ارمش بعيني شلون عرفت بكُل هذا الكلام مُستحيل باري تسولف قررت بعد صراع وي جسمي الهزيل اكوم لزمت ايدي بقوة شاخصة عينها
-خليچ يمي اني محد يحبني اخاف وحدي
بلا حيلة رجعت تمددت وضليت اتمتم ايات بگلبي ساعة كاملة من الرعب واخيراً غفيت اسمع بس عقارب الساعة وصوت زخات المطر فزيت على صوت المنبه سديتة بسرعة لازمة طرف شعري وغاطة بالنوم من بعد الكلام دب الخوف بگلبي ومستحيل اشوفها طبيعية اتسللت منها وتوضيت اصلي فرشت السجادة وانفجرت بالبجي والاستغفار
-اللهي وأنت جاهي قابلة بعقابك الي احرمني من مُلاذ وكُلشي سوي بية راضية بجزائك
كملت مناجاتي بسبب المطر الكهرباء طفت صوت الرعد مرعب اذا كانت هاي رحمتك ياللهي شلون راح يكون غضبك ? احجي وي روحي وبعدني ارعش من كلام الطفلة اتمددت على القنفة وبيدي السبحة غطيت بنوم عميق الايام تمشي مثل ماهي غرابة رحيل وليالي شتاء بغداد المُتعبة طلعت حاضنة ايدي مستسلمة للهواء حتى يداعب خدي تمشيت بالشارع وكانت المنطقة بالذات ناسها هادئين بشكل تقربت من شجرة الورد الاحمر يتساقط منها تمنيت همومي تتساقط مثل هذا الورد اشتريت خط جديد وبعد صراع وتفكير قررت احاجي دزيت رسالة
