في مهب الريح الجزء الثاني

12

#في_مهب_الريح32
مها حولي الزاكي

بعد كم اتصال كدا راجل عمتي قال لينا إنو أمير و مرتو عملوا حادث بعد ما طلعوا من الصاله و حالياً الإتنين في المستشفى و وضعهم حرج....
عمتي قالت لا حول ولا قوة إلا بالله دي عوارض شنو ، سوزان قالت عين و صابتهم ، عمتي قالت ليهو ما قالوا ليك هم في مستشفى شنو !؟
قال ليها قالوا لي ، أرح نمشي عليهم ، سوزان قالت ليهم أنا ذاتي ماشه معاكم ، قلت ليهم و أنا كمان ، راجل عمتي قال لي هي المستشفى براها حتكون ملانه لأنو ناسهم كتار ، عايزني أخمكم أقع بيكم وين !!؟
عمتي قالت لي أنتِ اقعدي يا مها ، أنا و عمك و سوزان حـ نمشي و انتوا اقعدوا في البيت .... فعلاً مشوا هم التلاته بس و نحنا قعدنا ، رماز قالت لي الليله وووب لو ماتوا ! مساكين والله ما إتهنوا بعرسهم ، طبعاً رغد لمن صحت براءه كلمتها بس ما قالت أي حاجه و ما إتكلمت مع زول فينا ....شلت تلفوني و قعدت أتصل على أواب كتير بس ما كان يرد ....لحد الضهر ما رد علي رغم انو تلفونو خاشي ، إتصلت على عمتي طوالي و قلت ليها لقيتوهم كيف !؟
قالت لي والله لحد الآن الدكاتره ما قالوا حاجه ، العروس هسي في غرفة العمليات و أمير دا لسه الدكاتره طالعين و داخلين من غرفتو و ما راضين يقولوا لينا حاجه ...حيييا يا مها يا بتي لو شفتي حالة خنساء تقطع القلب ، والله لمن تبكي بتبكي كل الناس المعاها ، يحليلها والله ما تستاهل ، قلت ليها ربنا يقوم أمير و مرتو بالسلامه و ان شاء الله تعدي على خير ، قالت لي ان شاء الله ، قلت ليها لو حصل حاجه اتصلي علي يا عمتي ، قالت لي كويس ....قبل ما تقفل قلت ليها أواب معاكم ؟؟
قالت لي اسكتي ساي دا كمان حالتو أصعب من أمو ، والله لا بتكلم مع زول لا بتجاوب معانا ، جاري ورا الدكاتره بس و بحاول يكون ثابت بس الولد يشهد الله حادث أخوهو دا دخل فيهو خلعه ما عاديه...
قلبي وجعني والله عليهو و على خالتو خنساء ، بعد ما قفلت منها رماز قالت لي قالت ليك شنو ؟ ماتوا !؟
عاينت ليها بغيظ و قلت ليها منتظراهم يموتوا تقول حـ تورثيهم أنتِ ! مالك ياخ ما عندك غير سيرة الموت ! قالت لي الموت حق و مفروض الناس تكون جاهزه في أي لحظه ، عهد قالت ليها معناها أنتِ ذاتك خليك جاهزه ، قومي صلي الضهر ما معروف يمكن تموتي و أنتِ ساجده ، بلعت ريقها و قالت ليها هسي أنا مالي شديده و لضيضه و ما بشكى من شي ، وعد قالت ليها يعني الموت دا إلا تكوني عيانه أو عامله حادث !؟
قالت لينا خلاااااص يااااا....المهم عمتك قالت ليك شنو ؟؟
لمن وريتهم ، رماز قالت غيتو ربنا يكضب الشينه.... طبعاً رغد بتعاين لينا ساي بس خشمها ما فكتو ....
