ياغيمتي بالبشر مالك شبيه ياليت مالك يابعد هاجس سمي

١

في قريه صغيره بيوت من طين وتحدها من الجهة الغربيه نخيل كثيره ووراها بيوت قديمه ومهجوره ومن الجهه الشرقيه جبال، مدخلها الاساسي من جهة الجنوب
ومن جهة الشمال حلالهم وبيوت شعر لجمعاتهم ومناسباتهم
________
في الصباح يوم الجمعه على الفطور
نزل اللقمه من يده.. وليه ماتبي تعلمن
ابو سهم تنهد بطفش..ياوليدي ياهاجس اترك هالحتسي عنك
وقف هاجس بضيق..زين زين مردي اعرفو طال الزمن ولا قصر.
طلع مسرع
جت حمده ام سهم .. الله يهداك
ابو سهم يمسح جبينه
حمده..تهون ان شاء الله 
ابو سهم.. وش عمل ولدتس
حمده..مادري وشنوحو هالولد اقتلب علينا
شيم من وراهم..اول طايرن من الفرحي وهالحين يبي يموت
حمده..الظاهر انو مايبيه
شيم جلست عندهم..اول يبيه اما هالحين مادري والله
_________
محل الاقمشه
فزاع ماسك السيف ويعرض فيه.. ها هلون حلو
بندر متكي على الباب.. لا لا اعدل روحك
فزاع عدل وقفته.. هلون
بندر بضحكه.. مانت حلو
فزاع صغر عيونه.. بنيدر تسذب علي من اليوم
بندر انفجر يضحك
فزاع..يعني مضبوطي عرضتي
بندر يمسح دموعه من الضحك ..كلك مضبوط
فزاع مد له السيف
بندر باستغراب..وشو
فزاع..ورن عرضتك
بندر..لا فكن منه ماعرف
فزاع..لازم تعلم
بندر..انا لا تحتسي علي الا بهالدكان وبهالاقمشه غيره ماعرف شين
فزاع ابتسم.. عقب العشاء مر علي ابيك
بندر خفض صوته.. وش وراك
فزاع ضحك.. ابيك تساعدن نجهز فرشات العرس
بندر ضرب جبينه بخفه.. احسبن وراك بلا، خلاص ابشر ابشر
فزاع ضحك.. تسلم يالله فمان الله
وطلع من الدكان
_______
شيم مرجعه اكمام ثوبها وتغسل الملابس.. والله مدري هذا راي امي عجزت عنه
ولايف.. خلينا نقوله مرةٍ ثانيه غديه( لعل او عسى) تقتنع
شيم.. انا ارفع يدي من هالسالفي اتركيهم على هواهم
ولايف.. طلبتتس الحقي معي انا احتسي( اتكلم) معه
شيم.. يالله بس ترانن مافتح افمي بشين
ولايف.. ايه ايه بس الحقي معي
اتجهوا لام سهم وام سياف اللي جالسين بطرف الحوش
ولايف..عمتي
ام سهم.. هلا ياعمتي
ولايف.. تكفين ابي اطلبتس
ام سهم.. انتي تامرين ماتطلبين ابشري
ابتسمت ولايف.. وشو رايكم لو تحطون عرس سهم عندنا بالبيت ماهو ببيت عمي فايز اوسع لضيوف
ام سهم..ابد انتي فصلي وحنا نلبس ،اللي تبينو
شهقت شيم.. يمههه وانا لي يومين اطلبتس ومانتي معبرتن
ضحكت ام سياف.. يبعد روحي ياشيمه لا يهمنتس
شيم بقهر.. والله غبن
ام سهم.. قومي كملي شغلتس
ولايف بابتسامه.. وانا بساعدتس يالله
شيم بنرفزه.. ماتقصرين يابنت العم انا اخلص شغلي بنفسي
ومشت وتركتهم
انفجروا يضحكون عليها
ام سياف.. ان شاء الله انا وولايف نولم (نجهز) كل شين
ام سهم.. ماتقصرين الله يجزاتس خير
________
بالسوق اللي كل المحلات تفتح على بعض وقريبه من بعض وبما انه يوم جمعه السوق يصير زحمه لان هاليوم تجيهم بضاعه من خارج ديرتهم.
فلاح( يشتغل بالخيل عند ابو سهم ).. يعمي يعمي ابي التمر الجديد ابو سهم يقول يبي الجديد ماهو الحويل( تمر قديم)
ابو فهاد.. عمى ياملا العمى اقول لك هذا الجديد شنوحك انت
فلاح بنرفزه..انت تقول هذا وعقبن تقول هذا وش بلا حتسيك هلون( كذا)
ابو فهاد.. اللّي من بلشه تبيه او ابيعو على غيرك
فلاح.. لا حول ولا قوه الا بالله الا ابيه ابيه عطن عشر اكياس
ابو فهاد بتحلطم.. هالعيال اللي مابهم سنع
فلاح زفر وهو يستغفر..
بين زحام الناس فجأه احد دفه بقوه وطاح على الارض وطارت منه الفلوس اخذهم الرجل الملثم وابتعد يجري
وقف فلاح مصدوم ويتلفت.. وشو وشو هذا منهو وش اللي جانن
ابو فهاد.. الحقه الحقه خذا فلوسك هالندوع (حرامي)
ركض فلاح مسافه وصار يتلفت وهو مايدري منهو او وين راح
ابو صلاح بياع الخضار.. هالندعان تكثر يوم الجمعه
ابو فهاد.. ماهو من ديرتنا هذا يجي مع هالناس اللي برا
ابو صلاح.. والله لازمن نعلم الشيخ ابو عمار يشدد الحراسي بيوم الجمعي
رجع فلاح يصفق يد بيد ومنغبن
ابو صلاح.. ها ماقضبتو( يمسكه)
ابو فهاد.. شلون يقضبو وهو ابطى مالحقو
فلاح بيبكي من الغبنه.. مدري وين دوى
______
فزاع بابتسامه يمسح على صدره بسعاده وهو يمر من جنب بيتها ويتجه لبيتهم
دخل البيت.. سلام عليكم
شيم وهي تنفض اللحف ومكشره.. ياهلا يامرحبا
ضحك فزاع على تعابير وجهها.. الحلو طنيان(زعلان)
شيم.. لا ماني طنياني
فزاع.. بيّن ( واضح) على عشيرتي الطنى
شيم .. شف ياطويل العمر
فزاع قاطعها.. مدام به طويل العمر السالفي طويلي اصبري ابي اجدع( انزل) هالاغراض وانكس لتس
شيم.. اجدعهن بالمطبخ والحق
فزاع.. وين امي
شيم تكتفت.. نهجت مع عمتي مهره
فزاع.. عرفت وشولو الطنى خلوتس لحالتس بهذا
شيم.. ماهو بس هذا اللي اطنانن اخخخ
ضحك فزاع وهو يتجه للمطبخ.. اصبري
______
غيمه طلعت من الدكان  واخذت اغراضها واتجهت لامها  وهي كل فتره تنزل الاغراض تستريح وتكمل وهي شايله هم امها تاخرت عليها
.....
فلاح.. ابو فهاد
ابو فهاد.. ياعل ماهلا وش تبي
فلاح بنرفزه.. عمي ابو سهم يقول اقولك تعطينن التمر وهو عقب يعطيك الفلوس
ابو فهاد.. والله معطيك ولا حبه يما تعطينن الفلوس
فلاح بقلة صبر.. ياعم كود اخذو الحين باتسر  العرس، عمي ابو سهم ماهو اكلن حقك
ابو صلاح بضحكه.. يابن الحلال اعطو
ابو فهاد.. اعطيك مار قل لابو سهم لا يبطي بالفلوس
فلاح.. ماهو مبطي اخلص علي
ابو فهاد.. قطع الله هاللسان وش بلاك تقل تبي تاكلن
فلاح.. صبرًا جميلًا والله المستعان
ماقدر يكتم ضحكته اكثر ابو صلاح وانفجر يضحك
________
بعد العشاء الكل سكر دكانه وخلص شغله ورجع لبيته
..
ابو غالب يتعشاء مع عياله
شيهانه..  يبه تبي تنهج يمهم
ابو غالب.. ان شاء الله يبنتي 
غالب.. كل الديري معزومين ،لهم اسبوعين يجهزون
شيهانه سرحت بخيالها
ابو غالب.. باتسر انهجي ساعديهم يبنيتي
غالب.. انا ابي انهج مع معيض لصيد يمكن مايمدي احضر
ابو غالب.. لا لا خل نهجتك مرةٍ ثانيي
غالب.. والله مادري يايبه ابي اشوف عن معيض ، شيـهانه اعطينن اللبن
ولا ردت شـيـهانه كانت مبتسمه وسرحانه
عقد حواجبه غالب.. بنت
وماكان في رد
ضربها بخفه على راسها.. وين وصلتي
فزت شـيـهانه..ها وشو
ضحك ابو غالب.. اخوتس يبي اللبن وش نوحتس
شيهانه بلعثمه.. ا ا هاك ياه
______
ابو سهم.. وينو مالو حس
شيم.. بالحجره( غرفه) يبه
ابو سهم.. خليه يجينن انا ابي اقعد بالمشب
شيم.. ابشر يبه الحين اقولو
وقفت واتجهت له
فزاع بهمس.. لهلحين ماطلع من حجرتو
ام سهم.. لا والله لهلحين ماطلع ولا يبي ياكل
فزاع.. بوه احد يبي يعرس يعمل هلون
ام سهم..يعمل هلون يبي غدي ابوه يهون
فزاع..تسان مايبيه وين يبي يقول لابوي ميخالف اخطبه
ام سهم..هو اول يبيع مار مادري وشو اللي جاو
..شيم دخلت عليه.. مساء الخير
مافي صوت
شيم.. سهم يبعد روحي وش بلاك يوجعك شين
سهم وهو كاتم نفسه باللحاف
شيم رفعت اللحاف عن وجهه.. بسم الله عليك ،ابوي يبك قم
سهم .. قولي لوه نيم
شيم.. سهم  ليه كل  هالعمـ..
