في مهب الريح الجزء الثاني

1

مبدئيا كده.. الروايه لسه قيد الكتابه.. أول م ح تنزل الكاتبه ح أنزله هنا...
اما ثانياً ف الجزء الأول من الروايه دي موجوده في الحساب في حال م لقيتوها..
و م تنسوا تدعمونا بالفويت بيشجعنا نكمل!!
ويلا استودعتكم الله
_______________________________
#في_مهب_الريح21
#الجزء الثاني
بقلم : مها حولي الزاكي

بعدها علاقتي بأستاذ أحمد إتوترت شديد ، بقى ما بتكلم معاي ولا بعاين لي و في الحصه بتجاهلني و بحسسني كأني ما موجوده ، الحاجه دي كانت مضايقاني شديد و زاعجاني ، أنا بحترم كل المعلمين و بحبهم و أكترهم أستاذ أحمد هو بالنسبه لي أفضل أستاذ و مكانتو ما زي مكانة باقي المعلمين ، هو أقربهم لي عشان كدا الجفا الحصل بيني و بينو زعلني شديد و جهجه أفكاري ، حتى ناس البيت و أواب لاحظوا الحاجه دي ، أواب كان لمن يسألني مالك كنت بقول ليهو انو دا كلو بسبب تالته ، يوم كان عندنا حصه مع أستاذ أحمد ، أثناء ما هو بشرح أنا كنت بعاين ليهو ساي و منتظره متين يعاين لي أو يعبرني ، فجأه جدع الطباشيره في بت و قال ليها سرحانه وين انتي من قبيل ؟؟ قالت ليهو لا ما سرحانه ، قال ليها يعني أنا ما بشوف ؟؟
خت الكتاب و قال بالمناسبه يا تالته نُصكم قاعدين يسرحوا أثناء الحصه و بالهم بكون في حته تانيه خالص و أنا عارف كويس الشاغل بالكم شنو 😊
أساساً انتوا شنو البخليكم تباروا القصص و الحاجات الفارغه  دي !؟ الوحده لو ركزت في قرايتها مش أفضل ليها من الأوهام المعيشه روحها فيها دي ؟! و بعدين المصاحبك البتكلم معاك  دا و العامل فيها حبيبك و شنو ما بعرف أنا متأكد إنو ما برضى حاجه زي دي  لأختو ، لو انتي بالجد بتهميهو و ما شايفك لعبه أو تسليه كان عمل خطوه جاده أو على الأقل ما كان ح يسمح لنفسو انو يطلع و ينزل معاك من دون ما يكون في حاجه رسميه أو علنيه بيناتكم ، انتي بالنسبه ليهو لعبه ح يتسلى بيك و لمن يلقى غيرك ح يرميك طوالي و.....لين قاطعتو و قالت ليهو هسي يا أستاذ احتمال هي سرحانه و بتفكر في حاجه تانيه ! يعني ما أي بت زعلانه أو سرحانه معناها بتحب !! قال ليها الحاجات دي أنا بعرفها كويس يا أستاذه لين ، قالت ليهو انت ما بتعلم الغيب يا أستاذ ، قال ليها الغيب بيعلمو رب العالمين و أنا كلامي ما كان معاك انتي عشان تتكلمي ولا مخصص ليها هي  ، كنت بتكلم بصوره عامه ، البت الكانت سرحانه قالت ليهو آسفه يا أستاذ ما ح تتكرر تاني ، قال ليها أنا والله ما عايزكم تتغشوا ساي و تضيعوا نفسكم و تجروا ورا أوهام ، قالت ليهو لا ماف كلام زي دا ، قال ليها أتمنى ذلك ، طبعاً لين زعلت شديد لأنو أحرجها....
الموضوع دا إتقفل و أستاذ أحمد رجع يشرح عادي بس انا لسه كنت بفكر في الموضوع لأني حسيت إنو قاصدني بالكلام دا ، قلبي وجعني شديد و مزاجي إتعكر زياده ، تكلت راسي في الكنبه و بديت افكر في الحاصل دا كلو ، و أنا بفكر كدا اتذكرت انو يوم من الأيام أستاذ أحمد دا كان قريب شديد لقلبي ، أو كنت بحبو عديل ! ما عارفه كان حب ولا إعجاب المهم الحاجه دي هسي بقت ما موجوده و هو بقى بالنسبه لي مجرد أستاذ بس ليهو مكانه ما زي مكانة باقي المعلمين لكن من دون أي حاجه تانيه ، ما عارفه متين حبي أو إعجابي بيهو زال !! ما إنتبهت للحاجه دي خالص إلا هسي !! بقيت ما بفكر فيهو و ما بخطر على بالي زي زمان لمن كنت مهوسه بيهو! يمكن عشان أواب عجبني أكتر منو! .....
