ياغيمتي بالبشر مالك شبيه ياليت مالك يابعد هاجس سمي

٩

اخر الليل طلعت شيم من حجرتها متجهه للمطبخ تبي تشرب ماء كان على عيونها النوم خلصت وطلعت وقف شعر راسها وهي تشوف هالشخص قدامها، جسمها بدا يرتجف واسنانها تضرب ببعض ..ب ب ببس بسم بسم الله الر الرحمن الرحيم
بلعت ريقه ولفت ناحية حجرتها تحاول تمشي.
من وراها بصوت خافت..شيم
شيم بدت تنزل دموعها من الخوف ورجفتها زادت اكثر..ي ي يمه يمه جن جني جني
وهي صاده عنه رفعت يدها تاشر له يبعد..اللهم سكنهم في مساكنهم بسم الله بسم الله
اسرعت متجهه لحجرة امها وابوها
مسكها وسحبها ولفها ناحيته
شيم صرخت بهستريه
سكر فمها وسحبها..شيم شيم وشنوحتس انا هاجس
شيم ناظرت له بخوف وبعدها دفته بقوه
هاجس انحنى جالس ..ااااه
لفت له شيم  وقلبها بيخرج من وبخوف
هاجس بالقوه يتكلم..شيم انا هاجس والله ماني جني مامت يتسذبون عليكم
شيم بصدمه وخوف وفرحه..هاه
هاجس جالس على ركبته ويتكلم بالم..يبون يذبحونن مار ماقويو
شيم دموعها تنزل من الفرحه وجلست على ركبتها قدامه وضمته قوه
هاجس بهمس..اوجعتينن
بعدت شيم بخوف..شنوحك
هاجس..ساعدينن
وقفت ورفعته..وشو اللي يوجعك
هاجس..اصص لاحد يسمعتس
شيم..ايه خلهم يقومون
هاجس..لا لا
شيم..ليه ماتبيهم يدرون
هاجس..انا جاي عشانتس انتي
شيم تناظر له باستغراب
هاجس..اسمعينن زين واعملي مثل ماقول لتس ولا احد يدري
شيم هزت راسها بالموافقه
_______
على اذان الفجر
غالب دق الباب بشويش
شيهانه فتحت عيونها..هلا
غالب فتح الباب..قمتي اذنو
شيهانه..قمت يالله
غالب..ابي اصلي وعقب اقضي لي شغل وعقبه ابي انهج يم الدكان تبين شين قبل امشي
شيهانه..لمنك قضيت اشغالك ابيك تشري لي قماش ابي افصلو ماعند هدوم
غالب..ابشر ابشر اجيتس واخذتس تختارين اللي يجوز لتس
شيهانه..لا تجينن ولا تاخذن انت اشتر لي
غالب ..وشدرينن باللي يجوز لتس
شيهانه..ميخالف كله واحد اهم شين لبس
غالب لف عنها ماشي..تجهزي تجهزي اقضي واجيتس
______
بعد صلاة الفجر رجعوا من المسجد
ابو سهم..صباح الخير
شيم جالسه وساكته
سهم آشر بيده قدامها..هيييه يابنت
شيم مانتبهت له
فزاع..شنوحه
ابو سهم جلس قريب منها..شيمه يابنت بتس خلاف
شيم كانت مو منتبهه لهم وغارقه بافكارها وخوفها وصدمتها
سهم.. من يوم انهج للمسجد وهي بهذا
ام سهم طلعت من حجرتها وناظرت لهم باستغراب..شنوحكم
سهم.. شيم مادري وشنوحه
ام سهم بخوف قربت منها.. ليه بنيتي يوجعتس شين
فزاع ضربها مع جبينها بخفه..بنت
صرخت شيم وفزت..يمههه
كلهم فزوا معها..بسم الله
ناظرت لهم بفجعه ثم لفت لابوها وضمته قوه وصارت تبكي
ابو سهم..بسم الله عليتس بنيتي تبتسين وانا ابوتس
فزاع قرب منها يمسح شعرها..شيمتي بسم الله على روحتس
سهم..يابنت خرعتينا
شيم بشهاق..يبون يذبحونو
