في مهب الريح الجزء الثاني

9

#في_مهب_الريح29
مها حولي الزاكي

بعد صليت المغرب جيت ألملم حاجاتي عشان أدخلهم في الدولاب ، لقيت سوزان مرة أبوي بتشوف فيهم مع رماز بت أختها ، قالت لي ما شاء الله نسيبتك عزتك ، تنزلي الجامعه بمزاااج ، قلت ليها اي خالتو خنساء ما بتقصر معانا ، رماز قالت لي أنتِ مش قالوا ذاعوك مع الميه الأوائل ! طيب ليه مسجله في جامعه خاصه و أنتِ جايبه نسبه كبيره زي دي ؟؟
قلت ليها أنا قبلوني تمريض في الخرطوم لكن قدمت استقالتي ، قالت لي يعني ما كنتي عايزا تمريض ؟ طيب ليه قدمتيهو ؟؟
قلت ليها تميت بيها رغباتي ، كنت كاتبه تمريض و مختبرات و صيدله في مختلف الجامعات و كاتبه طب مع التمريض و المختبرات في جامعة الخرطوم و كنت متوقعه يقبلوني فيها طب والله و عشان كنت واثقه من الحاجه دي بس اتفاجأت لمن لقيتهم قبلوني تمريض ما طب ، المهم أواب و ناس خالتو خنساء قالوا لي أحسن اقرا في خاص لأنو الجامعات الحكوميه و بالذات جامعة الخرطوم بتضيع الأعمار ساي رغم انو شهادتها قويه فـ بس أواب مشى و سجلني طوالي في الوطنيه ، قالت لي غيتو خساره بالجد زول يكون جايب نسبه كبيره زي دي و يمشي يقرا بيها خاص و يدفع قروش بالهبل !!
مرة ابوي قالت ليها يا بت هوي اسكتي خلاص و ما خساره فيها و بعدين نسابتها قادرين و القرش عندهم خليهم يدفعوا ليها ساي ، عاينت لي و قالت لي تستاهلي نسابه زي ديل يا بتي ، إبتسمت ليها بس....
أنا يمكن بتجاوب معاها و لو سألتني عن حاجه طوالي برد عليها ، أما رغد صباح الخير ما بتقولها ليها ، بتكرها شديد من أول يوم جاتنا فيهو...
طبعاً أمير من يوم مشوا للخطوبه حدد موعد عرسو و اتفقوا يعملوهو في أسرع وقت ، يعني قبل عرسي أنا و أواب ، المهم الأسبوع الجاي حفلة حنتو ، فـ بقيت انتظر ناس رغد يجوا من مدارسهم و نمشي لناس خالتو خنساء لأنهم بدوا تجهيزات العرس و حفلة الحنه ، مرة أبوي و بت أختها مشوا معانا مره وحده بس ، خالتو خنساء قالت لي عمتك آمنه ما جايه ولا شنو ، أنا كلمتها كدي اتصلي عليها و ذكريها ، قولي ليها خالتو خنساء قالت ليك كما جيتيها حـ تزعل منك ، قلت ليها طيب و طوالي اتصلت على عمتي و كلمتها ، قالت لي ما نسيت والله لكن كنت منشغله مع أولادي النزلوا مدارس ....في نهاية كلامها قالت لي اها مرة ابوكم تعاملها معاكم كيف ؟؟
قلت ليها تمام ماف حاجه ، قالت لي أصلا أنا ما بجيب ليكم مره كعبه ، جبتها عشانكم انتوا ديل ، قلت ليها دي جبتيها من وين يا عمتي ؟؟
قالت لي معرفه قديمه ، أبوها كان صاحب أبونا و بعرفوا من زمان و دي أصغر بت ليهو لحد ما كبرت ما اتوفقت في العرس و البجوها كلهم بطفشوا ، و يمكن دا كلو عشان تكون من نصيب أبوكم و تبقى ليكم أم ، قلت ليها بت أختها قاعده معانا ، قالت لي بت أختها دي أمها متوفيه و أبوها ما شغال بيها ، أخواتها كلهم معرسات و خالتها هي الربتها عشان كدا متعوده عليها ، قلت ليها يعني حـ تسكن معانا ؟؟ قالت لي لا لا ما أظن ، حـ تقعد كم اسبوع كدا مع خالتها و حـ تمشي بيت جدها ، قلت ليها ما بتقرا هي ولا شنو ؟؟ قالت لي قرت لحد تالته بس بعدها خلتها ، قلت ليها اهاااا ، قالت لي خليك من دا ، أنا عايزا احبسك بعد دا ، قلت ليها كيف مع الجامعه دي ، قالت لي ياخ ذاتو وقعت الجامعه دي ما مناسب أو كان العرس دا يكون بعد تخلصي عديل ، قلت ليها الموعد اتحدد و انتهى ، قالت لي خلاص ماف مشكله بظبطك في الأيام دي ، كدي لحد ما اجيكم بكرا ، قلت ليها طيب ...
