في مهب الريح الجزء الثاني

8

#في_مهب_الريح28
مها حولي الزاكي
بعد مسافه أواب جا راجع و لقى الإستماره زي ما هي ، رفع القلم و جا قعد ، أخد نفس و قال لي المشكله شنو ؟؟
ما رديت عليهو...
قال لي الإستماره دي ما ليها علاقه لا بزعلي منك لا بزعلك مني عشان كدا خلصينا و أمليها ، قلت ليهو ما عايزا ، قال لي ما عارف اقول ليك شنو لأني جد جد تعبت ، خت القلم و قال لي أساساً انتي ما بتسمعي مني عشان كدا اعملي البريحه ، قال كدا و مشى طوالي ، قعدت أبكي مسافه بعدها مسحت دموع و مليت الإستماره ، فكرت في كلام خالتو خنساء و قلت أساساً أنا الغلطانه و أواب أكتر من مره سامحني و اتجاوز حركاتي البعملها و اتحملني ، مفروض أنا الأعتذر منو....
شلت الإستماره و مشيت بيها الصالون حق الرجال ، لقيتو قاعد هناك و زهجان ، مشيت عليهو و مديت ليهو الإستماره ، شالها مني عن سكات و طوالي وقف على حيلو عشان يمشي ، قلت ليهو أواب ، من دون ما يتلفت علي قال لي بعد أرجع و طوالي مشى ....حسيت انو في فجوه أو حاجز بقى بيني و بينو ، حسيت إني خسرت خلاص بتصرفاتي الغلط البعمل فيها ، ما قدرت أمسك دموعي فـ قضيتها بكى في مكاني ، شويه سمعت صوت خالتو خنساء و هي بتقول لي في شنو يا بتي ؟؟!
ما كنت قادره اتكلم من شدة الزعل و البكى ، جات ضمتني عليها و قالت لي معليش خلاص وقفي بكى ، مسحت لي دموعي و قالت لي إتناقشتي مع أواب ولا شنو ؟
هزيت ليها راسي ، قالت لي يعني اتشاكلتو تاني ولا الحصل شنو ، قلت ليها كنت عايزا أعتذر منو بس هو ما أداني فرصه ، قالت لي خلاص ما تبكي ، خليهو أنا بتكلم معاهو ...
المهم أواب ما جا راجع تاني و حسيت انو إتهرب مني و انو المره دي جد جد زعلي شديد و ما حـ يسامحني و حسيت إنو حـ يفسخ الخطوبه دي ، المهم فطرنا مع ناس خالتو خنساء بعدها مشينا التراويح و منها رجعنا البيت ، طبعا الحوش بنوهو بلوك و حالياً ببنوا في الأوضه في نهاية الحوش للمره الجديده ، بديت اغسل في العده و أنا قلبي واجعني شديد ، لمن خلصتها شلت تلفوني و دخلت الواتس و كتبت لـ أواب :
أنا عارفه إني غلطت كتير و انت في كل مره كنت بتسامحني و ما بتزعل مني بس انا كترتها و ليك الحق تكرهني ، أنا بس كنت عايزا أعتذر منك يا أواب لكن انت ما أديتني فرصه ، عارفاك حتكون كرهتني شديد و ندمت على اليوم العرفتني فيهو و أكيد انت هسي مفكر تفسخ الخطوبه دي 💔
استلم الرساله و ما رد علي ، قفلت التلفون و رقدت على السرير و أنا بلوم في نفسي ، أواب دا ما حصل غلط علي ، ما حصل قصر مني ، ما حصل طلبت منو حاجه و ما لبى طلبي ، بعمل أي حاجه عشاني ، أما أنا فـ ما قدمت ليهو شي غير وجع القلب ...
نمت في مكاني داك و ما صحيت إلا وقت السحور لمن براءه صحتني ، قلت ليها انتي صايمه تاني يا براءه ؟ قالت لي اي ، رغد قالت ليها يا بت هوي أفطري ساي ، برا لمن تكبري و يبقى رمضان حقك تقعدي تتبكي و تتجرسي ، قلت ليها خليها تصوم و لو تعبت شديد تفطر طوالي....