الكل بخوف..بسم الله منهو
شيم.. ه هاجس
ابو سهم وجهه اقتلب وبلع ريقه بصعوبه..بسم الله عليتس
سهم ناظر لفزاع
فزاع..الظاهر حالمتن حلم
ام سهم بدت تسمي وتقرا على بنتها
شيم رفعت راسها لابوها ولا زالت تبكي..يبه طلبتك لا تخليهم يذبحونو
ابو سهم بسرعه امتلت عيونه دموع
شيم..يبه طلبتك يبه لا يذبحون هاجس
ابو سهم..ابشري ابشري وانا ابوتس بس لا تبتسين
فزاع جلس بسرعه قدام ابوه وشيم وصار يسمي عليها
سهم بخوف عليها تكلم بصوت حاد..شيم انتي حالمتن حلم ولا وشنوحتس
شيم هزت راسها..لا لا والله هاجس مامات
فزاع بردت اطرافه
ابو سهم بالقوه يبلع ريقه
سهم..وشتقولين انتي وشو هالحتسي
شيم..والله ياسهم انو مامات والله البارح جاء بهذا والله العظيم
ام سهم بخوف..شيم بنيتي سمي بالرحمن
شيم وقفت وبعصبيه..ليه مانتم مصدقينن ترانن مانجنيت هو قالي ماعلمكم وين ابي انا احتسي
ابتعدت عنهم متجهه لحجرتها
العنود اتجهت لهم..عمي
ابو سهم ناظر لها
العنود..البارحي حول الفجر سمعت صوت مار قلت يهيا لي
سهم بانفعال..وشو وليه ماقلتي لي
العنود..ماحسبو شين قلت هذا من وجع راسي اسمع هالاصوات
ابو سهم وقف واتجهه لشيم وكلهم تبعوه
شيم تبكي وتشهاق
ابو سهم جلس جنبها..علمينن وشو اللي صار
شيم لفت له..يبه البارح بغيت اموت من الخرعي احسبو جني والله
ناظرت لامها واخوانها.. والله سلمت عليه وسولفت معو يبه والله مامات قال انو تصاوب بس مامات
ابو سهم.. وليه ماقومتينا
شيم..هو عيا قالي يبينن اعرف منهو اللي قال لكم انو ميت ويجي الليلي واعلمو
ابو سهم.. زين خير خير ان شاء الله انتي هالحين استرحي وامسحي دموعتس
طلعوا وجلست عندها امها
_______
فرحان جايب الفطور رفع صوته ينادري..الغيييم
غيمه مسكت راسها وبسرعه ناظرت لهاجس
ثم طلعت مسرعه..اصصص اص اص
فرحان..وشنوحتس
غيمه..ولو سمعك
فرحان بفهاوه..عاد ولمنو سمعن مايدري وشو الغيم
غيمه..اخ اخخ واشيب راسي
فرحان تعداها..لا ماعليتس لا تنخرعين
اتجهه لهاجس وصرخ عند راسه..هااااااااجسسس
هاجس سكر اذانه..انا وش عامل من الذنوب يوم الله يسلطك علي
فرحان تربعه عنده ونزل الفطور..الا قل وش انت عامل من الخير يوم الله يسوقن لك
هاجس رفع حاجبه وابتسم بخفه
فرحان..يالله افطر افطر
مد يده فرحان وبدا ياكل
هاجس..وين خويك مايفطر معنا
فرحان وهو مندمج بالاكل..لا مايشتهيه ضرسو يوجعو
هاجس يستغبي.. واللي ضرسو يوجعو ماياكل
فرحان..لا
هاجس مد يده وبدا ياكل.. توي ادري
غيمه اتجهت لبيتها مسرعه
حست بالضيقه تجتاح صدرها يوم فتحت الباب
جلست بتعب..والله اني عجزت والله
شافت بشت ابوها معلق ابتسمت واخذته..الله يرحمك يايبه
شالت الغبار على البطانيه وانسدحت بتعب وغطت بنومه عميقه
_________
قريب المغرب
فرحان رايح راجع ينتظر بتوتر
