#مُجرد_حوار "2"
[شاي]
أعملك شاي؟
_بمناسبة شنو؟
=بمناسبة إنك زعلان مني.
_وإنتِ عارفة لما أكون زعلان منك ما بحب أشرب شايك صح؟
=بس أنا ح أتعب وأعملو يرضيك تعبي يروح ساي؟
_بسيطة ما تتعبي من البداية.
=قول والله؟
_لو عملتي ما بشربو المرة دي.
=تمام نشوف كلام منو الحيمشي فينا .. أنا داخلة أعملو وإنت شيل الكراسي جهزا.
_ما شغال بيك.
= أحلى من يكون ما شغال بي.
_إبتسم ورجع صر وشو.
=شايفاك ما تعمل فيها ما بتفصل.
_أختيني يا زولة أنا مشغول.
=تتهنوا إن شاءالله.
_سمح.
=سمح إنت دا يا زول.
_يا الله إنتِ مالك يا بت الناس معاي.
=أنا يتقال لي بت الناس .. كويس كويس يا أحمد.
_أنا قايم من هنا ما تلحقيني.
=بري ما قاعدة ألحق لي ود ناس أمشي ساي.
_تمام خليك قدر كلامك دا.
"دخلت المطبخ وهي بتكلم نفسها"
غياظ يعني أسي دا موضوع بزعل؟
يعني شنو لو زعلتو؟
مفروض يراضيني ويعمل رايح .. بس بحب المشاكل زي عيونه .. يلا ما علينا ح أعمل ليو أحلى شاي عامل وشو السمح دا.
=تراااا أحلى شاي بي نعناع لأحلى مُنعنع في حياتي كلها عليا الطلاق.
_نون إتلمي أحسن ليك.
=مش قلت لي ما أجيك؟
_إنتِ ما عندك كرامة يا بت؟
=كرامة أعمل بيها شنو وأنا عندي إنت؟
_ضحك.
=ضحكة دي ولا قلبي؟
_جيبي الشاي دا بلا قلب بلا بطيخ.
=ما قلت ما عايز شايني.
_شاي شنوووو .. دي ثقافتك .. والله أنا إتغشيت فيك.
=يا زول إنت بتحبني أنا لنفسي ولا بتحبني عشان ثقافتي؟
_للأسف بحب عوارتك دي.
=المهم حُب أها الشاي كيف بالله؟
_عادي.
=حالتي عملتو بكل حُب.
_ما تعايني لي كدا.
=مش بي عيوني بعاين.
_ياخ خلاص سامحتك لايوقة خلاص.
=إفتكرت إني ح أجتهد معاك أكتر أخرك كباية شاي خسارة والله.
_هي ما كباية شاي عادية.
=الله كلام حلو وحركات؟
_حلو غيرك ماف.
=ووبعليا.
_عويرة خلاص.
=زيك .. شبهينا وإتلاقينا.
_أنا ما كنت كدا.
=ومتغيِّر ليه طيب؟
_عشانك وعشان كان لازم أقعد القعدة دي وأشرب الشاي وأعاين لعيونك السمحة دي وإلا كان حتفوتني الحياة.
=أحييينا.
_دا أخرك؟
=ياخي ياخ ما إنت عارفني ما بعرف ارد للكلام الحلو.
_بس بتعرفي تقولي صح؟
=هئم بعرف أكتبه بس أكتب ليك؟
_تكتبي لي شنو مع الليل دا؟
=جيب يدك.
_لو جنيتي وريني من بدري عشان...
=ششش .. إنت مالك كلامك كتير وحُبك حبة كدا؟
"ضحك ومد ليها يدو"
"مررت أصبعا على يدو وكتبت ليه":
"حقك علي"
"مسك يديها وباسهم وقال ليها":
_عمري ما زعلت منك والله.
#على_الهامش:
"عليه أن يأتي حنونًا بقدر حُبي له))
#نُودين_بِت_مِن_حُب