و أنا غرقانه في التفكير سمعت صوت ضربه قويه على الكنبه ، رفعت راسي مخلوعه ، لقيت أستاذ أحمد واقف قدامي ، قال لي ما سمعتيني قبل شويه قلت  شنو ولا بس تحدي !؟ لو ما عاجباك الحصه دي طوالي تتفضلي  تطلعي برا ...
ملامحو الجاده و نبرتو الحاده زعلتني شديد و دموعي قربت تنزل بس منعتها على طول وقفت على حيلي و اتحركت و طلعت برا ....
مشيت قعدت ورا الفصول و بكيت قدرتي ، بعدها بقيت اتحاشى التعامل مع أستاذ أحمد ، بقيت قاصده ما بركز في حصصو و بحسسو كأنو ما موجود زي ما هو عمل معاي ، و لمن يقول اكتبوا التمرين و أجمعوا الكراسات لا بكتب لا بجمع ، بسببو أنا أهملت مادة الفيزياء دي شديد ، يوم جانا داخل و هو شايل الكراسات ، ختاهم و بقى يعد فيهم ، قال لينا إنتوا كم يا تالته ؟؟
لين قالت ليهو 30 بت ، قال طيب ممكن أفهم ليه ديل 19 كراس بس ؟؟
الباقين وين ؟؟
ماف زول رد عليهو....رفع صوتو و قال بتكلم معاكم أنا وين باقي الكراسات؟....في وحده قالت ليهو ما جمعنا ، قال ليها و السبب ؟؟.... بالمناسبه انتي  دي ما أول مره ما تجمعي فيها ، المهتمين و البصححوا أول بأول بتعدوا بأصابع اليد ! أي وحده ما جمعت تقيف على حيلها ، قمنا 9 بنات عشان في تلاته غايبين ، سألهم وحده وحده ليه ما جمعوا و أنا علي ما إتلفت يعني كأني ما واقفه ، شاكلنا قدرتو و قال لينا التمرين دا يتكتب 5 مرات و بكرا كراساتكم دي تكون في مكتبي و الغايبين ديل كلموهم و تاني ماف أي تساهل ، لمن قعدنا أنا قلبي دا حسيتو مثقوب ، زعلت زعل شديد لأنو اتجاهلني ، تصرفاتو كانت مؤثره علي شديد لدرجة إنو دموعي قربت تنزل ، المهم لمن رجعت البيت رغد قالت لي نحنا بعد شويه ماشين لناس خالتو خنساء تمشي معانا ؟؟
قلت ليها آي انتظروني ، جهزت نفسي و مشينا نحنا التلاته بس لأنو ياسر قال ما ماشي و طلع الشارع ، قفلنا البيت و قلت ليهو لمن تتم لعبك تعال لينا في بيت ناس خالتو خنساء ، المهم طلعنا و أنا ماشه بإستعجال شديد ، عايزا متين أصل بيت ناس خالتو خنساء عشان أشوف أواب مع اني شفتو قبل يومين بس برضو عايزا أشوفو تاني و تالت و رابع.....رغد قالت لي هسي لو كان ركبنا ركشه مش أحسن ! قلت ليها هوووس المسافه البنمشيها  للمدرسه أبعد من دي ، المهم لمن وصلنا البيت لقينا أمجد في الشارع بسقي في الشجر ، رغد قالت ليهو عاطل كالعاده ، وجه الخرطوش عليها و رشاها بالمويه ، انخلعت طبعاً ! بقت كلها عباره عن مويه ! قالت ليهو دا شنو دا يا حيوااااان ! قلت ليها رغد عيب !
