في مهب الريح الجزء الثاني

14

#في_مهب_الريح34
مها حولي الزاكي

بقيت قاعده على أعصابي و أنا منتظره أبوي يجي ، براءه قالت لي مها مالك ؟!!
اتنهدت و عاينت ليها هي و ياسر ، بعد مسافه قلت ليها أنا حـ أسافر....في اللحظه دي حتى رغد إتلفتت علي...
ياسر قال لي مسافره ماشه وين و ليه ؟!
قلت ليهم قبلوني طب في جامعة بخت الرضا في الدويم عشان كدا حـ اضطر أسافر....براءه قالت لي و نحنا تخلينا برانا....
لمن قالت كدا قلبي وجعني والله ، ياسر قال لي انتِ مش قبلوك في الوطنيه ...قلت ليهو اي يا ياسر لكن خليتها ، قال لي عشان عايزا تسافري تخلينا ....في اللحظات ديك قربت أبكي والله
حسيت كأنهم أيتام و لو مشيت خليتهم حـ يضيعوا ، يعني اتخيلوا ناس امهم حيه و أبوهم حي بس في نص بيتهم و مع أبوهم عايشين حياة أيتام !
ملامح وشهم و عيونهم الإتملت دموع خلت قلبي يقبضني ، أنا ليه ما فكرت في المساكين ديل ! بقول رغد أنانيه بس هسي الفرق شنو بيني و بينها !!
براءه لمن غلبها قعدت تبكي ، ياسر قال لي سوقينا معاك ، قلت ليهو حـ تخلي مدرستك !؟ قال لي اي ...براءه جات حضنتني و قعدت تبكي بكى زول مات ليهو زول !!
قلبي وجعني والله ....رغد قالت ليها تبكي ليه يا براءه ، الناس ديل ما دايمين ليك ، اول شي أمي شافت مصلحتها بوين و مشت و دي هسي عايزا تشوف مصلحتها و مستقبلها و تمشي عشان كدا خلوها على راحتها 😊
قلت ليها انتِ مفروض ما تتكلمي خالص...
سكتت و ما إتكلمت تاني بس ما عارفاها مالا كانت بتعاين لي بالطريقه ديك..... طبعاً براءه كانت حالفه ما تسكت و ياسر بالجلاله ماسك دموعو...قلبي وجعني والله ، ضميتهم الإتنين و قعدت أبكي.....رماز جات و لقتني بنبكي ساي ، قالت لينا فاتحين بيت بكى على شنو ؟؟
ماف زول رد عليها....
أخدنا بكيتنا بعدها مسحت لـ براءه دموعها و قلت ليها خلاص كفايه ، أنا ما حـ استقر هناك ، حـ أمشي و أجي راجعه في الإجازات ، و بعدين انتوا ما قاعدين براكم ، أبوي قاعد و أمي حـ تجيكم على طول .... طبعاً بتكلم و أنا صوتي متحشرج و بحاول ما أبكي تاني ، براءه قالت لي لكن نحنا عايزنك انتِ يا مها ، البراجع لينا تاني منو ، منو البعمل لينا الأكل و بمنو البكوي و بغسل لينا ملابسنا !
ضحكت بالغصب و قلت ليها اممم معناها انتوا عايزني بس عشان اشتغل ليكم ، قالت لي لا لا نحنا عايزنك انتِ بس تقعدي معانا ، ما تمشي تخلينا يا مها ....قالت كدا و تاني قعدت تبكي لي
قلت ليها برو ، عايني لي هنا ، ارفعي راسك و بطلي بكى خلاص ، مسحت ليها دموعها تاني و قلت ليها مفروض انتِ و ياسر في وجودي أو غيابي تعتمدوا على نفسك ، اتعلموا تقروا براكم ، تراجعوا و تحلوا تمارينكم براكم ، ما تنتظروا زول يعمل ليكم حاجه ، أي حاجه أي حاجه انتوا بتقدروا تعملوها و تخدموا بيها نفسكم ما تنتظروا بيها زول ولا أنا ...
أخدت ساعه و أنا بتكلم معاهم و بواسي فيهم ....كنت بحاول أسكتهم و أنا في نفسي محتاجه زول يسكتني ...
