السعوديه - يُنبع ' وهج الشموس '
دخلت الشمس في غرفتها تعكس نورها على زجاج غرفتها مابين المرايه والدولاب والسرير وحتى على شمعدانات الشموع اللي أنطفت نتيجة ذوبان الشمع على الرف بجانبها
صحت من نومها لأن شباكها متحرر من الستاير وتبغض أي قطعة قماش تحجب عنها نور الشمس وشروقها
لفت تناظر الشمس من شباكها الكبير اللي يطل على الحوش بباب زجاجي شفاف تشوف من خلفه شتلات الورد اللي تزرعها على أطراف باب شباكها المطل على الحوش
وقفت ولبست السليبر برجلها وفتحت الباب وناظرت الورد وعقدت حاجبينها:ليش ما تطول تعيش ؟
انحنت تشوف الورد اللي تثنّى من الجفاف رغم انها تسقيه ولفت على صوت أمها تناديها بإسمها:توليب
طلت ومشت لها سمر:صحيتي من سريرك للحوش ؟ وش تسوين عندك ؟
توليب لفت للورد:ما اعرف ليش يموت بسرعه أفكر أغير المشتل اللي اخذ منهم شتلات
سمر:خلي عنك الورد هذا بس بيعدم يدينك تعالي الصاله ابيك
وقفت واخذت نفس:اخذ شاور واجيك
سمر:بتطولين دام فيها شاور
توليب ابتسمت:لا وعد
هزت راسها وخرجت سمر من الغرفه وقفلت باب شباكها توليب ومشت للحمام
أمتع أوقاتها فتحت الرفوف تطلع منها العلب وتختار منهم ريحة سكرب وزيت ولوشن لاستحمامها
وبدت تعبي البانيو وتنثر فيه الصابون المعطر وفتحت العلبه الصغيره تنثر قطع الورد بالبانيو وابتسمت
تحب ريحة الورد وتحب جسمها يكون معطّر بالورد ما يكفي يكون إسمها ورد ودها تعيش إسمها
غادرت الشاور بعد ما انتهت ولبست روبها وخرجت للغرفه تشوف ترطيب جسمها وريحته ولمعته وجلست على التسريحه واخذت من تولات المسك والورد تحطها على اماكن النبض
وفتحت الروب تلبس ملابسها وتنشف شعرها وتركته براحه بعد ما مشطته ومشت تخرج من الغرفه
طلعت للصاله عند سمر اللي تتابع مسلسل وتشرب قهوه:وشو الموضوع ؟
لفت سمر:اصبري اكمل المسلسل
جلست توليب تناطر المسلسل التركي ولفت لأمها وابتسمت بتعب من وضعها واخذت جوالها
دورت مشتل قريب من بيتها لكن مالقت غير اللي تتعامل معهم ودورت ولقت مشتل بإسم - مشتل لُطف -
نزلت تشوف صور المشتل ورفعت حاجبينها بإعجاب من مساحته وتنوع الزرع داخله
ونقلت رقمهم وارسلت لهم طلبها وردوا مباشره
توليب:أبي شتلات ورد منوعه للزراعه
المشتل:كم شتله ؟
توليب:٤ بس يكون من ضمنها توليب أبيض أو زهري
المشتل:نجهزها لك بإسم مين ؟
توليب: T T
المشتل:تمام حضرتك
قفلت توليب ولفت لسمر اللي خفضت الصوت:شفتي عدنان اللي يشتغل معي بالدوام ؟
تنهدت توليب:اعترف لك بحبه ؟
ابتسمت سمر:لا مو لهالدرجه بس المره الاخيره جاب لي قهوه
توليب:المناسبه ؟
سمر رفعت كتفها:ما ادري سألته قال عشان التركيز
رفعت حاجبها توليب وضحكت سمر:شاف أم سنقل صغيره بالعمر أكيد أعجبه
توليب:ماما انتي باقي تبغين ترتبطين بعد كل المحاولات ؟
سمر:لا تحطميني توته يعني كل محاولاتي كانت تعارف بس أبي اتزوج وأستقر والاقي رجل يقدرني
توليب سكتت تناظر سمر وابتسمت سمر:ويعيشني حياه حلوه تناسب عمري ويعوضني عن تجربتي مع أبوك الله لا يعيدها من تجربه
توليب:اذا بتفضفين لي عن تجربتك مع ابوي بمشي افضل
سمر:اي اهربي ما ترضين على ابوك اللي ما يسأل عليك الا من عيد لعيد وعايش مع عياله الثانين ومخليك
وقفت توليب وتجاهلت سمر ودخلت الغرفه واتصلت تحط اسبيكر وتلبس عبايتها
