في مهب الريح الجزء الثاني

7

#في_مهب_الريح27
بقلم : مها حولي الزاكي

لمن قال كدا كلنا بقينا نعاين ليهو بإستغراب !!
رغد قالت ليهو عرست يا أبوي ! متين ؟؟
كان بعاين لأمي جوه عيونها ، قال عرست قبل أسبوع و حالياً بفكر أجيب المره ، أمي عاينت ليهو مسافه بعدها قالت ليهو ما بخلي أولادي يقعدوا مع مرة أبوهم 😊
قال ليها انتي شكلك ما مستوعبه أنهم هم ما عايزنك ، اي صح انتي امهم بس هم مع ذلك ما عاااايزنك ولا فاقدنك و أساساً بقوا ما شغالين بيك و وجودك و عدمو واحد بالنسبه ليهم...
أمي ما قدرت تقول حاجه فـ بس بكت قدرتها و ساقت ولدها و مشت بعدها حصل هدوء و كل الأنظار كانت على أبوي ! يعني لحد اللحظه ديك ما كنت مصدقه كلامو و قلت يمكن قال كدا ساي قدام أمي !....قلت ليهو أبوي انت ما جادي مش ؟
قال لي ما قاعد اهظر أنا و القلتو صح ميه في الميه ، انا عرست قبل أسبوع ...
بعد كلامو دا لساني إتربط ، ما عرفت اقول شنو تاني ! رغد قالت ليهو لكن يا أبوي انت ما كلمتنا !! قال ليها ما فرقت هسي عرفتو ، قال كدا و طلع طوالي من الأوضه !
حسيت انو البحصل دا كلو زي الحلم ، يعني أول شي أمي عرست و مشت خلتنا و هسي أبوي عمل نفس الشي ! رغد قالت لي معناها أبوي ذاتو ما عايزنا ، براءه قالت أبوي عرس عشان مرتو تجيب ليهو أولاد غيرنا.....بقينا قاعدين و محتارين لحد ما جا ياسر ، براءه قالت ليهو ياسر أبوي عرس ، قال ليها متين ؟؟
قالت ليهو قبل أسبوع و قال عايز يجيب مرتو هنا ، ياسر قال ما يجيبها لينا ولا شي ، نحنا ما عايزنها ، رغد قالت ليهو داك أبوي أمشي قول ليهو كلامك دا ، طوالي ياسر مشى مع أبوي ، بعد شويه جونا داخلين هم الإتنين ، أبوي قال لينا أنا معرسها عشاني ؟؟ مش عشانكم انتوا ! لو كان امكم قعدت و اهتمت بيكم ما كان إضطريت اجيب ليكم مرا غيرها ، رغد قالت ليهو نحنا ما قلنا عايزين مره تهتم بينا 😊
رفع اصبعو و قال ليها خليك ساكته و لسانك دا لميهو عليك عشان ما اقطعو ليك ، قالت ليهو يا أبوي أنا ما قلت حاجه غلط و انت ما عرستها عشانا ، انت عرستها لأنك عايز تعرسها و.....نهرها و قال ليها يا بت قفلي جردلك دا ....
لمن نهرها سكتت خلتو لكن زعلت شديد ، بعدها كلهم واحد ورا التاني طلعوا من الأوضه و خلوني براي غرقانه في أفكاري ، كنت مخنوقه شديد و حاسه انو زي ما أمي خلتنا أبوي كمان حـ يخلينا ....شلت تلفوني و طوالي إتصلت على أواب و أنا ببكي ، لمن سمع صوتي إتخلع و قال لي في شنو بتبكي ليه ....قلت ليهو أواب😭 قال لي مها طيب وين انتي ، هسي بجيك ، في البيت ؟؟....ردي ما تقلقي بي .....مسافة الطريق ، قلت ليهو لا ماف داعي تجي ، قال لي لا حـ أجي قلت ليهو الموضوع ما مهم و ما خطير شديد ، قال لي مش خلاك تبكي ؟! بالنسبه لي اي حاجه بتسبب في انو دموعك تنزل معناها حاجه مهمه و خطيره و حتى لو كان حاجه تافه فـ هي اتسببت في بكاك ولازم اقيف عند السبب دا ، قلت ليهو كل الحصل انو أبوي عرس ....سكت و بعد مسافه قال لي عرفت الخبر دا امبارح من أبوي....