قاطعها سهم وهو يجلس.. انهجي هالحين اجي
شيم.. سهـ..
سهم.. خلاص ياشيوم هالحين اجي
شيم.. زين يالله
طلعت ورجعت عند امها وفزاع
طلع سهم وهو لابس فروه ووقف عندهم.. وين ابوي
ام سهم.. بالمشب
اتجهه له
دخل هاجس.. سلام عليكم
الكل.. وعليكم السلام
مر من عندهم بدون اي كلمه
شيم.. الحق تعشاء معنا
هاجس.. ماشتهيه
اتجهه لحجرته
شيم.. اعوذ بالله اخواني وش بلاهم
فزاع بابتسامه.. هذا انا عندتس مابي الا العافيي
شيم ابتسمت.. انت غير
فزاع باستهبال..انا مثل وشو
شيم بنفس الاستهبال..مثل القمر عالي
فزاع..الله الله ياسلام
شيم..وانا مثل وشو
فزاع..مثل النجوم
شيم..لا انا نصفك القمر الثاني
فزاع بغمزه..نصفي تخبرينو
شيم دفته من كتفه بخفه..فزاعوه
وقفت ام سهم وراحت عنهم
فزاع.. وش نوحهه
شيم رفعت اكتافها بمعنى مدري
________
الشيخ ابو عمار منسدح ويفكر
ام عمار .. وش نوحك ياشيخ
ابو عمار.. عجيب هالامر والله
بدور.. وشو العجيب يبوي عسى ماشر
ابو عمار..هذي ثاني جمعه يصير بوه سرقه
بدور..وكاد انو من برا ديرتنا
ابو عمار..ايه وكاد انو من برا بس شلون نقضبو
ام عمار.. حط رجالك يراقبونو ويمسكونو
ابو عمار.. ابي احطهم وياويلو لو يقع( يطيح) بيدي
بدور..حطوا بالحبس سنه كامله
دخلت مرجانه ..اعوذ بالله منتس ياعلي ماقع بيدتس
كشرت بدور..ياصبر الارض
ابو عمار..عيب تقولين لاختتس هلون
بدور..يبه
ابو عمار..خلاص
سكتت بدور وهي متنرفزه
______
سهم وهو منزل راسه ويناظر للارض..تبينن اخذ لي وغد(صغير)
ابو سهم.. وتوو يطلع هالعذر وليه ماقلت من اول مابيه وقضينا
سهم تنهد..يبه الله يرحم والديك
ابو سهم بحده .. سهم ماحنا وغدان عندك يوم ايه ويوم لا
سهم.. يبه بيني وبينه اكثر من عشر سنين انت وعمي لا تظلمون البنت معي
ابو سهم.. هي موافقي وشو ظلمو
سهم.. يبه
ابو سهم..قضينا ، توكل على الله
وقف سهم وطلع وكل شوي ضيقته وخوفه يزيد
__________
غيمه.. هلا يمه وش بلاتس يوجعتس شين ياقطعة روحي
ام غيمه بالقوه تتكلم.. لا •• تاخذ نفس بصعوبه.. غيمه يمه تعشيتي
غيمه ابتسمت.. ايه يميمتي تعشيت الحمد لله
ام غيمه بصوت متقطع.. و
قاطعتها غيمه وهي تمسح على يدها اللي ضامتها بين يدينها.. يمه انا اعلمتس وش عملت اليوم
ابتسمت ام غيمه وهي تسمع سوالفها
غيمه.. اليوم مريت راعي الخضره
حطت يدها على راسها بتفكير.. امممم وش اسمو ياريت
ناظرت امها بابتسامه.. نسيت اسمو بس هو حبوب ونفسو حلوي مع الزباين خذيت خضره ورحت يم الدكان وخذيت الاغراض اللي تكفينا يومين.
رفعت نظراتها تخفي كذبها ..السوق اليوم مابوه ناس واجد
وناظرت لامها.. وانا جايه وانا بنتتس حطيت رجلي وجيت اركض
وكملت تسولف عليها اشياء ماصارت
ناظرت امها اللي استسلمت لنوم
تجمعت الدموع بعونها وفي نفسها.. اخخخ لو تدرين باللي يصير لبنتس يايمه
لحفت امها زين وانسدحت قريب منها
______
فتحت الباب بشويش ودخلت معها صحن.
كان منسدح وحاط يده على عيونه ومغمض
.. انت واعي(صاحي)
رفع يده.. ايه
شيم.. احسب اني خربت نومتك
ابعد عنه البطانيه وجلس.. هلا امريني ياشيومه
شيم.. انت ماتعشيت جبت لك عشاء
ابتسم.. ليه معنيتن روحتس قلت لتس ماشتهي
شيم.. لا ياهاجس وراك باتسر شغل يما تقع من التعب ومحدن راحمك
هاجس.. يكفينن انتي راحمتن
ابتسمت شيم.. عاد يالله تعشاء وباتسر ماتطلع الا وانت مفطر
هاجس.. ابشري تامرين على شين ثاني ياشيمه
شيم.. سلامتك لا تفكر بشين نم وارتاح,يالله تصبح على خير
طلعت بسرعه
هاجس اخذ الاكل وياكل وهو مبتسم
__________
فزاع.. الله يعافيكم ياشباب ماقصرتوا
فلاح.. تامر على شين ثاني يافزاع
فزاع.. سلامتك ياحبيب الروح
بندر.. عاد انا من الصبح اجيك ان شاء الله نكمل الباقي
فزاع.. على خير يعطيك العافيه
تركوه الشباب وكل واحد اتجهه لبيته
فزاع يناظر حوله مايشوف احد اسرع بخطواته لبيتها  وهو قلبه بيخرج من مكانه من الفرحه والتوتر واخذ حجر صغير وضرب الدريشه
انفتحت الدريشه وهي وراها وبزعل.. تسان ابطيت بعد بالحيل
فزاع واقف قريب الشباك ومعطيه ظهره ويناظر لطريق.. ابطيت عليتس ياعيوني
تكتفت ..اي ابطيت بالحيل عجزت وانا اتحراك
فزاع.. والله توي قضيت من الشغل تدرين باتسر العرس
ميلت فمها بزعل..  الشغل يأخذك مني
فزاع.. مابه شين بالدنيا ياخذن منتس ياشيهانة فزاع
شيهانه.. مارضيت
فزاع ابتسم..
من حروفتس انتثر شعر وقصيد
ومن كلامتس امتلاء جوي غزل
ومبسمتس يابعد ذا الروح عيد
وفي شفاهتس يابعد قلبي عسل
((﮼منقوله ☝︎︎﮼  كل القصايد بالروايه منقوله))
ابتسمت وهي ورى الشباك
فزاع.. ها رضت شيهانتي
شيهانه.. فزاع
فزاع.. ياعروق قلبو
شيهانه.. متى تخطبن
فزاع بانكسار.. ان شاء الله نقضي من عرس سهم اقول لابوي
شيهانه.. زعلت علي
فزاع.. انتي تدرين ياشيهانه
شيهانه.. بس حنا نبي بعض يافزاع
فزاع.. تصبحين على خير ابطيت, سكري الدريشي.