ردت عليها غايه:الو
توليب طلعت شعرها وحطت الطرحه على رقبتها:برا البيت ؟
غايه:بسم الله توليب قبل شوي اشرقت الشمس مين بيطلع اصلاً
توليب:انا طالعه
غايه:لا انا صراحه باقي ما قمت من سريري حتى مسترخيه
توليب:قومي نفطر مع بعض
غايه:اوف توليب المشكله ما اقدر اقول لصاحبتي لا
ابتسمت توليب تاخذ شنطتها:كلميني اذا طلعتي
غايه:تمام حياتي
قفلت غايه واخذت جوالها توليب وطلعت من البيت وركبت سيارتها
حركت تاخذ لها من الطريق عصير رمان طبيعي بارد وشغلت الموقع بجوالها ومشت بالطريق بسيارتها مشغله اغاني أنغام الهاديه مثل حياتها وجوّها
ناظرت المشتل من بعيد ومشت توقف عنده وناظرت بوابة المشتل ومكانه
قفلت سيارتها وفصخت الحزام واخذت عصيرها وشنطتها ونزلت
دخلت المشتل تناظر الزرع بكل مكان وريحة التربه الرطبه والورد تفوح من المكان
ابتسمت من مساحة المشتل وتقدمت تناظر الورد حوالينها وانحنت بفضول تشوف أنواع الورد المختلفه وتحاول تتعرف عليها
ووقفت تمشي بين التربه ولفت ووقفت محلها من شافت أقدام شخص طايح بين الورد على بطنه وجمد وجهها وركضت له بسرعه
حطت اغراضها بالارض تنحني له ورفعت وجهه:لو سمحت
رفعت راسها:احد يساعدني في شخص طايح هنا
لفت جسمه تحط راسه على ركبتها وتناظر وجهه ورفعت اصابعها تبعد التراب عن وجهه وتهز راسه بربكه
قاست نبضه تحس بنبضاته ولفت ترفع صوتها:احد يساعدني ، مافي احد هنا ؟
ناظرت الرجل الكبير بالعمر اللي خرج وركض لهم وناظر عسّاف بالارض:عسّاف
لفت توليب عليه:عسّاف تسمعني ؟
العم لطفي انحنى يشيل عسّاف ويجلسه:ما تخافيش بتلائيه هبوط بالسكر مش أول مره يطيح
ناظرته توليب بقلق ولفت لعصيرها وقربت من عسّاف تحطه بفمه وتحاول تعصره عشان يشربه
رفع عيونه العم لطفي يناظر توليب:أصل الباش مهندس ما يفطرش خالص وعنده سكر
توليب ناظرت العم لطفي:مشكله طيب لو ينخفض وهو يسوق
العم لطفي:حصحيه دي الوقت وانتي بتخاصميه
لفت توليب تشرب عسّاف العصير وناظرته يفوق ولف العم لطفي:حقيب قهاز السكر من قوا
وقف العم لطفي ورفعت ذراعها توليب خلف عسّاف تسنده وناظرته من قريب تشربه العصير
ورفع كفه عسّاف يبعده بإنزعاج وكح من شرق وابتعدت عنه بربكه وفتح عيونه عسّاف بتعب وناظرها تدور فيه الدنيا يشوفها بكثره وتعدد ودوران ورجع يغمض عيونه يحاول يجلس
ومشى العم لطفي بالجهاز وبيده عصير وفتح العصير:اشرب ياباش مهندس
شرب عسّاف وناظرهم يفوق شوي شوي وقاس السكر العم لطفي وناظرتهم توليب
العم لطفي:كويس بيرتفع دي الوئت
وقفت توليب تحضن شنطتها ورفع عيونه عسّاف يناظرها وهو عاقد حجاجه ونطق العم لطفي:لا مؤخزه يابنتي
توليب:لا مو مشكله بس انا طلبت شتلات وجيت أخذها
العم لطفي لف لعسّاف:صحصح ياباش مهندس خلينا نخلص شغلنا
نزلت عيونها توليب تناظر عسّاف اللي منزل راسه يحاول يفوق ويستوعب طيحته
ومشت خلف العم لطفي والتفتت بقلق وناظرت عسّاف اللي رفع راسه وعيونه عليها يناظرها من بعيد
ولفت تدخل داخل وناظرت المكتب والغرفه المريحه ووقفت تشوف العم لطفي يفتش في الفواتير
توليب:تواصلت واتس اب قبل شوي معاكم
العم لطفي:أيوه بإسم مين ؟
دخل عسّاف وبيده عصيرها الفارغ وجهاز السكر ووقف يناظرهم
توليب:دبل تي
رفع عيونه العم لطفي:مش فاهم !
