« المسجد الأقصى » .. مين اللي بناه و إيه أهميته بالنسبة لنا ؟ .. و ليه اسمه كدا و ليه اليهود مسيطرين عليه ؟ .. إيه الحكاية و إيه التاريخ ؟ .. الپوست دا مهم و لازم نفهم القضية صح
واحد واقف بيصلي إمام بِـ 124 ألف شخص .. مشهد مهيب .. الواحد دا يبقا نبينا محمد .. سيد ولد آدم .. و إمام البشرية .. بيصلي بالأنبياء كلهم اللي هما أئمة البشر .. في المسجد الأقصى .. و بعدها هيطلع منه للسماء للقاء رب العالمين .. تخيل مكان زي دا يبقا عظيم قد إيه .. تخيل المشهد تاني و تالت .. هنتكلم عن المسجد و عن التاريخ نفسه و أسباب الصراع و أصل القضية .. و هتلاقي صور أنت محتاج تشوفها .. فا يلا بينا ..
المسجد الأقصى تاني مسجد في الأرض .. اتبنى بعد المسجد الحرام بِـ 40 سنة ( في البخاري و مسلم ) .. اللي بناه سيدنا آدم .. و في قول أن سيدنا إبراهيم هو اللي بناه لكن الأرجح أنه آدم .. عمّره سيدنا إبراهيم ثم إسحاق و يعقوب من بعده .. ثم سليمان نبي الله جدده بعدها بسنين طويلة .. اسمه الأقصى عشان بعيد عن المسجد الحرام .. و اسمه بيت المقدس .. يعني البيت المنزَّه و المطهّر .. و الأرض المباركة لأن ربنا قال : " إلى الأرض التي باركنا فيها " .. عاش فيه أنبياء كتير زي خليل الرحمن إبراهيم و إسحاق و يعقوب و زكريا و يحيى و عيسى و داوود و سليمان و كتير من أنبياء بني إسرائيل و عاشت فيه السيدة مريم طبعا .. و دخله يوشع بن نون نبي الله من بعد موسى فاتحا بعد زمن التيه .. و هبط فيه الوحي كتير و كان قِبلة لأنبياء كتير قبلنا .. و كان قبلة لينا بعد الهجرة بِـ 16 - 17 شهر تقريبا .. ثم تم تحويل القبلة للمسجد الحرام ..
المسجد الأقصى هو كل ما دار حوله السور .. موجود في أقصى الزاوية الجنوبية الشرقية من بلدة القدس القديمة اللي كان حواليها سور .. بص ع الصور كدا .. المسجد اللي له قبة ذهبية مش الأقصى .. دا جزء منه و اسمه مسجد قبة الصخرة .. و المسجد اللي له قبة رصاصي أو برونزي .. مش الأقصى برضه و اسمه المسجد القِبْلي و موجود في الجنوب باتجاه القبلة .. بس حديثا بيتقال عليه الأقصى كدا .. لكن الأقصى الصح زي ما قولنا .. سور كبير و جواه مآذن و محاريب و قباب و أبواب و أسبلة مياه و منابر و أشجار و مباني و أروقة و مكتبات و مدارس و ساحات طبعا .. يعني أغلبه مفتوح و مالوش سقف ..
طَب إيه حكاية قبة الصخرة بقا ؟ .. سيبنا من القبة و خلينا في الصخرة نفسها .. الصخرة كانت قِبلة لليهود بعد موسى و كان دا عن تشاور منهم مش بأمر إلهي .. و كانت قبلة لبعض النصارى بعدهم .. قيل أنها الصخرة اللي طلع منها النبي للسماء في حادثة المعراج .. و ورد في صحيح ابن حبان أن جبريل خرق الصخرة بإصبعه و شد فيها البراق .. و لما عمر بن الخطاب فتح بيت المقدس سنة 15 هـ .. لقى ع الصخرة قاذورات .. فا أمر بتنضيفها و استشار كعب الأحبار عن مكان يبني فيه مصلى فا كعب كان عالم يهودي تقيل و أسلم .. فا قال له يبنيه خلف الصخرة .. بحيث اللي يصلي وراها يبقا متجه للقبلة و للصخرة في نفس الوقت .. فا عمر اتضايق .. لأنه حس أن دا تعظيم من كعب للصخرة اللي هي قِبلة لليهود مش لينا .. فا رفض .. و بنى للمسلمين مُصلى ( اللي هو المسجد القِبْلي دلوقتي .. و قدام الصخرة مش وراها فا بيتجه للكعبة من غير ما يتجه للصخرة .. شايف العزة ؟ ) .. الصخرة فضلت مكشوفة لفترة مِ الزمن و الصحابة و التابعين ما كانوش بيعظموها لأنها قبلة منسوخة و بيعظمها اليهود و بعض النصارى .. في كهف تحت الصخرة كدا معمول فيه مُصلى برضه و لما تدخله بتحس كأن الصخرة متعلقة في السما .. هتلاقوا صور روعة للصخرة و الكهف من داخل المسجد نفسه معانا هنا .. اتفرجوا .. و لسة هتكلم عن التاريخ بتاعهم بس أنا بعرفك المسجد الأقصى الأول ..