بعد مسافه رماز جات و قالت لي أبوك وافق يلا أرح نفذي شرطك ، قلت ليها أبوي جا متين هو ؟!! قالت لي من قبيل ، قلت ليها كذابه ، قالت لي اقسم بالله جا و هسي قاعد في أوضتو لو ما مصدقاني أطلعي اتأكدي بنفسك .... فعلاً طلعت و لمن اتأكدت انو قاعد قلت ليها يعني وافق طوالي و ما قال حاجه ؟؟؟
قالت لي أكيد لأنو خالتي هي الإتكلمت معاهو لو كان زول غيرها ما كان وافق ....المهم أرح مليني الرقم ....بقيت واقفه و انا مستغربه ، بالسهولة دي ؟؟!
يعني أبوي وافق طوالي و ما ناداني عشان يسألني عن الحاصل دا كلو و كيف حـ اسافر و حـ اجيب القروش من وين و و و ؟؟؟
قلت عشان ما بهمو و يمكن هو ذاتو عايز يتخلص مني....
فتحت تلفوني و رسلت لأستاذ أحمد و قلت ليهو إنو أهلي موافقين و حـ اسافر الدويم ، رد علي في نفس اللحظه و قال لي حـ تنوري الدويم والله ، و ما تشيلي هم أهلي حـ يشيلوك في راسهم كلمتهم من هسي ، المهم إتكلمنا مسافه بعدها طلعت من الواتس ، لقيت رماز واقفه و مربعه لي يدينها ، قالت لي الرقم لو سمحتي ....
قبل ما أديها ليهو سوزان جات داخله و قالت لينا يلا تعالوا الغدا ، قمت طوالي و مشيت ليها و قلت ليها اتكلمتي مع أبوي !؟ قالت لي لا لـ.....رماز جات بإستعجال و قالت ليها خالتي !!
طبعاً أنا و سوزان الإتنين إتخلعنا بسبب الطريقه الجات بيها رماز و صوتها الكان عالي ....سوزان قالت ليها بسم الله مالك ؟؟
قلت ليها قولي ليها تديني الرقم بعد دا ، مش انتِ اتكلمتي ليها مع أبوها.....
طبعاً ياداب فهمت الحاصل و أصلا من البدايه ما صدقت بنسبة 100٪ قلت ليها والله كذابه يا رماز و خالتك ما كلمت أبوي ، كمان عايزا تغشيني ؟؟ قالت لي لا كلمتو ، قلت ليها معناها هسي حـ أمشي اسألو ، أول ما إتحركت كدا ، سوزان قالت لي رماز دي مستهبله ساي و بتهظر معاك ، أنا لسه ما كلمتو لأنو جا تعبان و زهجان قلت أخليهو يروق شويه لكن حـ اكلمو و اقنعو ليك ، انتِ أديها الرقم و أنا على كل الأحوال حـ اكلمو ، قلت ليها ما بديهو ليها هسي ....
المهم طلعنا كلنا و مشينا اتغدينا مع أبوي و كل وحده كانت بتعاين للتانيه ، براءه أكلت شويه و قامت و بعدها ياسر طوالي قام ، أبوي قال الأولاد ديل مالم ؟! سوزان قالت ليهو شبعانين...
أنا ذاتي الأكل غلبني ....قمت و دخلت ليهم جوه الأوضه ، قلت ليهم أمشوا كملوا أكلكم ، براءه طوالي رقدت و إتغطت و ياسر ما رضى يتكلم معاي أو يعاين لي لأنو ما عايز يبكي تاني....
قلبي وجعني أنا كمان و قلت هسي يا مها حـ تمشي و تخلي أخوانك مع المره دي !!
أنا عارفه انو ماف زول غيري بنتبه عليهم و بتابع معاهم لا أمي لا أبوي ، أنا متأكد لو مشيت خليتهم في إحتمال كبير إنهم يتبهدلوا أكتر من كدا بعدي ، لو مشيت خليتهم حأكون أذنبت في حقهم و أنا ذاتي بالي ما حيكون مرتاح .... كيف حـ اقدر أنوم و هم بعاد عني !؟ كيف حـ آكل و أشرب و أنا ما عارفه هم هنا حيكون أكلو و شربوا شنو ، أنا لو مشيت حأكون أكبر انانيه في العالم دا كلو ، زي الكأني خليت أخواني و ضيعتهم عشان مستقبلي ....يمكن لو كان أمي ام بالجد و أبوي أب بالجد ما كان دا كلو حصل و ما كان أنا قاعده القعده دي و بسأل نفسي كيف أمشي و اخلي أخواني براهم في بيت أبوهم !!!!
