#ثلاثُون_ليلة 3 ........♥️كوكا العوامي♥️
بحتت فِ احمد بنظرة مليانة حيرة ومليون علامة إستفهام فِ راسي
منو هذي ؟ وشن الي شافه عليا ؟
قلتله : منو هذي ؟ شن الكلام هذا
سحب مني النقال ، والتفت
مسكته مع يده ..
بحت فيا بعصبية
وقال : حودي يدك قلت !!
قلتله : يا احمد هذي تقصدني يا احمد شن هالحكي ، حياتي ادمرت معاك يا احمدددد ، حكيت بنبرة وصوت عالي ..
حط يده ع فمي ،
احمد : شششش ، وطي صوتك وطيه راه نفكلك رقبتك
سحبت يده من على فمي بقوة
قلتله : تعبت منك شن هالمُعاملة ؟ شن تحسابني عبدة عندك ؟
حبيسة لأمراضك النفسية ؟
ضربني كف ..
سكتت ، حتى دموعي علقن فِ جُوف عيني ، هل انا نستاهل كل هذا ؟
حطيت يدي ع خدي ، عبرتي تحركت من وسط قلبي
كل كسرت خاطر فِ حياتي كانت هاللحظة كفيلة تذكرني بيها
رجفة فمي كانت تحكي شن إحساسي ..
نظرات احمد متغيرنش ، نفس البرُود
مش نفسه واللهِ ، وتالله مش نفسه الي حبيته ، الي كان يخاف عليا من النسيم الهّاب ، مش نفسه احمد
انا فِ لحظتها خارت قواي ، استسلمت للنوم
مكنتش حاسة بشيء ، لا كِيف تدارك الوضع
ولا كِيف مسكني ورفعني ، هل آنبه ضميره ؟
فتحت عيوني فِ عيادة وفِ يدي كانيولة ، مكانش جنبي ،
حصلت خبطة قوية على راسي ، والصُداع يفتك فيا
بحتت دوشة ، وفيه مُمرضات ناديت وحدة منهن وسألتها
قالتلي : محصلة خبطة على راسك وركبنالك املاح لأنه عندك هبوط فِ الضغط ..
تنهدت ، عرُوس النكد والمستشفيات ..
حالي يصعب على الكافر ، مازلت صغيرة ياربِّ
السرير الي جنبي كان فِيه عزوز وبنتها ، بحتت فيا العزوز و إبتسمت ، ابتسمتلها ..
قالتلي : كيف حالك ؟ لابأس
قلتلها : الحمدلله ، ماتشُوفي بأس ياربِّ
قربت مني ..
قالتلي : ياخيتي فجعتي الراجل مسكين له ساعة يكلم فِ الممرضات عليك ، خاش طالع ، وضحكتلي
طبست راسي انا ، فعقلي هابا وكان شاغلته م يدير فِيا هكِ ..
قالت : شكلكم مش من هنا !
قلتلها : اها ، جايين سياحة ..
قالت : ايواه ايواه ، عرسان قولي
ضحكت ..
قلتلها : ايوه عرسان ..
وقعدت تهدرزلي وتحكي وتحّط ، الحقيقة تغير مزاجي شوي
بعد ربع ساعة جتني المُمرضة قالتلي زوجك قدام الباب يبي يشوفك
قلتلها : راسي يوجع فيا منقدرش نطلع ..
فِ هذك اللحظة بجد كنت كارهته من وسط خاطري ، نبي نتخلص منه بأي طريقة ليا يومين معاه ويعامل فيا هكِ ، بعد مُدة هطا توصل بيه يقتلني ..
قعدت نص ساعة ثانية ، وخش بروحه
صبى عند راسي ، قلبت راسي للجهة الثانية ، كنت نشوف فِ عيونه
نظرة ندم ، نظرة واحد مليان حّيرة وآلم ..
ليش هكِ يا احمد ؟
كان خاطري نعاتبه هكِ ، بس بعد اللي صار ولا عاد حنسأله ليش
نصبر هالشهر ، وبعدها كل حد فِ حاله زي م قال ..
الراجل الي يتهمني باطل ، وقبل كل شيء معندش فِيا لا ثقة
لا انا ولا تربيتي حتى موضوع اني بنت عمه ومن عيلته وعظم رقبته محطهش فِ اعتباره ..