المهم بعدها مشيت اشتغل مع بنات أهلهم لأنو بكرا حفلة الحنه و أواب دا من الصباح ما شفتو ، طبعاً في اليوم داك رماز مشت معانا بس سوزان مرة ابوي قعدت في البيت ، طبعاً رماز ما خلت حاجه ما علقت عليها ، قالت لي بيتهم رهيييبه ، بختك حـ تجي تسكني في القصر دا ، قلت ليها ما شفتي رغد و براءه مشوا وين ؟؟
قالت لي براءه ما شفتها ، لكن رغد دي شايفاها واقفه مع خطيبك برا في الحوش ، قلت ليها اها كويس قايلاها رجعت البيت ، عاينت لي بطرف عينها بس و مشت ، المهم قعدنا معاهم لحد المسا بعدها أواب وصلنا لحد البيت و رماز الغياظه الطريق كلو بتحاول تتظارف و تتونس معاهو و هو ما شغال بيها ، لمن نزلنا أواب قال لي بكرا حـ أجي أسوقكم ، قلت ليهو المسافه ما بعيده لكن لي معناها ما عايزاني أجي صح ؟😂
قلت ليها لا لا والله ، رغد دخلت طوالي و رماز كانت واقفه معانا ، أواب اتغاظ منها ، قال لي أدخلوا بعد دا ، أول ما دخلنا كدا رغد جات راجعه و قالت انها نست شنطتها في عربية أواب ، قلت ليها اطلعي حصليهو قبل ما يمشي و فعلاً مشت لحقتو و أنا و براءه دخلنا جوه ، مرة ابوي قالت لينا أجهز ليكم الأكل ولا تنتظروا أبوكم ؟
قلت ليها أنا غيتو ما جعانه ، براءه و ياسر برضو قالوا ما جعانين ، ياسر قال لينا أنا عايز أنوم بس قلت ليهو صلي العشا بعدها راجع دروسك و نوم ، قال لي بعد أنوم و أصحى و طوالي مشى ، المهم أنا بعد ما صليت فتحت شنطت براءه و بقيت اشوف في كراساتها إذا مصححه أو لا ، لقيتها ماشه كويس بس في آخر تمرين بدتو و ما تمتو ، ناديتها و بقيت أشرح ليها و أحل معاها التمارين لحد ما خلصنا ، قلت ليها بكرا طوالي تمشي تصححي ، قالت لي طيب ، قلت ليها امشي نومي بعد دا ، قلت لـ ياسر جا دورك تعال ، قال لي أنا ولا شنطتي ؟؟ قلت ليهو الإتنين ، قال لي افففف منك ياخ ، جاب شنطتو و قعد جنبي ، طلعت كراساتو كلهم و فتشتهم و اكتشفت إنو في درسين ما كاتبهم ، قلت ليهو ليه ما كاتب ؟
قال لي ما فاضي ياخ ، قلت ليهو شغال ولا عندك أولاد بتربي فيهم ؟؟!...ياسر انت ما عايز تمشي عديل !؟ يعني أنا إلا كل يوم أجي و افتش ليك شنطتك و اتابعك ! متين حـ تعتمد على نفسك ! متين حـ تحس و تبقى زول مسؤول ! اهمالك دا عاجبك يعني !؟
ما رد علي ، قلت ليهو هسي قلت نعسان نوم لكن بكرا يا ياسر ألقاك كاتب الدرسين ديل و لو في حاجه وقفت ليك تعال لي ، المهم دخل حاجتو و شال شنطتو ختاها في الكرسي و رمى نفسو على السرير و نام ، رغد لمن جات قلت ليها فتشت لـ ياسر و براءه شنطهم و هسي جا دورك أنتِ 😅
من دون ما تعاين لي قالت لي ما شافعه أنا و طوالي شالت ليها مخده و طلعت رقدت في المظله العملها لينا ابوي جنب أوضتنا ، رماز كانت راقده و متلفته على الحيطه فلمن رغد قالت لي كدا طوالي هي إتلفتت و قالت لي أختك دي مالا كدا ؟؟! معليش بس دي مستحملنها كيف !!؟
قلت ليها طبعها كدا ، المهم قمت غطيت براءه و ياسر كويس و قفلت التلفزيون ، لمن جيت أطفي النور ، رماز قالت لي ما تفهميني غلط ، لكن أختك دي أعملي حسابك منها ، عاينت ليها بإستغراب و قلت ليها قصدك شنو !؟
قالت لي فتحي عيونك كويس ، قالت كدا و طوالي إتغطت و إتلفتت بالإتجاه التاني ، طفيت الضو و مشيت رقدت و ما فكرت كتير في كلام رماز....