بعد السحور ، فتحت تلفون و دخلت الواتس ، لقيت رسايل من أواب ، قلبي قبضني و حسيت انو كاتب لي في الرسايل دي إنو البينا إنتهى ، طبعاً أنا و براءه راقدين جوه الأوضه و ابوي و ياسر و رغد برا في الحوش ، بلعت ريقي و فتحت الدردشه ، لقيتو كاتب لي في أول رساله : إلا إذا انتِ عايزا الخطوبه دي تتفسخ 😊
تاني رساله : فايدة الإعتذار شنو إذا انتِ بتعيدي نفس الغلط و ما بتسمعي مني لمن اتكلم معاك و دائماً بتعملي عكس البقولو ليك و مع ذلك بكبر علي و بقول معليش لسه صغيره و بتجاوز تصرفاتك...
رديت على رسالتو الأولى و قلت ليهو أنا متين قلت كدا يا أواب ؟؟
كان متصل الآن ، رد علي بعد مسافه و قال لي و أنا متين قلت كدا ؟؟
قلت ليهو تصرفاتك بتقول كدا ، قال لي لو على التصرفات فإنتِ اكتر وحده تصرفاتك بتقول انك ما عايزا العلاقه دي تمشي لقدام ...
قلت ليهو أواب أنا والله ما حصل فكرت كدا و لو ما كنت عايزاك ما كان وافقت عليك من البدايه ، قال لي ما معروف يمكن ندمتي و بالك بقى في حته تانيه 😊
قلت ليهو ما ندمانه و مستحيل أندم لأني وافقت عليك ....أواب أنا آسفه و شديد كمان ، ممكن ننهي الخلاف دا و ننسى الحصل
و بوعدك يا أواب إنو ما يتكرر تاني و حـ احاول ما أزعلك مني ، قال لي ما مشكله حصل خير و أنا ما كنت زعلان منك بس كنت عايز احسسك بغلطك ، قلت ليهو بالجد آسفه ، قال لي خلااااص يا زوله إعتذارك مقبول 😂 المهم اتسحرتي ولا لسه ؟؟
قلت ليهو زمااااان و هسي عايزا أنوم ، قال لي طيب نومي ما تساهري ، قلت ليهو لا ما عايزا أنوم ، يعني أنا ما صدقت اننا إتصالحنا و رجعنا لبعض تاني ، قال أصلا كدا كدا كنا حـ نرجع لبعض ، حتى لو أنتِ ما رسلتي لي و ما اعتذرتي مني متأكد اني في الآخر كنت استسلمت و إتصلت عليك ، قلت ليهو عشان كدا أنا الإعتذرت المره دي لأنك موعدني انك تعتذر و تراضيني على كل الأحوال......المهم اتكلمنا مسافه بعدها نمت و أنا مبسوطه ، حسيت كأنو كان في صخره على أكتافي و إنزاحت....
المهم بعد اسبوعين و في نهاية رمضان كانت نتيجة القبول ، قبلوني تمريض في جامعة الخرطوم ، ما عرفت أفرح ولا لا لأنو معظم رغباتي كانت طب في مختلف الجامعات فـ ما إتوقعت أتقبل تمريض في الخرطوم ، قلت دا كلو بسببي ما كان اكتب رغبات أنا ما عايزاها ، أواب اتصل علي و قال لي ها تمرض كيف و كيف ؟؟
قلت تمام حلو ، قال لي متأكده ؟
قلت ليهو صراحة لا كنت عايزا طب و لأني غبيه كتبت رغبات أنا ما عايزاها ، قال لي اولا انتي ما غبيه ، تانيا الحاجه الكويسه انك اتكلمتي و قلتي الحاجه النفسك فيها ، كنت حـ أزعل منك لو كان سكتي و رضيتي بحاجه ما عايزاها ، قلت ليهو بعد شنو لكن !؟
قال لي ما فات شي حـ اقدم ليك استقالتك و اقدم ليك في التقديم البعدو ولا رأيك شنو أمشي اسجل ليك طوالي في الجامعه الإنتي عايزها....
قلت ليهو ما عارفه يا أواب حاسه نفسي جايطه و ذاتي ما متأكده إذا عايزا اقرا طب أو لا ،  ، قال لي ماف مشكله أنا معاك ، بعد التراويح حـ نطلع مشوار و حـ نتناقش مع بعض لحد ما نحدد أنتِ عايزا شنو ، قلت ليهو طيب ، قبل ما يقفل قلت ليهو أواب شكراً ليك كتييير ، قال لي بطلي عواره تشكريني ليه ؟؟
قلت ليهو بس كدا حسيت اني عايزا اقول ليك شكراً مع انها قليله في حقك ، يعني لولاك ما كنت عرفت حـ اعمل شنو ، قال لي أنا حـ أكون معاك و ملازمك زي ضلك و حـ نمشي كل الخطاوي مع بعض و على فكره أنا ما بعمل دا كلو عشانك ، قلت ليهو كيف ؟
قال لي بعملو عشان نفسي لأنو انتي نفسي ...
