#مُجرد_حوار "3"
[البوست]
- منذُ أَن قال أُحبُ القهوة ، نَمَت في قلبي شجرة بُن..))
=أحمـدد.
_عينيو.
=سيب تلفونك ده ياخ وركز معاي.
_ها يا ستي أحكي.
"قفل التلفون وختاه على جنب"
=مافي موضوع ونسني.
_ونسة حاف كده .. طيب سوي لينا قهوة.
=حاضر قايمة أجهزا دقايق وتكون عندك أحلى قهوة.
_طيب مستنيك.
"رجع شال تلفونو وفتح الفيس بوك "
"بم تفكر"
بدا يكتب من غير ما يشعر:
بدون مُقدمات ومن غير أسباب ..!
للمرة الاولى جاني شعور إني عايز أعبر ليها وأوريها قدر شنو أنا محظوظ بي وجودا في حياتي .. بإمكاني أقول ليها كدا بس الكلام بجي بسيط وبنتهي بسرعة وقدام عيونا أنا ممكن أنسى وأتوه.
السبب الأهم الخلاني أعمل الخطوة دي إنو هي بتحب الكتابة .. ده نوعا المُفضل في التعبير .. حتى في حياتا الواقعية بتحب تكتب ..!
أنا كل يوم بصحى بلقى ستيك نوت قدام المراية فيها كلام حلو نوع
"صباح الخير يا حلو ممكن تبتسم؟"
"صباح الخير والمقصود بالخير إنت"
إتعودت ألقى في جيبي مسج حلوة منها .. وحتى لو ما كتبتا بترسل لي في نص زحمة اليوم رسالة sms حلوة ..!
صح نحن مختلفين وأنا ما بعرف أكتب .. بس على الأقل ح أحاول عشانا
ح اقول كلام بسيط بدون أي تعديلات ومراجعة .. ح أكتبو وأسيبو هنا هي حتجي تتفاجأ بيهو.
حاليًا هي في المطبخ بتعمل قهوة .. بتذكر اول ما عرفتها وفي بدايتنا مرة قالت لي:
"إنت كيف بتحب القهوة دي أنا مستحيل أشربا "
في اول لقاء بينا طلبت قهوة وقلت ليها تشربي شنو .. قالت أي حاجة غير القهوة.
بين الكلام ده والليلة شهور بسيطة بس .. حاليًا بقت تصحى بدري تعملا لي وتشربا معاي ..!
بقت كل يوم المغرب تستناني بيها .. وفي أي لحظة نقطع موضوع تقول لي ح أعمل قهوة بكل حب الدنيا ..!
كل مرة بسألا إنتِ مش قلتي ما بتحبيها الإتغيير شنو؟
فبترد لي:
"أنا ما بحبها بس بحبك إنت .. فبقيت أحب معاك كل حاجة بتحبها"
حقيقي ساعات كتيرة بسأل نفسي .. أنا عملت شنو في حياتي حلو عشان أحصل عليها؟
من يوم ما دخلت حياتي وهي مُحلية أي حاجة فيها ..!
مهونة علي الدنيا شديد ومحسساني إنو مافي شي بستاهل زعلي خالص..!
إنسانة داعمة ومشجعة لأبعد حد .. ما حصل جيت حكيت ليها حاجة أحبطتني .. بالعكس دايمًا بتشجعني وبتفضل مهتمة تعرف كل خطواتي ..!
كل الوصلت ليهو في حياتي بي سببا ..!
لو ما هي حاجات كتيرة ما كان تمت .. وللأمانة جروح كتيرة ما كان إتداوت.
أنا دايمًا بسمع عن التعافي والإختيار الصح والتقدير والتعبير عن المحبة .. من قبل ما أعرفا كويس لما أقرا كتاباتا وأعاين لحياتي بلقى إنو البتقولو ده في وادي وأنا في وادي .. جات علي لحظات حسيت إنو دا مُجرد كلام عادي زي كل الناس البتكتب دي.
بس اول ما قربت إكتشفت إنو لا .. هي ما عايشة في عالم وردي هي فعلًا بتخلي العالم وردي .
ما بنسى أي لحظة عشتها معاها ..
اول مشكلة جيت حكيتا ليها من بعد سنين طويلة قررت بيني وبين نفسي إني ما ح أشارك أي زول مشاكلي وأسراري ..!
اول لحظة إحتياج لما حسيت إني ماري بفترة صعبة وما عارف أتصرف فلقيتني بقول ليها ممكن تفضلي معاي؟
اول إنتصار لي ما فكرت في غيرا يوما بتذكر كسبت صفقة اول ما طلعت إتصلت عليها بدون ما أشعر ..!
عرفت إنو الحياة حلوة بس كان ناقصا وجودا .. مُحتاج ليها عشان تكمل كُل الناقص في حياتي.
مشيت ليها عشان ما ينفع أكمل من غيرا ..!
من يوم ما بقينا سوا وأنا بقيت حاسس إنو نص التعب والشقى الكنت عايشو خف .. خف لأنها هنا ..!
مُجرد فكرة إني برجع بلقاها مُستنياني كانت حاجة بتهون علي تعب اليوم.
لما أصحى وألقاها بتقول لي صباح الخير .. بحس إنو هو فعلًا صباح الخير.
بطلع وأنا مُبتسم مُستف حُب وحنان .. شالت عني هم ألبس شنو بصحى بلقاها إختارت لي اللبسة .. وهم لو شالتني نومة وراح علي الزمن ..!
خففت عني الوحدة البحسها كُل صباح وأنا بشرب قهوتي براي ..!
برجع بعد يوم طويل مُرهق اول ما أشوفا بهون كُل التعب.
أنا ما عارف حياتي كانت حتكون كيف من غيرا .. بس حقيقي عمري ما كنت مبسوط وعارف قيمة الحياة قدر ما حاليًا حاسي كدا ..!
لو في شي في الحياة دي بستحق تعافر وتتعب عشانو .. إنو يكون عندك في حياتك شخص يهون عليك وتكون شايفو هو الحياة.
ما عارف لو قدرت أوصل شعوري بالطريقة الحاسيه تجاها أو لا .. بس كتبت الكلام ده عشان أقول لي الدنيا كلها إني بحبها وجدًا كمان .. بطريقة فوق الوصف والتعبير ♡
وأخر شي حابب أقولو ليها :
"نظرًا ﻷﻧﻲ ﻣﻦ ﺳﻨﻴﻦ لم ﺃﻓﻌﻞ ﺷﻲﺀ ﺳﻮﻯ ﺍﻟﻤﻐﺎﺩﺭﺓ،
لاول مرة جربت ﺷﻌﻮﺭ ﺍﻟﻮﺻﻮﻝ عندما أمسكت بيدك ..))