تاني يوم كانت حفلة حنة أمير ، على بال ما ناس رغد يمشوا المدرسه و يجوا أنا اخترت ليهم ملابس مناسبه و كويتها ليهم و نضفت ليهم جزمهم قلت عشان يجوا يلقوا كل حاجه جاهزه ، مرة ابوي جابت لي توبها و فستان و طرحه لـ رماز و قالت لي عليك الله أكويهم لينا معاك ، قلت ليها طيب و كويتهم ليهم ، المهم لمن أخواني جوا من المدرسه لبسنا ملابس عاديه و مشينا بيهم بيت ناس خالتو خنساء عشان نشتغل معاهم و نغير لمن الحفله تبدا عشان كدا شلنا ملابسنا معانا ، طبعاً من دخلنا سوزان و رماز شغالين تعليقات ساي ، فجأه جات سناء مرة سعيد عم ناس أواب عاينت ليهم من فوق لتحت و قالت ليهم انتوا منو ؟؟
خالتو خنساء جات و قالت ليها ديل ضيوفي ، أهل مرة ولدنا أواب ، ما قالت حاجه مشت طوالي ، طبعاً هي مره متعجرفه و شايفه نفسها ، المهم بعد ما خلصت شغل بقيت أفتش على أواب بس نهاي ما لقيتو لحد ما الحفله بدت ، دخلنا جهزنا نفسنا ، لبست فستان زيتي و طرحه اوف وايت و اكسيوارات فضيه ، أما رغد كانت لابسه اسكيرت ساندريلا أسود و قميص فضه مزركش و طرحه بنفس اللون ، طبعاً عملت شعرها كيرلي و لمن اتمكيجت و ختت الطرحه في نص راسها لمن ما عرفتها !! ايوه صحيح كانت طالعه جميله شديد و ملفته للأنظار بس من متين نحنا بنطلع شعرنا ! معقوله ما خايفه من أبوي لو شافها !!....براءه قالت لي مها شوفي رغد بقت سمحه كيف ... طبعاً براءه كانت لابسه فستان أبيض مشجر و شعرها عملتو ليها ضنب حصان ... طبعاً جوا ضيوف من أهل العروس عشان يحضروا حفلة الحنه ، كانوا عاملنها جنب الباب و الصيوان دا كأنو صاله ، قولة رهيب شويه عليهو ، يعني الواحد بحس نفسو في صاله ما في صيوان ، يعني حتى الطاولات كانت مرتبه و شلها راقي و جميل ، المهم لمن الحفله بدت أنا بس كنت بصور لأني ما يعرف ارقص و حتى لو بعرف ما بحب ارقص مع الناس أو قدامهم ، بفضل إني اقيف و أعاين بس و بالكتير أصفق ، أثناء ما أنا واقفه كدا جاتني ريحة عطر مميزه ، إبتسمت و قلت أوااااب و طوالي إتلفت عليهو و أنا بضحك ، قال لي خطيبتي الحلوه عرفتيني كيف ؟؟
قلت ليهو دا سر ، قال لي حاسس انو لي سنتين ما شفتك ، انشغلت مع التجهيزات ، قلت ليهو نفس إحساسي بس كنت عارفه انك مشغول و إلا كنت رسلت أو إتصلت ، قال لي فعلاً ، شال مني التلفون و قال لي خلينا نتصور ، و فعلاً اتصورنا صور كتيره مع بعض ، بعدها قال لي تعالي ، قلت ليهو وين ؟؟
قال لي يعني حـ تقيفي هنا زي الغريبه ! أكيد لا تعالي معاي ، مشيت وراهو و هو شغال يبشر ساي لحد ما وصل أخوهو أمير و بشر و سلم ليهو ، أنا وراهو طوالي سلمت على أمير ، قال لي يعني لو ما أواب جا ما كنتِ حـ تظهري !؟ انت يا أواب مانعها تظهر قدام الناس ولا شنو ؟ اواب ضحك و قال ليهو أبدا والله ، أمير قال لي الزول دا ما بكذب صح ؟😂 قلت ليهو لا ما بكذب ، أواب قال ليهو شفت !!....المهم بقيت واقفه جنب أواب و هو شغال يرقص و يبشر مع أولاد أهلو و مبسوط شديد و طبعاً خالتو خنساء و حبوبه سعاد كانوا في النص و شغالين يزغردوا ساي ، الصوت كان عادي فـ جريت أواب من قميصو لمن قرب عشان يسمعني قلت ليهو أنا تعبت من الوقفه ماشه أقعد قال لي طيب تمام أنا بعد شويه بجيك ...المهم مشيت قعدت و بقيت أعاين ليهم طبعاً ياسر شغال يرقص ساااي ياهو رقيص بتاع الراب و الشماسه داك لكن منظرو بالجد كان بضحك عشان كدا فتحت تلفوني و بقيت أصور فيهو و في براءه و هي بترقص جنب خالتو خنساء ، طبعاً عمتي آمنه ما قدرت تجي قالت ولدها عاين ، المهم أثناء ما أنا بصور كدا حسيت بزول جا قعد معاي في الطاوله ، لمن عاينت يميني لقيتها لين !!