سكرتها وانسدحت على فراشها بضيق
بعد ماتاكد انها سكرتها  مشى بضيق واخذ نفس يهدي نفسه
_____
انتهت هالليله واشرقت الشمس والكل انتشر بعد الفطور على شغله
::
ولايف.. ليا متى وانت جالس بهذا(هنا)
سياف.. الحين انهج يمهم وش مستعجلين عليه
ولايف.. المثل يقول امير النهار اولو، الحين يقضون الناس شغل وانت قاعد
سياف.. احلا خليهم يقضون عاجزن اشتغل
ام سياف طالعه من المشب.. ماخبرت وليدي هلون اخبرك شقردي
سياف..ياميمتي ابي انهج الحين بس بنتتس كلتن
ولايف.. الله اكبر عليك وش قلت لك
ام سياف.. خلي اخوتس قومي كملي شغلتس
ولايف تاففت..زين
سياف التفت لامه.. الحريم عندنا بالبيت يمه
ام سياف.. اي يوليدي نبيهن بهذا
سياف وقف وباس راس امه.. يالله يمه ابي انهج لبيت الشعر اشوف الشباب وش عندهم من شغل
ام سياف.. الله يحفظك يوليدي
سياف وهو متجهه للباب.. شوفي لي من البنات المزيونات
ضحكت ام سياف
لفت ولايف وتخصرت.. الا ياللي ماتستحي على وجهك
_______
عند بيت الشعر اللي بالجنه الشماليه من الديره يتم تجهيزات العرس
بندر.. وش بلاك تقل مانت مستانس
فزاع..الا والله اني ميت من الوناسي هالليلي ليلة عيد
بندر..اي والله انها ليلة عيد
فزاع كمل يحط التمر  وهو يحس بالعيره تخنقه
بندر سحب المقدعه( اللي يحطون فيها تمر)..فزاع يوجعك شين
فزاع.. راسي يوجعن
بندر..ا
قاطعهم هاجس.. ياشباب واحد يجي يساعدن
بندر.. يالله جايك ••التفت على فزاع.. ارتاح ياخوي انا اكمل عنك
فزاع رفع صوته ينادي.. فلاح يافلاح
فلاح جاء يركض.. هلا هلا
فزاع..جهزت الدلال
فلاح..هالحين اجهزهن ،تبينن اعاونك على شين 
فزاع..لا ياملا العافيه
سياف جاء وجلس جنبه.. صبحت بالخير
فزاع..صبحت بالنور
سياف سحب التمر وبدا يرتب معه..عقبال مانجهز لعرسك
فزاع..عرسك قبلي
سياف.. قبلك وعقبك
فزاع عقد حواجبه ..تبي تاخذ مرتين
سياف..مرتين قبل عرسك ومرتين عقب عرسك
فزاع..اعوذ بالله اربعه الله لا يشفحنا
سياف ضحك بقوه ..وليه مابه شين
فزاع..قم قم ساعد العيال انا قضيت
______
بعد العصر الكل صغير وكبير مبسوط ويشتغل ويرتب
على الجبال من الجهه الشرقيه واقف يناظر للقريه
.. اه ياديرتي الله اكبر على زمانن فات 
فياض جالس جنبه.. اطعن واعمل اللي قلت لك
ابتسم بخفه..وشلون ياخوي اصلح الخطأ بخطى
فياض ..ميخالف مدامو لمصلحتك
لف شماغه على وجهه.. القلب لهلحين مجروح
فياض..اخوك ماشفتو
اخذ نفس عميق.. جيتو عقب السالفي مرتين وعقبن طردن
فياض..افا ليه
..منخرع علي يقول يشوفونك
فياض..يفرجه الله وانا اخوك
_________
بيت ابو سياف
شيم.. يالله ياولايف استعجلي العنود تحرانا
ولايف.. اي يالله جيت ••لفت على ام سهم.. عمتي وين ناخذ العنود بهاذا ولا ببيتكم
ام سهم.. لا ببيتنا عشان تجهز
شيم ماسكه راسها.. خبلي انتي خبلي شلون نجيبه بهذا
ولايف.. مادري وش درانن اللي يسمعتس يقول كل يوم معرسه
ام سهم كتمت ضحكتها.. يالله انهجن بساع وحنا عقب العشاء نجيكن ان شاء الله
طلعوا واتجهوا لبيت عمهم ابو العنود اللي مايبعد عنهم شي
غيرت مسارها شيم متجهه لبيتهم
ولايف.. هييي وين تبين
شيم.. لازم ننهج للبيت ابي اتوكد من شين
ولايف.. وشو قولي لي
دخلت شيم.. تغشي(تغطي) وتعالي
ولايف.. ليه بوه احد بهذا
فتحت شيم الباب وشهقت.. والله اني شكيت انك مانهجت
سهم رفع راسه.. وين انهج
شيم.. خذ هدومك وانهج ابي اجيب العنود بهذا
سهم..تو الوقت ياشيمه توه
شيم ناظرت اللي معلق وابتسمت.. الله وشو هالبشت الحلو
سهم يناظرها وساكت
شيم.. هذا اللي عمي ابو العنود اعطاك ياه هديي
سهم.. ايه
شيم.. الله الله ياسهم تستاهل تستاهل ياخيي
دخل فزاع وهو يصرخ وفزت ولايف .. بسم الله وش بلاك الرجال يسلم لمنو دخل
فزاع.. سلام عليكم يابنت عمي وش بلاتس بهذا
ولايف.. بلاي اختك خله تجي بساع( بسرعه)
اتجه فزاع لغرفته وهو يرفع صوته.. شيمهه سهممم
شيم .. هلا هلا بحجرتك حنا
فزاع.. ابوي يقول دقيقتن وحده اذا ماشفت سهم قدامي ماهو احسن لوه
سهم ببرود.. البس بهذا ولا اخذ هدومي
فزاع.. لا ابوي مجهز خيمي تغير به خذ هدومك والحق
وقف سهم واخذ ملابسه وطلع مع فزاع
شيم.. يالله الحين نجيب بنت عمنا وعروستنا الحلوي
_______
على المغرب تجهز سهم وكشخ بالبشت وجت الشيوخ اللي بالقرى المجاوره وجت معارفهم من كل مكان وصوت الطبول وعرضة الخيل
وعند الحريم اللي يستقبلون الضيوف وريحة البخور تغطي المكان وصوت التصفيق والغناء.
وعند العنود كاشخه بفستان احمر وشعرها الاسود اللماع يغطي ظهرها وغرتها اللي على عيونها تناظر شيم وولايف اللي واقفين عند الباب ومتحمسين
شيم بصوت عالي.. ياولد الحق الحق
فز الولد.. وش تبين
شيم.. انهج يم ام سهم وقل له العنود تبيتس بساع لا تبطين عليه
الولد.. انا انهج يم الرجال مانهج للحريم
ولايف.. طلبتك
شيم.. لمنك نهجت اقول لفزاع يخليك تركب الفرس
الولد عيونه تلمع من الفرحه..والله تقولين لوه
شيم.. اي والله بس انهج بساع قل لامي والحق
طار الولد من عندهم متجهه بيت ابو سياف
العنود حاطه يدها على خصرها.. وليه تتسذبين(تكذبين ) علي انا مابيه
ولايف.. عنوده يعيوني نبي ننهج نرقص
العنود.. انهجن انا اقعد لحالي ميخالف
شيم.. بس امي لو تشوفنا مخلينتس ذبحتنا
العنود.. لا قلن العنود تبي تقعد لحاله
دقايق ورجع الولد.. مالقيته
ولايف.. اه منك ليه مانشدت احد عنه
الولد.. انا نهجت لازم تعطينن الوعد
شيم.. انهج يم فزاع وقل شيم تقول ركبن الخيل بس لا تقولو عند الرجال تفضحن قلو لحالو
ابتسم الولد وراح من عنهم ركض
العنود.. ولايف شيم انهجن يالله
ناظروا بعض وابتسموا
__________
الشباب كل واحد ماسك دله ويضيفون الضيوف
الشيخ ابو ماجد.. اشوف يبو عمار بيوت قديمي بالحيل ورى هالنخل من الغرب هن لكم
ابو عمار.. هذولي من دور ابواننا الله يرحمهم مار عقب نقلوا بهذا، البيوت القديمي مكانه على مجرى السيل وكل عقب مطر يعمرون من جديد وهالمكان هذا مرتفع مايجيه شين
الشيخ ابو ماجد.. بس الجبال تصب عليكم بهذا
ابو عمار.. لا كله تنزل يم البيوت القديمي
فزاع كان واقف بالدله ويسمع كلامهم
قاطع عليهم الولد.. فزاع فزاع
فزاع نزل نفسه لمستوى الولد.. خلك بهذاك عند هاجس الحين اجيك
الولد اتجه لهاجس اللي واقف عند النار ويصف الدلال ووقف عنده
هاجس.. وش عندك
الولد يناظره بنص عين.. مابيك ابي فزاع
رفع حاجبه هاجس وبهمس.. اهفك بهالدلي
الولد كشر وصد عنه
::
بندر.. فلاح هاك الدلي الرجل هذاك توو جاء
فلاح.. هات ابشر
بندر.. مرزوق دونك التمر
::
فزاع.. يالله الحق معي للفرس
هاجس.. وانت مصدق حتسيوه
فزاع.. ايه 
حركته المعتاده هاجس يرفع واحد من حواجبه.. الحمد لله والشكر
اتجه لواحد راكب الفرس.. حوّل، هالحين انا
صفقوا الشباب وهم يشوفون  فزاع يركب الفرس
ابو العنود.. السامري ياعيال
هاجس بعد ماخلصت صب القهوه ابتعد عنهم مسافه
________
ام سهم.. قص يقص ضلوعكن وش جابكن ليه تخلن العنود لحاله
شيم.. يمه عرس اخوي تبينن اجي عقب الناس كلهم
ام سهم.. تنكسن هالحين
شيم بعناد وزعل.. والله مانكس
ام سياف.. انا انهج يمّه اتركي البنيوات يستانسن
شيم فزت تبوس راسها.. كفو يعمتي كفو
ام سهم.. وفشيلتي منكن
اتجهت شيم لطقاقه وهي تصفق.. يالله انا ابي ارقص
الطقاقه.. كفو اخت العريس
شيهانه واقفه قريب الطقاقه وهي لابسه فستان ازرق ابتسمت وهي تشوف شيم وسرحت بافكارها وتتخيل ان هالفرحه تكون بعرسها هي وفزاع
شيم.. يابنت هيه وين وصلتي
فزت شيهانه تسلم عليها وتبارك لها
شيم.. ترقصين معي
شيهانه.. خلينن عقبتس ارقص
شيم.. ابي احد يرقص معي
ولايف من وراها.. انا وين نهجت
شيم ضحكت .. نسيتتس ، يالله ياوليفتي
_________
خلص العشاء وبدت الزفه والكل متجه لبيت ابو سهم وصوت الطبول وصهيل الخيل وسهم وسطهم يحاول يجمع كلام وزاد توتره واخذ نفس عميق .