توليب بلعت ريقها وتقدمت تشوف الفاتوره اللي بيده:هذي أنا ، دبل تي حرف التي مرتين
العم لطفي ضحك:أيوه دبل تي يعني حرف التي مرتين ازاي مافهمتش
لفت توليب تناظر عسّاف اللي جلس بعيد عنهم يناظرهم ولفت للعم لطفي اللي نطق:اخترت لك اربع شتلات من أفضل أفضل الورد اللي بيعيش بس لا مؤاخزه أصل التوليب صعب يعيش
توليب عقدت حاجبينها:كيف أهتم فيه لوقت طويل ؟
العم لطفي ناظر عسّاف وناظرها:تعالي وبعرّفك أنا
مشت مع العم لطفي اللي يمشي بتعب ومشت معاه لين دخلوا بين الورد والزرع وانحنى العم لطفي ورفع راسه لها:أصل التربه السرّ
سكتت توليب تناطر العم لطفي وكمل العم لطفي:التربه الرمليه الطينيه دي أفضل حاقه للزراعه ، ما تاخديش أي تربه لأن التربه هنا مالحه بسبب البحر والميّه المالحه بتئتل البزور بسرعه
ابتسمت توليب لانه يشرح لها وهزت راسها:وفين الاقي التربه ؟
العم لطفي لف يناظر مكانهم ورجع ناظرها:أنا طلعتك من عند الباش مهندس عشان أعطيك أنا من تربة المشتل
ارتبكت توليب بإحراج:لا ماله داعي أنا أدورها بمكان وأشتريها
وقف العم لطفي:دي ما بتنباع دي سرّ المشتل
توليب ابتسمت للعم لطفي وغمز لها ومشى ومشت خلفه ودخلت معاه داخل
وحط لها الورد بأحواض وناظرهم عسّاف ووقف العم لطفي:عايزه تحاسبي عليهم ؟
هزت راسها توليب تطلع بوكها:مع حساب التربه
لف العم لطفي على عسّاف وحك جبينه:لا مش محسوبه خليها علينا
توليب ابتسمت:اذا مافيها إزعاج بدفعها أنا
العم لطفي:اللي تشوفيه
مدت الفلوس للعم لطفي وانحنت تاخذ الشتلات ومشى العم لطفي:خليني اساعدك
اخذ عنها ومشت معه توليب وخرجت وفتحت باب سيارتها بالخلف وحطها العم لطفي وابتعد وابتسم لها:متشكره ساعدتي الباش مهندس
توليب ابتسمت:لا ماسويت شي شكراً إنت ياعمو
العم لطفي ضحك:أيوه ناديني العم لطفي
هزت راسها توليب وركبت سيارتها وانحنت تقفل حزامها وشغلت السياره واشتغل صوت أنغام ولفت من دق الشباك ولفت تناظر عسّاف شايل عصيرها وواقف عند شباكها
وفتحت الزجاج وناظرته بدون تتكلم
ورفع العصير عسّاف:شكراً
كانت الكلمه الوحيده اللي قالها وهزت راسها توليب بدون رد وقفلت شباكها وحركت سيارتها مبتعده عن المشتل
رفعت عيونها تشوف الورد بالخلف رابطه عليهم الحزام وكملت طريقها
'
دخل عسّاف وجلس عند العم لطفي اللي حط عنده طعميه ومخلل وخبز:افطر افطر عشان محدش من الزباين يعيد تقربة البت دبل تي
جلس عسّاف وناظره:ما حسيت لو عرفت اني بطيح ما كان طـ
قاطعه العم لطفي:ماكنتش طحت اكيد ، ايه ده الزكاء ياعمي
ضحك عسّاف من مصخرة العم لطفي عليه وبدأ يفطر وناظره العم لطفي:بس ايه يعني دبل تي ؟ مش فاهم خالص انت فهمت حاقه ؟
هز راسه بالنفي عسّاف وكمل العم لطفي:البت ماشاء الله ورده من ورد المشتل والله ، صوتها ناعم أوي ما ينسمعش
مارد عسّاف يفطر وكمل العم لطفي:أنا بقد مشفتش بت بدي الرئه والنعومه
ضحك عسّاف:انت شايف العالم كله ياعم لطفي اتركنا من كلامك
العم لطفي:بس البت خافت عليك أوي هاه !
