هنتكلم النهارده عن صلاه الضحي🌱
سمعتم عن صلاة الاوابين قبل كده ؟
اهو انا جايه النهارده اقول لكم ايه صلاة الاوابين دي ؟ السلام عليكم ورحمة الله وبركاته
الاواب معناها واحد كان بعيد عن ربنا سبحانه وتعالى وعايز يعود اليه. واحد بيجتهد وبيعمل كل اللي يقدر عليه انه يرضي ربنا سبحانه وتعالى ويقرب منه.
فتخيل لو فيه صلاة تشهد لك عند ربنا سبحانه وتعالى ان انت البني ادم اللي عايش دايما يقرب من ربنا ويرضيه
صلاة الاوابين سنة مؤكدة عن النبي صلى الله عليه وسلم واللي كتير مننا يعرفها باسم صلاة الضحى.
النبي صلى الله عليه وسلم قال لا يحافظ على صلاة الضحى الا اواب
اللي عايز يقرب من ربنا ويرضيه. وهي صلاة الاوابين
والاحاديث صلاة الضحى كتير.
واجرها عظيم يا جدعان. اسمعوا صلوا بنا على سيدنا النبي. اللهم صل وسلم وبارك على سيدنا محمد وعلى اله وصحبه اجمعين. النبي صلى الله عليه وسلم قال يصبح على كل سلامى من احدكم صدقة.
يعني المفاصل اللي في جسمنا كلها كل مفصل لوحده عليه صدقة في اليوم? ده احنا عندنا تلتمية وشوية مفصل دول وهنطلعهم ازاي ؟ فالنبي صلى الله عليه وسلم حلها لك فقال فكل تسبيحة صدقة. وكل تحميدة صدقة، وكل تهليلة صدقة، وكل تكبيرة صدقة. يعني كل سبحان الله الحمد لله لا اله الا الله الله اكبر كل واحدة من دول بصدقة وامر بالمعروف صدقة عن المنكر صدقة العالم بتوع سيب الملك للمالك وما لكش دعوة بحد.
لا احنا نأمر بالمعروف وننهى عن المنكر. بس نأمر بالمعروف بمعروف وننهى عن المنكر بغير منكر. ندعو الى الحق ونرحم الخلق. وفي اخر الحديث النبي صلى الله عليه وسلم قال
ويجزئ من كل ذلك ركعتان يركعهما من الضحى. ركعتين الضحى دول كل الصدقات المطلوبة منك على كل مفصل موجود في جسمك.
يبقى نطلع صدقاتنا بتاعة كل يوم ونصلي ركعتين الضحى. وسيدنا ابو هريرة في الحديث قال اوصاني خليلي بثلاث لا ادعهن حتى اموت
يعني النبي صلى الله عليه وسلم قاعد معه وصاه عارف لما اقول وصيته يعني اهم حاجة عنده بيسيبها لك قبل ما يموت فذكر تلات حاجات ثلاثة ايام من كل شهر انه يصوم ثلاثة ايام من كل شهر عربي
وصلاة الضحى اني اصلي الضحى كل يوم ونوم على وتر
وانه يصلي ركعة الوتر قبل ما ينام.
وصية النبي صلى الله عليه وسلم لابي هريرة صلاة الضحى. ومش بس كده. صلاة الضحى دي تكفيك كل حاجة تهمك او تخوفك او حاجة نفسك انها تحصل في يومك. النبي صلى الله عليه في الحديث القدسي ذكر عن رب العزة انه قال
اركع لي من اول النهار اربع ركعات اكفك اخره يكفيك طول النهار باربع ركعات ضحى تصليهم في اليوم كلام جميل جميل.
طب نصلي صلاة الضحى
دي من امتى لامتى? وكام ركعة? بداية صلاة الضحى من بعد شروق الشمس بربع ساعة.
ويا سلام بقى لو كنت صليت الفجر في جماعة وقعدت في المسجد تذكر ربنا سبحانه وتعالى لغاية ما طلعت الشمس واستنيت الربع ساعة وصليت الركعتين.
النبي صلى الله عليه وسلم اخبر ان اجر ده حج وعمرة تامة تامة تامة. وعلى فكرة انت كمان لو صليت في بيتك وقعدت في المكان اللي صليت فيه تذكري لغاية ما الشمس طلعت وصليت ركعتين الضحى تاخدي نفس الاجر. يبقى من بعد طلوع بربع ساعة لغاية قبل الضهر بحوالي تلت ساعة. بتصلى كام ركعة? تتصلى ركعتين ركعتين. يعني ايه? يعني اصلي ركعتين? عاديين خالص قراءة ركوع سجود. اقوم تاني قراءة ركوع سجود واسلم ركعتين. ركعتين في ركعتين بقى على قد ما ربنا يقدرني. وافتكر حديث الاربع ركعات ربنا يكفيك بهم باذن الله. طيب وافضل وقت لصلاة النبي صلى الله عليه وسلم قال صلاة الاوابين حين ترمد الفصال.
الوقت اللي الجمل الصغير يبدأ ما يستحملش حرارة الرمل بتاع الصحرا. وده تقريبا الساعة تسعة او عشرة كده. وليه اتسمت صلاة الاوابين? عشان دلوقتي اللي الناس كلها بتنشغل به في الشغل وبداية اليوم لكن انت في النص كده بتفتكر ربنا سبحانه وتعالى وتقوم تتعبد له
فبالله عليك بعد الخير ده والكلمتين الحلوين دول تبطلي صلاة الضحى. اللهم يا رب اجعلنا عبادا لك كما تحب وترضى. ولا تحرمنا صلاة الاوابين. يلا سلام عليكم