هاجس جالس ببيت الشعر ماراح مع الزفه وقدامه الشيخ ابو عمار
هاجس يمرر نظراته عليه وزاد توتر ابو عمار
هاجس.. فلاح
فلاح فز.. هلا
هاجس.. صب قهوه لشيخ
فلاح.. ابشر
الشيخ اخذ الفناجل وبسرعه شربه.. دايمه يولدي
ووقف.. الله يتسثر خيركم ويوفق عريسكم
هاجس جالس ماوقف.. وين وين تو الناس يابو عمار
ابو عمار..الله يغنيكم
طلع مسرع يخاف يجلسه هاجس وهو يمسح جبينه.. أعوذ بالله
هاجس باستغراب.. هالناس وش بلاه
_________
وصلت ام سهم قبل وصولهم.. لا تنخرعين يابنتي
ام سياف.. عسى الله يوفقتس يابنيتي ويكتب لتس الحياه السعيدي
رجفت العنود وهي تسمع اصواتهم دخلوا البيت
كان ابو سهم وابو العنود وسهم
فزاع وابو سياف رجعوا من الرجال لبيت الشعر
أبو سهم.. ياحريم
ام سهم.. حياكم حياكم
ام سياف اخذت العنود و طلعت، العنود شدة على يد ام سياف من الخوف
ابو العنود.. هلا ببنيتي
ابتعد شوي سهم وهو عيونه بالأرض
العنود اتجهت لابوها وضمته وهي ترجف
ابو العنود..عسى الله يوفقتس ياوليدي
العنود بهمس.. يبه
ابو العنود بنفس الهمس وهو ضامها..يروح ابوتس
العنود.. هونت
ابو العنود..وشو اللي هونتي عنوه
العنود..خذن معك مابي عندهم
سهم زادت رجفته وهو يسمع همسها وتوه يتاكد من الخبر اللي سمعه
ابتعد شوي عنهم.
ابو العنود.. هذولا اهلتس يبنتي وسهم باذن الله يبي يعوضتس عن كل شين
العنود.. والله اني منخرعي(خايفه)
ابعدها عنه ابو العنود.. سلمي على عمتس يبنتي
العنود وهي منزله راسها سلمت على عمها
ام سهم.. اقلطوا (تفضلوا ) حياكم
ابو سهم حط يد العنود بيد سهم وطبطب على كتف ولده بخفه
دخل الحجره سهم وبسرعه سحب يده من يدها
ابو سهم وابو العنود طلعوا واتجهوا لبيت الشعر
________
فزاع.. لا تحدى يافراس
فراس..اتحداك واتحدى عشره من اشكالك
فزاع رفع ثوبه وربطه على خصره.. ولد ابوي هاتوا السيوف
هاجس وهو متكي.. تراك جنيت على روحك يافراس
فراس.. الدور جايك انت اللي عقبو
هاجس ضحك باستهزاء.. تسان بقي بك حيل تاقف على رجليك
فراس.. اعقب وانا ولد ابوي
فلاح.. هذي السيوف
اخذ فزاع سيف واعطى فراس سيف وبدت المنازله
فراس طاح مرتين ووقف بسرعه
فزاع..والله لاكسر خشمك هاللي رافعو علينا
فراس.. تسانك تقوى
فزاع ماشوف قدامه الا فراس من العصبيه وكل شوي يزيد ضغطه على السيف
والكل يشجع ومتحمس وفجأه وقف الكل على الصوت
ابو سهم بصوت عالي..بحرب حنا
ابو العنود.. وشو هالعمل ماتستحون
هاجس.. ميخالف نتسلى مثلو مثل ركب الخيل
ابو سهم بحده.. هاجس
هاجس وقف واخذ السيف من فزاع وغرسه بالارض بقوه قدام فراس.. اليوم مسموح لك تنهج بس عقبو ماتلوم الا روحك
طلع وتركهم
فراس..تعب وتخسى
ابو سهم بعصبيه..فراااس اكفنا شرك
ابو العنود.. تعوذوا من الشيطان
فراس.. الشيطان حضر مع حضرتك
فزاع وسياف فار دمهم وهجموا عليه
سياف صار وراه وخنقه وفزاع صار قدامه ويصفقه
ابو سهم فقد اعصابه واتجهه لهم..فزااااع سياااف والله لو ماتركتوه انكم ماتلومون الا روحكم
ابو سياف.. خلاص ياعيال عيب عليكم
سياف وفزاع ابتعدوا عنه بقهر
وقف فراس واخذ شماغه وهو يمشي مبتعد.. والله ماخليه لك يافزاع وانا ولد ابوي
فزاع بصوت عالي.. اعلى مابخيلك اركبو
ابو سهم ناظر له بحده
فزاع نزل عيونه
_________
سهم بلع ريقه وهو مايدري وش يقول لها
مسح جبينه وهو يتذكر
<<<<<<<<
سهم دخل الدكان طاير من الوناسه
بندر ضحك.. ان شاء الله ليتك من اول عرست نبي نشوف هالفرحي
سهم تنحنح بخجل
بندر.. الحق تقهوى
سهم جلس عنده
بندر.. متى العرس
سهم.. عقب اسبوعين
بندر بضيق..ودي اقول لك شين مار ماودي اخوي مزاجك
سهم عقد حواجبه.. وشو وشنوحك
بندر.. والله ياسهم سمعت لي سالفي مار مادري هي تسذب ولا صدز
سهم بخوف.. وشوي احتس
بندر.. قبل امس انا قاعدن عن امي ونشدت تقول بنت فايز ماتبي سهم
سهم ركز اكثر بخوف
بندر..قلت وشدرينن منهو هاللي قايلن هالخبر
قالت كل حريم جيراننا يقلن فايز غصب بنتو على سهم وتقول انه ماتبيه تسيير عمرو عليه
سهم باستغراب وتوتر.. متوكد من هالخبر
بندر.. والله هذا اللي انا سمعتو قلت اعلمك باللي سمعتو
سهم وقف.. الله يعطيك العافيه
طلع ويحس العبره خانقته والفرح تبدد لحزن
<<<<<<
العنود تضغط على يدها تحاول تخفف توترها
سهم بتفكيره ونفسه.. انشده ••لا لا ياسهم وشلون تنشده تقول انتي ماتبينن•• ويمكن الخبر اللي جانت تسذب •• هـ ـهـ ـه وشلون تسذب وهي مشوين اللي قالو هونت وماتبي تقعد عندنا.
بعد مده من الصمت
سهم لف عليها وهي جنبه.. اسمعينن يابنت عمي .