قلت ليهو شنووو ! و ليه ما كلمتني ! يعني كل الناس عارفه إلا نحنا أولادو ما عارفين ! ليه ما كلمتني يا أواب !!؟
قال لي عرفت امبارح يا مها و بعدين يعني كيف حـ اتصل عليك و اقول ليك أبوك عرس ! قلت مدام هو ما كلمكم أكيد عندو اسبابو أو منتظر وقت مناسب يقعد فيهو معاكم و يفهمكم الحاصل ، قلت ليهو تمام شكراً ليك و طوالي قفلت الخط ، لمن رجع إتصل علي ما رديت عليهو و قفلت التلفون عديل ...
بعدها بيومين كان رمضان ، و أبوي بقى يرجع بدري من شغلو ، يوم و أنا طالعه عشان اجيب تلج قبل ما افتح الباب سمعت صوت أبوي جاي من ورا الباب و هو بتكلم مع واحد ، قال ليهو عديله يا زول ماف مشكله المهم انو يتبني في اسرع وقت لأني عايز أجيب المره بعد دا ، من صوت الراجل المعاهو عرفت انو دا سيد البيت ، أبوي قال ليهو أرح أدخل عشان نتناقش و نتفاهم قال ليهو لا لا مستعجل أنا ، المهم إيجار البيت حـ يكون 70 ألف لو بنيت ليك أوضه و عملت ليك الحوش بلوك و جيرتهم أما لو عملتو سيراميك و عملت الحمامات سايفون مع كم إضافات الإيجار حيكون 120 ، أبوي قال ليهو خلينا في الـ 70 دي لحد ما يمشي الحال ، سيد البيت قال ليهو تمام و المره دي أوعك تتماطل لي في الإيجار عشان ما أطلعك من البيت ....
لمن حسيت انو أبوي عايز يدخل زحيت من الباب شويه ، لمن جا داخل قال لي ماشه وين ؟؟
قلت ليهو ماشه اجيب تلج ، المهم هو دخل و أنا طلعت و طول الطريق بفكر في الكلام السمعتو ، يعني أبوي دا عمرو كلو معيشنا في البيت الخرابه دا و ما حصل شكينا و ما حصل قلنا ليهو عايزين نسكن في بيت سمح لأننا شايفين و عارفين ظروفو شنو بس الهسي عملتو دا اسمو شنو !؟ يعني نحنا عادي نعيش في بيت خرابه و مكسر لكن مرتو لا ؟ يعني لو ما هي عمرو كلو ما كان حـ يفكر يسكنا في بيت كويس !!
قلبي اتملى من الزعل ، وصلت مكان التلج و أديتو القروش و بقيت واقفه منتظراهو يكسر التلج و أنا واقفه كدا سمعت صوت عربيه جات وقفت وراي بس ما إتلفت لأنو واقفه جنب الظلط و طبيعي العربات تجي ماره بجنبي ، بس فجأه كدا أواب ظهر قدامي و إتكل في تربيزة التلج !!
اتفاجأت طبعاً ، قلت ليهو أواااااب ! قال لي عيووون أواب ! قلت ليهو الجابك شنو ، قال لي اول شي رمضان كريم عليك و ان شاء الله رمضان الجاي في بيتنا ....حاولت أخفي إبتسامتي بس ما قدرت ، لمن بتاع التلج مد لي الكيس أواب شالو منو و طلع قروش عشان يديها ليهو قال ليهو دفعت لي ، فـ طوالي أواب قال لي هاك ليهم انتي طيب ، قلت ليهو لا ما عايزا ، قال لي أرح أركبي طيب زمن الإفطار قرب ، أول ما ركبت كدا اتذكرت إني زعلانه منو ، أول ما جيت أنزل لقيتو مأمن الأبواب ، عاين لي و قعد يضحك قال لي عارفك حـ تتذكري في أي لحظه ، قلت ليهو نزلني ، قال لي لا ، مش زعلانه مني ! معناها لازم أراضيك ، قلت ليهو ما تراضيني نزلني بس ، قال لي لو انتِ كنتي مكاني كان حـ تتصلي و تقولي لي يا أواب أبوك أو أمك عرست فجأه كدا و من دون أي مقدمات ؟؟
قلت ليهو اي كنت حـ اتصل و اقول ليك ، قال لي طبيعي لأنك شافعه ، بس جد جد هي حركه بايخه و ما عندها معنى لو كان اتصلت و قلت ليك كنت حـ احس نفسي بتاع شمارات ، لويت ليهو خشمي بس ، قال لي ها لسه زعلانه ؟ قلت ليهو آي قال لي المشكله اني مصدع و ما قادر أشرح و أبرر ليك أكتر....
