روايه خفيفه وراااائعه لكوكا العوامي ....صاحبة روايه صمت .....جزء 2
عمرك تخيلتي تكوني مكان عروس روحت لحوش هلها يوم صبحيتها ؟ ولا انا عمري تخيلت
القصة بدت ليلة عمري مع حبيبي وولد عمي عظم رقبتي ، الرؤية مشوشة معش نتذكر التفاصيل
نتذكر فِ العياط والضرب والشتم بس
كنت زي الدايخة فِ عالم ثاني ونبكي ونقوله واللهِ انا نظيفة وهو يبكي وانا نزيد نبكي ، كان يضرب فيا بحرقة قلب ودم كيف انا ندير فِيه هكِ
وانا مظلومة ومشعارف اساساً ليش قاعده نُهان
التكملة للجزء الي فات ::::::::
قالي ..
عندك شهر يا مريم ، وبعدها كُل حد فِ حاله .. ومش عشان وحدة رخيصة زيك ، عشان عيون عمي وعمتي بس
قلتله وانا فاضت بيا : شن درتلك ؟ شن الشيء الرخيص الي شفته مني ؟
خبط الستيرسو بيده بقوة
وانا مازال نفس السؤال على لساني ..
- انا شن درتلك ؟ شن شفت مني ؟
مسك يدي بقوة لدرجة حسيت اصابعه إنحفرن فِ يدي
قالي : انا معش نبيك ، درتي او م درتي ، والاحسن متعرفيش ..
وطلق يدي حرك سيارته ، وانا حاطة راسي ع القزاز ونبكي
تحركنا ومفش صوت غير صُوت نفسي وتنهيداته
غفيت فِ نص الطريق شوي وعيت ع صُوت عجل السيارة
شهقت ، نحسابه درنا حادث بحتت فيه وبحت فيا نزل من السيارة
تقريباً من امس عالقة دموع ، نبحت فِيه هو نزل ع ركن الطريق وقعد طلع دخانه ويدخن حاطط يده فِ شعره ..
ربع ساعة وانا نبحت فيه وهو عاطيني بظهره ، يعني هذي حياتي الي كنت نحلم بيها ؟ وحبيبي المُتفهم الي كان يقولي ع الحلوة والمُرة
نقاله يرن ، مره مرتين ..
خذيته بسرعة وبحتت ، رقم غريب
رديته مكانه بسرعة لما حسيته تحرك جهتي
ركب السيارة وكمل الطريق ، وانا سكتت
لازم نفهم ليش ..
طبعاً كنا مخططين نقعُدوا فِ شالية هنا فترة اسبوع وبعدها نطلعوا لمصر ، لكن مش بس كل شيء خططتله حتى حياتي انهارت فِ ليلة
وصلنا نزل وخذا دبشه م الشنطة ، وخلاها مفتوحة
يعنِي خوذي دبشك بروحك ، خنقتني العبرة ونزلت كريت شنطتي وراي ..
دهشت وانا نمشي وراه
خشينا عزق دبشه وكل شيء فِ المدخل وخش للحمام
قعدت انا نضم ونبرم ونشكي فِ ضعفي لربي
انا ليش يصير معاي هكِ ؟
كنت متمنية حياتي تقعد زيي زي اي بنت خذت حبيبها ، نعيش الي طول عمري نحلم بيه ، تفاصيلي الصغيرة انحرمت منهن ..
طلع احمد من الدوش وخش رقد ، وقعدت انا نضم والنوم مجافيني
جسمي يوجع فيا م الضرب ، قعدت فِ الصالة على الكنبات
نبحت فِ السقف ، خنقتني العبرة لا إرادياً ، توا انا شن الغلط الي غلطته معاه ؟ هو حتى مقربش مني ، ليش يتهم فيا ؟
منقدرش نروح لحوشنا باتي وامي حيمرضوا وينجلطوا ، والشامت اكثر م الزعلان ، الف علامة إستفهام ، وفوق هذا كله اهانتي وضربي وكرامتي وشرفي كله انداس عليه
انتِ ليش بختك هكِ يامريم ؟
تنهدت تنهيدة من وسط خاطري ، وغمضت عيوني بقوة
