طبعا بعد تفكير ندمت وردة على موافقتها لحضور الحفل و لأنها سنصبح سخرية الجميع وقالت أختها: وتندمى ليه ؟ دى حفلة مهمة ولازم تحضريها وبعدين الراجل اترجاكى هاتكسفيه يعنى؟
بسنت مش عايزة هزار.
أنا بأتكلم جد, ليه مش عايزة تحضرى؟
يعنى مش عارفة!! كل الستات والبنات هايبقو في منتهى الرشاقة والجمال ولابسين فساتين شيك هاروح أنا بقى لابسة إيه؟
فستان طبعا وفستان أشيك بكتير.
إزاى؟
زى الناس مش معاكى فلوس؟
معايا طبعا .
حلو ها ننزل دلوقتى حالا نشترى فستان جديد.
وهو معقول هلاقى فستان مناسب
وردة مش هاسيبك غير لما تقومى معايا
أكيد مش هالاقى و.....
جذبتها بسنت من يدها وهى تقول: قلت لك قومى معايا حالا ننزل نشترى فستان
لم تترك بسنت أختها إلا بعد أن نزلت معها لتشترى فستان جديد لحفل وأخذتها للعديد من المحلات وأخيرا إشترت فستان جميل وعندما عادت كانت راضية عن إختياره كانت تخشى من نظرات الناس ولكنها فى نفس الوقت تريد أن تكون مع فاروق؟
إستعد فاروق للذهاب للحفل ودخلت رحمة: ماشاء الله إيه الوسامة دى كلها.
صحيح ياماما !!
المراية تقولك, إنما إيه الاهتمام ده كله بالحفلة دى؟
حفلة مهمة قوى للشركة ياماما.
ومين هايبقى هناك؟
كل الموظفين هايكونو هناك.
ووردتى هاتحضر ؟؟؟؟
أيوه أنا أتفقت معاها إنى هاعدى عليها ونروح مع بعض.
وقفت رحمة أمام فاروق تظبط له رابطة العنق وهى تقول: آه علشان كده مهتم قوى بمظهرك.
أرتبك فاروق وقال: لأ ده اهتمام عادى يعنى
ده إهتمام أكتر من العادى ,
أنا هاتأخر إبقى نامى إنت معايا المفتاح.
خرج من حجرته وهى خلفه ونادته قبل أن يخرج وقالت: إشترى لها ورد وإنت رايح.
ورد,, إشمعنى!
الورد للورد ,, وردتين تلاتة كده باقة صغيرة يعنى.
حاضر ياماما.
خرج فاروق فابتسمت رحمة وهى تقول: ياترى امتى هاتعترف بأنك بتحبها؟
أنت تقرأ
لأنها أنت مسابقة M.A
Romanceهذه الرواية تم نشرها فى كتاب فى معرض القاهرة الدولى للكتاب 2023 من الخطأ أن يحكم الإنسان على الآخرين من المظهر والشكل فقط فربما تحت الشكل شيء آخر والمظهر لا يجعلك تعرف حقيقة الشخص فكثير من الناس يبدو شكلهم جميل...