دموعي نزلت عشره عشره ، فكرت كتير بعدها مسحت دموعي و طلعت برا الأوضه و مشيت الحوش ، و أنا ماشه على ناس أبوي سامعه سوزان بتتكلم معاهو و هم لسه بياكلوا ، لمن وصلتهم هي قالت ليهو و هسي قبلوها طب و عندها نيه تسافر و.....قاطعتها و قلت ليها خليتو ما عايزا ....
رماز قالت لي شنوو ؟؟ مش قلتي عايزا تسافري الدويم عشان تقري في بخت الرضا ؟
قلت ليها اي و خليت أي حاجه ، أبوي قال لي دا كلو حصل متين و متين قدمتي استقالتك و متين مشيتي قدمتي تاني لمن يقبلوك في بخت الرضا !!؟
قلت ليهو بصوت مبحوح قبل أسابيع ، قال لي أنا ما عارف أنتِ جايبه العناد دا من وين ! و كمان واثقه إني حـ أخليك تسافري عشان كدا قدمتي في الولايات!! خليك من دا كلو ، كنتِ مفكره تجيبي قروش من وين !؟؟ براك عارفه أنا وضعي شنو و ما بقدر اتحمل أي قروش زياده ، يعني الواحد يقعد يأمن ليكم حق لبسكم و أكلكم و شرابكم وحق الإيجار ولا يقعد يدفع ليك رسوم الجامعه !...و كمان طب !! عارفاهو بكم انتِ ولا ساي بتقدمي ؟؟!
سوزان قالت لي صراحة يا بتي هنا بالغتي ، يعني على الأقل كان تقدمي لأي مجال أدبي قروشو كويسه ، لكن الطب مقارنة بوضع أبوك غالي والله ، رماز قالت لي ياريتك ما فسختي الخطوبه كان هسي ما إتجهجهتي الجهجه دي كلها....
هم كانوا بتكلموا و أنا كنت بمسح في دموعي ، حسيت فعلاً انو خلاص دي النهايه ، ما قدرت أسكت نفسي فـ طوالي إتحركت من جنبهم و دخلت جوه و قعدت أبكي....
بعدها عدا يوم و إتنين و أنا في نفس الحاله ، عمتي آمنه لمن جات و عرفت الحصل قالت لي والله ما عارفه اقول شنو لكن انتِ ما غلطتي لمن فسختي خطبتك من ولد الناس لكن انتِ الضعتي في النهايه ، غيتو بس ربنا يعوضك ، لكن أنا شايفه انو بدل تقعدي في البيت كدا عيدي تالته تاني و المره دي قدمي في مجالات أدبيه في جامعات حكوميه و خلاص و أبوك للوقت داك يمكن يغير رأيو لمن يشوف انو الرسوم شويه و يمكن يدفعهم ليك....كنت بسمع في كلامها ساي بس ما رديت عليها ، قالت لي أمك ما جات تاني و ما حاولت تتكلم معاهو ؟؟
هزيت ليها راسي بس ، طوالي طلعت تلفونها و إتصلت عليها و كلمتها ، قالت ليها أساساً أنا في الطريق و جايه عليكم ، لمن عمتي ورتني ، قلت ليها جايه ليه يعني ما فهمت !!؟
المهم أمي لمن جات قالت لي أنتِ ذاتك ما كان تقدمي للولايات و و و ....خليتها بتتكلم و قمت دخلت جوه ، طبعاً هي عشان راجلها مسافر بقت تجي على طول ، جاتنا مع العصريه كدا ، هم بقوا يتكلموا في الموضوع و أنا ببكي جوه الأوضه.....لحد ما أبوي جا أنا ما طلعت ، بعد مسافه سمعت أمي بتجوط مع أبوي ، قالت ليهو حتى قرايه ما عايز تخليهن يقرن !!؟ قال ليها اجيب ليها قروش من وين انا ، أشحد يعني ؟؟
قالت ليهو و لمن بنيت البيت دا و بقيت تدفع للإيجار فوق ال80 كنت بتشحد ؟؟
