#مُجرد_حوار "7"
[الخطوبة]
=يا ولد إنت صاري وشك دا كده أنا جابراك على العلاقة دي؟
_نون إتكلمي كويس أحسن ليك.
=بانت حقيقتك أنا إتغشيت فيك والله.
_حقيقة شنو وغش شنو يا بت الناس؟
=هكرتك بقيت تتكلم زيي.
_يا ربي.
=أفرد وشك ده شوية بنات عماتك ديل ما يقولوا أنا غاصباك علي.
_خليهم يقولوا.
=يا ود الله يهديك.
_قصدك الله يصبرني.
=إنت زعلان كده مالك هسي ما ياهو أخيرًا حتخطب حُبعمرك لاقي إنت؟
_حاسي نفسي إتسرعت.
=ما تخاف أنا هنا.
_ده المخوفني أصلًا.
=الله هو أنا ما قدر المقام ولا شنو يعني؟
_أسي لو سمعونا بنتشاكل كده يقولوا شنو؟
=ما تعصبني طيب.
_إنتِ جادة في كل كلامك بتاع المرة الفاتت؟
=أيوة ولسة في كلام ما قلته مخلياه لما أضمنك.
_الكلام ده ما صاح منك.
=أسمع مني الخواف ربى عيالو خاف أحسن ليك.
_أخاف من شنو أنا ما عامل شي غلط.
=كلو حيتكشف بعدين أحسن ليك لو في حاجة وريني من هسي .. يمكن أسامحك عشان نحن في لحظات مقدسة.
_يا بت الناس بطلي تهديد.
=والله يا أحمد أنا لو بعدين عرفتك بتلعب من وراي أقسم بالله حتشوف.
_ألعب شنو إنتِ ما واثقة فيني ولا شنو؟
=أنا واثقة بس البت الهناك البتعاين ليك دي ما مريحاني بتعرفا من وين زيتا سريع!
_أخر مرة أقول ليك إتكلمي كويس وبعدين ياتو بت دي.
=أنا بتكلم كويس بس إنت فتش ليك تبرير تقوله لي وياريت يكون مقنع.
_ده نكد صاح؟
=ده ما نكد وأنا لسة هادية وأهو عاملة نفسي ببتسم وبضحك عشان الناس ما تشك فينا.
_طيب يا روح أمك إنتِ أقعدي هادية وبلاش السيرة دي عشان بتعصبني.
=طيب حنغيير الموضوع عاين لي وأضحك.
_غصب هو؟
=طيب خلينا من ده البدلة اللابسة دي ما نفس الصورتها لي ليه؟
_يعني ده وقته؟
=صح ده ما وقتو طيب دي شنو الحلاقة دي .. ليه ما شوفتني ليها من لما حلقتها هسي يمكن عايزة أقول ليك على شوية تعديلات؟