لحد بعد العصر كدا عمتي و سوزان جوا راجعين و قالوا حالتهم ما بتطمني خالص لا أمير لا ندى مرتو ، المهم عمتي و سوزان بعد ما اتغدوا قالت لينا انهم حـ يرجعوا بعد دا ، قالت لينا قصي و عدي وين ؟؟ قلت ليها طلعوا من قبيل مع ياسر ، بكونوا في الميدان هسي ، قالت لي خلاص نحنا نجهز و نلاقيهم برا ، فعلاً جهزوا نفسهم و شالوا حاجاتهم و مشوا ، بعدها سوزان دخلت أوضتها و رماز طوالي مشت لحقتها....
المهم عدوا يومين و ابوي كل مره بجي راجع و بقول لينا ماف شي جديد غير إنو العروس نقلوها العنايه المكثفه ، طبعاً أمير عملوا ليهو عمليتين و منتظرنوا يصحى ، المشكله إنو أبوي ما بخليني أمشي معاهو و أواب لحد اليوم التالت ما برد علي ! في اليوم الرابع أمي جاتنا بعد ما سمعت بالحصل ، الوقت داك أبوي كان معاهم في المستشفى ، أمي لمن جات قالت لي كنت مخططه اجي لأبوك و أمشي معاهو ، سوزان قالت ليها هو بطلع بدري و ما قاعد يخلي زول يمشي معاهو ، قلت لأمي أنا ذاتي عايزا أمشي والله ، قالت لي خلاص أرح مش عارفه اسم المستشفى !!؟
قلت ليها اي ، فعلاً طلعنا و مشينا و هي خلت ولدها مع ناس براءه ، طبعاً رغد بقت شغاله صامت حتى أمي لمن جات لا عاينت ليها لا اشتغلت بيها رغم انو أمي سلمت عليها و قالت ليها وشك دا مالو وارم و رغد ما ردت عليها و ما كان في زول غير في الأوضه و إلا أمي كانت عرفت لو مثلاً براءه أو رماز أو سوزان دخلوا معانا.....المهم لمن وصلنا المستشفى لقينا كميه من الناس ، عيني طوالي وقعت على خالتو خنساء و هي قاعده في الكراسي و تاكله راسها مع الحيطه و بتبكي ساي ، مشينا عليها و سلمنا عليهم كلهم ، كان في مره بتصرخ بأعلى حس و بتقول ما تستاهلي والله يا بتي ، سحروك و ما خلوك تتهني بعرسك ، طبعاً دي كانت أم ندى ، لين و معاها كم بت كدا كانوا بحاولوا يهدوا فيها بس هي حالفه ما تسكت بعدها جا أبوي ندى و هرشها حتى سكتت ، بقيت أتلفت ساي و أنا بفتش على أواب لحد ما شفتو واقف بعيد و سرحان ، مشيت عليهو و لمن وصلتو ، قلت ليهو بتردد ...أوال....كيفك !؟
عاين لي بس و هز راسو ، قلت ليهو أمير بإذن الله حيقوم و يرجع زي ما كان ، قال لي ان شاء الله بعدها ما نطق حرف ....قعدنا معاهم مسافه بعدها رجعنا البيت رغم إني كنت عايزا اقعد أكتر بس أبوي قال نرجع و قال لي أساساً المكان زحمه و الناس الواقفه ديل كلها ما بخلوهم يبيتوا أو يدخلوا يشوفوهم ، هو ذاتو رجع معانا ، طول الطريق أمي كانت بتسأل فيهو ساي ، و بتقول ليهو يعني لحد اللحظه الدكاتره ديل ما قالوا ليكم حاجه !؟
قال ليها قالوا إنو وضع أمير حرج و كلمو سليمان انو يكون جاهز ، بس سليمان قال الأحسن انو ما يكلموا النسوان ، يعني بس نحنا الرجال عارفين الحاصل بالتفصيل ، هسي سليمان قال حـ يسفر ولدو لو لزم الأمر....
