الجزء1عمرك تخيلتي تكوني مكان عروس روحت لحوش هلها يوم صبحيتها ؟ ولا انا عمري تخيلت
القصة بدت ليلة عمري مع حبيبي وولد عمي عظم رقبتي ، الرؤية مشوشة معش نتذكر التفاصيل
نتذكر فِ العياط والضرب والشتم بس
كنت زي الدايخة فِ عالم ثاني ونبكي ونقوله واللهِ انا نظيفة وهو يبكي وانا نزيد نبكي ، كان يضرب فيا بحرقة قلب ودم كيف انا ندير فِيه هكِ
وانا مظلومة ومشعارف اساساً ليش قاعده نُهان
كسر وخرب كل شيء ، التغليف الهدايا حرفياً
كسر وعيط وخبط ، كسر نقالي الي خذاه ليا هدية
كانن دموعه شلال وانا مش فاهمة ليش حبيبي يدير فيا هكِ ؟
ليلتها بدال م يجافيني النوم من الفرح ، جافاني من كسرت الخاطر والألم ..
ضوت الشمس وصبيت بشوي وانا عظامي يبكن بالدموع على حالهن ، نرجف وشعور الخُوف والرعب من ليلة امس مازال يحرك فِ نبضاتي بسرعة ، طلعت راسي من الباب ، مازال لابس البذلة وقاعد يدخن فِ التركينة متاع الصالة
حس بيا صبا ع طوله ، وانا جريت جهة الدار وخشيت ضميت رجليا فِ الارض جنب السرير ..
قرب مني وخذا يدي فِ يده وانا نرجف ، طلع السبسي من فمه وطفاه على يدي ، قعدت نبكي بصوت عالِي ومسّلمة روحي
بحت فِيا وقالي صبي وتي روحك طالعين مشرق ..
وانا نبكي بصوت عالي
ليش يا أحمد ؟
جاوبنِي بِ تفّلة * حشاكم *
وطلع ، قعدت نضم فِ دبشي ونرجف خذيت الفيلو المعلق وحطيته عجنب شايلة كسرت خاطري وحرقة قلبي معاي ..
جهزت روحي وخش فتح الدار بقوة ، مبحتش فِيا نهائي
قالي : غطي وجك ونلقى نقطة الوان فِ وجهك حندمره لكِ ..
فتحت شنطة دبشي وطلعت خمار أسود
حطيته على عِيوني والدموع مازال ينزلن ..
طول الطريق بإتجاه السيارة وانا نسّمي بإسم الله ونتعوذ من الشيطان ، عقلي وقلبي يقولن فِيه سبب
نعطي فِيه فِ عذر ، يمكن سحر ؟
ركب جنبي وخبط باب السيارة بقوته
قالي ..
علقن نكملها لكن بعدين ..كوكا العوامي ..
