شما وهي تمشي ومقهوره من حركته قاطع تفكيرها صوت ام عبدالله من عند الباب : شما بنتي
التفتت شما بسرعه صوب الصوت الي سمعته : هلا عموه .. سارت صوبها و باست راسها علومج عموه ؟
ردت ام عبدالله : بخير وسهاله شحالج وشحال امج عساكم طيبين
شما ب ابتسامه شاقه حلجها و هي تشوف عبدالله الي يا يحضن امه : بخير الحمدالله .. مريتكم عشان اشل ريم بنسير دبي بنتسوق
ام عبدالله وهي تبادل عبدالله الحضن : هلا ابويه يالغالي شوف منو زارنا اليوم
عبدالله و هو يخلي عمره مب مهتم : امي تبيني اوصلج ؟ قاطعته شما وهي تقول عيل الله يحفظج خالوه امي تترياج فالبيت
ركبت السياره وقلبها نغزها من تصرفه , يعني ليش جي تصرف انا شو سويت عمري ما قصرت بحقه واذيته ب شي
ريم تركب السياره بسرعه . . شما يلااااا تحركي شو فيج بسم الله ؟ شما لفت صوبها و صوت مبحوح وفيها صيحه : اخوج شو فيه يتجاهلني انا شو سويت له هل قصرت معاه ب شي وفجاه سكتت يوم شافت ريم تطالع وراها .. لفت بسرعه وشافت عبدالله وحاولت تمسك دموعها بس ما حبت تفشل عمرها وتساله ليش ياي يمكن يبا يكلم اخته .. عبدالله يدق الدريشه يباها تفتح له
شما وهي متوتره من وجوده المفاجئ : نعم ؟
عبدالله وهي مبتسم ويطالع اخته ورجع يطالع شما : سيارتج ماش كل الكلام يصير داخلها ينسمع برا .. عصبت شما وهي تقول : يعني عايبنك الي تسويه الحين ؟ اذلف اذلف انا مب يايه بيتكم عشانك يايه اشل اختك ونروح , سكرت الدريشه وتجاهلته وتجاهلت وجود اخته و وبدت تسبه و تحركت على طول متجهين لدبي سمعت صوت ضحكة ريم وهي ماسكه تلفونها .
شما : ها تكلمين منو ؟
ريم ارتبكت و بندت التلفون : ابد طلعلي فيديو يضحك ماعلينا شرايج نسيرستاربكس والله فخاطري .. اتجهو لستاربكس لانه وراهم يوم طويييل ومشاوير ما تخلص بما انه ملجة شما من عبدالله ما بقالها الا اسابيع
( عند عبدالله )
الحين انا مثل ما زعلتها غصبا عني براضيها هذي حبيبة قلبي كيف قلبي طاوعني اتغلى عليها لدرجة انها تبا تصيح ؟ماعليه خلاص بس بنزل امي وبسلم ع ام شما و فورا بسير ادقلها و براضيها
ام عبدالله : عبدالله ويهك صار اصفر ف شو تفكر حبيبي شو الي ماخذ بالك لهالدرجه؟
عبدالله ب ابتسامه وهميه : امي افكر ف الملجه وايد ماخذه تفكيري ,
ام عبدالله : كل شي بيتيسر ان شاء الله
( في بيت ام شما )
ام شما تنزل من الدرج و هي يايبه وياها الدخون وقاعده تبخر البيت عشان تستقبل ام عبدالله احلا استقبال
اليازيه : امايه خلاص سويت السويت وطلبت اكل و الشاي والقهوه كلهن فالميلس
ام شما تتقرب من اليازيه وتبوس راسها : فديتج حبيبتي ما تقصرين مب نفس غيرج .. وتطالع ميره بطرف عينها