المهم لمن وصلنا البيت سوزان هي الفتحت لينا ، قالت لأبوي ها ماف جديد !؟ قال ليها ماف ....المهم دخلنا ، أبوي و مرتو مشوا أوضتهم و أمي دخلت معاي المظله حقتنا ، كانت بتتلفت ساي ، قالت لي يعني هسي ابوكم دا بخليكم تنوموا هنا براكم و بنوم في الأوضه البعيده ديك !!؟
قلت ليها اي ، قالت لـ براءه عليك الله جيبي لي يوسف دا ، براءه قالت ليها يوسف نايم ، قالت ليها خلاص خليهو ، دخلت شربت مويه و جبت لأمي ، شربت و قامت دخلت الأوضه جوه و جات طالعه قالت لي أختك دي مالا !؟
قلت ليها منو !؟ قالت لي رغد دي ما شايفنها عامله كيف !؟
قلت ليها ما عارفاها ، قالت لي المشكله إني لمن اتكلم معاها كأني بتكلم مع حيطه !!
ياسر جا داخل و قال لي أنا جعان ، قلت ليهو ما أكيد لمن الناس دي  ختوا الأكل و أكلو انت كنت ماف !! قال لي يااااخ ختي لي ، أمي دخلت المطبخ و ختت الأكل و جات قالت ليهو نحنا ذاتنا ما أكلنا دي جيتنا ، قعدنا ناكل التلاته و طبعاً ياسر ساكت ساي ، حتى لمن أمي تتكلم معاهو ما برد عليها ، لمن لقتو ما شغال بيها بقت تتكلم معاي أنا ، قالت لي أبوك دا لقى القروش وين لمن بنى البيت بلوك و كمان عامل ليهو أوضه و مظلتين !؟
قلت ليها ما عارفه ، طوالي سكتت خلتني ، قلت لـ ياسر بعد تاكل طوالي تشوف قرايتك بوين ، قال لي ياريتني ما جيت البيت ، أمي قالت ليهو اسمع الكلام يا ياسر ، براءه جات و قالت لي اجيب ليك شنطتي تشوفيها !؟ قلت ليها اي يا براءه ، قالت لي كمان عندي تمارين عايزاك تحليهم معاي ، قلت ليها طيب ، المهم جابت لي شنطتها و فتشت كراساتها لقيتها كلها مصححه ، قلت ليها أنتِ شاطره شديد و طوالي بقيت أحل معاها التمارين و أمي كانت بتعاين لينا ساي ، لمن يوسف صحى و بقى يبكي هي طوالي قامت و دخلت ليهو جوه ، بعدها قعدت هناك مسافه لمن أنا و براءه خلصنا ، لمن دخلت لقيتها قاعده جنب رغد و رغد بتبكي شغاله تبكي ، أمي قالت ليها مش أبوك دا خليهو علي ، أنا ضربتكم متين لمن هو الما قاعد ليكم ذاتو يمد يدو عليك و يضربك بالطريقه دي من دون ما يستفسر و يفهم الحاصل....
لمن دخلت و أمي شافتني ، قالت لي انتوا أخوات !؟ عليكم الله أخواتك !؟ و أنتِ أختك بتوعيها و بتعلميها الصح من الغلط ولا بتمشي تفضحيها قدام الناس و تخليها تنضرب بالطريقه دي !؟عشان راجل تخسري أختك ! و بعدين أنا ما شايفه زول غلطان غير الخاطبك دا ، هو بلعب على حبلين ليه !؟ فرضا إنو رغد عشان صغيره و جاهله كانت بترسل ليهو ، هو ليه ما وقفها !؟ ليه ما قال ليها كدا عيب انا خاطب أختك !؟ هو ذاتو لو ما كان بلمح ليها ما كانت حـ ترسل ليهو ، هو خاطب وحده و عينو على التانيه ، دا واحد وسخ و سجمان...
طبعاً في اللحظات ديك جا على بالي المثل البقول : ضربني و بكى و سبقني اشتكى !!
للحظات غضبت غضب ما عادي و كنت ناويه أصرخ و اقول لأمي بتك غلطانه ما تقيفي معاها و اذا هو غلطان هي غلطانه أكتر منو لأنها أختي....كنت عايزا اقول ليها فرضا هو كان بلمح ليها هي أنا أختها ولا لا !؟ عارفه انو البلمح ليها دا خاطبني ولا لا !!؟
كنت عايزا أبكي و اقول ليها انتِ واقفه مع الزول الغلط يا أمي ، أنصفيني !!..