ضحك عسّاف وهو ياكل ويناظر العم لطفي
وكمل العم لطفي:بقد إرتحت للبت ما تيقي تخطبها ياعسّاف
عسّاف:بس كذا ؟ الان أخطبها متى تبي الزواج بس ؟
العم لطفي:انت بتتمصخر ؟ ده قزاتي وانا بدور لك عروسه غير بت خالتك دي اللي عايزينك تاخدها
عسّاف:امي بس تبغاني اخذها انا ما ودي اخذها
العم لطفي:انا ما شفتهاش بت خالتك دي بس مش عاقبتني فكرة بت خالتك واسمها ، هوه صحيح اسمها ايه بت خالتك ؟
عسّاف:البندري
العم لطفي:بقد مش طايئ الاسم ، مالها الدبل تي ؟
عسّاف:بس انت خلاص مسكت دبل تي ودبل تي ؟
العم لطفي:ماعرفتش اسمها اعمل ايه
عسّاف:طيب ياعمي انت كمل شغلك وانا اتركني اروح اخلص شغلي
وقف عسّاف وناظره العم لطفي:اتصل على دبل تي مادام الرئم عندنا
عسّاف:كلمها انت قولها اللي شربتيه عصيرك يبي يخطبك
ضحك عسّاف يتمصخر على العم لطفي ومشى يخرج تاركه
طلع من المشتل وطلع من جيبه مفتاحه وركب سيارته واخذ نفس يرتاح ثواني وحرك سيارته
لف على جواله اللي يهز واخذه يرد:هلا
حنان:شلونك عسّاف ؟
حرك سيارته:حمدلله بخير خالتي انتي كيف حالك ؟
حنان ناظرت البندري اللي جالسه:بخير كلنا حمدلله عاد قبل شوي البندري قاعده عندي وتسولف واحنا نفطر وجيت ببالي
هز راسه عسّاف وابتسم يفهم تلميح خالته المستمر:عسى خير !
