في مهب الريح الجزء الثاني

2

#في_مهب_الريح22
#الجزء الثاني
بقلم : مها حولي الزاكي

لمن رجعنا البيت ، شاكلتها شديد و قلت ليها ليه عملتي كدا و و و ....و في ختام كلامي قلت ليها لو كررتي حركتك دي تاني حـ أكلم ليك أبوي ، هسي بسببك خالتو خنساء زعلت ، قالت لي أنا ذاتي حـ أكلم ليك أبوي و عاينت لي جوه عيوني !
قلت ليها مالي أنا عملت شنو ؟!
قالت لي انتي عارفه نفسك كويس بتعملي في شنو و أبوي لو عرف حـ يضبحك...
لمن قالت كدا قلبي اشتغل دق دق !
بقيت اتمتم في الكلام! قلت ليها ما عملت حاجه أنا ، قالت لي خلاص لمن أكلم أبوي قولي ليهو انكِ ما عملتي حاجه ....قالت كدا و مشت و خلتني ميته من الخوف ....أنا فهمت قصدها ، معناها هي عارفه إني بتكلم مع أواب و قبيل عشان شافتني معاهو عملت القصه دي كلها !...لو كلمت لي أبوي حـ يكتلني والله و أنا ما عارفه حـ أقول ليهو شنو....
بقيت خايفه اليوم كلو ، و كل ما عيني تقع على رغد بلقاها بتعاين لي بكل ثقه و بنظره حاده كأنها بتهددني ، لمن المسا جا و أبوي رجع أنا خلاص هبطت ، رغد جهزت ليهو الأكل و ودتو ليهو و أنا من الأوضه ما طلعت ، شويه كدا جا ياسر و قال لي مها أبوي بناديكِ ، هنا حسيت قلبي وقف عديل ، نططت عيوني و قلت ليهو شـ شـ شنو ؟ بناديني ليه ؟
قال لي ما عارف ، بلعت ريقي و إتحركت ، بقيت ماشه و أنا رجليني بضربوا في بعض من شدة الخوف ، لمن طلعت ليهو في الحوش و لقيت رغد واقفه معاهو قربت أجري ، قال لي تعالي ، مشيت عليهو بحذر و أنا منططه عيوني لسه ، لمن وصلتو عاين لي بإستغراب و قال لي مالك انتِ ؟
عاينت لـ رغد و قلت ليهو مـ مـ مالي ! ولا شي ! قال لي من جيت ما شفتك ، قالوا لي من قبيل قاعده جوه الأوضه ، مالك عيانه ولا شنو ؟؟
هنا ياداب قدرت أتنفس كويس ، طبعاً رغد كانت بتتبسم ساي ، عرفتها كانت عايزا تلعب بأعصابي بس ، قلت ليهو لا لا كويسه بس كنت قاعده أقرا ، قال لي كويس ، صحي مشيتوا لناس عمكم سليمان ؟؟
قلت ليهو آي ، قال لي لقيتوهم كيف ؟ قلت ليهو كويسين بس عم سليمان ما كان قاعد....
رجعت الأوضه و أنا خاته يدي على قلبي ، رغد جات داخله و قالت لي بتعرفي الخوف لكن ما بتعرفي الأدب ...ما قدرت أرد عليها ، قالت لي لو أبوي عرف انك بتتكلمي مع أواب أو غيرو حـ يكتلك ، قلت ليها أساساً نحنا ما قاعدين نقول حاجه ، أواب بسألني عن أحوالنا و بس ، قالت لي طيب ليه خفتي لمن قلت ليك بكلم ليك أبوي ؟؟
قلت ليها رغد ياخ أنتِ مالك معاي ؟
قالت لي كنتِ عامله فيها الشريف الرضي و هسي بقيتي تعملي ليك حركات ، ما رديت عليها ، اتكلمت قدرتها و مشت ، أول ما طلعت طوالي قعدت أبكي ، ما عارفه ليه تحديداً بس زي الحسيت بالذنب و إني هزيت صورتي قدام أستاذ أحمد و رغد ، في نفس اليوم دا ، أواب رسل لي زي الساعه 9 كدا ، شفت رسايلو بس ما رديت عليهو ، لمن تاني رسل ، دخلت و قلت ليهو أواب تاني ما ترسل لي و أمسح رقمي ، قال لي في شنو ؟؟
قلت ليهو ساي كدا و ذاتو ما مفروض أتكلم معاك
قال لي مها فهميني في شنو مالك ياخ ؟؟
ما رديت عليهو ، قفلت التلفون و قعدت أبكي ، براءه و ياسر كانوا نايمين في الحوش مع أبوي و أنا قاعده براي جوا الأوضه ، رغد لمن جات داخله أنا طوالي مسحت دموعي و عملت نفسي مركزه مع الكتاب القدامي...