لمن قال كدا حنيت عليهو و أصلا كان واضح انو تعبان ، ضحكت و قلت ليهو دا كلو من الصيام ؟؟ طلعت شافع يا أواب و ما بتستحمل الصوم 🤣🤣
ضحك و قال لي بالجد انتي شافعه ، قايله انو دا اول رمضان لي ولا شنو !؟
قلت ليهو معناها في كل رمضان حالتك بتكون كدا 😂
قال لي ابدا والله بس من يومين عندي حمى و إلتهاب و صداع ، قلت ليهو مشيت الدكتور ؟
قال لي لا ، قلت ليهو طيب منتظر شنو ؟
قال لي منتظرك تقولي لي أمشي الدكتور ، قلت ليهو هه ظريف ، عاين لساعتو و قال لي الزمن ، نزل من العربيه و مشى و جا راجع بعد مسافه و هو شايل كميه من الأكياس ، قلت ليهو ديل موديهم وين ؟
قال لي موديهم بيتنا ، المهم دور العربيه و مشينا ، لمن وصلنا البيت نزلت و شلت التلج ، قلت ليهو شكراً و كنت حـ أدخل ، قال لي بايخه و ما عندك ذوق بس براي حـ أعزم نفسي ، طوالي نزل و نزل معاهو الأكياس الجابهم ، نططت عيوني و قلت ليهو داخل معاي البيت ؟؟
قال لي لا لا عايز اقيف جنب بابكم ، قلت ليهو أبوي قاعد ! قال لي وين المشكله ؟ حـ يطرد راجل بتو يعني ؟
طبعاً لمن يقول لي كلام زي دا قلبي بعمل شححح و بفصل عديل ، المهم دخل معاي و سلم على ناس البيت و أبوي استقبلو بكل بشاشه و حفاوه ، قال ليهو طبعاً يا عمي براي عزمت نفسي و قلت أجيكم ،، قال ليهو نحنا الإتلومنا معاك ، كان مفروض نعزمك ، لكن قلت دا اول رمضان و معظم الناس يا قضتو في البيت يا مشوا لأهلهم و قايلاكم مشيت لأهلكم ناس امدرمان قال ليهو فعلاً ناس البيت مشوا بس انا قعدت مخصوص عشان تجي افطر معاك ، أبوي ضحك و قال ليهو احسن حاجه عملتها يا ولدي و شرفتنا و نورت البيت والله ...
أواب قال ليهو البيت منور بـ ناس و طبعاً لمن قال كدا عاين لي و أنا طوالي مشيت دخلت جوه ، رغد قالت لي يعني عايزا مية ساعه عشان تجيبي التلج ! قلت ليها ياخ ما تجوطي ! جبتو في النهايه ، قالت لي الأذن قرب هسي متين نكسر التلج و نختو في العصير و متين نعمل صينيه تانيه دا مدام جاي يفطر هنا كان يتكلم من بدري بدل ما يجينا قريب للإفطار !..
