အိပ်ပျက်ညများရဲ့ ကယ်တင်ရှင် [ဘာသာပြန်]

Chapter 10 (unicode)

အိပ်ပျက်ညများရဲ့ ကယ်တင်ရှင်

မူရင်းစာရေးသူ - 인식론

ဘာသာပြန်သူ - Marilee

****

အခန်း ၁၀

ကလေးဘဝမှာ မိခင်ဖြစ်သူက အာမာရီယွန့်ကို မှူးမတ်အနွယ်ဝင်တစ်ယောက်လို ပြုစုပျိုးထောင်ခဲ့တာပါ။
သူက အာမာရီယွန့်ကို ကန့်သတ်ထုတ်ထားတဲ့ ချည်မျှင်နဲ့ ချည်ပန်းထိုးနည်းသင်ပေးခဲ့တယ်။ မင်းမျိုးမင်းနွယ်တစ်ယောက်ရဲ့ လေယူလေသိမ်းအတိုင်း စကားပြောဖို့ အတင်းဖိအားပေးခဲ့သလို ကပွဲကကွက်တွေရဲ့ စည်းချက်တွေကို မှတ်မိအောင် အတင်းသင်ပေးခဲ့တယ်။
အာမာရီမှာ ဘယ်သူမှ အဲ့ဒါတွေမလုပ်ကြတာမို့ အာမာရီယွန်ကတော့ အဲ့ဒီအရာတွေကို အသုံးမဝင်တဲ့အရာတွေလို့ သဘောထားခဲ့တယ်လေ။ ဒါပေမဲ့ မိခင်ဖြစ်သူကိုတော့ သူ မလွန်ဆန်နိုင်ခဲ့ပါဘူး။ အာမာရီယွန်ရဲ့ မိခင်က တိုင်းတစ်ပါးမှာ အိမ်ထောင်လာကျသူဖြစ်ပြီး အပြောင်မြောက်ဆုံး အထူးချွန်ဆုံးဖြစ်အောင် လေ့ကျင့်ပျိုးထောင်ခြင်းခံခဲ့ရသူတစ်ယောက်ပါ။
ကြွယ်ဝချမ်းသာပြီး နွေးထွေးတဲ့အိမ်တော်မှာ မွေးဖွားကြီးပြင်းလာခဲ့တဲ့ အာမာရီယွန်ရဲ့ မိခင်အတွက်တော့ အာမာရီဟာ ငရဲပါပဲ။
သူက အာမာရီမြေရဲ့ အ​ခြေအနေအထွေထွေကို မသိချင်သလို စံအိမ်ရဲတိုက်ထဲကတောင် တစ်ဖဝါးမျှမခွာပါဘူး။ ပုံစံဒီဇိုင်းတစ်ခုတည်းကို ထပ်ပြန်တလဲလဲ ချည်ပန်းထိုးရင်းနဲ့သာ အချိန်ကုန်ဆုံးစေလေ့ရှိပါတယ်။ သူပန်းထိုးတဲ့ ပုံစံဆိုတာကတော့ နေမင်းကြီးပေါ့။
သူ့ရဲ့သမီးဖြစ်သူက ဓားရေးသင်နေတာကို သိလိုက်ရချိန်မှာတော့ ဒေါသူပုန်ထပြီး အစေခံတွေအပေါ် ဒေါသအိုးပေါက်ကွဲတော့တယ်။

- မိန်းကလေးက ဘယ်လိုလုပ်ပြီး ဓားကိုင်နိုင်ရတာလဲ။

အော်ဟစ်သောင်းကျန်းသံကို ကြားတဲ့အခါမှာ စစ်သည်တော်တွေ အပြေးဝင်လာပြီး အာမာရီယွန့်မိခင်ကို ဝိုင်းတားကြရတာပေါ့။

- သခင်မလေးက မှင်စာတွေနဲ့ တွေ့ရကြုံရရင် အဆင်ပြေမှာတဲ့လား။ ဘေးကင်းကင်းနဲ့ ပြန်လာနိုင်ပါ့မလား။ အာမာရီဆိုတာ အဲ့ဒီလိုနေရာမျိုးပါ!