طلب فاروق اجتماع عاجل مع الجميع لمناقشة خطة الأعمال وكان لديه أفكار جديدة لطرحها عليهم , أخبرته السكرتيرة بأن الجميع في حجرة الاجتماعات فأعد أوراقه ودخل وقال: أهلا بيكم جميعا , طبعا عمى أدهم قبل ما يسافر قالكم بأنى هاكون المدير في فترة غيابه وأتمنى إننا نعمل شغل حلو مع بعض. نبدأ بقى , أنا قدامى دلوقتى قايمة فيها كل الحملات الإعلانية الجاهزة للعرض على العميل والحقيقة لفت نظرى شيء مهم ان فيه أشخاص واخدة أكتر من حقها ومعاها أكتر من حملة إعلانية وأنا أفضل إن كل واحد يكون مسؤول عن حملة واحدة بس علشان التركيز وبالتالي الشغل يتوزع على الجميع.
وردة: أيوه يا أستاذ فاروق لكن أدهم بيه وافق على الحملات و.....
قاطعها فاروق بحدة وقال: من فضلك مش عايز مقاطعة.
أحست وردة بالإحراج وإبتسمت مها بإنتصار ومالت نسمة على وردة وهمست: واضح إن مها وعلى عملو شغل ضدك.
نظرت وردة لمها وابتسمت حتى لا تجعلها تشعر بالإنتصار ولكنها كانت غاضبة جدا , إنتهى الاجتماع ونهض الجميع ليتوجه لمكانه.
كانت وردة تشعر بالغضب من رد فاروق عليها بهذه الطريقة أمام زملائها وقالت نسمة: مها بدأت حربها ضدك مع فاروق.
يبقى غبى لو سلم ودانه ليهم.
شكله كده والله من طريقته في التعامل معاكى إنتى بالذات مع إنى متأكده إن أدهم بيه قال له إنك أهم واحدة هنا.
الله أعلم مها وعلى قالو عنى إيه؟
دول توقعى منهم أي حاجة.
عموما مش مهم إحنا كل اللى بينا شغل وبس و.....
ودخلت مها فجأة وهى تقول: وردة هاتى ورق الحملة الإعلانية بتاعة غالب بيه؟
عايزاها ليه؟
فاروق بيه أصدر أوامره بإنى أنا اللى هامسكها.
أفندم !! إنتى اللى تمسكيها ؟ ليه؟
هو قال كفاية عليكى حملة واحدة بس.
والله !! هو قال كده؟ طيب!!
خرجت وردة غاضبة من حجرتها ودخلت حجرة أدهم بيه وخلفها مها وقالت: ممكن أعرف إيه معنى الأوامر الجديدة دى؟
تأملها فاروق ببرود وقال: محدش علمك تخبطى على الباب قبل ما تدخلى
جاوب على سؤالى يعنى إيه تسحب منى خطة إعلانية إشتغلت عليها أسابيع وتديها لغيرى؟
عادى أنا قلت في الاجتماع إنه بعد كده كل واحد هايشتغل في حملة واحدة وإنتى معاكى 3 حملات يعنى هآخد منك 2 وإلا أنتى تشتغلى وغيرك قاعد يتفرج
أنت تقرأ
لأنها أنت مسابقة M.A
Romanceهذه الرواية تم نشرها فى كتاب فى معرض القاهرة الدولى للكتاب 2023 من الخطأ أن يحكم الإنسان على الآخرين من المظهر والشكل فقط فربما تحت الشكل شيء آخر والمظهر لا يجعلك تعرف حقيقة الشخص فكثير من الناس يبدو شكلهم جميل...