كلامها زعلني لكن ما رديت عليها ، استعجلت و جهزت صينيه تانيه ، ختيت فيها صحن عصيده بتقليه و جكين عصير و جك مويه و بلح ، بعدها كسرت التلج و ختيتو في العصاير ، ناديت ياسر و قلت ليهو أمشي فرش الفرشه جنب سرير أبوي و تعال شيل الصينيه ، فعلاً مشى فرشها و جا شالها ، رغد قالت لي هسي يشيل حالنا و يقول صينيتنا فاضيه ، قلت ليها رغد عليك الله أسكتي ، طبعاً نحنا قعدنا جوه المطبخ لأنو الأذان إذن قبل ما نشوف لينا حاجه نقعد فيها لأنو عندنا فرشه وحده بس ، المهم بعد الإفطار قلت لـ رغد أعملي ليهم الجبنه لأني حـ أغسل العده ، قالت لي ياخ ما قادره اعمل حاجه أنا ، بطني مليانه و الحركه غالباني ، قلت ليها كويس حـ اعمل ليهم الجبنه لكن انتي حـ تغسلي العده ، قالت لي ماشه أرقد شويه و فعلاً مشت الأوضه و رقدت ، أما أنا فـ عملت الجبنه و مشيت وديت ليهم الجبنه ، أبوي قال لي ما يكون عملتيها تقيله ! قلت ليها لا لا وسط لا تقيله لا خفيفه .....بعدها مشيت الأوضه طلعت لي عبايه عشان أمشي بيها صلاة التراويح ، قلت لـ رغد حـ تمشي التراويح ؟ قالت لي ما عارفه ، قلت ليها على راحتك ، طلعت لـ براءه عبايتها عشان تمشي معاي ، مشيت كبيت التنى لناس أبوي و لمن العشا أذن قلت لأبوي نحنا ماشين التراويح ، أواب قال لي أنا ذاتي ماشي المسجد فـ حـ أسوقكم معاي ، أبوي قال ليهو سوقهم ماف مشكله ، دخلت جوه كلمت براءه و لبسنا عباياتنا ، ياسر قال لينا أنا ذاتي ماشي معاكم ، براءه قالت ليهو عشان تركب العربيه بس ، رغد رفعت راسها و قالت ليها عربيتي منو ؟؟
قالت ليها نحنا ماشين الجامع مع أواب ، قالت لينا المسافه قريبه هسي محتاجه ليها عربيه ! قلت ليها وين المشكله و يمكن لأنو من الجامع حـ يمشي طوالي !!
المهم نحنا طلعنا و لقينا أواب منتظرنا برا ، أول ما ركبنا كدا رغد جات لاحقانا و قالت لينا ماشه معاكم ، المهم مشينا صلينا و لمن خلصنا أواب وصلنا لحد البيت ، طبعاً طول الطريق في المشيه و الجيه كلنا كنا بنتونس إلا رغد ساكته ساي لمن خلاص وصلنا البيت أواب قال لي التقديم لسه ما بدا صح ؟ قلت ليهو أيوه لسه ما بدا ، لمن ودعنا أواب و نزلنا اتذكرت حاجه ! وقفت و بقيت متردده اسأل أواب ولا لا ، هو كان حـ يدور عربيتو بس لمن شافني ما دخلت نزل و قال لي في حاجه ؟؟
ما اتكلمت ، قال لي مها قولي و ما تدسي مني ، في شنو ؟
قلت ليهو عايزا اسألك عن حاجه لكن خايفاك تزعل مني ، قال لي أنا قبل كدا قلتها ليك ، أنا ما بقدر أزعل منك و لو زعلت زعلي بروح في ساعتو فـ قولي عادي .....بعد تردد قلت ليهو انت ما لقيت ورقه في عربيتك ؟؟
قال لي ورقة شنو ؟؟ ما لاقتني اي ورقه ! قلت ليهو اهاا خلاص معناها وقعت في حته تانيه ، قال لي فيها شنو الورقه دي ؟؟ قلت ليهو ما شي مهم ، قال لي عشان لو مهمه أفتشها ليك ، قلت ليهو لا لا ما مهمه خليها ساي و يلا مع سلامه يا أواب و سلم لي على خالتو خنساء ، أول ما لفيت عشان ادخل البيت قال لي ثواني ، لمن إتلفت عليهو لقيتو مدخل يدو بـ شباك العربيه ، لمن طلعها كان شايل فيها ورقه ، فتحها و قال لي قصدك دي ؟؟؟
هنا نططت عيوني و بلعت ريقي ، قال لي ياها ولا لا ؟ بقيت اتمتم ليهو في الكلام ، قال لي أنا ما بحب الكذب فـ خليك صريحه معاي ....هزيت ليهو راسي بس ، فـ طوالي مد لي الورقه و إتوقعتو يسألني عن الرقم الفيها بس ما سألني ، قال لي بعد دا خشي جوا و ما تنسي لو إحتجتي حاجه كلميني ، قال كدا و طوالي فتح باب العربيه عشان يركب قلت ليهو أواب ، إتلفت علي و قال لي ايوه ! قلت ليهو انت ما سألتني دا رقم منو ، قال لي ما عايز اتحشر و أسألك سؤال متأكد انك ما حـ تجاوبي عليهو 😊
بقينا ساكتين الإتنين ، قال لي مش قلت ليك ! المهم حـ أمشي بعد دا ...أول ما إتلفت مني قلت ليهو أستاذ أحمد ....إتلفت علي بإستغراب و قال لي نعم !!!
