يوم زفافي(مكتملة)

البارت التاسع

البارت التاسع
#يوم_زفافي
#Mariam_Elshahawy بقلم

هود ابتسم:"أبشري يا آنسه فرح جوازك من عماد باطل بالتأكيد."

فرح ابتسمت ودموع الفرحة في عينيها:"بجد!!"

يامن بفرحة:"كنت متأكد... متأكد إنها لعبة."

هود:"هما كانوا مبينين إنه منطقي عشان ميتشكش فيهم."

يامن:"أوي... أنت لو سمعتهم ساعتها... كدبوا الكدبة وصدقوها."

بص لفرح وابتسم:"مفيش حاجة وحشة هتحصلك تاني."

فرح:"بتمنى."

هود:"هنعمل محضر بإن الجواز باطل وكمان في عنف وضرر للزوجة والمستشفى هتطلعلنا تقرير طبي بده ولو مرضيش يطلق بالذوق هنرفع قضية خلع ويطلق بالعافية."

يامن:"كمان هو وراه حكاية."

هود استغرب:"حكاية إيه؟ "

يامن :"اللواء سامح شافله تسجيلات وشاكك إن فرح مش أول بنت يحصل معاها كده ."

هود:"الله اكبر... ده فيها حبس حبة حلوين."

يامن:"بالشفا."

يامن وهود ضحكوا وفرح ضحكت معاهم
فرح ضحكت بكل سعادة وهود كان بيبصلها مش فاهم هي عجبته ولا إيه... ومتعجوش ليه؟ فرح حلوة وجذابة ملامحها جميلة وضحكتها طفولية ميحبهاش ليه؟ ويامن كان باصصلها هيمان بضحكتها.... ضحكتها بتخليه طاير من جواه الإتنين متنحينلها لحد ما فرح سكتت ابتسمت بكسوف ويامن اتكلم.

يامن:"أنا هنزل مع هود... وإحتمال أرجع أتطمن عليكِ على بليل كده."

فرح:"مفيش مشكلة...اتوكل أنت على الله وأنا هنا في أمان."

يامن كان هيتطلع برا الأوضة وفتح الباب بس لاحظ حد كان مركز معاه من إزاز شباك الأوضة وكإنه بيراقبه وأول ما شافه دور وشه الناحية التانية.

هود:"يلا.. واقف كده ليه؟؟"

يامن بص لفرح:"إنزل أنت... جاي وراك."
______________________

فريدة:"والله لاجوزهولك."

إبتسام:"بس بقى يا خالتي... أنا مش هتجوز هشام لو حصل إيه... هو مش عايزني وبيحب مراته... دي مش أول مرة... أنا فعلا رخصت نفسي مع هشام أوي زي ما نورا قالت."

فريدة:"دموعك غالية يا بنتي... والله لاندمها بنت غادة... أنا أصلا مش موافقة علجوازة دي من الأول.... يابت متفقديش الأمل... مش هشام ده حبيبك اللي بتتمنيه طول عمرك."

إبتسام:"كااان.. دلوقتي هو حبيب حد تاني ونورا هتاكلني بسنانها لو قربتله تاني... ده المرة دي اتكلمت بس الله وأعلم المرة الجاية تعمل إيه؟"

فريدة:"طب تعمل ...تعمل وتشوف أنا هعمل فيها إيه."

سمعت تخبيط علباب جامد.
فريدة قامت تفتح واتفاجئت بجوز أختها داخل بكل غضب وشاف إبتسام قاعدة في الأوضة ودماغه فارت لما شاف فستانها ومحسش بنفسه غير وهو هاجم عليها عمال يضر ب فيها. بقلم مريم الشهاوي