طبعاً لساني إتربط !! بس كنت مبسوطه و قلبي شغال دق دق ، أواب دا أنا بحبو حب ما عادي و كل يوم حبي ليهو بزيد ، قال لي يلا لـ بعدين...
بعد قفلت منو ضميت التلفون و قلت في نفسو بس لو تعرف يا أواب أنا بحبك قدر شنو 💜
بعد الإفطار طوالي جاتني مكالمه من رقم غريب ، لمن رديت لقيتها دي ريما ، اتفاجأت و انبسطت في نفس الوقت ، قلت ليها ريماااا كيفك و اخبارك شنو ، قالت لي كويسه الحمدلله و رمضان كريم عليك و اخبارك شنو ، قلت ليها كويسه الحمدلله و على فكره رمضان باقي ليهو يومين بس و ينتهي و انتي ياداب متصله علي ، قالت لي معليش شديد والله بس تلفوني كان متعطل و سافرت مع أمي البلد و لمن جيت راجعه صلحتو قبل يومين و هسي اتصلت عليك ، اها قدمتي !! قلت ليها ايوه و حكيت ليها الحصل ، قالت لي أواب دا عسل عديل ، قلت ليها ريما 😊
ضحكت و قالت لي أنا قبلوني طب في جامعة النيلين ، قلت ليها كويس والله ألف ألف مبروووك يا دكتوره ، ضحكت و قالت لي متين هو !؟ قلت ليها ناس شروق الحصل معاهم شنو ، قالت لي رهام دي قبلوها مختبرات طبيه في جامعة السودان و أصلا هو كان رغبتها من زمان أما شروق قدمت هندسات بس و قبلوها هندسه مدنيه في جامعة السودان للعلوم والتكنولوجيا ، قلت ليها اتشتتنا ، قالت لي فعلاً لكن رايك شنو تجي تقري معاي في النيلين ، قلت ليها لكن التقديم العام انتهى ! قالت لي اي لكن في خاص و شواغر في الجامعات الحكوميه ، لكن ما تتضيعي فرصك و تنتظري الشواغر قدمي خاص طوالي....
قلت ليها طيب ان شاء الله
قالت لي بالمناسبه يا مها قبيل أستاذ أحمد كان بسألني عنك ، عايزا يعرف الحصل معاك شنو و قبلوك وين ، قلت ليها متواصله معاهو انتي ؟
قالت لي لا ما كتير ، رسل لي مرتين بس ، يوم بدا التقديم و اليوم لمن طلعت النتيجه ، قلت ليهو ما عارفاها والله ، قلت ليها يا حليلو كويس هو ؟
قالت لي اي كويس ، انتي يا مها ما متواصله معاهو ! رغم انو رقمو معاك ، قلت ليها ضاع مني ، قالت ليها اهااا ، المهم اتونسنا مسافه و قفلنا من بعض ، طبعاً رقمو معاي بس كذبت عليها و هي فهمت اني ما عايز اتواصل معاهو عشان كدا ما قالت لي حـ أديك رقمو تاني....
المهم بعد ما جينا من التراويح أواب جانا و استأذن من أبوي انو حـ يسوقني مشوار و ما حـ نطول ، المهم طلعنا و قعدنا نتكلم و نفكر في الحاجه المفروض أنا اقراها ، قال لي انتي نفسك تبقي شنو ؟؟
قلت ليهو ما عارفه والله يا أواب 😭😭
ضحك و قال لي يعني ماشه ساي لا هدف لا رغبه ! قلت ليهو أجل ، قال لي أنا شايف انو الطب أكتر مهنه مناسبه ليك ، قلت ليهو ما عارفه ، قال لي الطب بشبهك ، قلت ليهو كيف يعني الطب بشبهني ؟!