طبعاً اتفاجأت !! قلت ليها ليبين !!؟
هي ذاتا كانت مستغربه ! قالت لي انتي الجابك هنا شنو ؟؟
قلت ليها العريس أخو خطيبي 😊
عاينت لي بإستنكار كدا و قالت لي و أنا العروس بت عمي 😏
قلت ليها اها كويس ، قالت لي خاطبك منو ان شاء الله ؟؟
طبعاً هي شكلها قايلاني بكذب ، قلت ليها شايفه اللابس قميص بيج داك !؟ بس دا أواب خطيبي ، عاينت ليهو و قالت لي اهااا دا الكان جاك في المدرسه ، قلت ليها ما كنتِ بتعرفيهو يعني ؟؟
قالت لي ههه ياريت لو كنت بعرفو كان أنقذتو من المصيبه السوده الوقع فيها دي....
قلت في نفسي لين دي من يومها وقحه و مغروره و بتحب تجرح مشاعر الناس بالذات أنا عشان كدا أحسن ما أكتر معاها الكلام ، بعد مسافه قالت لي يعني استاذ أحمد كان تسليه ؟؟
طبعاً فهمت قصدها بس عملت غبيه ، قلت ليها كيف يعني ؟؟
قالت لي ما كنتوا عاملين فيها عصافير حب و ماف واحد برضى في التاني و يوم قال ماشي قلبتي الفصل بيت عزاء !! قلت ليها دا كلو في راسك انت ، بتألفي الحاجه و بتصدقيها ، لوت لي خشمها بس ...بعد مسافه قلت ليها خليك من دا ، جبتي كم و شالوك شنو ؟
قالت افف جبت 90 و شالوني طب في جامعة الخرطوم ، طبعاً قربت أضحك ، بس عملت نفسي مصدقاها ، قلت ليها كنت متوقعه يذيعوك معانا ، قالت لي كان ممكن انذاع لو ما مرضت أيام الإمتحانات ، بس مع ذلك جايبه 90 بـ مرضي دا ....في اللحظه دي ضحكت ، قالت لي قلت نكته أنا ؟؟
ما رديت عليها ، قالت لي أساساً أنا المقعدني معاك شنو ، أول ما هي مشت أنا قعدت اضحك و اقول لين عمرها ما حـ تتغير و مستحيل تقول الحقيقه ، نزلت راسي عشان افتح تلفوني عشان أرجع أصور تاني ، بس قبل ما افتحو فجأه سمعت صوت كواريك ، لمن رفعت راسي شفت أواب واقع مع ولد في الأرض و بضرب فيهو ضرب شديد و الناس بتحاول تحجزوا منو بس هو حالف ما يفكوا ، و عمو سليمان شغال ليهو خلاص حـ تكتلو يا ولد ، فكوا قلت ليك ، يا ولد يا أواب اسمع الكلام ، قمت من مكاني و جريت عليهم و في اللحظه ديك أولاد أهلو فكوهو من الولد و طلعوهو برا و أواب لسه بصارع عشان يمسك الولد و يضربو تاني !!
بقيت اقول في شنو و الناس الجنبي ذاتا كانت بتقول الحاصل شنو يخوانا و سبب المشكله شنو ، في وحده قالت ليها ، شكلو الولد دا شغال بت اهلو ولا عمل ليها شنو ما عارفه و هو وقع فيهو ضرب ، قالت ليها دي منو دي كمان ، قالت ليها شايفه البت ديك 👈 دي الكان الولد مباريها و شايفاهو من قبيل لاصق فيها ، إتلفت طوالي عشان أشوف البت دي....

يتبع......