دگ المنبه فتحت عيوني مدگنة خطيت رجلي على الگاع
وبوجهي للحمام غسلت وسبحت وطلعت اباوع على المراية عگدت حاجبي وتفلت
غفران: وجه ال*** جلحة ملحة مايفيد بية شي
تبسمرت بمكاني من شفت والدي شابگ ايدة ومنتجي على الباب
سرمد: حرام علية اعتبرج بنية لااسلوب لا لباقة
ضليت بأستهزاء اعد بصابيعي واضحك لان الروتين الصباحي هذا متكرر مل مني ونزل يهز بيدةوباوعت على الساعة 7:33 لبست صدريتي شلون مجان ونزلت اهرول
لزمتني امي شالي وعدلتة كلبت عيوني ماعاجبني
تمرة:حرام بنيتي ميصير طلعين شعرج هيج مدتشوفين اسيل جارتنة صديقتج من الابتدائية وهي تجنن بالعباية والربطة مو سرمد?
باوعت على ابوية وهو مخلي رجل على رجل ويكلب بتلفونة وياشر بيدة بمعنى صحح كلامها طلعت وبوجهي الها اركض نزعت الشال وكفيت رداني خليت العلج بحلكي وضليت اتموع بمشيتي دكيت الباب واني الهث وعيني على الساعة طلعتلي جدتها المخرفة وخازرتني عبالك بايكة الحجي منها
غفران: صباح الخير يابة اسيل هنا ?
الجدة:لا طلعت
حكيت طرف حاجبي وضليت اباوع جوة البيت ردت اتحرك واكمل طريقي وسمعت صوتها يجوعر تعدل بعبايتها
اسيل: اوكفي اوكفي بس خلي ارتب عبايتي
غفران:ديلة فضيني
سبقتني وضليت خازرة الجدة اتقربت منها وحجيت بهمس
غفران: اكلي جوز هواي
الجدة: شتقصدين ?
غفران:حتى متنسين بعد يحلوة
ذبيت العلج وكملت مشي اركض وراها وهي جنها باتمان ماتنطي فكة لزمت گلبي وضليت اتنفس بصعوبة لان عندي قلب انتبهت وركضتلي مرعوبة
اسيل:حبيبتي اسم الله الرحمن بيج شي ?
غفران:اي بية لتمشين سريع انتِ وعبايتج قلقتيني مستعجلة على الجنة?
مسحت وجهه وابتسمت
اسيل:لا ياكلبي بس هاي عباية امنة الزهراء لازم انطيها حقها ومانعتبرها مجرد قماش
نترت ايدها من كتفي وحصرت الصدرية كملنة مشي ووصلنة للمدرسة جنت طالبة سادس علمي كسولة وكل مرة اسيل تنجحني وتساعدني دخلت للحمامات مخلية الجهاز بصدري خليت ثنين يراقبن المكان حتى اخابر حبيبي
دكيت علي وخليتة بجيبي لان ماجاوب سمعت المدرسة مناهل تصيح وطكيناها ركض للصف كعدت بصف اسيل واني العب بخصلة شعري وهي تقرة
غفران:غششيني حبابة
وخرت المناضر وضلت صافنة بوجهي ضليت اتمسكن واتلوك واغازل بعيونها الخضر
أنت تقرأ
ذنوب قيد الغُفران
ChickLitبين رداء الزهراء ومخالب الشيطان حرب بين النور والظلام كيف ستكون النهاية ?
