عيونه .. وضحك سعود /تبيني اجلس مااروح اوصي حدى الصبيه ينوبون عني .. نهله تطمنت ../لاخلاص حافظك الله
ابتسم لها ومزاجه عالي العاال.
-
بعد المغرب قابل حاتم امه .. بعد ماسلم عليها /يايمه ماتدرين بلا ابوي كذيه .. يهوجس والى من نشدته قال خير خير ..ابتس شوفي العلم بعيونش هاه وش العلم ؟
ام حاتم سكتت متردده وبعد تفكير ان حاتم مرده بيدري /يابوي ياحاتم .. الليلة المداويه راحت لعايشة تشوف بلاها
حاتم /ايه خابر .. ظنوا انها حامل ولا كتبه الله
ام حاتم /المداويه مرت علي .. تقول ان عايشة ظنها ....
عقد حواجبه ودكت صدره الضيقه /ويش !
‏عيا لايصدق .. يبي يروح ينشدها بس امه منعته لان عايشة مادرت ولاقالوا لها
سكر عيونه وهرج امه لازال يرن باذنه "يامي المداويه تقول ظنها ان عايشة ماتجيب عيال" .. ان بها شي ماتدري وشهو ..
جالس بآخر هالليل على راس الجبل المكان المعتاد .. ياما تخيلها تشيل ولدها منه وتلاعبه .. ويجيب منها قبيلة .. اثر القدر الى من عطى .. بيعرف ياخذ !
اخذ مني اغلى ماتمنيته ....
تنهد بحزن عقب ماكان واقفٍ بشموخ الجبل ، طاح طيحة حصان ..وكود طيحته
عايشة اذا مادرت اليوم .. تدري باكر
لزوم اخذها باكر نرد البلاد قبل ماياصل الهرج للعرب ، وهرج العرب مايرحم .. خوفي يوذونها بالحكي
سمع صوت خطاوي .. ولف وهذا عزام .. والمبسم على محيّاه
جلس عنده وعاين وجهه اللي الاعمى يدري به شيٍ محزنه/افا يذالعلم العلم وشبلاك ياخوي
حاتم تنهد وعينه على السماء/اييه ياعزام .. يقولون ان ربي ماكاتب لي مع عايشة ضنى
سكت عزام مصدوم /وش ذالهرج .. انت متوكد ياحاتم .. من يقوله
حط غترته على وجهه وحر عيونه يوجسه/المداويه يوم زارتها .. تقول ان عايشة مريضه
عزام .. مايدري ويش اللي يقوله/ياخوي المداويه ماهي تعلم الغيب .. خذ عايشة ورح بها البلاد يشوفون بلاها
حاتم/هذذا اللي اقوله
عزام قبل راسه /هونها تهون ياخوي
-
هبت عليها هبوب الوله والشوق .. اللي بكل ليلة تزورها
النفس غصبن عليها تبيكم ..
ريحتكم عند خشمي ماتزول
كانت دمعتها على وشك تحدّر وسمعت خطاه وصدت
سعود /السلام عليكم
همست بصوت ماينسمع/وعليكم السلام
لف عليها يوم ماسمع صوت/نهله!
لفت عليه ويكستي عينها الكبر .. صدت عنه وقامت مرقادها .. ووقفت قبال المرايه
دخل عليها بركاده/ويش بلاش .. من مزعل هالعيون
نهله صدت للدولاب /ابي البس لجل انام
سكر عيونه بطولة بال ومسك يدها /وش يعني ذا كله؟
نهله عقدت حواجبها من مسكته /وووش!!
سعود /الصبح الكلام الزين والاسلوب ومن يرد لش عقلش يتغير كل شي .. وش اسمي هذا؟
نهله نفضت يدها منه وصرخت والقهر يكويها من مجلسٍ  عند ام سيف من شوي/ وش تبيني اسوي معك دام الحريم مالهم سيره غيرك
سعود ابتسم /وش يقولون
نهله وعيونها بعيونه /قبل اقولك انهن يطرّن لي طاري عرسك ابي ابارك لك م.. تجمد دم شرايينها  وهو يطبع قبله بأعلى شفاهها
حد الكتمان .. يولد الشعور المجنون .. لذة الشعور ماتنوصف ..ووقتها ولو تأخر جميل
مرحلة الاكتفاء من الم الششعور
غرس يده بأكملها وسط شعرها وكل خليه بجسدها ترتعش .. لمها وسط صدره وضحك ولاهوب اقل منها /هو انتي تغارين علي وانتي ماتدانيني
نهله سندت راسها على كتفه /ايه مادانيك
سكر عيونه واخذ نفس يهدي رجفة قليبه اللي اوجستها زينه ورفعت راسها له/ بلا قليبك كذيه قدك جاي وانت تركض ؟!
سعود /انشديه .. انا معش مدري ويش بلاه .. اما عن قلبي هو انا كل ليله اركض مير عمري راح وقد الشيب ملى دقني وشنبي ..ماعاد بي حيل يانهيل
نهله تطالعه /وهرج النسا .. اللي خذا عقلي
سعود ضحك/كانهن خذن عقلش من زمان .. عافاهن ربي
نهله عقدت حواجبها وفكت يدينه عنها ..سحبها بضحكه/ابتس انتي مخبوله؟النسا لوهنّ منكا يغارن ماقالت هالهرج .. ومن اللي تبيني والشيب ملاني
طالت عيونها بعيونه .. لامس باطراف اصابعها دقنه وبهمس /ايه .. زين "وشدته لمعة عيونها الاقرب للدموع" توه حلى الشيب بعيني عقب لحية ابوي
ابتسم وشامته تبين تحت شنبه وضمها له زود
-
مرت يومين وحاتم ماراح لعايشة بعد مافتح موضوع روحته للبلاد معها لابوعقاب ورفض بسبب خوفه على عايشه .. وحاتم ماطب بيتهم لخوفه ان الحقيقه تبان عندها ويزيدة وجعها ..مادرى ان عايشه وصلها الخبر .. وحزنها ماهو اقل من حزنه ..
-
ام عايشة دخلت عليها /قومي ياميّ  تتعبين نفسش زود .. قومي يابعدي الحريم عندنا الليله قومي تلبسي الحزن ماهو لك .. قومي لعل حاتم يجي تبينه يشوفش كذيه
قامت تسبحت ولبست ثم كحلت عينها .. ووجعها يزيد وكبدها ماودها بحد مير لجل الهرج مايظهر
-
زينه مرت ام حاتم وسهام لغرض وقابلت حاتم .. وهي واقفه مع عزام
تكلمت وهي تطالع حاتم طالع من الخيمه توه صاحي /صبحك ربي بالخير
اثاري عايشة ماهيب اقل من حالك .."وجّه عيونه لزينه وقلبه يتآكل من الوله عليها وده ينشدها عن حالها .. مير انه خابره" زينه كملت هرجها /وينك عنها والتعب ياكلها
سكر عيونه وعبرته باحت/وشلونها هي
زينه /تبي تعرف لونها .. تدل بيتتها .. ودعتك الله ياعزام
.
.
لا تفزّز وحشتي خلها تنام
الحزن أحيان يحتاج لـ هدوء

للغياب اللي أكل وجهي سلام
ما درا إنّه عن العالم لجوء
.
.