انا والضابط

البارت الثاني والعشرون

ومرت الأسبوعين عبالك ساعتين بس
يوميه اتصل عليهه واتوسل بيهه وهي متريدني
وحتى متجاوب ابد
خليتلي محامي شاطر حتى يثبت هي جانت حامل
بس اني ماعندي اي دليل ملموس
بس بلكي يقتنع القاضي

واليوم  يوم المحكمه
دزتلي رساله الصبح

( شكد حبيتك وشكد دست على كرامتي وياك
بس انت تحب بس نفسك
شوف رب العالمين شنو راح يسوي بيك بعد
والله ياخذ حقي منك)

دزيتلهه
( واني راح ابقى احبج
ومستعد اخلي مليون محامي علمود منتطلك
براء اني بس وياج عرفت الحب
وما مستعد اخسرج)

رحت للمحمكه بكامل اناقتي
دخلت اني والمحامي
واجت براء سبحان الخالق
طالعه احلى واحلى
ووياهه عبد الرحمن والمحامي

جانت لابسه فستان اسود قصير نص ردن
واني دائما جنت امنعهه تلبس هيج اشياء
اعرف هي تريد تستفزني
بس اني مستحيل ازعل منهه
اصلا اريد ترجعلي بأي طريقه

وكفنه كدام القاضي
والمحامي مالتهه بدأ يحجي
وكل كلمه تطلع منه احسهه سيوف تكطعني

اخر شي كال المحامي

المحامي : اتفضل استاذ هاي كل التقارير الطبيه
الي تثبت تعرض الزوجه للعنف الاسري
ونطالب بالتفريق على طلب من موكلتي براء كريم
والتنازل عن كافة الحقوق الزوجيه التي بينهما
والخلع المستعجل لها
لما تسبب في اضرار نفسيه للموكله

القاضي : اي شي تضيفه محامي الأستاذ غيث هشام

( باوعلي المحامي وحسيت دموعي تريد تنزل
اريد بس ينقذني
بس للأسف المحامي مجان بأيده شي)

المحامي : لا سيادة القاضي

القاضي : حكمت المحكمه بالتفريق على طلب المدعيه براء كريم، والتنازل عن كافة مستحقاتها الماليه والماديه
والخلع المستعجل من المدعو غيث هشام

( اخر شي سمعته هاي الجمله وحسيت نفسي
دخت ووكفت الدنيا كدامي
ما كدرت احجي شي
جنت اشوف بس اشكالهم وما اسمع اي صوت
بقيت اباوع لبراء شلون تحجي وتضحك ويه عبد الرحمن، واني؟! اني ما اعرف شنو صار بيه
اريد ابجي واريد احجي، بس منو يفهمني؟!

عفتهه وطلعت احس اختنكت حيل
صعدت سيارتي ورحت
ما اعرف وين اروح وشسوي
احس الدنيا بكبرهه خانكتني
رحت لعمار كالو بلدوام
يربي لمنو اروح واشكي همي

رحت لشارع ابو نؤاس
كعدت هناك واحس اريد بس اتنفس
يا ربي دخيلك ارحمني وخلي الخنكه تروح

بقيت كاعد لحد الليل
ما اعرف شسوي، ما اكدر ابجي اريد ابجي يربي

صعدت سيارتي ورحت أقرب ملهى موجود هناك
بلكي اكدر افك الخنكه عني

دخلت واشوف اليضحك والمتونس
والراقصات وكلشي اشوف بس اني ما راحت الخنكه
دزيت رساله لعمار خاف اثكل بلشرب عاد يجي ياخذني منا
كعدت اشرب وأشرب لحدما فقدت وما احس بنفسي
اريد بس انسى، والضاهر ما اكدر انساهه
لحدما صحيت لكيت نفسي كاعد بنفس المكان بس فارغ مبي اي احد بس اني وواحد ينظف