هاجس جالس تحت النخله..يابن الحلال يجي ماعليك
فرحان..وين نهج من الصبح اختفى وماجاء
هاجس..يمكن يقضي اشغالو
فرحان..ماعندو اشغال
ابتسم هاجس..يجي يجي ماعليك
فرحان بعصبيه..وين نهج غابت الشمس
هاجس..اخافك مادورتو بالحيل
فرحان..ماخليت متسان ماشفتو 
هاجس سكت
فرحان لف عليه.. هالحين ابي امشي لمنو جالك امسك اذنو ولا يتحرك ياما اجي باتسر
ضحك هاجس..ابشر ابشر
مشى خطوتين ثم وقف وابتسم وهو يتذكر البيت اللي وصفته له غيمه ورفع ثوبه وبدا يركض
وصل وبدا يضرب الباب بقوه..غيييييمه هيييي ياغيييمه
فتحت عيونها بتعب ولفت على جنبها
فرحان يضرب الباب بقوه
بالقوه وقفت بعد ماعرفت صوته
لف فرحان..ماهي بهذا وين نهجت
فتحت الباب تفرك عيونها..هلا
لف لها وبعصبيه..وينتس من الصبح
غيمه..جيت بهذا
فرحان..وليه ماعلمتينن
غيمه..يازين هالنومة اللي انا نمته
فرحان يكرر كلامها بقهر..يازين النومه اللي نمته
وصرخ..ماتعلمينن انخرعت عليتس
غيمه تركت الباب مفتوح ودخلت.. مبطي مانمت نومن حلو
فرحان رفع صوته بزعل..تبين شين ابي امشي
غيمه رفعت صوتها..سلامتك مار مرن باتسر
________
غالب جالس قدام شيهانه ..والله اني انشغلت اليوم مار ابشري باتسر اخذتس ان شاء الله
شيهانه مدت الفنجال لابوها..يابن الحلال قلت لك انت جب لي
ابو غالب.. لا انتي تنهجين وتاخذين اللي يجوز لتس
تنهدت شيهانه.. ماصار شين يجوز لي يايبه
غالب لف على ابوه ..يبه باتسر لمني خذيت شيهانه لسوق ابي انهج
ابو غالب هز راسه وكمل فنجاله
شيهانه..وين تبي
غالب.. والله لاخذ حقتس واطلع روحوا
شيهانه بعصبيه..مجنون انت تنهج يمو بديرتو
غالب.. انهج يمو واكسر راسو
شيهانه.. ماهو لحالو كل ديرتو معو
غالب..والله لو يذبحونن ماعلي اهم شين اخذ حقتس منو
شيهانه بدت دموعها تنزل..لا لا انا مابي شين منوه بس لا تنهج والله لايذبحك ، مسامحتو والله مسامحتو
غالب.. والله لايدفع الثمن غالي والله
شيهانه بخوف..واللي يسلمك لا تنهج طلبتك ياخيي
ابو غالب..ماعليتس ماهو ناهجن لحالو
شيهانه..حتى ولو والله لايذبحك بدمٍ بارد
غالب..كل شين يبي يصير لي استاهلو استاهل لاني ماصرت سند وقوةٍ لخيتي
شيهانه بترجي وخوف..ياغالب طلبتك واللي يحفظك ويسلمك لا تنهج يمهم انا نسيت اللي جرى
غالب ضرب صدره بقهر.. انا مانسيت ولاني ناسي
شيهانه لفت لابوها..يبه
ابو غالب.. لا تشيلين هم يابنيتي
________
انتصف الليل
شيم جالسه بالحوش بمكان جلستهم
كل شوي تناظر الباب اللي مفتوح تنتظر دخوله
سمعت صوت الباب وسوت نفسها مانتبهت
وقف عندها.. مساء الخير
شيم رفعت راسها..هلا مساء النور
وقفت..الحق معي
هاجس..وين
شيم..يم المشب
مشى معها هاجس ودخلو المشب سكرت الباب واشعلت السراج
هاجس ابتسم بتوتر وخوف وهو يشوفهم قدامه