ضحك و قال لي مهنه إنسانيه و الدكاتره ملائكة الرحمه و انتي عشان ملاك و قلبك أبيض و عطوفه و حنينه بس انو المهنه دي شبهك ، قلت ليهو لكن هو صعب ، قال لي أنتِ عشتي و اتحملتي مسؤوليات أصعب منو ، متأكد انو ماف شي بغلبك يا مها أنا واثق فيك و خليك عارفه إني حـ أكون معاك و أدعمك في كل مرحله و مع كل خطوه....
قلت ليهو ما عارفه اقول ليك شنو ، قال لي ما تقولي حاجه ، إنبسطي بس ، المهم كدا انتهينا من اختيار رغبتك باقي الجامعه ، نفسك تدخلي جامعة شنو ، قلت ليهو برضو ما عارفه يا أواب 😭😭
ضحك و قال لي شكلي أنا برضو الحـ اقرا ليك بعدين و حـ اتخرجك بدلك ، قال لي على فكره أنا بقيت احب إسمي شديد لأنك بتكرريهو طوالي في نهاية كل جمله ، إبتسمت بخجل و قلت ليهو ما إنتبهت للحاجه دي يا.....طوالي سكته ، قال لي ياريتني ما قلت ليك الحاجه دي ، تاني اسمي بالغلط ما بتقوليهو 🤣🤣
قلت ليهو مستحيل ما أقولو يا أوااااب يا أواااااب ، قال لي الله الله 💜
قال لي نرجع لموضوع الجامعه عشان ارجعك بدري لأني كلمت ابوك اننا ما حـ نتأخر ، قلت ليهو اختار لي جامعه على ذوق ، قال لي تمام ، بعدها أكلنا و اتونسنا مسافه و طلعنا مشينا ، لمن وصلت البيت ابوي ناداني و قال لي ولد الناس دا ما قال ليك ناوي يعمل العرس متين ؟؟!
قلت ليهو لا ما قال لي ، قال لي ما تكوني عامله ليهو مشاكل و في خلاف بيناتكم !! قلت ليهو لا ماف......حسيت عايز يعرف أواب ساقني ليه بس شايفها شينه و ما قادر يقول لي كنتوا بتقولوا في شنو ، قلت ليهو أواب سألني عايزا اقدم في جامعة شنو و اقرا شنو ، و وريتو اني عايزا اقرا طب فـ قال حـ يقدم لي في جامعه مناسبه ، قال لي هسي الولد دا لو عمل عرسو و صرف عليك على راحتو مش أحسن ! هسي اعمل شنو ! عايز الناس يقولو اني مُحملو مسؤوليتك و مخليهو هو يصرف عليك ! انتي ليه ما قلتي ليهو احسن تعمل العرس ، انتي عارفه كويس اني قروش الجامعه دي ما بقدر عليها و في نفس الوقت ما بقدر أخليهو يصرف عليك و هو خاطبك بس....
صراحة كلام ابوي زعلني بس لمن فكرت فيهو لقيتو صح ، أنا ما فكرت في حاجه زي دي ولا مره خطر على بالي إنو ما اخلي أواب يصرف علي و ما حصل مره سألت نفسي منو المفروض يصرف علي أبوي ولا أواب ولا الإتنين سوا!! ، لأني ما عارفه إذا الواحد مفروض يصرف على خطيبتو أو لا و إذا هي حاجه عاديه ولا لا ، دا كلو ما حصل فكرت فيهو...
لمن دخلت المطبخ لقيت رغد بتغسل في العده ، قلت ليها الحمدلله انك غسلتيها ، ريحتيني والله ، ما ردت علي ، طلعت من المطبخ و أنا في مية استفهام في راسي !!
رغد مالا ؟؟
ليه بقت عدوانيه كدا ! ليه بقت ما بتطيق الكلام و ما بتسمع من زول و جاهزه للمشاكل ! بقيت أحسها بقت ما بتطيقني كأني عملت ليها حاجه ....قعدت افكر كدا و بعد مسافه مشيت ليها في المطبخ ، قلت ليها رغد مالك انتي في حاجه حاصل معاك ؟؟
قالت لي حاجة شنو يعني ! قلت ليها ما عارفه لكن انتِ ما ملاحظه انك اتغيرتي و بقيتي عدوانيه شديد ؟؟
قالت لي أنا كدا ، الله خلقني كدا ، عايزاني أبقى كيف يعني ؟
عرفت انو ما حـ أقدر اتفاهم معاها فـ خليتها...