طوالي نزلت تحت و خمشت ليها تراب و رشتو بيهو و هو كان لسه برش فيها ، قلت لـ براءه ديل ما عندهم موضوع أرح ندخل نخليهم ، دخلنا و جري لخالتو خنساء ، ضمتنا عليها شديد و باستنا ، قالت لينا رغد و ياسر وين ؟
قلت ليها ياسر ما جا معانا و رغد برا بتتشاكل مع أمجد ، قالت لي أجي ! أمجد مالو معاها ! براءه حكت ليها الحصل ، ضحكت و قالت الإتنين ديل لو ما إتشاكلوا ما برتاحوا ،......خالتو خنساء مشت عشان تعمل لينا عصير و أنا بقيت أتلفت يمين و شمال بفتش على أواب ، طلعت تلفوني و رسلت ليهو في الواتس : أواب انت في بيتكم ولا وين ؟؟
ما كان فاتح الشبكه ، قلت أف ياخ ، فكرت أتصل عليهو بس براءه كانت قاعده جنبي و خالتو خنساء ذاتا جات ، أدتنا العصير و قعدت تونس فينا ، رغد جات داخله و هي زعلانه شديد ، قالت لخالتو خنساء شوفي أمجد رشاني بالمويه كيف ، من قبيل واقفه في الشمس عشان ملابسي يجفوا 😭😭😭خالتو خنساء قالت ليها خليهو يصبر لي أصلي ما بريحو ليك ، امشي المطبخ أشربي عصيرك و تعالي و أمجد يصبر لي بس ، بعد مسافه جات بت صغيره كدا و قالت لخالتو خنساء أمي قالت ليك تعالي ، قالت ليها سمح هسي بجيها ، بعد مشت خالتو خنساء قالت لينا دي بت جيرانا الليله عندهم حنة بتهم و ليهم كم يوم بجهزوا في حاجات العرس ، كدي النمشي أديهم طله و أجي ، قلنا ليها طيب ، قالت لينا لو جوعتوا خشوا المطبخ طوالي ، مشت و ساقت براءه معاها لأنها قالت ماشه معاها ، بقيت قاعده براي و رغد طلعت من المطبخ و مشت الحوش عشان تقيف في الشمس ، فتحت الواتس لقيت رساله من أواب ، قال لي لا أنا برا البيت ، زعلت شديد ، قلت ليهو طيب بتجي متين ؟؟
قال لي ما ح أجي اليوم ، ح أبيت برا ....حسيت نفسي كتم ، اتضايقت ضيق ما عادي ، قال لي جيتوا البيت ولا شنو ؟
قريت رسالتو بس ما رديت عليهو ، قفلت الشبكه وانا قلبي واجعني شديد ، الريموت كان جنبي شلتو و بقيت اقلب بزهج في القنوات لحد ما فجأه جاني صوت بقول بااااس باااااس خلي القناة دي !!
طبعاً دا كان صوت أواب ، وقفت على حيلي و إتلفت وراي و شفتو نازل من السلم ، عيوني بقت قلوب قلوب و حسيت السعاده جاريه في شراييني ، قلت ليهو أواااااب يعني كنت انت قاعد ؟؟ بتكذب علي ليه طيب ؟
وصلني و قال لي كنت عايز أشوف ردة فعلك شنو يا شافعه يا زعيله ، قلت ليهو منو القال ليك زعلت و ذاتو أزعل عشان شنو ؟
قال لي ماف زول قال لي ، أساساً واضح إنك كنتِ زعلانه و هسي لمن شفتيني زعلك كلو إتبخر ، قلت ليهو ههه قال قال !!! أفرح ليه شفت خزنه ولا عربيه آخر مودل ؟
ضحك و قال لي بهظر معاك ، المهم أنا طالع لمن أمي تجي كلميها اني طلعت ، قلت ليهو بخلعه طالع ماشي وين ؟
رفع حاجبو و قال لي عندي زولتي ماشي أقابلها ، لويت خشمي و قلت ليهو ما عندك موضوع بس ، قال لي عشان كدا ماشي أعمل لي موضوع لأني من دونها بحس بفراغ و بإنو ماف مواضيع ....