ابو سهم جالس على المركى بتوتر وسهم واقف جنب ابوه وفزاع متكتف قريب الباب وام سهم جالسه والدموع بعيونها وجنبها العنود
شيم..تشوفون ماتسذب عليكم
هاجس سحبها من اذنها بخفه.. وانا اقول سري ببير
فزاع قلبه بيخرج من الفرحه.. وليه ماتبينا نفرح بشوفتك
ابتسم هاجس وفتح يدينه
اتجهه له فزاع وضمه
ابو سهم بالقوه وقف ودموعه تنزل.. يالله لك الحمد يالله لك الحمد
اتجهه له هاجس وسلم عليه ثم على ام سهم 
العنود..الحمد لله على السلامي
هاجس..الله يسلمتس يابنت العم
سهم حرك شعر هاجس بعشرائيه ولفه له وضمه ..يامرحبا يامرحبا
شيم رجعت شعرها بغرور..هاه صدقتوا
هاجس استند على سهم وجلس
فزاع لف لابوه.. يبه ماقلت لنا منو اللي علمك بالخبر
هاجس.. ايه انا جيت انشدكم منو اللي نقل خبر موتي
ابو سهم.. والله اني ماعرفوا اول مرتن اشوفو
سهم.. والحل شلون نعرفو
ابو سهم حط يده على كتف هاجس.. اعرفو وانا ابوك لا تشيل هم ، هالحين علمنا عن علومك
________
الصباح اشرقت الشمس
وقف على الباب اخذ نفس بعمق والابتسامه مرسومه على وجهه
سهم من وراه.. ما شاء الله عساه دايمه
فزاع التفت له وضحك.. تبي معي
سهم معك يالله
اتجهوا لدكان وقلوبهم تنبض بفرح ووناسه
بندر..يامرحبا يامسهلا ياهلا بالحبايب نور الدكان والله
سهم..الله يعطيك العافيي يابندر تركنا كل الشغل عليك
بندر..انا بالخدمي
فزاع سحب الكرسي وجلس على مدخل الباب بابتسامه يحس بفرح يملا قلبه.. سهم سو لنا شاهي
سهم.. ابشر هالحين اضبط لك احلا شاهي
فزاع يمرر نظره على السوق ويدندن بصوت خافت
سكت وبلع ريقه اختفت ابتسامته وقلبه صار يرتجف وحس الهوا اللي يدخل لصدره كتمه وضيق عليه انفاسه بدا العرق يصب من جبينه فتح ازار ثوبه العلويه بتوتر وهو يشوفها تمشي ورا اخوها بهمس..هي هي
بلع ريقه..لا لا ماهي هي
صار جسمه يرتجف.. الا والله هي
بالقوه غمض عيونه وصد ودخل للدكان وكانه جسد بدون روح
دخل غالب..سلام عليكم
ارتجف قلب فزاع
سهم..وعليكم السلام ياهلا
شيهانه وقفت جنب غالب وهي منزله راسها
فزاع رفع عيونه لها وصار يتكلم بنفسه..فزاع اصحى الحرمة على ذمة رجل نزل عيونك
سهم يوريهم الاقمشه وانواع
غالب..نبي مثل هذا بس اسود
سهم..ابشر ••رفع صوته..فزاع  جب مثل هالقماش هذا الاسود
فزاع ماسمعه ولا كان معه
شيهانه رجف قلبها ورفعت نظرتها تدور عليه وقفت عيونها عليه
بدت دموعها تنزل وبنفسها..هو هو اي والله هو والله والله هو
بندر جاب القماش لسهم ورجع لفزاع وحركه من كتفه.. ولد
لف له فزاع
بندر حرك عيونه بمعنى امش ودفعه عشان يمشي
ناظرت شيهانه لين اختفى من قدامها
غالب.. ها هذا حلو
شيهانه وصوتها اختفى من العبره..ايه حلو
غالب.. وشو بعد تبين
شيهانه..قضيت يكفن
غالب لف عليها..لا لا مايكفن خوذي
شيهانه مسكت يده.. والله يكفن
