في مكتبها سرحت وردة بأفكارها في البلورة والصور لم تستطيع ان تنسى الكلام المكتوب لأنه لمس قلبها فعلا ,وأيضا لأنها بدات تقتنع بأن فاروق فعلا أتفق على الرهان وبعدها بدل رأيه , دق الباب ودخلت نسمة تقول: وردة فيه حد عايز يشوفك.
مين؟
ظهرت رحمة على الباب و قالت: أنا ياوردة ياترى هاتسمحى لى أدخل وإلا ...
وقفت وردة فورا وإقتربت من رحمة وهى تقول: إيه اللى بتقوليه ده ياطنط؟ طبعا إتفضلى.
دخلت رحمة وقالت وردة: هاتى قهوة يا نسمة لو سمحتى.
لأ مفيش داعى انا مش هافضل كتير.
خرجت نسمة وأغلقت الباب و جلست رحمة على الأريكة وقالت: تعالى يا وردة اقعدى جنبى.
جلست وردة بجوارها فأكملت: انا عايزة أتكلم معاكى شوية لو معندكيش مانع؟
لأ ياطنط إتفضلى
أنا مش جاية علشان أدافع عن إبنى يا وردة لأن غلطته في حقك كبيرة قوى بس عايزاكى تعرفى حاجة واحدة إن فاروق بيحبك , أنا متاكده من مشاعره , أنا بهدلته وخاصمته مدة طويلة بس أنا أم ومقدرتش أفضل غضبانة عليه وأنا شايفاه بيدبل قدامى من الحزن , هو حكى لى كل شيء وأرجو إنك تسمحى لى أشرح اللى معرفش يقوله , فاروق لما جه الشركة هنا إنتى وقفتى قصاده وإتحدتيه وحس إنه علشان يثبت شخصيته قدام الموظفين إنه يسيطر عليكى إنت لأنك كنتى أقوى واحدة هنا.
أرتعش وجه وردة وهى تتذكر فأكملت رحمة قائلة : لكن هو حلف لى بأنه من أول مرة أتكلم معاكى فيها غير رأيه وبدأ يتشد لك وإعجابه إتحول لحب كبير قوى بس هم ضغطو عليه وكانو بيهددوه .
كان لازم يحكى لى ياطنط بدل مايخبى على.
هي دى الغلطة التانية لأنه كان لازم يقول لك من الأول , وهو حاول أكثر من مرة بس كان خايف , كان عامل حساب اللى بيحصل دلوقتى, يابنتى كلنا بنغلط ,أنا مش هاقول لك إرجعى له لأن ده شيء يرجع لك إنتى , أنا بس عايزاكى تسامحيه.
أسامحه!!
أيوه لو سامحتيه هاتريحيه قبل مايسافر.
يسافر فين؟
كلم الشركة اللى كان بيشتغل فيها في الإمارات وهايجدد عقده معاهم , معدش قادر يقعد هنا خلاص.
أحست وردة بالألم يعتصر قلبها وسكتت وهى تفكر فأمسكت رحمة يديها وقالت برجاء: وردة أنا دلوقتى بأكلمك كأم عايزة تريح إبنها , فاروق مطلبش منى آجى لك ولا يعرف بإنى هآجى , انا قلبى اتقطع عليه لما شفته بيبكى في اوضته وهو ماسك صورتك
إيه ! فاروق بيبكى !!
أيوه يا وردة , اول مرة فاروق يبكى بعد وفاة والده وده معناه إنه بيحبك بجد , ها تسامحيه يا وردة؟ لو لى خاطر عندك كلميه وقولى له إنك مسامحاه وإسمحى له يودعك ويشوفك لآخر مرة وانا عمرى ماهنسى لك الجميل ده.
أنت تقرأ
لأنها أنت مسابقة M.A
Romansaهذه الرواية تم نشرها فى كتاب فى معرض القاهرة الدولى للكتاب 2023 من الخطأ أن يحكم الإنسان على الآخرين من المظهر والشكل فقط فربما تحت الشكل شيء آخر والمظهر لا يجعلك تعرف حقيقة الشخص فكثير من الناس يبدو شكلهم جميل...