بعد كلامو دا حسيت بنار جواي و جد جد في اللحظات ديك صدقت كلامو ، حسيت بوخزه في قلبي ، قلت معناها ما كان بحبني ، قلبي حسيتو انكسر و عيوني إتملت دموع و للأسف ما قدرت أخفيها ، طبعاً هو في البدايه كان بعاين لي جوه عيوني و هو مبتسم إبتسامه مستفزه بس إبتسامتو دي إتلاشت لمن دموعي نزلت ، قال لي دقيقه دقيقه في شنو !!؟ ما رديت عليهو ، قال لي بالجد الببكي شنو يعني قلت حاجه غلط أنا ؟؟
قلت ليهو بس أسكت مني ، ضحك و قال لي والله العظيم كنت بكذب عليك ، لا ماشي اشوف وحده لا عندي زوله ، قلت ليهو ما بصدقك تاني و ذاتو أنا ما ببكي بسبب كلامك ، اتحرك خطوتين علي و قال لي شااااافعه كذابه ، المهم أنا قاعد هنا و ما ماشي مكان ، أمسحي دموعك دي و إلا ح أمشي من هنا و أخليك تبكي ل بكرا ، مسحت دموعي و لفيت وشي منو ، قعد و هو ميت بالضحك ، عاينت ليهو و لويت خشمي ، قال لي كدي أقعدي عايز أتونس معاك ، قلت ليهو أبيت ، قال لي خلاص مع السلامه ح أمشي ، أول ما وقف على حيلو طوالي قعدت ، قعد و لسه بضحك ! قال لي ها أخبارك شنو ؟؟ قلت ليهو ماف شي...
قال لي كيف يعني ماف ، طيب كيف عامله مع المدرسه ؟
لمن جاب لي سيرة المدرسه طوالي إتذكرت أستاذ أحمد ، قلت ليهو تمام ، قال لي ماف شي تاني ؟؟
قلت ليهو لا ماف شي...
اتنهد و قال لي لحد اللحظه ما متأكد أنا بالنسبه ليك شنو بس انا غصباً عن أي شي حاسي إنو من حقي أعرف أي حاجه ليها علاقه بيك ، من حقي أعرف تفاصيل يومك و شنو البحصل فيهو بالضبط ، شنو البضايقك و شنو البفرحك ، حاسي إنو أي حاجه بتخصك أنا لازم أعرفها ...
لمن قال لي كدا قعدت أعاين ليهو بذهول ! بعدها حسيت برجفه غريبه كدا و انو أطرافي بقت بارده و جسمي اقشعر ، قال لي تسمحي لي إني اتدخل في حياتك و أعرف تفاصيلك ؟؟
سكته لأني ما كنت بحاول استوعب البقولو...
قال لي انتي شافعه ساي و ما ح تعرفي تردي على كلامي دا ، المهم انتي بتهميني والله و ما ح أكون مرتاح لو ما عرفت المضايقك شنو لأنو ليك فتره ما على بعضك ، ....الحاصل عليك شنو ممكن أعرف ؟!
ما كنت عايزا أحكي بس بعد إصرار كتير و إلحاح منو ، حكيت ليهو اني زعلانه بسبب معاملة أستاذ أحمد لي ، قلت ليهو انو اتغير و بقى يشاكلني على طول و يتزهج فيني و مرات بتجاهلني و بعمل نفسو ما شايفني.......لمن خلصت قال لي ما فهمت ليه هو اتعامل معاك كدا !؟ يعني القصه دي كلها ما استوعبتها ! في شنو يعني مالو !؟
قلت ليهو نظرتو لي اتغيرت ، بقى شايفني بت ما كويسه عشان كدا اتغير علي ....قال لي كيف يعني بت ما كويسه ! عملتي شنو انتي ؟؟؟
ما رديت عليهو
كان بعاين لي شديد جوه عيوني ، قال لي ما عايزا تقولي لي عملتي شنو ؟؟
هزيت ليهو راسي بمعنى إني ما عايزا اقول...
قال لي هو منو أساساً عشان يصنفك بت كويسه ولا لا ، من وين جايب الحق دا و أصلا هو متدخلك فيك مالو !؟
....يعني للسبب دا انتي كنتي متضايقه؟! دا الكان شاغل بالك ؟
قلت ليهو آي لأنو أستاذ أحمد دا أكتر أستاذ .....قاطعني و قال لي خلاص فهمت إنو أكتر أستاذ مفضل عندك ، أصلا دا السبب الخلاهو يتمادى و يعمل ليك حركات 😊
مها ركزي مع قرايتك بس و ما تشتغلي بأستاذك دا و تاني لو رفع صوتو عليك و عاملك معامله ما كويسه كلميني بس و أنا بعرف أتصرف معاهو كيف ، المهم بعدها إتكلمنا عادي ، طبعاً كنت مبسوطه شديد لأنو قاعد معاي ، شويه كدا رغد جات قالت لي خلينا نمشي بعد دا ، أواب قال ليها ، اهلين يا رغد كيفك ، قالت ليهو تمام ، عاينت لي تاني و قالت لي قومي أرح ، أواب قال ليها وين وين !قالت ليهو البيت ، قال ليها متين جيتوا انتوا عشان تمشوا ؟! قالت ليهو قاعدين من قبيل ، قلت ليها طيب خلينا ننتظر خالتو خنساء لأنو براءه معاها ، قالت لي لا أرح نطلع و نجيب براءه و نمشي ، أواب قال ليها لا أقعدوا اتغدوا ، قالت لي قومي يا مها عشان اتأخرنا..... طبعاً كأنو أواب ما كان بتكلم معاها !
