عشر اصناف من الناس لا يحبهم الله.
اوعى تكوني منهم.
السلام عليكم ورحمة الله وبركاته.
بسم الله والصلاه والسلام علي رسول الله
اتكلمنا المره اللي فاتت عن ازاي نعرف ان ربنا سبحانه وتعالى بيحبنا
وجبنا فيها الايات اللي فيها قول ان الله يحب
كذا
وخدنا الصفات وانواع الناس اللي ربنا سبحانه وتعالى بيحبهم عشان نهتم نبقى بينهم.
دلوقتي بقى جه الوقت نتكلم عن الشخصيات والصفات اللي ربنا سبحانه وتعالى لا يحبها.
عشان لما نعرفها نبعد عنها وما نبقاش منهم باذن الله فربنا يحبنا ويرضى عنا. وهي دي غايتنا في الدنيا.
والصنف الاول من الأصناف العشره
" ان الله لا يحب المعتدين"
والمعتدي ده اللي بيتعدى حدود ربنا سبحانه وتعالى.
ربنا سبحانه وتعالى يأمر بشيء وهو يسيب الشيء ده على جنب ويعديه بمزاجه وهو مصر عليه.
ممكن الواحد يقع في عصيان الله عز وجل ويعما ذنب او معصيه.
ولكن بيكون لحظة ضعف وغصب عنه.
انما اللي قاصد ده ياخد باله الله لا يحب المعتدين.
الصنف التاني من الأصناف العشره
"والله لا يحب كل كفار اثيم."
كفار يعني يكفر بالله عز وجل ويصر على كفر وبعده عن ربنا سبحانه وتعالى.
ونعوذ بالله من ان نكون منه. وباذن الله لا ولا انت منهم.
الصنف التالت هو صنف كان في نفس الاية.
والله لا يحب كل كفار (اثيم).
وهنا بقى ناخد بالنا.
الاثيم هو المصر على الاثم والمعصية والبعد عن الله.
لما تقول له قرب يقول لك يا عم كبر دماغك وابعد عني انا كده زي الفل.
يحب المعصية وتبقى عنيه.
ولو حد بس كلمه على الطاعة يتعفرت فان كنت صاحب ذنب او معصية قاوم نفسك واوعى تصر عليها
ولما ييجي حد يكلمك عن ربنا او يقربك منه افتح قلبك وباذن الله ربنا سبحانه وتعالى هينور بصيرتك ويرفع حب المعصية من قلبك باذنه
الصنف الرابع " والله لا يحب الظالمين."
الظالم اللي بيظلم نفسه بالذنوب والمعاصي والبعد عن ربنا سبحانه وتعالى.
او الظالم اللي بيظلم خلق الله متعمد لأنهم يقدروش عليه.
اعلى منهم رتبة او منصب او مال او ظلم الناس لبعضها والإفتراء عليهم ويرمي عليهم تُهم معملوهاش
ياخد باله لان ربنا سبحانه وتعالى لا يحب الظالمين
الصنف الخامس " ان الله لا يحب من كان مختالا فخورا."
مختالا فخورا يعني متكبر.
شايف نفسه على الناس يستصغرهم ويحتقرهم
لنعمة سبحانه وتعالى اداها له.
يبص لهم من فوق لتحت ويحتقر خلق الله خد بالك الكبر ده يمنعك من الجنة.
النبي صلى الله عليه وسلم قال لا يدخل الجنة من كان في قلبه مثقال ذرة من كبر.
الصنف السادس "ان الله لا يحب من كان خوانا اثيما."
خوان بيخون امانة ربنا سبحانه وتعالى واوامره. وبيخون امانات الناس ويخون اسرارهم ويحكيها ويخون وثقتهم فيه ربنا سبحانه وتعالى لا يحب الخيانة.
الصنف السابع " اللي لسانه سيء ماعليهوش الا الالفاظ القذرة"
ما يعرفش يتكلم الا بسب دين وشتيمة ولعن وحاجات غلط لا ترضي الله عز وجل.
ما تعرفش تسمع منه كلمتين كده بهدوء وبساطة لازم ودانك تتلوث بحاجة.
ربنا سبحانه وتعالى لا يحب الجهر بالسوء من القول الا من ظلم
المظلوم اللي له حق ياخد حقه وما يزيدش.
فحسن لسانك يا اخويا واختار الكلام اللي يرضي الله. والا تدخل في صفة لا يحبها الله.
الصنف التامن "والله لا يحب المفسدين."
المفسد اللي مش بس فاسد في نفسه ولكن يحب يفسد الناس ما يعملش الذنب لوحده ابدا ولكن لازم ياخد حد معه
وانا هروح النار لوحدي ولا ايه
يسمم افكار الناس بحرام وبعد عن ربنا سبحانه وتعالى.
افكار لو اعتنقوها توديهم في مكان اخطر ما يكون.
ينشر مسلسل او فيلم وينصح الناس بسماعه او اغنيه وهاتك يا استوري طول النهار
كأن الصوره مش هتبقي جامده لو محطيتش عليها اغنيه واديت ذنب لكل اللي هيشوفها
وسبحان الله يبقى مفسد كبير ويقول لك هو ينفع رمضان من غير مسلسلات الله ينفع ده اللي ما ينفعش انه يبقى بمسلسلات.
مفسد كبير او مفسد صغير خد بالك.
والله لا يحب المفسدين.
الصنف التاسع " انه لا يحب المسرفين."
المسرف اللي بينفق المال من غير عقل ولا حساب. بدل ما يرضي به ربنا سبحانه وتعالى ينفقه على الفقراء والمساكين
يروحوا ينفقوا في الهيافات وفيما يغضب الله سبحانه وتعالى.
فلو ربنا سبحانه وتعالى اتاك مال دي نعمة وطريق للجنة. ازكر نعمة ربنا سبحانه وتعالى. وما تبقاش من المسرفين. وخليك فاكر انه لا يحب المسرفين
الصنف العاشر " ان الله لا يحب الفرحين."
ما تستغربش الفرحين هنا مش معناها الناس الفرحانة السعيدة يعني. ولكن الاية دي ذكرت في قارون.
قارون اللي كان بيقول على ماله انما اوتيته على علم عندي. الفرحين هنا معناها اللي شايف ان نعمة ربنا عليه لا نعمة ولا حاجة دي حقي.
انا راجل دماغي نضيفة وعبقري وعندي علم وما فيش مني
فلا يشكر الله على نعمته ويفرح بنفسه.
فيا اخويا الغالي كل حاجة في ايدك انسب بفضلها لله. سواء العيال او تفوق او خدت منصب.
ايا كان اللي ربنا سبحانه وتعالى اداه لك اعرف انه من الله. واوعى تقول انما اوتيته وهو على علم عندي. وافتكر كويس اوي. ان الله لا يحب الفرحين.
عشر اصناف. نعوذ بالله ان انتم اونا نبقى منهم. وربنا يجعلنا من الاصناف اللي هو بيحبها
ويقربنا من كل عمل يقربنا الي حبه
جزاكم الله خيرا والسلام عليكم ورحمه الله وبركاته
