انا والضابط

البارت الخامس عشر

كعدت الهث وشصاير بيه وعركان

الوالده: سلامتك يوم، شبيك تلهث هاك مي

غيث : مخنوك يوم ما اكدر

الوالده: سمي بالرحمن واشرب

( شربت المي واحس عبالك تيزاب
الحلم مجاي يروح من بالي ابد

سولفت لأمي، كالت هاي لأن تفكر
وماكو شي انشالله

رجعت نمت بلكوه بس الحلم مجاي يروح من بالي
لحدما محسيت على نفسي وغفيت)

مر تقريبا شهر واني احس نفسي اسعد انسان
رحت انطيت فلوس النيشان بيد عبدالرحمن
وطلعنه كم مره اني وبراء
ويوم عن يوم يزداد حبي الهه اكثر واكثر

كالت لازم نسوي عرس ولو بسيط
لان هاي اول فرحتهه وهي هم حقهه
كتلهه عادي اني اصلا اتمنى اشوفج بالبدله البيضه

خلال شهر واحد أجرت بيت قريب على بيت اختهه
رغم كالت زوج اختهه يكول عادي اكعدو بلبيت واذا تردون انطوني ايجار
بس اني رفضت لأن عيب منهم
ومن بعد الحاح من عدهم وافقت لأن يم بيت اختهه احسن
لان اني اغلب وقتي لو بالشغل لو يم اهلي
غيرنه الأثاث
وبنات اختهه اخذو اغراضهم وراحو يم اهلهم بعد
جانت الشقه صغيره ومرتبه
بيهه ٣ غرف وصاله ومطبخ وملحقات
حيل مرتبه وحلوه
جبت اثاث جديد وغيرنه المطبخ
وجانت الشقه كلهه عباره عن لمساتنه الخاصه
وبكل زاويه خلينه شي يعبر عن ذوقنه المشترك
وحبنه لبعض

ومن بعد شهرين صار العرس
اجت بس امي وام عمار وجناينهم
هوسو وصفكو وفرحولنه

شفتهه لابسه الأبيض واحس كلبي يريد يطير من مكانه
اخذتهه بأحضاني
معقوله هاهيه صارت ملكي
وشوكت ما احب راح تكون كدام عيني
يا فرحتي الماتنوصف

رحنه للفندق حجزت يومين
ومن بعدهه نريد نروح نسافر

جانت اول ليله وياهه وبلحلال
مستحيل انساهه
جانت كاعده بكل برائه وهدوء
احتاريت على شنو اباوع
على عيونهه لو شعرهه
لو جسمهه
معقوله صارت ملكي؟!
لحد هاي اللحظه اني ممصدك

جانت لمساتهه اليه بكل حنيه ورقه وخجل
رغم اني دنستهه
بس بقت مثل ما هي
ورده ناعمه وهادئه ومستحيل تأذيني

كعدنه ثاني يوم الصبح
كعدت قبلهه بس علمود اتأمل جمالهه
معقوله كل هذا الحسن والجمال حلالي
ربي ميحرمني من هيج نعمه بحياتي

كعدت من النوم وبقت تباوعلي

براء: معقوله جاي احلم

( لزمت خدهه الأيسر وكرصتهه خفيف)

غيث : لا مو حلم، انتي صرتي حلالي
ومستحيل بعد شي يفرقنه

براء: انت العوض الي رب العالمين عوضه اليه من بعد صبر طويل