قلت ليهو دا رقم أستاذ أحمد يوم النتيجه شلتو من صحباتي ، قال لي لا تمام ، محتاجه رصيد عشان تتكلمي معاهو ؟؟
قلت ليهو أواب أنا.....قاطعني و قال لي ما عايز اسمع شي لأني متأكد إنو عذرك ما حـ يكون مقبول و أساساً ماف شي يخليك تتواصلي معاهو تاني ، قلت ليهو عارف انو ما مبرر بالنسبه ليك لكن استاذ أحمد بالنسبه لي.....قاطعني و قال لي : افضل و احسن أستاذ عشان كدا ما ناويه تخليهو 😊
قلت ليهو أواب أنا ....قال لي ما تبرري لي و أنا ما حـ اقول ليك حاجه لأني لو اتكلمت حـ تزعلي حتى و انتي غلطانه عشان كدا أعملي البريحك و أنا زعلي و ضيقي ما مهمات ، قال كدا و طوالي مشى ، لمت نفسي شديد و عاتبتها ، لمن دخلت البيت أبوي ما كان قاعد ما عارفاهو مشى وين ، قلت لـ رغد يلا غسلي العده بعد دا ، قالت لي هسي نعسانه بعد انوم و أصحى بغسلها .... طبعاً أنا عارفه دي حركات منها ساي ، أصلا هي في كل شهر بتتهرب لي من غسيل العده ، خليتها مشت رقدت و أنا مشيت غسلتها و ضايرت المطبخ ، بعدها قطعت سلطه للعشاء و انتظرنا أبوي لحد ما جا بعدها اتعشينا و نومنا....
في اليوم البعدو خالتو خنساء جاتنا هي و أمجد ، كنت متوقعه أواب يجي وراهم بس خالص ما جا و لمن إتصلت عليهو ما رد علي ، زعلت شديد من نفسي و قلت أواب ما بستاهل إني ازعلو و اجرح مشاعرو بالطريقه دي ، خالتو خنساء قالت لينا إنو خطوبة أمير ولدها بعد يومين ........ طبعاً خطوبة أمير دي كان مفروض تكون قبل خطوبتي أنا و أواب بس قالوا أبوي خطيبتو كان عيان عشان كدا أجلوها ، المهم طول اليومين ديل أواب ما كان برد لا على رسايلي لا مكالماتي ، المهم بعد صلاة التراويح جهزنا نفسنا و أبوي ساقنا و ودانا بيت ناس خالتو خنساء عشان نمشي معاهم لخطوبة أمير ، أول ما وصلت بقيت أفتش على أواب بس خالص ما لقيتو ....
طبعاً بيتهم كان ملان ناس و بناتهم سمحات جنس سماحه بقيت أعاين ليهن بس و اقول ديل بنات و أنا بت !!....رغد كانت قاعده جنبي و فجأه قامت قلت ليها ماشه وين ؟؟ قالت لي برجع بعد شويه ...
المهم الناس جهزت نفسها و جابوا باص عشان نمشي بيهو دا غير العربات الحـ تمشي قدام الباص ، طبعاً خالتو خنساء و حبوبه سعاد كانوا مشغولين و أنا صراحة حسيت نفسي غريبه وسط أهلهم ، لمن الباص جا الناس جرت ركبت و أنا كنت بفتش على ياسر و رغد ، لمن ما لقيتهم قلت بكونوا مشوا ركبوا الباص ، لمن مشيت الباص لقيتو اتملى عديل و المشكله انو معظمهم شفع ، يعني الوحده قاعده في كرسي و مقعده أولادها في باقي الكراسي يعني شافع عمر 3 ،4 سنه قاعد في كرسي براهو ، عاينت لوحده لقيت جنبها كرسي فاضي سقت براءه و مشيت أقعد جنبها قالت لي الكرسي دا حاجزاهو لصحبتي و الوراها قالت دا كرسي بتها هسي بتجي ...حسيت أهلهم ديل كعبين و ما حابين وجودي فطوالي نزلت من الباص و عيونو مليانه دموع ، براءه قالت لي ديل حقارين عشان كدا أرح البيت ، قلت ليها رغد و ياسر وين ما لاقياهم ، طبعاً كنا واقفين في الشارع ، براءه قالت ليها مها عايني أواب و طوالي أشرت عليهو و هو طوالي إتلفت في اللحظه الهي أشرت فيها عليهو ، نزلت يدها و قلت ليها خليهو ، أرح نشوف رغد و ياسر ، سقتها من يدها و مشينا دخلنا جوه و بقينا نفتش عليهم و طبعاً بتاع الباص كان بضرب بوري ساي عشان الناس تستعجل ، لمحت رغد ماشه بإستعجال على الباب ، ناديتها قبل ما تطلع لمن جاتني قالت لي انتوا ما ماشين ولا شنو ؟؟