تاني يوم مشيت المدرسه و أنا ما عندي رغبه في شي ولا عندي نفس لـ قرايه أو غيرها ، ريما قالت لي انتِ عيانه ولا شنو ؟ عشان ما تسأل كتير قلت ليها ايوه مصدعه ، ما عارفه اليوم دا عديتو كيف و رجعت البيت ، بعدها عدا أسبوع فيهو ما اتكلمت مع أواب خالص و حظرتو ، و برضو في الأسبوع دا ما إتلاقيت وجهاً لـ وجه مع أستاذ أحمد لأني ما كنت بحضر حصصو و التمرين القال تكتبوا 5 مرات ما كتبتو ، كنت أول ما اعرف إنو الحصه فيزياء طوالي بطلع من الفصل و بمشي ورا الفصول لحد ما هو يخلص حصصو ، ريما و شروق قالوا لي انتِ ليه ما بتحضري حصص الفيزياء ؟ قلت ليهم ساي ، شروق قالت لي أستاذ أحمد مالو معاك ؟؟
قلت ليها مالو !؟
ريما قالت لي الفصل كلو ملاحظ انو استاذ أحمد بقى شايلها معاك و خالص ما بعاين ليك أو بتكلم معاك عكس زمان ، إنفعلت و قلت ليهم يعني أنا جايه من بيتنا عشان أخليهو يعاين لي أو يتكلم معاي !؟ ما يتكلم عنو ، مالي و مالو ، فارق معاي في شنو يعني !!؟
شروق قالت لي طيب طيب ما تنفعلي ! قلت ليهم اقفلوا السيره دي و تاني ما تجيبوها لي ، سكتنا دقيقه ما تميناها أستاذ أحمد جا داخل و البنات وقفوا ردوا ليهو السلام ! طبعاً استغربت لأنو حسب الجدول اليوم ما عندنا فيزياء و الحصه دي مفروض تكون إنجليزي !
قال لينا كل وحده تطلع كتابها قدامها حـ نشتغل التمرين سوا ، معظم البنات قالوا ما جايبين كتاب الفيزياء عشان اليوم ماف فيزياء ، قال الجايبين كتب منو ؟ رفعوا يدينهم زي 13 بت كدا ، قال كويس وزعوا الكتب دي بيناتكم ان شاء الله في كل كنبه كتاب واحد ، فعلاً وزعوا الكتب على الفصل كلو ، في كل كنبه كتاب ريما طوالي فتحت التمرين و كل الكنبه إتلمت في الكتاب ، كنت قاعده في النص ف طوالي بدلت البت القاعده في نهاية الكنبه و قعدت مكانها لأني ما عايزا أحل معاهم ، أول ما بدلتها و قعدت كدا لقيت أستاذ أحمد بعاين لي ، فجأه كدا قال دخلوا الكتب دي و كل وحده تطلع ورقه و قلم و طوالي إتلفت على السبوره و كتب "إختبار " كل الفصل قعد ينق ! قالوا ليهو ما جاهزين يا أستاذ أجلوا ليوم تاني ، قال ليهم ما جاهزين ليه ؟ مش كل يوم بتحلوا التمارين !؟ إذاً ماف شي حـ يغلبكم ، ريما قالت ليهو أستاذ أحمد عليك الله أجل الإختبار دا ، رهام قالت ليهو آي يا استاذ أجلو لينا ....خت كتابو على التربيزه و قال معقوله !!؟
عاين لـ ريما و رهام و قال ليهم إذا انتوا أوائل الفصل ما جاهزين للإختبار دا فـ كيف حيكونوا الباقين ! ما عارف !....ما عارف والله اقول شنو يا ريما و رهام ! مفروض انتوا أكتر اتنين تكونوا مصرين على الإختبار دا ! بتحلوا التمارين أول بأول و بتجوا تصححوا فما فاهم الغالبكم شنو !؟