ما عرفت أقول شنو ، طوالي وقفت على حيلي ، أواب قال لي ما تشتغلي بيها رغد دي مجنونه ساي ، قالت لي ماشه ولا لا ؟؟
أواب وقف على حيلو و قال ليها مالك انتي يا بت الناس !! قاعده في بيت ناس غريبه عنك ؟؟! قالت ليهو الزمن أتأخر و نحنا ما متعودين نقعد للوقت دا برا البيت ، قال ليها الساعه ياداب 3 و نص 😊
ما عاينت ليهو ، قالت لي من الآخر ماشه ولا لا ؟؟
أواب هز راسو و قال يخوانا دي بت شنو ! قال ليها رغد يا بت الحلال مالك ياخ ! اقعدوا لسه و أنا بوصلكم البيت !...قلت ليهو رغد شكلها زعلانه لأنو أمجد قبيل رشاها بالمويه و كل ما نجي هنا بتشاكل معاها ، قال ليها بسيطه أمجد أكيد بهظر معاك بس ما قاصد يضايقك لكن ما مشكله ح أكلمو انو يبطل هظار و.....
_ ماشه ولا لا للمره المليون ؟؟

طبعاً رغد حيرتني !
عاينت ل أواب و قلت ليها أرح طيب ، اتضايق شديد طلع قدامنا طوالي ، بعد مشى قلت ليها ماف داعي للحركات البايخه دي يا رغد ، مالك بتتكلمي معاهو كدا ؟!
قالت لي لأنو غياظ و لايوق و كريه و أنا ما بطيقو
استغربت بالجد !....يعني من متين هي بتكرهو و ما بتطيقو و أساساً ليه شايفاهو كدا ؟؟!
قلت ليها رغددد حرام عليك ياخ ! أواب دا عمل ليك شنو ! غريبه زمان ما كنتٖ بتكرهيهو ، قالت لي بس هسي بقيت بكرهو و سااااااي كدا خلقتو دي بقيت ما بطيقها ، قلت ليها ربنا يشفيك ! من دخلتي الثانوي بقيتي غريبه و تصرفاتك أغرب !
المهم لمن طلعنا لقينا أواب واقف مع براءه ، أشر لينا عشان نركب العربيه ، قلت ليهو دقيقه طيب أمشي أكلم خالتو خنساء ، فعلاً دخلت ليها في بيت جيرانهم و لمن لقيتها كلمتها اننا ماشين ، جات طالعه معاي الشارع و قالت لي راجعين ليه ! أرح أنا ذاتي راجعه بيتي خلصت شغلي معاهم ، قلت ليها لا لا اتأخرنا نحنا ، قالت لي اتأخرتوا على شنو ؟! اجي مالكم يا بناتي زمان بتقعدوا معاي عادي هسي مالكم ؟؟
طوالي عاينت لـ رغد ، خالتو خنساء عاينت ليها و قالت ليها في شنو ؟؟
ما ردت عليها ، ركبت العربيه بس و ربعت يدينها !
يعني أنا والله استغربت و اتفاجأت فيها ! يعني أول شي ما اتكلمت مع أواب بطريقه كويسه و هسي عملت الحركه دي لخالتو خنساء !!
رغد طلعت راسها بالشباك و قالت لي سرعه ياخ !! خالتو خنساء قالت لي أمشوا طيب ، قلت ليها رغد شكلها متضايقه عشان بكرا عندها إمتحان ، قالت لي خير ما مشكله ... رغم أنها قالت كدا و ودعتنا بس حسيتها زعلت و بالجد حركات رغد بتزعل ، أول ما ركبنا العربيه حمرت لـيها  و هي كانت عاديه كأنها ما عملت حاجه !!

يتبع.....