طبعاً كانت عامله ميك اب في وشها و شكلها اتغير شديد ، براءه قالت ليها ما خلونا نركب و طوالي حكت ليها الحصل ، رغد قالت ليها ليه الباص دا بتاع أبوي وحده فيهم ! قالت لي انتي وحده هبله كنتي تقعدي طوالي و ما عندك شغله بيهم ، قلت ليها هسي أنا عايزا أرجع البيت ، ياسر وين عشان نمشي ، طبعاً في الأثناء دي الباص و العربات المعاهو مشوا ، في اللحظه ديك قربت أبكي بس مسكت دموعي ، رغد قالت المعفنين مشوا ، قلت ليها خايفه ياسر يكون مشى معاهم و بعدين يجوا راجعين و يخلوهو معاهم ، شويه كدا جات مره داخله رتبت البيت و قالت لينا انتوا تابعين لناس البيت دا ولا حاجه ! عشان موصنها تقفل البيت بعد تنضفو ، قلت ليها طالعين ، المهم طلعنا الشارع و المره طوالي قفلت البيت ، بقيت شايله هم ياسر بس و غالبني أرجع البيت من دونو ، بعد مسافه فتحت تلفوني و إتصلت على أواب ، في البدايه ما رد علي بس في الآخر فتح الخط و قال لي ايوه يا مها !
قلت ليهو ياسر معاك ؟؟
قال لي ايوه راكب معانا ، قلت ليهو خلي بالك منو ، ياسر مشاغب و يمكن يضيع منك ، لمن ترجعوا عليك الله جيبوا معاك للبيت ، قال لي دقيقه دقيقه انتي وين ؟؟
قلت ليهو ما مهم ، ياسر أمانه في رقبتك ، قال لي ما محتاجه توصيني عليهو ، انتي وين ما أعيد كلامي تاني يا مها ، لـ مره واحده جاوبي علي من دون ما تلفي و تدوري ، قلت ليهو أنا في الباص الوراكم حـ أكون وين يعني ؟؟
في اللحظه دي رغد خطفت مني التلفون و قالت ليهو نحنا واقفين في الشارع يا أواب ، جنب بيتكم 😊
ما عارفه قال ليها شنو بس هي قالت ليهو نحنا ما متعودين نتواجد في مكان ما مرحب بينا فيهو ، المهم هسي حنرجع البيت و ياسر دا ما تنسوهو بعدين جيبوهو راجع معاكم ، قالت كدا و طوالي قفلت الخط في وشو ، قلت ليها ما كان تقولي ليهو و تتكلمي معاهو بالطريقه دي ، أواب رجع إتصل علي بس التلفون كان مع رغد و هي حلفت ما ترد ولا تخليني أرد ، لمن إتصالاتو كترت شلت منها التلفون و فتحت الخط و قلت ليهو أواب ما تشتغل بكلام رغد انتي عارفها لمن تكون زعلانه بتتكلم كيف ، قال لي مها ما تتحركوا من مكانكم انا جاي عليكم ، قلت ليهو لا ما تجي ، نحنا اتحركنا و هسي ماشين على البيت ، قال لي قلت ليك ما تمشوا انا جاي عليكم خشوا اقعدوا في البيت لحد ما أجي ، قلت ليهو بيتكم مقفول ، قال لي انتوا ليه ما ركبتوا معاهم ؟؟
سكته ما رديت ، قال لي المهم أنا هسي جاي ، رجاء ما تتحركي من مكانك ، لمن قفلت منو كلمت رغد بالقالو ، قالت لي أنا و براءه حـ نمشي البيت ، انتي اذا عايزا تقيفي كدا و تنتظريهو أقيفي نحنا حـ نمشي ، براءه قالت ليها أنا عايزا اقعد مع مها ، قالت ليها بعد ما خلوكم تمشوا معاهم لسه عندكم نيه تمشوا تلحقوهم ! يمكن عشان شايفننا رخاص عشان كدا حاقرين بين و صراحة ليهم حق 😊
كلامها زعلني لكن بالجد حسيت إننا رخاص قدامهم و إنو أنا و أواب ما مناسبين لبعض ، هو مستواهو كيف و نحنا مستوانا كيف ، قالت لي بعد دا كلو عايزا تنتظريهو ؟؟
ما رديت عليها ، قالت لـ براءه أرح و خليها ان شاء الله تقيف كدا للصباح ، براءه مسكتني من يدي و قالت لي مها ارح معانا ما تقيفي براك ...بعد مسافه مسحت دموعي و قلت ليهم أرح ، أول ما إتحركنا و مشينا كم خطوه كدا فجأه جات عربيه و قطعت طريقتنا ، طبعاً دا كان أواب ، وقف العربيه و نزل و هو زهجان ، قال لي أنا مش قلت ليك انتظروني ! كنتي ماشه وين براكم في الليل دا !!