بس إتراجعت و قلت حـ اتعب نفسيتي ساي لو فتحت خشمي ، يعني إذا أواب الشاهد و العارف القصه بالتفصيل و كل عمايل رغد قال لي ما كان تقولي كدا قدامهم ، أمي الجات هسي و السمعت من طرف واحد حـ تقول شنو !؟
أنا أبدا ما مستغربه من وقفة أمي مع رغد ، لأنو رغد طول عمرها بتعرف كيف تتباكى و تطلع نفسها بريئه و أمي دائماً بتصدقها و أصلا رغد دي من زمان كانت مفضله عند. أمي ، رغم استهبالها و قلة أدبها و لسانها الطويل بس مع ذلك أمي كانت بتريدا شديد و بتنبسط من عمايلها و حركاتها البتعملها ....هه يمكن لأنهم شبه بعض !؟
ما رديت عليها ، قالت لي أنتِ كبيرة أخوانك فـ مفروض تكوني أعقل منهم و تداري عليهم ما تفضحيهم و تشمتي الناس فيكم ، ماف زول بنفعك غير أخوانك ديل ، لا خطيبك دا لا أهلو ...
طبعاً خشمي ما فتحتو بس الحسيت بيهو كان شعور لا يطاق ، حسيت انو كل تعبي و تضحياتي ماف زول شايفهم ، و انو ماف زول حاسي بي 💔
أنا المره دي ما سكت لأنو دا طبعي ، أنا سكت لأنو حرفياً ماف شي ينقال ، اعمل شنو ولا اقول شنو لزول شايف الحقيقه بس مغمض عيونو !
يعني كأنهم و بأي طريقه عايزين يختوا الحق علي ...
طيب ليه !؟ مالي أنا !؟ عيبي شنو !؟ السوء الفيني شنو !؟
رغد أحسن مني في شنو عشان يفضلوها علي و يطلعوها هي الصح و أنا الغلط !؟
طبعاً أبوي لمن جا أمي اتشاكلت معاهو و قالت ليهو كيف يعني تضربها كدا لمن وشها يورم و و و......قال ليها أنا لو ما مسكوني منها ما كان بس وشها الحـ يورم ، صدقيني جسمها كلو كان حـ يورم ....قالت ليهو دي بتك ولا بت عدوك ! انت بدل تمسك الولد و تشاكلو و تحقق معاهو هو تجي تضرب بتك و قدامهم كلهم و تثبت ليهم انها غلطانه و ولدهم لا !؟
المهم اتناقشوا نقاش حاد في نهايتو أبوي قال ليها أنتِ ما تدخلي ، أولادك ديل قعدتي ليهم متين لمن هسي جايه تجوطي و تشاكلي ! ما لو كان قعدتي و ربيتيهم كويس ما كان طلعوا قليلين أدب كدا ....قالت ليهو التربيه دي على الأم بس ! انت مالك محنن ! ما بتعرف تربي ولا التربيه عندك ضرب و بس ....قال ليها أنا أمشي أشتغل و أأكلهم ولا اقعد أراقبهم و أشوفهم بعملوا في شنو ! ...
خليتهم بتشاكلوا دخلت جوه لمن اقتنعت إنو أمي بأي طريقه عايزا تبرر لـ رغد عمايلها...
بعدها شبه دخلت في حالة إكتئاب !
بقيت معظم الوقت ساكته ، أي زول يتكلم معاي في الموضوع دا سواء كان رماز أو سوزان أو أمي أو عمتي ما برد عليهم ، عدا أسبوع على الكلام دا ، أمي قالت لـ عمتي هسي البنات ديل أعمل ليهم شنو ! بقوا الإتنين ساكتات و عاملات زي الأصنام عشان راجل !؟
عمتي قالت ليها النصيحه رغد غلطانه ، أمي قالت ليها الولد غلطان و مها ما كان تقول القالتو قدامهم و أخوكي ما كان يضرب رغد لأنو كل اللوم بقع على الولد السجمان داك ، حاساهو كان بلعب بيهم الإتنين ....قلت ليها أنا ما كنت عارفه شي لكن بتك الكانت بتتراسل معاهو دي ما كانت عارفه إنو خاطبني ولا بس عايزا تتلصق و تقل أدبها و خلاص !؟
قالت لي خلاص عملتي ليك قرون !؟ لكن أنا عارفه انو دا ما كلامك و الناس الملوا ليك راسك ديل خليهم يبقوا ليك أخت ، عمتي قالت ليها قصدك شنو انتي ؟! يملوا ليها راسها يقولوا ليها شنو و القصه كلها واضحه و أساساً ما عرفنا إلا منهم !
