شاعر لعيون القصيد

البارت 19

في صباح اليوم الثاني
صحيو كلهم وراحو المسجد وبعد ما رجعو كلهم قعدو يفطرو كلهم سوا وبعد الفطور كل واحد عنده شغل قام لشغله وبهالحين جا ساهر يسلم على عمه لانه رجع من الدمام توه وما حصل فرصة يجي ويزوره
ورحبو به جاسم وصقر وباقي الاخوان كلهم بدواماتهم
وقعدو كلهم سوا وهم يتقهوون ويسولفون ويتفقون بأمور الزواج والعرس
ابو جاسم لف لابوه :هاه شرايك يبه
الجد :والله اشوف زين العرس بعد عيد الأضحى بخمس اسابيع وانتو تدرون بعد البعيد اشلون تصير حوسة خلص نرتبها ويصير خير
ابو جاسم :لو كنا نسويه قبل العيد كان احسن لكن جت روحة ساهر وما صارت
الجد :لعله خير يولدي
ابو جاسم:الحمدلله الحمدلله لعله خير لنا وحنا ما ندري
ساهر:وانت صادق يا عمي
ابو جاسم:طيب وبدر ما شاورناه هو وش رأيه
ساهر:والله هو قال انتم قدمو والي فيه الخير يتم
ابو جاسم:اجل تمت يا ولدي بعد العيد بخمس اسابيع ان شاء الله
ساهر ابتسم:الله يقدم الي فيه الخير
الجد :الله يسعدكم يا ولدي
الكل :امين
ساهر:اجل انا اتيسر يا عمي
ابو جاسم:وين وين اقعد
ساهر:السموحة بس الشغل متراكم علي تدري كنت بعيد عن الشغل وبدر ما  يلحق عليهم لوحده
الجد:رح يبه والتهي بشغلك ولا تلتهي بأشياء ثانية
ساهر ضحك :ان شاء الله يا عمي
وسلم على عمه وجده وعيال عمه وبعدها قام عشان يمشي وقام معه صقر عشان يوصله لين الباب
صقر حط يده بكتفه وهو يقول :ما اوصييك يا ساهر
ساهر لف له:تفضل
صقر :اوصيك على اختي ادري للحينه باقي واجد لكن مابي اخليها بخاطري وابي اقولك انها اختنا وعاشت بين اخوان كبار دلعوها على كل شيء وقبل تطلب قالو لها تم
وهي صغيرة على كتوفنا شلناها وبمرضها عندها سهرناا هي غالية علينا وان كانها مهي غالية ما كان ابوي وافق يعطيك وينسب فيك اوصييك تكون لها جاسم الي بكتفه شالها وعاادل الي بمرضها سهر عليها وصقر الي قال لها تم قبل تقولل بغيت وحيدر الي بكتفه شال اثقالها واحزانها ولا عمره اشتكى اوصييك على نظر عيننا لا تنزل دموعهاا بغياب اخواانها
ابتسم ساهر ل حب صقر و وصاياه لسارة وقال:بكون لها العالم الي يحتويها من كل شيء وعهدن علي ان دموعها ما بتسكن عيونها وانا حدها
صقر ابتسم وربت بكتفه ببتسامة وهو يقول :ما عندي شك والله يا ساهر اخبرك بار في امك والي قدر يسعد امه باذن الله انه قادر يسعد حرمته
ساهر ضحك:ان كان ذي الوصايا قبل الملكة والعرس افكر وش بتكون وصايا العرس والملكة!؟
صقر:اوهوو هاذي يبي لها ورقة وقلم والله لو الود ودي ادخلك واقعدك  مع بريق الشاي واوصيك فيها لين بكرة لكن متيسر الله رحمتك
ساهر: يالله اجل دام كذا خله يوم ثاني وانا الحين زي ما قلت متيسر
صقر سلم عليه :مع السلامة يا اخوي انتبه لنفسك
ساهر:مع السلامة يا ولد العم
ودعو بعض وطلع ساهر وصقر قفل الباب وبعدها ابتسم ابتسامة خفيفة وهو ما يصدق سارة كبرت وبتودع الحين زي رغد
وصقر مثل ابووه يحس ما يقدر على فرقا خوااته و ودع رغد والحين بيودع سارة والايام تجري وبيجي دور شوق ودلال
مشي متوجه الصالة
صالة امه وقبل يدخل تنحنح وما سمع صوت احد الواضح ان الصالة فاضية لان الكل موجود في صالة ام عادل الي الجدة دايم تقعد هناك وعشانها الكل يتجمعو هناك وبعد العصر الكل يتوزعو
قبل يدخل نزلت سارة من السطح وهي بيدها سلة ملابس توها ناشرتهم بالسطح وشافته واقف عند الباب وقالت:هلا اخوي ليه واقف عند الباب  بغيت شيء!؟
صقر لف لها:لا والله ما بغيت شيء لكن تنحنحت ومحد رد ف توهقت ادخل ولا لا
سارة:لا الكل عند الجدة ما تلقى احد هنا
صقر ناظر الصالة فاضية :طيب وراتس ما تقعدين معهم وتتونسين!؟؟
سارة ابتسمت :لا كنت انشر الغسيل وتوني كنت نازلة اقعد عندهم
صقر ابتسم من ابتسامتها وضل يناظر فيها وهو ويقول بداخل متى كبرتو والله امس اذكركم هالطول
سارة استغربت منه:وشبلاك صقر؟
صقر ضحك بخفة:لاا بس اشوف اشلون كبرتي وصرتي عروس وانتي امس كنتي هالطول تناديني اروح لتس البقالة
ابتسمت سارة ابتسامة حزينة من كلامه وفعلآ تتمنى ترجع صغيرة عن ذي الهموم والحزن
وصقر مسح براسها بحنية :تصدقي توني اوصي في ساهر فيتس!؟
سارة تفاجئت لأنها شافت واحد مع صقر لكن ما ظنته انه ساهر صح ولد عمها لكن هي من النوع الخجوول الي ما كانت ترفع عينها لرجال يمر وان كانو عيال عمامها عكس دلال وشوق عادي عندهم وصدمت انه تغيير وااجد وصار مملوح وحلوو
سارة::الي كان معك هو ساهر؟
صقر :ايه كان ساهر وشبلاتس ما عرفتيه!؟
سارة سكتت شوي وقالت :لا ما عرفته
صقر ضحك:اخبر انتس خجولة وما تطلعين لهم مثل دلين وشوق لكن مهو كذاا ما تعرفيينه؟
سارة:والله ما عرفته
صقر بضحكة:معليه يا بعد روح اخوتس بتشوفينه بعدين وتعرفينه
سارة سكتت وصقر قال:يالله انا رايح
سارة:الله معك
مشي صقر وسارة. وقف بمكانها وهي تقول بداخلها منجد ذا ساهر الي شفته؟؟ متغير حييل مهو ساهر الي اعرفه والله من متى صار كذاا
ضلت شوي تفكر وبعدها استوعبت على نفسها ومشيت عشان ترجع السلة بمكانها