العنود بلعت ريقها
سهم..انتي تراتس ضلعٍ من ضلوعي، اللي يصير عليتس يصير علي انا اخوتس وابوتس وسندتس، واي حاجتن تبينه من هالدنيا اشري عليه وابشري به ،
العنود تجمعت الدموع بعيونها وهي منزله راسها
سكت وهو يسمع اصوات اهله رجعوا للبيت
وقف
انسدح على الفراش ويحس راسه بينفجر من الصداع  صار يضبط عليه بخفه يبي يخف
بعد مرور وقت قصير وقفت الـعنود بشوي وصارت امشي على اطراف اصابعها وقفت قريب منه وشافته داخل بنومه عميقه حطيت يدها على قلبها وتنهدت براحه
_______
الصباح والناس طالعه من المسجد والكل اتجه لبيته بيفطر ويروحون لشغلهم
فهد.. يافراس الشيخ يبيك انهج يمو
فراس.. ماهو هالحين انهج لمنه صارت الشمس بتسبد( كبد) السماء
عياد.. تراه يطنى عليك انهج الحين
فراس.. والله ماتحرك يما اوقع اللي براسي
فهد.. ماهو جاي اليوم ادري والله ماتشوفوه
فراس.. لا يجي وليه مايجي
عياد.. انهج يم الشيخ وعقب تجي تلقاو تسان يبي يجي
فراس.. ياعيال اتركونن لاحط كل حرتي بكم
فهد وعياد جلسوا بصمت
.. ابو فهاد يفتح دكانه كشر وهو يشوفهم.. اصبحنا واصبح الملك لله يالله صباح خير لا شر فيه
فراس.. هيه انت وش نوحك تقل ماهو عاجبك
ابو فهاد.. انا وش انا قايل ياملا الصّمخ
عياد.. اكفنا شر لسانك يارجل
ابو فهاد.. يالله ياربي صبرك انا وش انا عامل يوم الله يبلانن بهالناس مع هالصبح
فراس وقف وبصراخ.. ابوو فهادد اقضب لسانك لا والله ادفنك وانت حي
فهد صار بوجهه.. تعوذ من الشيطان وش تبي بوه ناقص عقل اتركوه
ابو فهاد.. قطع الله هاللسان انا ناقص عقل
فهد يغمز لعياد.. يالله مشينا
طنشوا وابتعدوا شوي عن دكانه وهو يتحلطم
ابو صلاح من وراه يضحك
ابو فهاد..ياملا نثر السنون وشتضحك لوه
ابو صلاح.. استغفر انا مالي الا ضرسين وتبيهن يقعن
ابو فهاد.. هالناس يبون يذبحونن قبل يومي ، عيال اليوم مايقدرون التسبير
ابو صلاح فتح دكانه وهو ميت ضحك
_________
ابو سهم.. شيمه ياشيمتي خلي العيال يجون يالله نبي نفطر ونمشي لشغلنا
شيم.. ابشر يبوي شيم غالي والطلب رخيص
اتجهت لغرفه سهم وطرقت الباب بقوه فزوا سهم والعنود، وقف وفتح الباب وهو يفرك عيونك.. خيرررر
شيم.. الخير بوجهك انهج يم ابوي افطر معو
سهم.. يالله جايو
اتجهت لغرفة هاجس ودخلت بدون ماتطق الباب.. هاجسسسسس هجوس هجوسي صحصح يالله ابوي يبيك
فتح عيونه بالقوه.. عاجز اتركينن
شيم..ليه ماصليت بالمسجد
هاجس يغطي وجهه.. صليت بهذا عجزت انهج للمسجد
شيم سحبت اللحاف.. يالله قم
هاجس جلس وهو يتمغط.. فزاع جاء
شيم.. لا نشدت امي تقول من البارح مانكس
هاجس.. انهجي الحين اجي
شيم وقفت ثم لفت عليه .. ماهو تنكس تنام ترا ماهو احسن لك
هاجس..زين زين
طلعت شي ورجع انسدح
دقايق ورجعت له وبصراخ.. هاااااااجس
هاجس فز.. بسم الله
شيم.. قلت قم وشولو تنكس تنام
هاجس بتمثيل.. مصخن
شيم قربت منه بخوف.. هاه
حطيت يدها على جبينه وعقدت جوابها بعصبيه.. بعد تتسذب
هاجس انسدح. والله اني عاجز
شيم رفعت صوتها.. يبببه
هاجس فز وطلع مسرع
شيم بانتصار..ماتجي الا بالعين الحمراء
________
بدور.. لو حتسيتي شين والله لسانتس اقصو يامرجانه
مرجانه.. انتي شنوحتس وش بلاتس ياخيتي انجنيتي
بدور.. ايه انجنيت وش تبين مالتس شغل اتركينن
مرجانه.. والله لو تعدين هالباب اني لاعلم ابوي عليتس
بدور بصراخ.. مرجانه تدرين وش اعمل بتس لو فتحتي افمتس بشين
مرجانه تخصرت.. ومتى تبين تنكسين ان شاء الله
بدور.. مابطي قبل يجون امي وابوي الا انا بهذا
مرجانه.. اذا جو قبلتس وسالونن ترينن بعلم
بدور.. ماهم ناكسين ماعليتس
مشت من عندها
رفعت صوتها مرجانه.. ترى مالي شغل بتس لو يذبحونتس ماتعذر عنتس
بدور تاففت ووقفت .. مرجانه يابعد يعيوني شوين ماني مبطيه بس بشوفو وش بلاتس
مرجانه كشت عليها.. انهجي عساتس ماترجعين .
اخذت عبايتها وطلعت مسرعه
مرجانه جلست قدام القهوه وصبت لها فنجال.. يالله ياربي ياكريم ان يجيتس احد ويخرعتس
_______
فزاع متمدد على الارض ونايم مو حاس بشي بنص بيت الشعر
سياف.. هيييييه ياولد قم وشي هالنومي
سكت شوي وهو يتلفت يناظر لكل شي نظيف.. ياعيني عليك ياولد عمي انت زينت كل شين الله يعافيك
فزاع غرقان بنومه وفجأه فز وصرخ.. بسم الله وشو هذاااا
سياف بضحكه.. وش اعمل بك قومتك ماتقوم
فزاع مسك قلبه.. عاد تصب علي ماء
سياف.. انهج يم بيتك عمي ينشدن عنك
فزاع.. انا مادري وشلون نمت بهذا
سياف.. قل لشيم ولايف تبيه تساعده على الحوسي  فزاع.. ان شاء الله
سياف.. انا ابنهج يم الدكان لمنك افطرت واسترحت الحق تقهوى عندي شاهي
فزاع يفرك عيونه.. زين زين
_______
جالسين يفطرون بهدوء
ابو سهم... مريت على دكانك
هاجس.. لا لهحين
ابو سهم.. كم صار لك مامريت عليه
هاجس وهو يشرب الشاهي.. سبوعين
ابو سهم عصب.. اسبوعين وانت مخلي دكانك مع هالسروق
زفر هاجس وهو يحاول يمسك اعصابه.. انا ادرى بشغلي
ابو سهم يهدي نفسه..هاجس يابوك افطن لشغلك حطيت هالسروق ماقلنا لك شين
هاجس..هالسروق تاب ويبي يكسب رزقو بالحلال تحرمونو
ابو سهم.. ماقلنا شين مار افطن لوه ماهو مخليه اسبوعين لا حسيب ولا رقيب
هاجس وقف.. الله يبارتس لكم
وطلع
تنهد ابو سهم..هالولد يبي يذبحن
فزاع..الله يطول بعمرك ويحفظك
ابو سهم لف على فزاع .. وانت بساع كل واسبقن على الدكان
فزاع فز.. ابشر يبه
سهم.. وانا ابي معكم
ابو سهم.. وين تنهج معنا لا أقعد ••ولف على فزاع.. انجز علي انت
نشبت اللقمه بفم فزاع
::
العنود.. تبين تنهجين الحين
شيم.. ايه ابي اساعد ولايف
العنود.. زين اعطينن المواعين هذولي اغسلهن وانتي انهجي هالحين
شيم..لا الحين اقضي تغسيلهن ماهن شين
العنود.. اقول اعطينن عنتس
شيم.. هاليومين هذولي ابي ادلعتس وبعدين اسحبتس من حجرتتس تغسلين وتنظفين
ضحكت العنود.. ماعليه اغسلهن الحين وبعدين اعطينن
وصلهم صوت سهم من بعيد.. شيم وين امييي
شيم رفعت صوتها.. يم بيت عمي
سهم.. وانتي تبين تنهجين ولا هونتي
شيم..لا ابي انهج
سهم.. يالله فزاع يتحراتس
العنود ضحكت.. اعطينن ياهن ويالله مع السلامه
شيم.. الشكوى لله اول ابي ادلعتس مار ماش
__________
غيمه.. يمه يبعد يروحي وشو اللي مقومتس من الفراش
ام غيمه.. ابي اطلع اشم هالهوا ••تاخذ نفس..انكتم نفسي من قعدت الفراش
غيمه.. تسان قلتي لي اعاونتس لا تقومين لحالتس
ام غيمه.. مابي اشغلتس واتعبتس
غيمه وهي تساعدها تمشي.. يمه الله يهداتس وشو اللي تشغلينن وتتعبينن انا منهو لي غيرتس بهالدنيا 
أم غيمه.. الله يرضى عليتس يابنيتي
غيمه..  وش لونتس اليوم مانتي اشوى
ام غيمه.. الله هو الكريم
جلستها غيمه ورجعت بتجيب ماء