قالت ليها ما تتحسسي ساي يا آمنه أنا ما قاصداك ، أنا قاصده مرة أبوهم و بت أختها الشمتانين ديل ....عاينت لي و قالت لي فتحي عيونك دي كويس و ما تسمعي كلام الناس الغريبه و تقيفي ضد أختك ، ديل غير يزرعوا الحقد و الفتن بيناتكم ما بعملوا شي ، قلت ليها أنا لو فتحت عيوني أكتر من كدا يا أمي حـ انتبه لحاجات حـ تخليني اقول ياريتني كنت عميانه عديل 😊
عمتي قالت لي ما تقولي كدا يا مها ، هسي الموضوع دا إتحلى و رغد عرفت غلطها ، قلت ليها طول ما هي ما معترفه و ما شايفه انها غلطانه معناها ما عرفت غلطها أو عارفه بس شايفه إنها صح ...بالنسبه لي الموضوع دا حـ يتحلى لمن انتوا تكونوا حقانين ....أمي قالت ليها عليك الله شوفي البت !! يعني خلاص عايزا تجني بسبب ولد الناس !؟ عايزا تعادينا عشانو !؟
عمتي قالت ليها أنتِ اسكتي منها و خليني أنا بتكلم معاها ، قلت ليها ما عايزا زول يتكلم معاي و طوالي دخلت الأوضه جوه و قعدت أبكي ، طبعاً ناس رغد مشوا المدرسه....
شلت تلفوني و رسلت لأستاذ أحمد : لو الواحد عمل حاجه و شايف انها صح بس بسببها كل الناس وقفت ضدو حتى أقرب الأقربين ليهو ، يعتذر و يتنازل عن موقفو و يكسبهم ولا العكس ؟؟
كالعاده ما كان داخل....
ختيت التلفون و رقدت و بقيت سرحانه و بفكر ، حللت كل الحصل دا في بالي و أواب رغم حبي ليهو إلا إني لحد اللحظه ما قادره افهم موقفو من الحصل شنو و ما قادره اعرف أنا مفروض اعمل شنو في الحاله دي ....
المهم بعد شويه كدا براءه جات من المدرسه ، بعدها بمسافه رغد جات داخله ، طبعاً ياسر في الشارع ، رغد لمن جات داخله ما سلمت على ناس أمي و هم في المظله ، أمي قالت ليها إرتاحي و تعاليني ، جات داخله و هي ساكته ساي بس نظراتها لي ما إتغيرت ، يعني بت عديمة الإحساس زي رغد دي أنا ما لاقتني ! ....لمن إرتاحت و غيرت ملابسها ما مشت لأمي ، عشان كدا أمي جاتها داخله ، ختت يدها على وش رغد و قالت ليها الورم خفى شديد و العلامات الكانت في وشك إختفت ، عمتي جات داخله و قالت ليها هي ليه أسبوع كيف ما تختفي و الورم يخف !!.... طبعاً ابوي لمن ضربها كان لابس خاتم عشان كدا كان في جرحه في وشها و دا غير الورم الهسي خفى شديد ، طبعاً رغد ما إتكلمت معاها ، قالت ليها قولي حاجه يا بتي ما تسكتي لي كدا و تحسسيني إني بتكلم مع صنم ، قلت ليهم مستهبله بس و عايشه دور المظلومه ....قلتها بكل غيظ و حرقة قلب ، عمتي قالت ليها مهاااا ! خليك ساكته !