غالب..يالله مشينا
اخذ الاقمشه وطلع
تنهد سهم واتجهه لفزاع.. فزيع قم الشاهي قضى
بندر يسحب فزاع يقومه..يالله يالله شاهي سهم ماينفوت
فزاع سحب يده بقوه ووقف وطلع
سهم حط يده على كتف بندر.. ماعليك منوه
_______
غيمه جالسه قدامه وعيونها سودا من التعب والسهر
فرحان كشر..مدام تسمعين صوت ابوتس بهالبيت وشتبين بوه اطلعي
غيمه بتعب..وين انهج
فرحان.. الحقي معي ببيتنا
غيمه.. لا ماقوى
فرحان..بالبيت اللي بوه هاجس
غيمه صرخت..لااا يمه ياقلبي
فرحان عصب.. وش اعمل بتس كل ماقلت لتس شين قلتي لا
غيمه..وش اعمل
فرحان تكتف يفكر .. ابي اعلم امي
غيمه.. وش تبي تعمل امك
فرحان .. مادري
غيمه.. ماعليك مني قلي نهجت يم الرجل
فرحان.. منهو
غيمه.. هاجس
فرحان.. لا والله
غيمه.. قم انهج شفوه وادو شينن ياكلو
فرحان.. هو رجل يدبر روحو
غيمه..قم قم الله يصلحك
فرحان وقف بكسل..ااهاه قمت يالله توصين على شين
غيمه.. سلامتك
فرحان اتجهه لمكان هاجس وصار ينادي..هاجس ياولد
هاجس رفع صوته..بهذا الحق
فرحان..صبحت بالخير
هاجس..ياهلا ،وينك ياولد انشقت الارض وبلعتك
فرحان.. عند غي.. ••سكت وابتسم.. عند خويي
ابتسم هاجس.. ما شاء الله لقيت خويك
فرحان.. ايه
هاجس.. وينو اختفى
فرحان.. نهج يم بيتو
هاجس سكت وهو  يحاول مايوضح ابتسامته
فرحان.. لا تنسى تجازيه هو اللي ساعدتك
هاجس.. يبشر والله
فرحان انسدح قريب منه.. اسكت عني ابي اغفي لي شوين
هاجس.. وليه ماجبت لي اكل
فرحان بصوت خافت.. صرت شغال عندكم
هاجس سمعه.. وشو
فرحان.. ان شاء الله اجيب لك لمني قمت
هاجس.. لا  لمنك قمت ابيك تدينن يم خويك
فز فرحان وناظر له..وشتبي بوه
هاجس رفع حاجبه وبابتسامه.. ابي اجازيه
فز فرحان واقف
هاجس.. وين تبي نم
فرحان.. ابي اجيب لك اكل
ابتعد يركض
انسدح هاجس وهو يضحك بصوت عالي
________
الليل على العشاء
فزاع يناظر للاكل بهدوء وجهه اسود وكل شوي تطلع منه تنهيده
شيم وقفت..الحمد لله كثر الله خيركم
الكل..عافيه
شيم ناظرت لهم بابتسامه.. عندي لكم بشارتين
ابو سهم.. عساها خير يابنيتي
شيم.. والله انها تونس بالحيل بالحيل
ام سهم.. انا تكفينن بشارتي بهاجس
شيم.. لا يمه هالبشاري تغطي على هاجس
سهم.. ها وشي
شيم .. وش لي
سهم.. قامت تدلع مالتس شين تبين تقولين قولي ماتبين اسكتي
شيم ضحكت.. تهمك بالحيل
سهم يكمل اكله.. لا ماتهمن
شيم لفت لامها وابوها.. العنود حامل
سهم نشبت اللقمه بحلقه
فزاع رفع راسه يناظرها
ابو سهم وام سهم.. ما شاء الله ما شاء الله ياعله الف مبروك مبروك لك ياوليدي
سهم لف على شيم
شيم غمزت له.. ها تهمك ولا لا
سهم.. وش دراتس انتي
شيم.. مانت مصدز انهج انشده
وقف سهم واتجهه لحجرته ركض
شيم رفعت صوتها.. شوي شوي لا تقع
ام سهم.. وشي البشاري الثانيي