ام غيمه تناظر للغيوم والجو اللطيف
_________
دخل السوق واتجه لدكانه
وفز مسعود.. ياهلا ياهلا يامرحببا توو نور الدكان
مرر نظرته على المحل .. شلونك يامسعود
مسعود.. الحمد لله بخير
جلس على الكرسي .. ها قلي وشلون الشغل
مسعود.. مثل ماقلت لي كل شين مسجل
فتح الدفتر.. هذا اللي مسجل بوه كل شين
مسعود.. اي الذهب اللي اشتريه اسجلو بالجهه اليسرى من الدفتر واللي ابيعو اسجلو بالجهه اليمنى
جاهم صوت من عند الباب.. هااااااجس
هاجس ومسعود لفوا على الصوت
الرجل .. هاجس الحق فزاع يتخانق مع فراس
فز هاجس وركض معه مسعود لف عليه.. وين تخلي الدكان اقعد
وقف مسعود.. ا ا اايه زين
::
فزاع شماغه بالارض وشعره منتثر على عيونه
والناس بينه وبين فراس يهدونهم
ابو سياف بصراخ .. تعوذوا من الشيطان وش بلاكم انتم
فزاع سحب شماغه.. هو اللي يتعدى علي وكل مره تبونن اسكت
فلاح يحاول يهديه
فراس.. والله اني ماخليك يافزاع والله لو يصيرون كل هالناس من دونك
هاجس وقف قدام فزاع وعيونه شرار اشر بسبابته جهت فراس.. وآلله والله لو تلمس شعره من راسه اني لانهي حياتك
فراس من ورى الرجال اللي صايرين بينهم.. تخسييي ماتبقى الا انت
هاجس.. جرب تقرب يمو والله ماحسب ربي خلقك
ابو سهم من بعيد جاء معصب.. هاجس فزاع يالله يم شغلكم
ابو صلاح.. يالله يافراس انهج اكفنا شرك
فراس بعصبيه..انا مالي شر يابو صلاح هم الشر كلو
فزاع اتجهه لدكان وهو متنرفر
فراس..والله ماخليك والله
_______
سهم جالس بالحوش بمكانهم المعتاد
العنود جت وهي تنزل اكمامها وهي طالعه من المطبخ
جلست قريب منه وسحبت القهوه تصب له
اخذ الفنجال وهو يناظر لها 
<<<<<<<<
كان عمر العنود٣ سنوات
الاولاد والبنات يلعبون وعندهم العنود جالسه بالارض وتبكي اسرع لها سهم وشالها.. ليه ليه وش بلاه العنود
شيم.. عمي فايز(ابو العنود ) نهج وخلاه
سهم.. وين نهج
ولايف.. يقول يبي ينهج يم الرجال افطنن له وحنا عجزنا عنه عيت تسكت
سهم .. عنوده هالحين ننهج  يم الدكان
شيم وولايف.. وحنا نبي معكم بعد
العنود تشاهق
مسح دموعها ولف على الاولاد.. لا اشوف احد قايل للعنود شين هذي بنتي
سكتت العنود ومسك يد شيم وولايف واتجهوا لدكان
شيم.. شلون هي بنتك وهي بنت عمنا
سهم.. اغليه مثل بنتي
ولايف..  عشان انك تغليه تصير مثل بنتك
شيم وهي ماسكه يده.. وحنا بعد نبي نصير بناتك
ضحك بصوت عالي.. وانتن بعد بناتي
<<<<<<<<
بلع ريقه وهو يشوفها كبرت وتغيرت ملامحها حيل وشرب فنجاله
سهم.. العنود
العنود .. هلا
سهم سكت يفكر
العنود ميات راسها بابتسامه..وشبلاك
سهم.. ها لا مابي شين
العنود اخذت فنجاله وتصب له قهوه بابتسامه
بلع ريقه بتوتر وناظر للارض
_______
دخل وهو مبسوط ويهمهم
وصله صوت وقف قلبه.. وينك داشر
بلع ريقه.. يبه الله يهديك وشو داشر توي خلصت شغل من بيت الشعر
ابو سياف بشك.. وليه بس انت اللي تشتغل
سياف.. يبه جيت فزاع نيم  وقال لي اكمل اللي بقى
ابو سياف.. يالله الحق كمل شغلك بهذا
سياف.. وين راكان
ابو سياف.. قلت لوه يستريح هاليومين
سياف بهمس.. وانا اشقى واعجز
ابو سياف.. يالله جهز الطحين لابو مرداد وسكر وقمح لابو غانم
رفع ثوبه سياف وربطه على خصره.. ابشر يبوي ابشر
دخل ابو سهم.. سلام عليكم
وقف ابو سياف.. ياهلا والله بعزوتي
ابو سهم جلس بتعب.. ابي شعير للخيل
ابو سياف..ابشر ••رفع صوته..ياسياف جهز شعير لعمك
ثم ناظر لاخوه.. وش بلاك ياخوي متكدر
ابو سهم يمسح وجهه .. ابلشن يبي يعرفو
ابو سياف.. الله لا يوفقك يافراس يومنك تسذب على ولدنا
ابو سهم.. انا مادري منين جايب هالخبر
ابو سياف..ماعليك منهو هذا تسذوب يبي يفرقنا
تنهد بضيق ابو سهم
ابو سياف.. وسع خاطرك وانا اخوك
ابو سهم.. ياخوفي بيوم يكسر كلمتي
ابو سياف.. وكل امرك لله يارجل
ابو سهم.. ربي اني وكلت امري اليك
سياف جاء..هلا عمي
ابو سهم..هلا بك ياوليدي
سياف باس راسه.. وشلونك عقب البارح
ابو سهم ..نشكر الله ونحمدو
سياف..الحمد لله، الشعير جهز ارسل فلاح يجي ياخذو
ابو سهم..الله يعافيك ان شاء الله
________
ولايف وشيم شوي يغسلن القدور وشوي يطبلن ويرقصن
جلست بتعب ولايف.. سهم تسبير وليه ماعرس اول
شيم.. يتحرى نصيبو
ولايف رفعت حواجبها وبابتسامه خبث.. هو عاشق العنود
صقعتها شيم بالملعقه.. لا اقول يتحرى نصيبو يعني الله ماكتب لوه يعرس الا هالحين وعلى العنود
ولايف تمسح مكان الضربه.. اييي اوجعتينن
شيم.. خلينا نقضي ابي انهج
ولايف.. وليه تنهجين اقعدي عندي
شيم.. حرام خليت العنود تشتغل
ولايف..الله لا يجزي العدو بالخير البنت توه عروس وانتي مخليته تشتغل
شيم..وش اعمل بتس انتي بعد
ام سياف من وراهم.. ولايف خوذي هدوم اخوتس وحطيهن بحجرتو
ولايف.. زين يمه ..وبهمس .. عاجزه اقوم تكفين شيومه شوفي رجليي يوجعنن
شيم وقفت.. يالله يربي صبرك وانا رجليي مايوجعنن يعني
اخذتها واتجهت لغرفته وشقت وجهها الابتسامه وهي تشوف اغراضه.. والله ماعرفتك ياسياف ياولد عمي
نزلت الملابس وشافت سبحته على فراشه واخذتها
________
بلال اخذ نفس عميق وهو مبتسم.. اه يازين ديرتكم
هاجس وهو جالس على الصخره.. اقول اخلص علي وش صار
بلال وهو فارد يدينه يستقبل نسائم الهواء البارده.. مالقيت شين
هاجس.. وشو شهر وتجينن تقول مالقيت شين
لف عليه بلال.. والله يابو جابر لا ليلي ليل ولا نهاري نهار وانا ادور
هاجس تافف.. وليا متى
بلال.. هو بالديره ماطلع انا ادور برا وهو عندك
هاجس.. محدٍ يبي يعلمن وش اعمل بهم
بلال.. انا ابي اكمل واسال وانت حاول تعرف شين
هاجس.. ايات معلومه لو هي صغيره علمن به تنفعن
بلال.. لا تشيل هم، يالله اشوفك على خير
هاجس.. لا تنهج يم جهة النخيل اطلع مع الجهه الشماليه لا يشوفك احد
وقف بلال ولف عليه.. ليه مانعين احد يجي جهة النخيل
هاجس.. مادري عنهم بقلعتهم
بلال بتفكير.. يمكن
هاجس وهو يطرد الفكره.. لا لا سالفتي ابيه من يومي صغير الجهه الغربيه منعوه توهم
بلال مشى وهو متعجب.. يالله اشوفك على خير
________
بعد العشاء بدت السماء تمطر
دخل سهم وهو توه جاي من ابو العنود وكله ماء.. سلام عليكم
حمده.. يوليدي ليه مشيت بالمطر ابتليت انهج غير هدومك
سهم قرب من النار يتدفى
حمده.. العنود جت معك
سهم.. ايه يمه
ابو سهم.. ليه ماقعدتوا يما يوقف المطر
سهم.. جانا وحنا نمشي بالطريق
شيم دخلت المشب وهي تنفض ملابسها اللي تبللت
حمده.. وانتي وش جابتس
شيم.. يعني اقعد بالمطبخ ياما يوفق المطر ابي يمكم
فزاع.. قربي عند النار
ابو سهم.. سهم انهج غير هدومك
تنهد سهم وسكت
حمده.. قم يوليدي قم لا تمرض
وقف وطلع يركض لحجرته.
