الحب اهتمام.
والاهتمام ما بيطلبش.
واللي بيحب حد بيهتم جدا يعرف حبيبه بيحب ايه.
فيحب اللي حبيبه بيحبه.
فحبيبه يحبه.
وتبقى الحياة كلها حب في حب.
الا قوليلي صحيح. انتي بتحبي ربنا
خلاص يا ستي ما تتحرقيش كده انا بطمن بس. طب طالما بتحبيه يبقى تمام
تعرف ايه بقي احب الاعمال الى الله.
بسم الله والصلاه والسلام على رسول الله
السلام عليكم ورحمة الله وبركاته.
النبي صلى الله عليه وسلم في اكتر من موقف حد من يقول له ايه هي احب الاعمال الى الله؟!
اصلهم كانوا بيحبوا ربنا بجد فعايزين يعرفوا ربنا بيحب ايه فيعملوه فربنا يحبهم
واللي يحبه ربه يسعده في الدنيا والاخره
وبما اني عارفه كويس اوي انك بتحبي ربنا
وعايزه تعرفي ربنا بيحب ايه فتعمليه فربنا يحبك.
فياللا بينا نعرف جواب النبي صلى الله عليه وسلم في كل مرة اتسأل فيها السؤال ده.
* ايه هي احب الاعمال الى الله ؟!
١/ رقم واحد احب الاعمال الى الله الصلاة على وقتها.
انك اول ما يدن الادان نقوم صلي.
تسمعي الادان تقومي تتوضي وتفرشي سجادتك صلي فرض ربنا في اول وقته تبقي عملتي احب الاعمال الى الله.
٢/ تاني حاجة بر الوالدين.
ابويا وامي ما ينفعش اعلي صوتي عليهم
او اغلط فيهم او اكلمهم بطريقة ما تلقش.
مهما عملوا فيك ما تقوليش اصل بيعملوا ويسووا مهما عملوا. احد الائمة لما سئل ينفع الواحد يختلف مع امه وابو فقال لهم ولا مع الحذاء بتاعهم.
طب يا اسراء لو بيعملوا وبيسووا ما انا قلت لك مهما عملوا لو قتلوكي لهم عندك حسن المعاملة والبر
فخليكي فاكره بر الوالدين من احب الاعمال الى الله.
٣/ رقم تلاتة من احب الاعمال الى الله الجهاد في سبيل ان الواحد يدافع بحق عن دينه وارضه وماله وعرضه.
الجندي اللي بيبات يحرس في سبيل الله ويحافظ على الناس وامانهم.
طب دا مش بتاعنا اي اللي بتاعنا
المجاهد برضه من جاهد نفسه في الله.
اللي بيحارب نفسه وشيطانه اللي عمالين يزقوه على الذنوب والمعاصي عمال يزق نفسه على الطاعة والقرب من الله.
والمجاهد ده ربنا بيوفقه والذين جاهدوا فينا لنهدينهم سبلنا.
٤/ رقم اربعة احب الاعمال الى الله ادومها وان قل.
المعله اللي كلنا مش مصدقين انها معادلة
تلاقي واحد بقي يا يقرأ كل يوم جزء قرآن يا مش قاري حاجة.
يقيم الليل كله يا مش قايم.
يصوم اتنين وخميس وتلتاشر واربعتاشر وخمستاشر من كل شهر. يا مش هصوم.
مع ان ورد القرآن يبدأ بصفحة ولا حتى ايتين ولا اية.
وقيام الليل يكفي وتر تصلي كل يوم الوتر ركعة واحدة بس لله عز وجل بالليل.
ولو صمت يوم واحد في الشهر هتبقى صمت اللي تقدر عليه وتطيقه من الاعمال.
اعملوا ولو قليل ان لو داومت على القليل دا من احب الاعمال الى الله. ولو تقدر زيد
٥/ الحاجة الخامسة. ومن احب الاعمال الى الله سرور تدخله على مسلم
اعمل حاجة لاخوك المسلم تفرحه.
والنبي صلى الله عليه وسلم فصل في الموضوع حاجات كتير.
فاكشف عنه كربة. تلاقيه في ضيقة تساعده وتقف جنبه وتاخد بايديه.
او تقضي عنه دينا. لقيته عليه دين ومش قادر يسده وانت ربنا فاتح عليك.
ادي له وسد دينه وما تطلبش منه الفلوس تاني.
او تطرد عنه جوعا. لك جاره ولا واحد لقيته ماشي كده حسيت انه فقير محتاج جعان وقمت والله سديت جوعه.
ده من احب الاعمال الى الله.
في اي حاجة تعملها تدخل السرور على اخوك المسلم اياكش بس تضحك في وشه ولا تطمنه ولا تبشره بخير. كل دي من احب الاعمال الى الله.
ربنا يا اخواتي يحب نتعبد له في خدمة عباده.
حاجات كلها سهلة وبسيطة. واهي دي احب الاعمال الى الله عز وجل يحب ربه يعملها.
ولو عملها يحبه ربه.
طب ولو حبه.
يعيش اسعد حياة في الدنيا الناس كلها ترضى عنه وتحبه ويبقى سعيد على طول.
مهما كانت ظروفه صعبة ومهما كانت ابتلاءات. وربنا سبحانه وتعالى يكتب له الحب في الملأ الاعلى.
الملائكة تبقى عارفاه وبتحبه يوم القيامة يلاقي اللي ربنا قال عنه ما لا عين رأت ولا اذن سمعت ولا خطر على قلب بشر.
الله يرزقنا حبه وحبه من يحبه وحب كل عمل يقربنا الي حبه ❤️