أمي قالت لـ عمتي كدي تعالي اتكلمي معاها ! البت حالفه ما تتكلم ! أبوها دا الله لا كسبو ، عمتي قالت ليها رغد خلاص بطلي حركات و فكي الزعله دي ....رغد ما إتكلمت معاها ، أمي قالت ليها البت نفسياتها تعبانه عشان كدا حـ أسوقها معاي البيت لمن تبقى كويسه حـ نرجع...
لمن قالت كدا أنا طوالي عاينت ليها و في سري قلت ليها و أنا !!؟
تقريباً هي شايفاني كبيره ، كبيره شديد لدرجة إني بتحمل أي حاجه و ما بتأثر بيها ، أما رغد فـ هي شايفاها لسه صغيره و ما بتستحمل لا ضرب لا كلام 💔
فعلاً أمي ساقت رغد و مشت بيها ، طبعاً أمير دخل في غيبوبه و ندى شبه بقت كويسه ، أنا ما قاعده أمشي طوالي بس عارفه أخبارهم ....
بسبب الحصل دا أنا دخلت في دوامه من التفكير و الإكتئاب ، حتى الجامعه ما نزلتها و أساساً ماف زول اتذكرها و ماف زول جا إتكلم معاي عشان أنزل ، حسيت اني ما عايزا شي تاني من الحياة دي غير اني اتقفل ورا 4 حيطان أو اموت و أرتاح...
بعد يومين ، يوم كنت فاتحه الواتس ، رسلت لأواب و قلت ليهو ضروري نتقابل....من زمان كنت حابه اتكلم معاهو بس عشان وضع أمير الكان حرج أجلت النقاش دا لـ وقت مناسب ....استلم الرساله بس ما شافها ، بعد دقيقه ، قال لي طيب تمام ، قلت ليهو بكرا كيف معاك ؟؟ قال لي تمام حـ أجي اسوقك ، قلت ليهو تمام و تاني لا سألني لا سألتو ، إفتكرتو حـ يسألني عن الجامعه و كدا و إذا نزلت أو لا بس شكلي بقيت ما بهمو و الفيهو إنعرفت....
طلعت من الواتس حقي و بقيت أعاين للواتس بتاع رغد ، رغم إني حاسه انها ما اظن تكون اتكلمت مع أواب تاني بس قلت حـ اتأكد ، تاني قلت يمكن غيرت رمز الواتس بس الغريبه إنها ما غيرتو ! حتى انو كان من غير رمز فـ دخلت عادي و أول دردشه لقيتها في وشي كانت مع أواب 💔
غمضت عيوني و قويت قلبي و قلت دي حاجه لا بد منها و أنا تاني ما عايزا اكون هبله و غبيه و ما فاهمه حاجه من البحصل حوليني ...
لمن دخلت اكتشفت انو أواب هو الرسل ليها أول ، كان كاتب ليها رغد كيفك ؟؟
قرت رسالتو بس ما ردت عليهو
قال ليها ما كنت عايز الوضع يصل للمرحله دي و كنت عايز أحل الموضوع دا بيناتنا نحنا التلاته لمن اتأكد انو مها عرفت
برضو ما ردت عليهو
قال ليها المهم حصل خير و أنا والله حاسي بالذنب و اتمنيت إنو دا كلو يحصل بينك و بين أختك و ما اتمنيت إنك تنضربي بسببي
طبعاً الرسايل دي كانت أمبارح
بعد ما شفت الدردشه دي أنا حرفياً بطني طمت 💔 لو افترضت إنو زعلان من الحصل بيني و بين رغد و بالجد انو حاسي بالذنب ليه ما رسل لي أنا ؟؟ ليه ما إعتذر مني !!؟
ليه كل الناس دي بتستهتر بمشاعري و بتحسسني أنها تافهه ! ليه انا مشاعري و أوجاعي ما مهمه ! ليه هم بتجاهلوني كدا !؟
في نفس اللحظه الطلعت فيها من الواتس حقها جات رساله في الواتس حقي ، لمن دخلت لقيتها من أستاذ أحمد ، قال لي معليش ما قاعد ادخل واتس كتير ، رد على كلامي القبل يومين لمن كتبت ليهو : لو الواحد عمل حاجه و شايف انها صح بس بسببها كل الناس وقفت ضدو حتى أقرب الأقربين ليهو ، يعتذر و يتنازل عن موقفو و يكسبهم ولا العكس ؟؟