رغد قالت ليهو ماشين البيت يعني حـ نمشي وين ، نهرها و قال ليها انتي بالذات خليك ساكته ، الكانوا معاهو في العربيه نزلوا و ياسر اول واحد نزل فيهم ، كانوا راكبين معاهو ولد و بنتين من بنات أهلهم ، لمن اتكلم معانا بالنبره العاليه ديك ما قدرت أمسك دموعي ، وحده من بنات أهلو قالت ليهو أواب براحه عليهم ! قال لي ممكن أعرف ليه ما ركبتي معاهم !!؟ طيب ليه ما كلمتيني عشان أسوقكم معاي !!؟....ما تسكتي لي قولي حاجه ، براءه قالت ليهو هم ما خلونا نركب معاهم ، قال ليها منو ديل الما خلوكم ؟؟ قالت ليهو أهلكم ، رغد قالت لـ ياسر تعال و خلينا نمشي ، فعلاً ياسر جا ، رغد مسكتو هو و براءه و قالت لي يلا نمشي البيت ، أواب قال ليها أنا لحد اللحظه ماسك أعصابي و لحد اللحظه دي متحمل حركاتك و تصرفاتك المستفزه دي ، بطلي البتعملي فيهو دا عشان ما اتعامل معاك بطريقه ما تعجبك....
طبعاً كلامو صدمني فيهو !!!
قالت ليهو أنا هسي سألتك !؟ يعني عايزين نمشي بيتنا المشكله وين ؟؟! انت مش خاطب دي 👈 معناها هي المجبوره تسمع كلامك أما نحنا ما عندك بينا شغله ، قال ليها رغد أحسن تسكتي ، طوالي جرت ياسر و براءه من يدينهم و مشت و أواب شغال ليها اقيفي مكانك و ما تخليني أفقد أعصابي ، أما أنا فـ كنت واقفه في النص بس و ما عارفه اعمل شنو بعد مسافه إتحركت من مكاني و مشيت على ناس رغد ، أواب قال لي ماشه وين انتي كمان ؟؟
مها بتكلم معاك أنا
جا لاحقني و وقفني و قال لي على فكره انا جاي عشان أسوقكم معاي ، قلت ليهو نحنا ما ماشين ، قال لي ما تسمعي كلام رغد ، عاينت بإتجاهم و قلت ليهو فاتوني حـ أمشي ألحقهم ، ما أديتو فرصه يتكلم طوالي إتحركت من قدامو و ناديت على رغد عشان تقيف لي لمن وصلتهم طوالي مشيت عليهم و أواب كان واقف بعاين لينا ساي لحد ما إختفينا من قدامو ، لمن وصلنا البيت و عاينت وراي لقيت أواب واقف من بعيد و واضح انو كان ماشي ورانا عشان يتأكد اننا وصلنا البيت ، لمن دخلنا أبوي قال لي الجابكم بدري شنو ؟؟
أنا دخلت طوالي و رغد قعدت تحكي ليهو الحاصل ، قال لي دا ما سبب يخليك تزعلي و تقولي ما ماشه معاهم ، ديل بقوا نسابتك بعد دا فالأحسن تخلي حركاتك دي و ما تتعاملي معاهم على أساس انهم ناس غرباء ، هزيت ليهو راسي بس و مشيت...