و لمن مشيت و عرست شحدت ؟ ولا لنفسك بتعرف تجيب قروش من العدم لكن لو واحد من أولادك نفسو في حاجه بتعمل نفسك جنيه ما عندك ، ياخ أنا أول مره أشوف لي اب ببخل على أولادو للدرجه دي ، قال ليها و أنا أول مره أشوف لي أم بتخلي أولادها في عز احتياجهم ليها و بتمشي تعرس عشان تعيش في رفاهيه ، ياخ أنتِ من وين لـ وين جايه تتكلمي و تتهمي كمان ! أنتِ مفروض ما تتكلمي ذاتو و عينك من الأرض ما ترفعيها ، أولادك ديل يادب حِلوا ليك ؟ من زمان ما شايفاهم ولا بس من عرفتي إني عرست بقى ليك حار و جايه تتشمري بس و تنظري !؟
المهم قعدوا يجوطوا شديد و كل واحد بلوم في التاني ، زهجت و صدري ضاق و الفيني كملت و أعصابي خلاص تلفت ، البسمعهم بتكلموا بقول صحي شايلين همنا و هم أساسا ما شغالين بينا ....خميت نفس الحرقه مسافه و طلعت ليهم برا و أنا دمي بغلي عديل .....صرخت فيهم و قلت ليهم البسمعكم بتجوطوا بقول بالجد شايلين همنا بس نقتكم و كلامكم الكتير دا كلو بوضح قدر شنو نحنا بقينا ليكم هم و انكم ما قادرين تتحملوا مسؤوليتنا و كل واحد فيكم شايف إنو مفروض الطرف التاني هو اليتحمل مسؤوليتنا ....ياخ أنا مش قلت ليكم خليت الجامعه دي ؟؟ مش قلت ليكم خلاص قنعت و خليت أي حاجه ! ياخ الأكل دا لو عايزين ممكن اخليهو ليكم عشان أوفر ليك قروش يا أبوي و بعدين دي مسؤولية شنو الإنتوا بتتكلموا عنها ؟؟ أنا خليت ليكم شنو من المسؤوليه عشان تتحملوها ؟! كدي بس جاوبوني دي مسؤولية شنو البتتشاكلوا بسببها و كل واحد فيكم عايز التاني يتحملها ؟؟! أنا ماسكه البيت دا كلو و متحمله مسؤولية نفسي و أخواني من قرايتهم لـ مذاكرتهم ، بغسل ليهم و بكوي ليهم و لمن يرجعوا بلقوني مجهزه ليهم الأكل و اي حاجه ما قادرين يعملوها أنا بعملها ليهم ، انتوا عملتوا لينا شنو عشان تقعدوا تتشاكلوا كدا ؟
يا الأسمك أمي لو كنا بالجد بنهمك ما كان فكرتي في نفسك و مشيتي عرستي و خليتينا وراك ، ياخ أنا بستغرب كنتِ بتنومي كيف من دون أولادك ؟؟ أجفانك دي بتتلاقى مع بعض كيف و انتِ عارفه الوضع الخليتي فيهو أولادك ، بتاكلي و بتشربي كيف و انتِ متأكده إنو أولادك جعانين ، نحنا احتجناك كتير و ما لقيناك ، كم مره براءه مرضت و ما لقتك في مرضها ، كم مره ياسر دا انضرب و إتعوق و ما لقاك واقفه معاهو ، كم مره أنا بكيت و تعبت من المسؤوليه دي و ما لقيت زول أشكي ليهو ، في الوقت الكنتِ فيهو انتِ نايمه في أحسن البيوت نحنا هنا المطره كانت صابه فينا و السقف بدفق من كل الإتجاهات ، في الوقت الكنتِ فيهو راقده في المكيف و مبرده قلبك على الآخر نحنا كنا بنتهبب من شدة الحر و السخانه فسختنا ، في الوقت الكنتِ فيهو بتاكلي و بتشربي اصناف و أنواع من اكل و العصاير نحنا كنا بنقعد على وجبه وحده بس و مرات الوجبه الوحده دي ما بنلقاها و بنضطر نمشي المدرسه و نحنا جعانين....