وقف عند الباب وطق.. اا ادخل
العنود لبست بسرعه.. ايه الحق
دخل وهو ينزل ثوبه بسرعه وينتفض
لفت العنود واخذت الفروه وجلست على الفراش وهي تنتفض
(تصميم البيوت، كل غرفه تفتح على الحوش وحتى المطبخ والمشب)
::
فزاع.. هالمطر فرصه لصيد
شيم.. تسان بتاسر الجو حلو انهج
فزاع.. تخاوي ياهاجس
هاجس منسدح ويلعب بسبحته.. لا ماقوى
شيم.. يبن الحلال انهج تونس ياليت اني ولد
حمده .. عيب وشو هالحتسي
ابو سهم.. من تبي تاخذ
فزاع.. ابي اشوف بندر
ابو سهم.. لمنو نهج معك بندر منهو يساعدن بالدكان
شيم.. سهم او هاجس ينهجون معك
ابو سهم.. هاجس عندو دكانو مايقوى
حمده.. ينهج سهم معك
ابو سهم ..لا لا الصيد ماهو باتسر مرةٍ ثانيه
فزاع يناظر امه بترجي يبيها تقنع ابوه
_______
سياف معصب.. ولاااااايف
ولايف.. وش تبي هاه
سياف.. وين مسباحي الازرق
ولايف.. وانا وش درانن عن مسباحك
مهره.. وش بلاك تصيح على اختك
سياف..يمه انتي تدرين اني اغلي مسباحي الازرق بالحيل وقايل لا احد يجيه
ولايف.. ومنهو اللي جاوه دورو يمكن واقع منك بمتسان
سياف.. انا ماخذو معي اخليه عند فراشي
مهره.. والله ماندري يولدي عنك
سياف مسك راسه.. وين دوا
رجع حجرته يفتش عنه وهو يتحلطم
_______
غيمه وهي تحاول ترفع امها عن المطر اللي دخل عليهم وتحطها فوق الاعمده اللي هي مسويتها ورابطتها فوق اذا جاء مطر ترفع امها عليها.. يمه اصبري ابي اجيب لتس بطانيه اخرى تدفيتس
ام غيمه تكح وتنتفض من البرد.. الحقي يبنتي عندي، برد عليتس
ابتسمت غيمه.. يمه ماتعرفين بنتتس قويي ماعليتس
اخذت السراج وترفع الاغراض عن المطر
:::
اشرقت الشمس من بعد المطر وفتحت عيونها غيمه اللي نايمه على عتبت الدرج وملابسها كلها ماء
حست عظامها متكسره وماهي قادره توقف
ام غيمه تنادي وهي تبكي.. غيمه غيمه تسمعيني يابنتي وينتس
فزت غيمه رغم الالم اللي بجسمها.. هلا يمه هلا
ام غيمه.. وينتس يابنتي من نص الليل وانا اصوتس لتس
غيمه ضمت يدين امها.. عساني لصمخ اللي ماقمت بصوتس
ام غيمه .. بسم الله عليتس يابنتي بسم الله عليتس
غيمه ناظرت للماء اللي داخل البيت .. يمه ابي اشيل هالماء وانزلتس
وقفت وحست نفسها بتبكي من الالم وضغطت على نفسها عشان ماتشوفها امها
وبدت تاخذ من الماء بالقدر وتكبه برا
_______
شيم.. من صبح الله جايتن تقولين  ليه بفراشتس ابي انام لي شوين برد
ولايف.. سويتي فطور اقول انا مافطرت
شيم..بعد مافطرتي ••وقفت.. ايه سويت فطور وكل شين الحقي
ولايف.. وين العنود خليه تجي
شيم.. الظاهر مافطرت
طقت الباب عليه.. الـعـنــود هيه يالعنود
طلعت ام سهم واتجهت للمطبخ
وبسرعه فتحوا الباب ودخلوا عند العنود
ولايف.. ليه ماقصرتي حستس عن عمتي
خفضت صوتها شيم..لو هي شايفتنا ذبحتنا
رفعت العنود اللحاف عنها وبصوت مبحوح .. هلا بنات
ناظروا بعض وحمرت وجيههم من الفشله نسوا نفسهم
شيم.. ا ااا حنا اا
ولايف بسرعه نطقت..الحقي افطري معنا
العنود بابتسامه شاحبه.. لا ماشتهي شين
شيم.. زين العذر والسموحه ابلشناتس
وطلعت بسرعه وهي تهف على وجهها من الفشله
ولايف بشك.. وش بلاه يوجعه شين
شيم ناظرت لها.. ليه وش بلاه
ولايف سحبتها.. الحقي  خلينا نفطر وابي اقولتس سالفي
_________
فزاع..يبه
ابو سهم وهو يرتب درج الفلوس..هلا
فزاع.. اخطب لي
سهم وبندر لفوا عليه بصدمه
ابو سهم تنهد.. الحق معي برا
طلعوا برا الدكان
سهم ضرب الجدار جنبه.. ابوي قايل لوه لا تجيب طاريه
بندر بلع ريقه..يمكن ماهي هي
سهم..ماتعرف فزاع يموت ويحيا به
بندر..اي والله اعرفو بس اقول ان شاء الله
:::
ابو سهم.. هي يافزاع ولا وحدتن غيره
فزاع.. الا هي يايبه
ابو سهم.. ليا متى يافزاع ليا متى
فزاع.. يما اخذه
ابو سهم.. اربع مرات اخطبه لك وابوه يعيي وطيت على كرامتي عشانك بس هو مايبيك
فزاع شد على قبضة يده.. ليه يعيي وهو يدري اننا من يوم حنا وغدان وحنا نبي بعض
ابو سهم.. والله مابيدي حيله ياولدي خلن اخطب لك غيره
فزاع.. والله ماخذ غيره لو طول عمري اقعد وماخذ احد
ابو سهم.. ابشر يولدي ابشر اخطبه لك بس .. رفع سبابته.. تراه اخر مره
ابتسم فزاع وباس راس ابوه.. الله يطول بعمرك ويعزك يابوي
__________
بقرية بعيده عن قريتنا قرية الصامل ابو سامر
سامر وجهه احمر ومعصب ويصرخ.. لاااا والله واللي خلق سبع وبسط سبع اني ماخذه
ابو سامر بحده.. وقص يقص لسانك ياقليل الحياء كلمتي تمشي عليك غصبٍ عن خشمك
سامر يشد شعره وهو واقف ويدور ومعصب.. يمه يمههه يمههه قولي لوه وش بلاكم علي
ام سامر تحاول تهديه.. ياولدي كل شين ينحل اهدا اهدا
سامر..وين ينحل وينننن وينن
ابو سامر.. اقطع لا تصيح علينا، ولا كلمه
ام سامر.. انت اهدا يايمه مايصير الا الخير
سامر.. وينووووه الخييير وينوه الله ياخذن وافتك منكم
طلع وهو معصب يسب ويشتم
ام سامر.. يارجل لا تخسر ولدك انهج وقل مانبيه
ابو سامر.. غصبٍ عليه يبيه
طلع وتركها
ام سامر.. ياربي تستر
:::
الشيخ اتجهه لبيت الشعر اللي يجمع كل القبيله مجلس الشيخ
لافي.. ياهلا بالشيخ يامرحبا
ابو سامر.. لا هلا ولا مرحبا
لافي.. افا افا الشيخ زعلان يخسي اللي يبي يعكر مزاجو••لف على المقهوي سراي.. ياولد صب قهوه  
________
ام سهم.. وين العنود من الصبح ماشفته 
شيم.. جيته تقول راسه يوجعه
ام سهم .. بسم الله على بنيتي ليه ماعلمتينن
شيم.. هي تقول لا تشيلين هم مابي خلاف
وقفت ام سهم واتجهت لها .