شيم.. لا ماهو هالحين اقوله لكم
لفت واتجهت لحجرتها
ام سهم وقفت بتشيل العشاء
فز فزاع.. يمه اتركيه انا اخذو
ام سهم.. لا والله ياوليدي
فزاع..الا والله اتركيه
جمع العشاء وشاله متجهه للمطبخ
شيم ركضت له مسرعه.. فزاع
فزاع بدون مايلتفت.. ها
شيم.. تبينن اعلمك وشي البشاري ولا مثل اخوك
فزاع لف لها وتكتف.. ها اعطنن وش عندتس
شيم قربت لاذنه وبهمس.. شيهانه تطلقت
فزاع قشعر جسمه وبدا يرتجف
ضحكت شيم ولفت عنه.. يمكن مايهمك مادري ليه علمتك
سحبها فزاع.. منهو اللي علمتس
شيم.. ولايف اليوم تقولو
فزاع.. انتي صاذره ولا بس حتسي
شيم.. والله مادري عن بنت عمك
تركته واتجهت لحجرته
طلع من المطبخ ويحس قلبه بيخرج من مكانه وجسمه ثقيل ماهو قادر يتحرك مايدري هو صدق او تسذب
مر من جنب امه وابوه ووقف على كلامهم
ابو سهم.. هي بنت ابو غالب
ام سهم.. ايه هي
ابو سهم.. منهو اللي يقولو
ام سهم.. اليوم والله تقولو ام سياف تقول كل الحريم يقلن طلقه رجله
ابو سهم.. الله يعوضه خير
فزاع بدت ابتسامته تتوسع وعيونه تلمع
:::
سهم ماسك يدين العنود وكل شوي يبوسها.. ليه ماعلمتينن انتي ماهو شيم
العنود.. توي توكدت والله وشيم هي دريت ماعلمته
سهم.. هالشيم سوسي كل شين تدريبو
ضحكت العنود.. والله اول نيتي انتي اعلمك انت اول واحد بس قلت يما تعدي هالايام والحمد لله عدت بفرح وخير
سهم ناظر عيونها.. الحمد لله
ابتسمت العنود
_______
شيهانه فاتحه الدريشه وجالسه على فراشها وشعرها يتحرك من الهوا وتخيط هدومها والابتسامه على وجهها..اكيد انو عافن
تنهدت بابتسامه..اهم شي انو حي
شهقت بعد ماسمعت هالصوت
:::
فزاع بعد ماتأكد ان ابوه دخل حجرته طلع مسرع وقف قريب هالبيت وصار يتلفت يناظر يمين ويسار يتأكد في احد او لا ابتسم ويشوف الدريشه مفتوحه اخذ نفس.. احم احم
ورفع صوته شوي وبدا يلحن..

أهلا هلابك توها تزين دنياي
في جيتك تو الليالي تزيني
يا مرحبا يا غاية العين ومناي
يا مرحبا يا شوق عمري وضنيني
انا عليل بالهوا وأنتي ادواي
يا ضحكتي يا فرحتي ونور عيني
أنتي هوى بالي وعشقي وسلواي
وأنتي دوا قلبي وراحت يديني
يا نور دربي كل ما حل مسراي
ياللي خياله في كنف مقلتيني
اليا حكت اجيه كلي من اقصاي
لبيه سمي وامري وامريني
لو ما عرفت إلا عيونك في دنياي
يكفيني أنك في ليالي سنيني
..
شيهانه الدموع تنزل من عيونها ابتسمت.. صوتو هو والله هو
فزاع حط يده على قلبه وتنهد يسترد نفسه وهذي اول مره بحياته يلحن القصيد
مشى خطوتين وقال بصوته الهادي.

العيون الي تراقب من بعيد
يا عساها ما تشوف الا الهنا
استريحي يالغلا مامن جديد
العهد باقي ونا مازلت انا

اسرع بخطواته ارجع للبيت وقلبه بيخرج من الوناسه.
شيهانه بدت تبكي، صوته لملم شتاتها وقصيدته جبرت قلبها
________