طبعاً أنا مسحني خالص ! كأني ما من أوائل الفصل ، أو كأني ما موجوده خالص ، لين قالت بالعكس يا جماعه الأفضل نختبر روحنا ، أنا عن نفسي عايزا الإختبار دا ، شروق قالت طيب العايزين الإختبار يتأجل يرفعوا يدينهم ، ريما و رهام و شروق و معظم بنات الفصل رفعوا يدينهم ، رهام قاعده في القسم التاني في الكنبه الأولى ، عاينت لي و من مكانها قالت لي يعني انتِ يا مها عايزا الإختبار يكون هسي !؟ وحده قالت ليها مها أكيد بتكون شاربه الفيزياء زي شراب المويه عشان كدا عايزا الإختبار ....لين قالت طيب العايزين الإختبار هسي منو ؟؟
رفعت يدها و معاها شوية بنات و أنا في الحالتين ما رفعت يدي ، رهام قالت لأستاذ أحمد معناها الإختبار حـ يتأجل 😅
إتلفت على السبوره و بدأ يكتب في الإختبار و كل الفصل بقى يتلفت ، من دون ما يتلفت قال بنبره حاده أول ما أخلص كتابة الإختبار دا لازم كل وحده تكون ورقتها قدامها و كاتبه الأسئلة دي ، عشان ما أوريكم الوش التاني ، طبعاً أنا بديت أكتب الأسئله بس ما حاولت أحلها ، لأني ما عايزا أحل و لأني حقيقة في اسئله كتيره ما عارفه حلها بسبب إهمالي للفيزياء في الفتره الآخيره ، المهم لمن خلص و إتلفت علينا لقانا كلنا بنكتب ، قال لينا معاكم ساعه بس .....كنت ماسكه القلم ساي و ما كتبت شي غير إسمي ، شويه كدا سمعت صوت استاذ أحمد و هو بقول جيبي الكتاب دا ، كل الفصل إتلفت ورا ، كان واقف قدام لين و واضح إنها كانت فاتحه الكتاب ، شالو منها و كتب ليها حاجه في ورقتها ، جا قدام و قال أي وحده تعمل عملتها دي حـ تاخد زيرو زي ما زميلتكم أخدتو ، المهم الساعه عدت و هو مشى ورا و بقى يجمع الورق من هناك لحد ما وصلنا قدام ، طبعاً أنا آخر وحده في الكنبه ، لمن جا يشيل مني الورقه ، عاين فيها و عاين لي بطرف عينو بس و شالها طوالي ، في اللحظه ديك حسيتو بكرهني شديد و حسيت إنو بتضايق من وجودي 💔
قبل ما يطلع قال لينا نهاية اليوم ما تمشوا خليكم قاعدين عشان تشوفوا نتيجة العواسه حقتكم دي....
بعد ما طلع لين بقت تقول إنو أستاذ أحمد شايلها معاها عشان كدا بتعمد يشاكلها و يحرجها ، وحده قالت ليها ما براك يختي كلنا بعاملنا كدا ، حتى مها الكانت مفضله عندو بقى يعاملها معامله ما كويسه ، طبعاً في اللحظه دي كل بنات الفصل إتلفتوا علي ، لين وقفت على حيلها و قالت ليها و أنا علاقتي شنو بالبت دي !! ماف مجال للمقارنه ، يعني عشان بقى بعاملها عكس زمان معناها كلنا نسكت و نرضى بالمعامله السيئه دي ؟؟!
عن نفسي ما حـ أسكت و انتوا إذا الوضع دا عاجبكم و متعودين على الإحراجات و الذل فـ على كيفكم ، وحده قالت ليها ما راضين والله يا لين لكن نعمل ليهو شنو ؟! ناسيه إنو هو أستاذنا !!
لين قالت ليها و يعني شنو لو كان أستاذ ؟!
هل دا بديهو الحق فـ إنو يهين و يحرج طلابو !
بديهو الحق في إنو يفرق بين طلابو و يفضلهم على بعض !