وين كنتِ أنتِ لمن كانوا في المدرسه يقولوا لينا جيبوا أولياء أموركم ؟؟ وين كنتِ لمن اتبهدلنا و إنطردنا من البيت دا ؟! وين كنتِ لمن سكنا في بيت مسكون و شفنا فيهو العجب ؟! وين كنتِ لمن أخو عمو سليمان طردنا من بيتو و جاط فيني ؟؟ وين كنتِ لمن شقينا و إتبهدلنا قدرتنا و في الآخر رجعنا لنفس البيت المرقنا منو .....وين كنتِ من دا كلو و غيرو !؟ و المشكله انو حالتك أم ! يعني هسي قلبك دا قلب أم !؟
و انت يا أبوي ما أحسن منها والله يمكن فايتها بحاجه وحده بس يلي هي انك بتأكلنا و بتشربنا بغض النظر عن نوع الأكل ، يعني كتر خيرك ما طردتنا من البيت دا و يمكن لو كان في طريقه تقدر تتخلص فيها مننا و تشوف حياتك كان زمان اتخلصت مننا ، للسبب دا انت كنت مُصر على عرسي من أواب ، كنت بأي طريقه عايز تخارجني و تخارج البعديني لحد ما المسؤوليه الإنت أساساً ما متحملها تنتهي ، صدق إني كنت بضغط نفسي في القرايه و مرات من شدة مرارة القرايه بقعد ابكي عديل بس اول ما اتذكر إني بعمل كدا عشانك بمسح دموعي و بواصل قرايتي ، كل ما تصعب علي بشجع نفسي و بذكرها إني بعمل كدا عشان أساعد أبوي بعدين و ما أحوجو حاجه ....رغم انك ما قدمت لينا كتير بس دا انا كلو ما نسيتو ليك و كنت معتبراهو دين في رقبتي و بحفز نفسي عشان انجح و اتفوق و اردو ليك بس هه أردو ليك كيف و انت أساساً مستكتر فيني حق الجامعه !!؟ أردو ليك كيف و ليه و انت حق الأكل و الشراب بتحاسبني عليهو و كل مره بتذكرنا انك فضلت علينا لمن أكلتنا و شربتنا مع انو دا واجبك بس انت بتحسسنا كأنك جبتنا من الشارع و اتفضلت علينا ، انتوا وقت ما عايزننا و ما بتقدروا تتحملوا مسؤوليتنا جايبننا ليه ؟؟
نحنا ما حصل شكينا ولا حصل قلنا انك مقصر في حقنا لأننا شايفين و عارفين قدر شنو انت بتتعب و بتشقى عشان توفر لينا حق اللقمه ، بس افهم شنو أنا لمن فجأه كدا تتصرف و تجيب ليك قروش من ماف تبني بيهم و تعرس بيهم ؟؟!
افهم انك كنت شايفها كتيره علينا ؟؟ حاسي انها حتكون خساره كبيره لو القروش دي قريتنا بيها أو سكنتنا في بيت افضل من دا ؟؟ افهم انو كان بمقدورك تشتغل أي حاجه بس ما كنت عايز تتعب نفسك عشان نحنا ما بنستاهل ...ههه و أنا الهبله الكنت شايله همك و كل ما اشوفك جاي داخل البيت تعبان قلبي بيوجعني عليك و طوالي بردد في سري يا رب قدرني أجازيهو 💔
لو في زول هنا مفروض يشتكي و يتباكى فهو أنا لأني ما قصرت من واحد فيكم و مع ذلك ما لقيت منك إلا الأذى ، ابتداءً من أمي و رغد و انت ، أنا بكرهك يا أمي لأنك انانيه و لمن بقى عندك ذرة إحساس ما فكرت إلا في رغد و ما واسيتي زول غيرها و بقيتي تبرري ليها رغم انها الغلطانه و بكرها هي كمان لأنها طلعت زيك عديمة إحساس و بكرهك انت يا أبوي لأنك كنت قادر تتصرف و تحسن حالنا بس فضلت انك تعيش دور المغلوب على أمرو و بسببك اتبهدلنا .....و كمان بسببك راجل عمتي إتحرش بـ براءه إلا نحنا لحقناهو عشان كدا أنا كرهتكم من كل قلبي و يارب أموت عشان أرتاح منكم و ترتاحوا مني....
لمن قلت ليهم كدا زي الكأني رميت قنبله ....قلت كل الكان في قلبي دفعه وحده و من دون تفكير.....دخلت الأوضه طوالي و من دون ما أتردد رفعت اللحاف و شلت من أدوية أبوي و بلعت أكتر من حبه و أنا بطني فاضيه من أمبارح ما أكلت شي ، قعدت على الأرض و بقيت اقول أنا عايزا أموت و بس ، ربنا ياخدني و يريحني.....ديلك برا بدوا شكله جديده و أمي كانت بتبكي بأعلى حس عندها و هي بتقول لـ عمتي كيف يعني راجلك اتحرش ببتي دا كلام شنو دا و..و....و...و