#مُجرد_حوار "11"
|العوض |part2|
"أتمنى أن ينتهي بي المطاف مع شخصٍ يفهمُني، شخصٌ يُحبني بما أنا عليه أو سأكونُ عليه، يتقبلُ عيوبي ويُسامحني على أخطائي .. أتمنى أن ينتهي بي المطاف مع شخصٍ هيّن ليّن يتقبلُّني كما أنا ونواجهَ الحياة سويًا من دون أيّ خوفٍ أو قلق))
فجأة لقيتو واقف قدامي كان طالع مُختلف عكس كل مرة شفتو فيها .. أنا شفتو كتير .. بكل قمصانو .. شفتو يوم ما كان مرهق وتعبان وفي إيدو مُركب فراشة بس أصر يجي عشان كان عايز ياخد مني أو راق مهمة شاف إنو ما ينفع تتأجل .. شفتو وهو بيضحك .. وهو مُكشر وشو .. شفتو بيونيفورم الشغل .. بالبدلة يوم التكريم .. بالجلابية لما اول مرة جانا البيت .. بس دي اول مرة أحسو ما بشبه أي مرة شفتو فيها .. عيونو كانت بتلمع .. وشو بيضحك .. كأنو حواليه فراشات زي ما بقول.
قرب علي لاول مرة ما بينا حتى سنت واحد .. حسيت الهواء اللي بتنفسو طالع منو ..
_المفروض أقول شنو في اللحظة دي؟
=فضلت ماسكة الفستان وبضغط عليه.
_كأنو في زول الليلة لسانو إتقص؟
رفعت عيوني عاينت ليهو .. قلبي كان بدق بطريقة غريبة لدرجة حاسة نفسي ح يكتم .. فجأة حسيت المكان بقى ضيق والفستان دا أهبل قرار أخدتو في حياتي هو ليه تقيل وكبير ومُتعب كدا؟
_يا نوف إنتِ كويسة؟
=هزيت ليو راسي.
_عايني ما تتوتري كدا أنا ذاتي متوتر شايفة الموضوع ما خطير.
=ضحكت.
_عادي أحضنك؟
=لا أوعك أنا مش قلت ليك ما عايزة العوارة دي؟
_حضني وهمس .. عشان ما تطيني عيشتي بعدين لما توعي لروحك.
غمضت عيوني دي اول مرة أحس إني قريبة من شخص للدرجة دي ..
عمري ما إتخيلت النهاية دي .. أنا كنت راسمة سيناريوهات كتيرة بس ما كدا ..
ما أتوقعت يجي شخص يضرب بي كُل القصص ويعيشني وحدة مختلفة خالص ..
ما إتوقعت إني أحبو بالسهولة دي والله أنا أكتر شخص ما بندفع في حياتو ولا بتسرع في قراراتو ..
كُنت فاكرة ح أخد فترة سنة سنتين أموڤ أون بعدين أشوف الوراي بس هو أخدني من يدي وحشرني في تفاصيلو غصب عني ..
كل شي جا بسرعة لا فترة خطوبة نفهم بعض ولا فريند زون نعيش فيها أيام حلوة ..
كانت علاقتي بيه في حدود الشغل وشوية مُجاملات بعديها جا البيت وكل شي تم بسرعة .. أقل من 8 شهور بالضبط لقيت نفسي عايشة معاه تحت سقف واحد.
أنا كنت فاقدة الأمل في إنو قلبي يدق تاني .. أو على الأقل ما بالسرعة دي.
صعب جدًا الإنسان يرجع يعيد نفس تجاربو الفاشلة بنفس الشغف ..!
أنا كنت حاسة إني ما ح أعرف أعمل الحاجات اللي كنت بعملا زمان .. حتى لما بجي أتكلم معاه بحاول ما أعيد أي كلمة من الفات .. أيوة ما بنتلام على مشاعرنا بس بتفضل زي نُدبة بتألمنا وتذكرنا كل مرة.
معاذ هو النقطة السودة اللي ما كنت قادرة أمحي أثارا .. هو الأخد كل المشاعر الحلوة وشغف البدايات .. هو اللي زرع جواي خوف وتردد ما عارفة إذا ح أتخلص منو أو لا.
___________________
