#مُجرد_حوار "10"
"يحاول سرقة قلبي، كلما نظرت إليه أشعر وكأنه يحتضنني بعيناه ..))
ما عارفة ليه الدنيا بإتساعا دا كلو .. بتضيق علينا يوم ما نزعل على شخص بنحبو.
بتذكر وأنا بقفل منو لأخر مرة بعد ما ودعنا بعض بطريقة سخيفة ما بتشبه النهاية اللي خططنا ليها .. حسيت إنو الدنيا قفلت في وشي.
يوما أنا ما عرفت أسَّكِت نفسي من البكي .. كنت بعافر عشان أخد نفس .. أنا وقتها كنت بتمنى لو أموت من كترة الزعل الجواي.
مشيت لي ننا في بيتهم عشان عارفة لو قعدت براي ممكن أعمل حاجة في نفسي.
كنت بضغط على نفسي وبجي عليها عشان أكلمو إنو بابا رفض لأخر مرة ..!
ما كُنت عارفة كيف المفروض أوريه الخبر دا ..
ما كُنت فاهمة أبدا ليه من وين ولا أقول ليهو شنو ..
كُنت بسألو إنت كويس زي كُل مرة .. وسَكتَا بعدها عشان ما ينفع يكون كويس وأبقى سبب في إنو يزعل.
والله أنا بحبو بس بابا هو اللي رافضو أعمل شنو يعني؟
دُست على قلبي ومسكت دموعي عشان أعرف أكلمو بجدية ..
كُنت عايزاه يحس إنو الموضوع أكبر من أي مرة إترفض فيها وإنو دي النهاية عشان أنا تعبت والله .. تعبت من العشم اللي بكبر جواي كل مرة.
بكيت لساعات طويلة .. بكيت كُل أحزاني دُفعة واحدة ..!
حسيت إنو قلبي حيقيف من كترة البكي .. حضنت ننا وأنا بسألا :
=أنا ذنبي شنو يا ننا .. يعني أنا ما أستاهل أفرح وأحب؟
الدنيا ما بتقيف على غياب حد بس من بعدو بتمشي بطريقة مُختلفة ..!
مرت الأيام وكُل يوم أنا في صراع مع كل الحوالي ..
مافي شخص واحد عايز يفهمني .. هما ما مُستوعبين يعني شنو تفقد إنسان كان كل حياتك!
لا صحباتي اللي بحاولو غصب عني يخلوني أرجع أضحك وأقعد وسطهم ..
ولا ناس البيت اللي شايفين إنو الموضوع عادي وما بيستاهل زعلي للدرجة دي ..
أو دراستي اللي مُستنياني وما حتقيف عشان أنا زعلانة ومكسورة .. ولا الإمتحانات أوالمشاريع حتتأجل لحد ما أبقى كويسة ..!
أنا واجهت كل دا مرة واحدة .. ضحكت في وش اللي يلاقيني .. قريت وإشتغلت المشروع في عز ما أنا مكسورة ومنهارة ..!
دا غير صراعي مع نفسي كُل يوم وأنا بتذكرو .. بحاول ما أرجع أكلمو .. بمسك نفسي ألف مرة عشان ما أقول ليه ما تسيبني .. ما تستسلم لسة حاول كمان ..!
عديت شهر وأنا بعيدة .. قفلت تلفوني ورميتو عشان ما أرجع أشوف الشات والمكالمات والصور وكل الذكريات دي ..!
شهر وأنا كُل يوم قلبي بدق لما الموبايل يرن .. بتخيل إنو هو ما ممكن يكون مشى ..
أكيد ح يرجع يكلمني ..
حيفقدني ويقول لي أنا لسة هنا.
هو كان موبايل صغير .. لا فيه ذكريات ولا شات ولا صور .. بس أنا كل ما أمسكو بفضل سرحانة فيه وبفتكر كلامنا .. مكالماتنا بالساعات .. ببتسم لما أشوف اسمو بعدين بسأل نفسي ..
هو ليه ما إتصل؟
ليه ما وقفني وقال لي: إستني ما ح أستسلم زي كل مرة؟
بنوم بصداع من كتر الأسئلة اللي ما لاقية ليها إجابة ..!
بصحى كل يوم وأنا ناسية إنو نحن إنتهينا .. باخد مسافة عشان أستوعب إنو هو مشى خلاص .. لما أفتح دولابي كل يوم بقيف نص ساعة بقنع نفسي إني ما أتنازل عن وعدي لنفسي ..أنا ح أسيبو يعمل اللي بريحو ..!
نحن ما بنقدر نجبر أي شخص يحارب عشانا !