في اليوم البعدو طوالي خالتو خنساء اتصلت و زعلت شديد لأني ما مشيت معاهم و ما كلمتهم بالحصل ، قلت ليها حصل خير و ماف مشكله ، قالت لي أديني أبوك اتكلم معاهو ، اديتها أبوي و هي قعدت تعتذر منو قدرتها ، قال ليها انتوا ما غلطوا والله ، البت براها مقويه راسها و زعلت في حاجه ما بتستاهل الزعل و ساقت أخوانها و جات بيهم ...
المهم بعد أسبوع من الكلام دا ناس أبوي نزلوا حاجات البناء و هو و معاهو كم عامل كدا بدوا يبنوا في البيت ، كنا بنمشي نقعد مع ناس خالتو خنساء لحد ما العمال يخلصوا و ابوي يتصل علينا عشان نرجع ، طول الأسبوع دا ما شفت أواب ، خالتو خنساء قالت انو بايت مع صحبو ، المهم فوق الأسبوع مر أسبوع تاني ، لمن جينا ناس خالتو خنساء أول ما ضغطنا على الجرس أواب جا و فتح لينا الباب ، لمن شفتو عيوني بقت قلوب قلوب ، حسيت إنو لي سنوات ما شفتو ...كنت متلهفه شديد عليهو و قلبي شغال دق دق ! أما هو فكان عكسي تماماً ، كان بارد و كأنو كان شايفني كل يوم !! قال لينا اتفضلوا و طوالي دخل قدامنا ، حسيت بوخزه في قلبي ، رغد طوالي عاينت لي ، لمن دخلنا أنا شويه كدا و كنت حـ أبكي ، خالتو خنساء قالت لينا خشوا نموا جوا المكيف شغال و الدنيا سخانه ، ناس رغد مشوا أنا كنت قاعده في مكاني ، قالت لي لو عايزا تحضري هنا بشغل ليك المكيف ، قلت ليها لا لا ما تشغليهو بعد شويه بمشي ألحقهم ، بعد مسافه قالت لي انتي و أواب متزاعلين ولا شنو ؟
بتردد هزيت ليها راسي و اتخيلت أنها تسألني عن السبب بس ما سألتني كل القالتو لي انو دي حاجه عاديه بتحصل بين اي اتنين المهم انهم يعرفوا كيف يحلوا مشاكلهم و يتجاوزوها ، دي كلها امتحانات و إختبارات ليكم الإتنين عشان تفهموا بعض و تعرفوا نفسكم كيف حـ تتعاملوا مع النقاشات دي ، و كلو بتحل بالتنازل و عدم المكابره ، قلت ليها كلامك صح يا خالتو ، قالت لي ما تخلوا الفجوه البيناتكم تكبر اي مشكله حلوها في ساعتها ، قلت ليها حاضر ، قالت لي ماشه أخت أكل لـ براءه و ياسر ، قلت ليها هم قالوا صايمين ، قالت لي يا حليلهم بقدروا على الصيام ؟؟
قلت ليها براءه دي صامت 5 أيام لكن ياسر دا لحد الآن صام نص يوم بس ، كل ما يقول صايم بتجرس و بقطعو ، ضحكت و قالت لي غيتو ياسر دا الله يكون في عونو بعدين لمن الصيام يكون واجب عليهو ، شويه كدا عملو سليمان جا راجع من الشغل ، سلم علي و قعد اتونس معانا شويه و مشى غرفتو ، خالتو خنساء جابت لي سيرة عرس أبوي و اتكلمت معاي في الموضوع و فهمتني انو من حقو يعرس و لو عايز يعرس تاني غيرها بقدر يعرسهم قالت لي لكن نحنا ما بنقصر منكم يعني إذا مرة أبوكم الجديده دي قصرت معاكم أو لا نحنا ما بنقصر و حتلقونا واقفين معاكم في الحلوه و المره ولو علي أجيبكم و اسكنكم معاي....اتكلمنا مسافه بعدها هي قامت و مشت ، أواب جا نازل من فوق و من دون مقدمات قال لي التقديم بدا ، هاك أملي الإستماره دي...
بقيت أعاين ليهو و أنا قلبي واجعني بالجد ، يعني بعد دا كلو لسه مصلحتي بتهمو ، قلت ليهو أواب انت زعلان مني ؟؟
قال لي أملي الإستماره ، قلت ليهو اول شي جاوب على سؤالي ، وقف على حيلو و قال لي لمن تمليها ناديني ، قال كدا و مشى و أنا طوالي جدعت القلم و قلت ما حـ أملى أي استماره ...

يتبع.....