كانت دهشة وردة كبيرة فهذا الواقف أمامها الآن هو نفسه الشاب الذى أغرقته بالطين ,بالرغم من أنه أخذ حماما و بدل ملابسه وبدا نظيفا إلا أنها عرفته فورا ,إختفت إبتسامتها على الفور و مدت يدها بتوتر ونهض فاروق وهو يتأملها بغضب ورسم إبتسامة صفراء وهو يصافحها ويضغط على يدها وقال: أهلا آنسة وردة تشرفت جدا.
ضغط على يدها لدرجة شعرت معها بأنه يريد أن يكسر لها يدها وقالت: الشرف لى أنا يا أستاذ فاروق.
أدهم: أقعدى ياوردة , فاروق هو اللى هايتولى إدارة المكتب في غيابى.
أتسعت عينا وردة وقالت: والله !! دى فرصة سعيدة جدا.
إنتى عارفة إن علاجى ممكن يطول وهو كفؤ جدا وهاتقدرو تتفاهمو مع بعض . فاروق كمان نشيط زيك وذكى جدا وعنده أفكار تفيد الشركة وأرجو إنكم تتعاونو مع بعض.
فاروق: إن شاء الله ياعمى .
فاروق ها يكون هنا في مكتبى وأنا هاديله كل الصلاحيات .
إبتسمت وردة بتوتر وهى تتأمل المدير الجديد, كان شابا وسيما وله نظرة حادة جدا لم تعجبها ويبدو واثقا من نفسه جدا , كان هو الآخر يتفحصها ورأت إبتسامة ساخرة على شفتيه وتذكرت ماقال فرفعت رأسها بثقة وإبتسمت وسمعت أدهم بيه يقول: عملتى إيه في حملة إعلانات شركة البسكويت.
وضعت وردة الأوراق أمام أدهم بيه وبدأت تشرح له , كانت تشعر بنظرات فاروق تخترقها ولكنها تماسكت وبعد أن انتهت قال أدهم: عظيم ياوردة, عظيم جدا عمرك ماخيبتى ظنى.
أشكرك يا أدهم بيه؟
دلوقتى بقى خدى فاروق وعرفيه على باقى الموظفين.
لم تستطيع وردة أن تعترض على كلام أدهم بيه فقالت: إتفضل يا أستاذ فاروق.
نهض فاروق وقال بأدب: بعد إذنك ياعمى.
إتفضلو.
خرج فاروق مع وردة وقال: إسمك وردة !!
أيوه إسمى وردة فيه مانع؟
كان لازم يسموكى باقة ورد بالحجم ده.
بالرغم من أنه قال جملته بصوت خفيض إلا ان وردة سمعته ورمقته بنظرة نارية وقالت: يظهر إن الطين الصبح دخل بوقك يا أستاذ فاروق.
بتقولى إيه؟
أظن سمعتنى كويس ياريت تبقى تتعلم إزاى تكلم الناس وتانى مرة مش هاسمح لك تعلق على شكلى أو وزنى مفهوم.
نظر لها بإستهزاء وقال : معلش أصل الموضوع وااضح جدا ولازم أعلق.
ردى المرة الجاية مش هايعجبك أبدا يافاروق بيه أنا اتعودت إنى أواجه أمثالك من الناس التافهه اللى بتحكم على المظهر وصدقنى لو قلت لك رأيى في مظهرك مش هايعجبك أبدا.
أنت تقرأ
لأنها أنت مسابقة M.A
Romanceهذه الرواية تم نشرها فى كتاب فى معرض القاهرة الدولى للكتاب 2023 من الخطأ أن يحكم الإنسان على الآخرين من المظهر والشكل فقط فربما تحت الشكل شيء آخر والمظهر لا يجعلك تعرف حقيقة الشخص فكثير من الناس يبدو شكلهم جميل...
