السلام عليكم ورحمة الله وبركاته. حبايب قلببي طابت ليلتكم
بسم الله وكلمة وتر معناها عدد فردي اما صلاة الوتر فهي صلاة ما بين العشاء والفجر. وهي من قيام الليل. بعد ما بنخلص صلاة العشاء عندنا ركعتين سنة العشاء
وبعد سنة العشاء ييجي قيام الليل . قيام الليل مثنى مثنى . يعني ركعتين ركعتين ركعتين. خلصنا قيام وعايزين نقفل النبي صلى الله عليه وسلم علمنا ان اخر صلاة الليل الوتر يعني نختم قيام الليل بركعة واحدة اسمها ركعة الوتر. طب ينفع نصلي بعد سنة ركعة واحدة بس وتر ونبقى قمنا الليل؟ اه هو ده اقل قيام الليل ركعة الوتر. طب انا بصلي الشفع والوتر ركعتين وبعدهم ركعة ينفع... ايوة ينفع واوعى تفتكري ان صلاة الوتر دي صلاة هينة ولا حاجة بسيطة كده لكن لا دي اجرها عظيم واسمعي مني السر الاول ركعة الوتر ركعة يحبها الله عز وجل
قال رسول الله صلى الله عليه وسلم يا اهل القرآن اوتروا فان الله وتر يحب الوتر . النبي صلى الله عليه وسلم بينصح جميع المسلمين ان احنا نصلي الوتر وقال لنا ان ربنا سبحانه وتعالى واحد بيحب صلاة الوتر. تخيل لما تعرف حبيبك بيحب ايه ده انت بتعمله ليل ونهار. عشان يحبك وتقرب منه فما بالك بالحاجة اللي بيحبها ربنا سبحانه وتعالى. فلو داومت على الوتر تحب ربنا وربنا يحبك ر طب والسر التاني الوتر صلاة كان يحبها النبي صلى الله عليه وسلم. من عادة النبي صلى الله عليه وسلم انه كان في السفر ما يصليش السنة ولكنه كان لا يترك صلاة الوتر لا في سفر ولا في حضر. كان يصلي والسيدة عائشة هي نايمة قدامه. لغاية ما ييجي يصلي الوتر عشان تصليه السيدة عائشة احب الناس لقلبه ما يسيبهاش من غير وتر لانه عارف قيمة الوتر سيدنا ابو هريرة بيقول ان النبي صلى الله عليه وسلم وصاه بتلات حاجات كان منها ان يوتر قبل النوم. فصلاة يحبها النبي صلى الله عليه وسلم ويوصي بها احبابه تبقى شكلها عامل ازاي نيجي بقى للسر التالت
اللي بيصلي الوتر لا يكتب عند الله من الغافلين. اللي بيترك قيام الليل عند ربنا سبحانه وتعالى يكتب غافل يعني سايب اجر عظيم وحاجة كبيرة اوي اوي اوي ومضيعها وراميها. النبي صلى الله عليه وسلم قال من قام بعشر ايات لم يكتب من الغافلين. يعني لو جيت قبل ما تنام كده قمت متوضي ومصلي ركعة وتر واحدة قلت فيها الفاتحة ادي سبع ايات وقرأت بعد الفاتحة شيء من القرآن تلات ايات كمان ادي عشر ايات ، لا تكتب عند الله من الغافلين طب ولو زدت ؟
ربنا عنده الزيادة واكتر فان كانت عندك الاستطاعة انك تقوم الليل بعدد ركعات اكبر وقراءة اطول من القرآن
افضل وافضل واجر اعظم ولكن على الاقل لا تترك ركعة الاتنين.
نيجي بقى للسر الرابع النبي صلى الله عليه وسلم اخبر ان في صلاة الوتر اجر عظيم لا يمكن تتخيله . قال صلى الله عليه وسلم ان الله امدكم بصلاة هي خير لكم من حمر النعم . قالوا وما هي يا رسول الله؟ قال صلى الله عليه وسلم الوتر ما بين صلاة العشاء الى طلوع الفجر. وكلمة حمر النعم هنا دي كناية عن حاجة عظيمه قوي كان بيحبها العرب. وقيمتها عندهم عالية جدا جدا. فالنبي بيقول لهم دي احسن من حمر النعم. لانك لما تروح عند ربنا سبحانه وتعالى يوم القيامة هتشوف اللي ما حدش شافه. فدنيا ايه وحاجات من اللي في الدنيا ايه الوتر اهم.
اما بقى السر الخامس في الوتر استجابة لدعائك باذن الله. افضل وقت للدعاء هو الثلث الاخير من الليل. اللي النبي صلى الله عليه وسلم علمنا ان الله عز وجل يتنزل فيه الى السماء الدنيا تنزل يليق بجلاله وكماله عز وجل. ويستجيب الدعاء. فتيجي انت بقى في الاخير من الليل. يعني ايه? يعني تحسب من المغرب للفجر كم ساعة تقسم على تلاتة تيجي في اخر تلت منهم. تتوضى وتقف تصلي الوتر. ومن سنة النبي صلى الله عليه وسلم انه كان بعد ما يرفع من ركوع الوتر. وقبل ما يسجد انه كان احيانا يدع ادعي بقى بما شئت ودعاء الليل سحر والله سحر بس انت تجربه. تجربه تجربه ايه؟ خلي عندك يقين ان سهام الليل بتصيب دعاء ربنا سبحانه وتعالى يتقبله والله ويغير دنيتك واخرتك شفت بقى الخمس اسرار دول ما تسيبش صلاة الوتر تاني ابدا بقى. تمام؟ ودي الطريقه
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