بديهو الحق في إنو يجي يفش غبينتو و زهجو فينا !؟
عملنا شنو نحنا عشان نتعامل المعامله دي !؟
رهام قالت ليها : لين ماف داعي للكلام دا كلو و أستاذ أحمد ما كدا
قالت ليها ما كدا كيف ؟؟ انتِ طبيعي تشوفيهو كويس و ما تنزعجي من معاملتو الزفته دي لأنكِ في دائرة الناس المفضله عندو و هو ما قاعد يعاملك بنفس الطريقه البعاملنا بيها ، المهم يا بنات أنا ساعة الفطور ماشه للمديره فـ العندها كرامه و بتحس و رافضه العنصريه الحاصله دي مفروض تمشي معاي ....
المهم لين بقت تتكلم كلام كتير عن أستاذ أحمد و قدرت تحرض عدد كبير من البنات و صراحة معاملة أستاذ أحمد في آخر فتره بقت سيئه شديد لكل الناس....
لمن جات فسحة الفطور أنا و ريما و شروق مشينا نشتري فطور ، لقينا رهام واقفه قدامنا في الصف ، قالت لينا جيبوا أجيب ليكم معاي ، أديناها و هي طوالي إشترت لينا معاها ، ريما قالت ليها أرح اقعدي معانا هناك ، قالت ليها لا ماشه الفصل أنا في تمرين عايزا أحلو ، شروق قالت ليها حق الكيمياء صح ؟؟ كلنا عايزين نحلوا ، أرح نقعد هناك و أنا بمشي أجيب ليكم الكتاب عشان نحل سوا ، المهم نحنا التلاته مشينا و شروق مشت الفصل ، طبعاً أنا كنت ساكته ساي و ريما و رهام بتكلموا ، ريما قالت ليها صحباتك وين الليله ؟ قالت ليها ما جوا ، قالت ليها بقيت ما بشوفك معاهم كتير ، قالت ليها فعلاً لأنهم في فصل و أنا فصل تاني و معظم الوقت بكون شغاله أحل في التمارين و ما بلقى وقت عشان أمشي ليهم ، ريما قالت ليها يا حليلك العلمي فرقكم .....
و هم بتكلموا كدا شروق جاتنا بإستعجال و قالت لينا ما وررريتكم الشمار ، لين و بنات الفصل مشوا مكتب المديره و هسي الناس كلها صاباها هناك شكلو في مشكله كبيره حصلت ، ريما قالت لينا أرحكم نشوف ، قلت ليها أمشوا انتوا أنا ما ماشه ، رهام قالت ليها أنا كمان ما حابه أمشي ، قالت لينا نظام طالبات مثاليات و كدا ، رهام ضحكت و قالت ليها لا والله 😂
المهم شروق و ريما مشوا و أنا و رهام ما مشينا ، قالت لي غيتو لين دي كما عملت جوطه في المدرسه ما بترتاح....كنت ساكته ساي و سرحانه ، قالت لي ما حشريه مني لكن نفسي أعرف ليه أستاذ أحمد غير طريقة تعاملو معاك !...لأنو زمان كان بعاملك بأسلوب تاني خالص و كان واضح انك مفضله و مميزه بالنسبه ليهو بس هسي شايفه الوضع إختلف ! قلت ليها ما عارفه و ذاتو ما مهم و طريقة تعاملو ما فارقه معاي ....المهم هي غيرت الموضوع و بقينا نتكلم في حاجات تانيه لحد ما ناس ريما جوا ، شروق قالت لينا طبعاً ما شفتو لين كانت بتتكلم مع استاذ أحمد كيف قدام المديره و المعلمين يعني كأنو هو قدرها أو أصغر منها ، ريما قالت لي كمان جابت سيرتك و سيرتنا و قالت للمديره انو استاذ أحمد طريقة تعاملو كعبه مع كل الطالبات إلا مها و رهام و شروق و ريما و صباح ، قالت ليها بتزهج فينا من دون سبب و بحب يحرجنا و شايلها مع معظم بنات الفصل ، طبعاً استاذ أحمد ولا اشتغل بكلامها و ما رد عليها خالص ، بعد ما لين و البنات المعاها خلصوا كلامهم المديره قالت ليهم خلاص أمشوا و أنا بتناقش مع أستاذ أحمد ، حالياً هو في مكتبها و بتتناقش معاهو و طردت كل البنات الكانوا واقفين جنب المكتب....
المهم لمن رجعنا الفصل لقيناهو جايط و البنات كانوا لسه بتكلموا في الموضوع و طبعاً لين مبسوطه ، قالت عشان تاني ماف استاذ يفرق بين طلابو و يفضل طالب على طالب

يتبع.....