طق الباب الخارجي وقفت شيم واتجهت له.. منهو
فلاح بلعثمه.. اا عمي يبي الغداء
شيم.. زين اصبري اجيبو الحين
فلاح يمسح جبينه بتوتر
رجعت شيم ومدت الغداء له.. هاك
فلاح.. الله يعافيتس
اخذه بسرعه ورجع لدكان ابو سهم
::::
ام سهم.. وش بلاتس يابنتي عسى ماشر
العنود وجهها اصفر.. هلا يعمتي لا بس راسي يوجعن
ام سهم.. عندي عشبة الصداع ابي اجيبه لتس
العنود.. اليوم الصبح اوجعن الظاهر برد
ام سهم.. بسم الله عليتس يبنيتي ماعلى قلبتس شر
   __________
بين المغرب والعشاء
فتحت الصندوق اللي تحط فيه الفلوس وتنهدت وهي تشوفه فاضي
ام غيمه.. يابنتي كم باقي معنا من الفلوس
غيمه سكرته وابتسمت وهي متجهه لامها.. يمه الحمد لله الخير واجد لا تشيلين هم
ام غيمه.. قضن فلوس ابوتس
غيمه.. لا ماقضن وبوه بعد فلوس الجمل اللي بعتوه الحمد لله بس انا اصمدهن ماشتري شين بالحيل
ام غيمه.. اشتري اللي يكفي حاجتنا يبنتي انتي تعرفين وضعنا معهم
غيمه.. لا تشيلين هم يمه طلبتتس لا تحتسين بالحيل تتعبين
ابتسمت ام غيمه وسكتت وبدت غيمه تجهز العشاء البسيط
________
الساعه ١١:٣٠ الجو هادي والكل نايم وصوت صرصور الليل بكل مكان
طلع مسرع واتجهه لنافذتها واخذ حجره صغيره وضربها وهو يتلفت
فزت من نومها وفتحت الشباك بشوي.. فزاع؟
فزاع وهو ياخذ نفس وعينه على الطريق.. ياعيوني
شيهانه باستغراب انه مو موعدهم المعتاد.. بك خلاف
فزاع.. لا جيت اقولتس ابوي يبي يخطبتس لي
ابتسمت وبسرعه اختفت ابتسامتها.. اخاف ابوي يعيي
فزاع.. هلودعي(عشان كذا ) جايتس اسمعينن زين
انتبهت معه شيهانه
فزاع.. لمنو طلع ابوي من عندكم تقولين اللي ابي اقولتس الحين
شيهانه.. ايه اسمعك
________
فز سهم
العنود انفاسها تنزل وتتصاعد.. سهم
مسك يدينها  بيد وحده .. وش نوحتس اوجعتس راستس نوبه
حط يده على جبينها وكانت حاره وتصب عرق
توتر .. العنود وشو اللي يوجعتس الحين
العنود امتلت عيونها دموع
سهم بخوف..العنود بسم الله عليتس
فز .. اصبري ابي اقول لامي
اتجهه لغرفه امه وطق الباب.. يمه يمه
فزت ام سهم وابوه .. هلا وش نوحك
سهم بتوتر.. يمه العنود
حمده.. وش بلاه بسم الله عليه
سهم.. يمه مادري الحقي
اتجهت لها وهي تسمي عليها.. انهج جب لي قطعة قماش وماء بساع
اتجهه للمطبخ يركض
كان ابو سهم جالس قريب من حجرتهم
دخل فزاع وهو يحط يده على قلبه ان محد شافهه
عقد حواجبه ابو سهم.. منين جاي
فز فزاع وحس قلبه بيوقف وبلعثمه.. ا ا يبه جيت جيت من بندر سهران عندو
ابو سهم.. يالله انهج نم بتاسر وراك شغل من الصبح
فزاع.. شبلاك بهذا يبه
ابو سهم.. بنت عمك ماهي بالحيل
فزاع .. ماتشرف شر
اتجهه لحجرته وهو ماسك قلبه اللي يرقص من الخوف
سهم جاب ماء ووقف عندها
ام سهم بدت تكمدها
سهم وهو يشوفها تتنفس بقوه والعرق يصب رجف قلبه وهو يتذكر نفس الموقف
^^^^^^^^^
كان عمر العنود تسعة اشهر
الصباح
دخل سهم البيت وهو ينادي.. عمي عمتي ياعمي
سمع صوت ينادي بخفه اتجه للغرفه وشاف ام العنود تتنفس بصعوبه وهي ترجف والعرق
يصب وبالقوه تتكلم..سهم ي سهم خل امك تجي .
سهم طاح منه اللحم اللي كان جايبه لهم واتجه يركض لبيتهم
الظهر الكل واقف بالحوش ينتظر ،طلعت ام سهم وام سياف يصيحون..انا لله وانا اليه راجعون
انهار ابو العنود والكل صار يصيح ويبكي
التفت سهم للعنود اللي جالسه باخر الحوش وذبلانه من كثر البكي محد انتبه لها نسوها من هالمصيبه
انكسر قلبه عليها اخذها وحاول يسكتها وهو منهار بكي.
بالليل طق الباب بقوه طلع ابو سهم وشاف ابو العنود شايل العنود منهاره صياح وهو يبكي ماهو عارف شلون يسكتها
ابو العنود بعبره.. عيت تسكت فاقدةٍ امه
خذتها ام سهم وتحاول تسكتها بس يزيد صياحها
  سحبها سهم من امه وهو ياحاول بها وشيم تلعب بيدينها عشان تسكت بس استسلمت لنوم وهي تشاهق
^^^^^^^^^
صد عنها وهو يرجف ويهدي نفسه..ان شاء الله مابه شين
ام سهم..سهم جدد الماء بساع
:::
قرب الفجر وحست حالها هدت وشافت عمتها اللي واضح التعب على وجهها .. عمتي
ام سهم.. هلا يعمتي
العنود.. انهجي ارتاحي ماقصرتي انا اشوى احس اني احسن
ام سهم.. لا يابنتي
سهم قاطعها.. الا يمه انهجي انا عنده لمنه احتاجت شين علمتس
طلعت ام سهم وتركتهم
حط يده على جبينها ..لا الحمد لله خفت الحمى
_________
يوم جديد يوم الجمعه والكل يشتغل ويدور رزقه
بديرة الشيخ الصامل ابو سامر
عند مربط الفرس تنتظره
جاء مسرع ووقف عندها وهو ياخذ نفس.. ابطيت عليتس
بسمه بنرفزه.. ايه ابطيت علي لو هو شايفن ابوي
سامر.. بالقوه طلعت من ابوي
بسمه.. ها بشر وش صار
نزل راسه سامر.. ماقويت على ابوي عجزت عنو
بسمه والدمعه بعينها..يعني شلون خلاص قضت قصة عشقنا
سامر.. لا وشو اللي قضت انا اموت واحياء بتس شلون تبينن ابعد عنتس
بسمه.. وش تبي تعمل هذا ابوك عجزت عنو
سامر.. بسمه اسمعيني يانضر عيني انا ابي اعمل اللي يقولو لي ابوي
بسمه ودموعها تنزل.. وانا ياسامر وانا
سامر اخذ نفس.. اسمعينن بس منشان ابوي والله والله لاخليه خدامتن عند رجليتس
بسمه.. لا لا مابيه مابيك تروح مني
سامر.. يانضر عيني وعد مني اني ماخليه تقعد اكثر من اسبوع واني لاخذتس فوقه باليوم الثاني له
ابتسمت بسمه برضى.. وعد ياسامر
سامر.. وعد ياروح سامر وعد رجال
_________
ابو غالب.. جيتك عزيزه علي يابوي سهم بس انا قلته لك اول واقوله هالحين ماقوى
ابو سهم.. ميخالف اعرف رفضك لولدي
ابو غالب..  والنعم بك وبولدك ، وفزاع كلٍ يتمناو مار انا بنتي عطيّه من يومه وغد
ابو سهم تنهد.. منهو اللي مطيه ياوه
ابو غالب.. ماهو من هالديره
ابو سهم.. علمن ابي انهج اطلبه منوه
ابو غالب.. انا عطيتي ماترد يما هو يقول مابيه وهذي وعيده قبل تجي على الدنيا صار وعد بيننا
ابو سهم.. زين عسى بالامر خيره
وقف وطلع ابو سهم
كانت شـيـهانه ورى الباب وتحاول تسمع شي بس كانت الاصوات منخفضه ولا سمعت شي
:::
فزاع جالس بحوشهم ويهز رجوله من التوتر
ام سهم.. يولدي اهدا ماهو صاير الا اللي ربي كاتبوه
فزاع استغفر بصوت عالي
شيم متربعه وتناظر له .. اذا عيا ابو شـيـهانه بوه الف شيهانه
ام سهم.. انتي اسكتي
شيم.. ماقلت شين خطأ
دخل ابوي سهم .. سلام عليكم
فز فزاع.. هلا يبه وعليكم السلام
جلس بدون ماينطق شي
فزاع ابتسم بخفه ووضح على وجهه الضيق .. عيا صح
تنهد بصوت عالي وطلع من البيت
حمده.. لا حول ولا قوه الا بالله الله يهدي بالك يوليدي
شيم.. الله لا يوفقو شايب قريح
حمده.. تكفون لا يدري هاجس لا يدري
جت العنود وجلست عندهم
شيم.. الا خلوه يدري عشان يذبحو ونفتك منو
حمده بحده.. شيم يويلتس تحتسين شين
العنود قربت لشيم وبهمس.. ليه ماتبيه يدري
شيم.. لو يدري يايذبح فزاع او يذبح ابو غالب
العنود.. اعوذ بالله ليه
شيم.. هو حذر فزاع اول يقول لا تذل ابوي لو يبونك يوافقون عليك من اول
العنود.. ايه وشو اللي دخل ابو غالب
ابتسمت شيم.. ماتخبرين جنون هاجس يمكن يقول وشولو ترد اخوي
العنود.. والله انو مجنون
شيم.. يجوزلي(يعجبني)هالمجنون
________
تحاول تستجمع قوتها وتهدي توترها  ، هو حاول الحين دورها اخذت نفس عميق ورفعت صوتها.. يبه
ابو غالب.. هلا
شيهانه وهي تحاول تخفي رجفتها.. انا سمعت كل شين
ابو غالب .. والمطلوب
شيهانه.. انا موافقه يبه
ابو غالب ضحك.. متوكده انتس سمعتي كل شي
رجف قلبها شـيـهانه وحسيت فيه شي ماتعرفه.. يبه فزاع دايم يخطبن وهو لو ماخطبن مايبينن
ابو غالب.. ايه وانتي وشو اللي دراتس انو يخطبتس دايم
حست الدنيا دارت بها وانها انكبت.. ا ا غالب يعلمن
ابو غالب يهز راسه.. وانتي بس سمعتي انو خطبتس ماسمعتي وشو اللي قلتلو انا
شيهانه تحاول تهدي نفسها
ابو غالب  .. محد يعرف مصلحتس احدٍ كثري خلي هالسوالف عنتس وخلي فزاع عنتس
طلع وتركها وهي انهارت تبكي