قال لي : حسب الموقف و حسب الناس ، مثلاً في مواقف ما بتستاهل إنو الواحد يعمل مشكله و قومه و قعده بسببها و يخسر الحوليهو لأنو ممكن يعديها و يتجاوزها عادي ، بس كمان في مواقف صعب انك تتجاوزها و لو فكرت تعديها عشان ما تخسر الناس الحوليك ديل بتكون ظلمت نفسك شديد ....بعدين أنا شايف انو أي زول يخليك تظلم نفسك عشان ما تخسرو دا ما يستاهل انك تتنازل عشانو ، أنا شايف إنو زي ما نحنا بندي كمان بنحتاج مقابل حتى لو الواحد ما قال كدا بس أي إنسان في الدنيا دي بتمنى إنو زي ما اتنازل و ضحى و سامح و عفى و عامل الناس بالحسنى هو كمان عايزا يتعامل بالطريقه دي لأنو حتى التعامل مفروض يكون فيهو عدل ، يعني أنا الليله إتصلت و سألت معناها انت كمان مفروض بكرا تتصل و تسأل ، أنا عديت ليك موقفك و سامحتك عليهو معناها انت كمان تعدي لي موقف و تسامحني عليهو ، قلت ليهو يعني وحده بوحده ؟!!
قال لي بالظبط كدا ، أنا ضد الناس البتقول ليك اعمل العليك و ما تنتظر مقابل ، كلنا محتاجين مقابل والله ، على تعبنا ، على تسامحنا ، على تجاوزنا ، على مشاعرنا بالمختصر على كل حاجه نحنا بنقدمها لـ غيرنا   ...
قلت ليهو كلامك صح
قال لي حـ امعطك بالكلام ....قلت ليهو ما عندي مشكله
قال لي كـ مثال بسيط لو عندك جردل فاتحه فيهو الماسوره و شغاله تغرفي منو و ترشي و بعدها قفلتي الماسوره و بقيت تغرفي من الجردل و ترشي الحـ يحصل شنو في النهايه !؟؟
قلت ليهو موية الجردل حـ تنتهي ، قال لي بالظبط كدا و حيكون فارغ و خاوي لا عندو حاجه يقدمها تاني لا لقى مقابل للحاجه القدمها ...فهمتيني !؟؟
قلت ليهو فهمتك يا أستاذ ، شكرا كتييير ليك ....قال لي ما بيناتنا...
رجعت اقرا في رسايلو تاني ، ما عارفه بس أستاذ أحمد دا بحسو كأنو عارف الحاصل علي شنو ، من زمان معودني إنو ألقى الحل إنو ....
قبل ما أطلع من الدردشه : قال لي لو انتِ الماخده موقف و خايفه تخسري الناس بسببو أنا شايف انك تخسريهم و دا ما تحريض مني دا عدل ، اقول ليك ليه !؟؟
قلت ليهو ليه ؟؟؟
قال لي لأنك من فئة الناس المتسامحه ، الصبوره ، الما بتحب تبادر بالشينه ، البتفكر ألف مره قبل ما تقول كلمه وحده بس عشان ما تجرح زول ، الفئه دي بالذات لو جات و أخدت موقف يبقى معاها حق لأنهم بالجد لو ما انجرحوا و لو ما الموضوع زاد عن الحد ما كان اتكلمو ، ما كان حسوا إنهم إنظلموا ، و أنا رغم اني ما عارف في شنو بس متأكد طالما انتِ ماخده موقف و زعلانه و متضايقه معناها أنتِ الصح و هم الغلط و طول ما انتِ صح معناها ماف حاجه اسمها اني خايفه أخسرهم ، أنا بقول انو أي حاجه خايف انك تخسرها ، أخسرها عشان ما تخاف منها تاني و منها بتكون اتخلصت من القلق و التوتر الكانت عاملاهو ليك الحاجه دي ، قيمي نفسك و أديها حقها  ...