انا والضابط

البارت الرابع عشر

اتصلت على عمار

عمار : اهلا سيدي

غيث : لا سيدك ولا هاي السوالف

عمار : هاااا، خير

غيث : يعني انت داز امك علمود تخطب ومتكول

عمار : والقران تعبت غيث

غيث : تعال نتشاوف بلكهوه
لو تريد تجي هنا للبيت بكيفك

عمار : انت شتكول

غيث : تعال للبيت

عمار : صار جاي

( اندكت الباب ورحت فتحتهه ودخل عمار
اباوعله متأنق وجاي
انكسر خاطري عليه
صار ٨ سنوات منتظر موافقتي واني ما اوافق)

عمار : اخوي الغالي شلونك

غيث : والله موزين

عمار : هاا سلامتك

غيث : ضوجتني عمار

عمار : الله ياخذني اذا اضوجك، خير شكو

غيث : لهل درجه ماعندك ثقه بيه بعد
وتروح تدز امك تخطب

عمار : وداعت عيونك غيث تعبت
يعني عمري ٤٠ سنه، شوكت بعد اتزوج
واني لو افتر الدنيا ما الكي مثلكم
والوالده الله يخليهه النه
تكول لو هي لو ما تتزوج، ذوله عشرة عمر
والبنيه كلهه تحجي بأخلاقهه
وترة هي الكالت راح اروح مو اني

غيث : بس مهما يكون، المفروض تكول

( دنك راسه وما حجه)

غيث : بس لأن انت رجال واجيت من الباب
وما حاولت تغدرني لو تسوي شي من ورايه
اني موافق على زواجكم

( اباوعله اجه مثل العاصفه وحضني ووكعني بلكاع
مدري اضحك على خباله
لو على فرحته، صار عبالك طفل صغير)

عمار : غيث ما اعرف احجي والله

غيث : يمعود خنكتني

عمار : اسف اسف، بس والله ما اعرف شنو اكول
وداعتك اخليهه بنص عيوني
واذا صار يوم واجتكم زعلانه
تاخذ مسدسي وتفرغه براسي
واني من ايدكم هاي لأيدكم هاي

غيث : شنو هلحجي عمار، بس اني اريدك تصونهه
مو تصير مثلي تشبعهه خيانات

عمار : وداعتك درب الأعوج ما اجي يمه بعد

غيث برفعة حاجب : يعني ما تروح ويايه ونسات
لأربيل

عمار : بس اذا جبرتني

غيث : هااااااا

عمار بضحكه : لا وداعتك، اصير ابو بيت معدل
اني هم اخاف الله يبليني

غيث : والله يا عمار، يمكن اني الوحيد الما اخاف ربك

عمار : حشاك خويه حشاك، بس هم ديربالك
ربك يمهل ولا يهمل ترة