حنان:خير خير بس قلت اسأل عليك اشتقنا لك من زمان ما سيّرت علينا
عسّاف:كل جيّاتي عشان عمي تركي يحتاجني بشغله والحين عمي تركي بطل يحتاجني
ضحكت حنان:لا لا ما بطل كلنا نحتاجك اصلاً
ابتسم عسّاف:سيّروا على امي والبنات تسلونهم
حنان:ودي والله بس هيله نومها معفوس ما تقعد الا بعد الظهر مستحيل تعدله
ضحك عسّاف من أمه وجدول نومها:العصريه زينه
حنان:بنروح لهيله أمك بس بشرط تكون موجود بشوفك واخذ علومك
عسّاف:ان شاء الله بس ما اوعدك ياخالتي وقتي ضيق واشغالي كثيره
حنان:انا مدري وش هالشغل اللي ما يخلص بس ماشاء الله عليك بس ليتك تاخذ معك يوسف وتعلمه شوي
عسّاف:يوسف عنده أبوه تركي ماشاء الله عليه خير من يعلمه
حنان هزت راسها:ايه يالله ما أطول عليك
عسّاف:مع السلامه
قفلت منه وناظرت البندري:ياحلو هالولد بس
ابتسمت البندري:سأل عني ؟
حنان:لا عسّاف ثقيل ما يلمّح حتى بس اعرفه اعرفه مبين من صوته مشتاق
ضحكت البندري بتوتر ولفت لأريام اختها:لا ترفعين احلامها امي يمكن مو شايفها ترا
حنان:اسكتي انتي تحطمين الواحد ، ولد خالتها وعاش طول عمره عندنا ومعنا ليه ما يحب البندري ؟ الا يعشقها بس مدري شفيه ما يخطب ويسمع من أمه
البندري:أمي تراه يشتغل كثير خالتي هيله تقول ما يرجع الا متأخر ويقوم بدري مع الصلاه ، يمكن ما يحسه الوقت المناسب
حنان:اي الزواج استقرار ، يالله وش ورانا ننتظر عسّاف عبدالمحسن يخطب بنتي القمر
ابتسمت البندري ولفت من دخل تركي ومعه يوسف:سلام عليكم
حنان:هلا
جلس تركي واخذ نفس بتعب:مافي شي ناكله ؟
حنان:توك فاطر امداك تجوع !
لف تركي لأريام:أريام وأنا أبوك عطيني شي خفيف اكله
وقفت أريام ومشت للمطبخ ولف تركي لحنان:هاه ست حنان اليوم الطقس مستقر ماعندك خطط جديده والا نكد جديد
يوسف ضحك:ابوي حتى وامي ساكته تدور للنكد ليه ؟
حنان:تشوفه ؟ وبعدين يقول انا ابدأ أحارشه
تركي:ياكلمه ردي مكانك خلاص مانقصد
حنان ناطرت تركي تخزه واكل تركي وجلست بجانبه أريام
يوسف:ابوي كنت بسألك عن توليب اختي
لفت حنان ورفعت حاجبها:عسى خير يوسف مع هالصبح ؟ وش جاب طاريها ؟
تركي لف لحنان:وش عليك منه انتي ؟ كيفه يبي يسأل عن اخته ، بتمنعينه ؟
حنان جلست بإعتدال:اي بمنعه وش نبي فيها تدخل حياتنا ؟ خلها تقعد عند امها
تركي حط الصحن:اقول اعقلي ولا تفتحين صفحات انطوت ، ريحينا
يوسف:امي البنت مالها ذنب ترا ليه معصبه عليها ؟ وانا قلت ابي اطمن عليها اختي بعمر البندري وما نعرف عنها شي وما نشوفها الا بين سنين وسنين
حنان:ومانبي نشوفها العمر كله لا هي ولا امها
تركي:مابقي الا انتي تقطعين بنتي عني ، اقول ثمني كلامك واحترمي نفسك ، البنت طلقت امها وانفصلنا ايه بس البنت من دمي
حنان ناظرته بحده:طلع لك العقل الحين يا ابو عقل ؟ ليه ما قرر عقلك بيومها ما تتزوج عليّ وحده حيّه مثل سمر ؟ ولا تجيب بنت بكبر البندري !
تنهدت البندري تناظر ابوها وامها وعقد حاجبينه تركي:لان محد بيمنعني اتزوج وان بغيت اتزوج عشر تزوجت تفهمين ؟ وانا ماطلقت عشانك طلقت لاننا ما ناسبنا بعض وانتي رضيتي تقعدين ببيتك وجبتي هالبنات بعد
سكتت حنان تناظره بحده وكمل تركي:قفلي هالسيره ما بقعد كل مره افتحها معك واقولك ان توليب بنتي
لف ليوسف:وان مت هذي وصيتي توليب بنتي لها من ورثي نفس مالكم انتم نصيب واللي يبخس حقها ماني راضي عليه
وقف تاركهم ولفت أريام على حنان:انتي فتحتي الموضوع
حنان لفت عليها:انكتمي انتي
سكتت أريام من دقتها البندري وتنهد يوسف ووقف تاركهم
'
تفطر وتناظر غايه اللي تسألها:وش قالك يوم فاق ؟
توليب:قالي شكراً وش بيقول يعني
ابتسمت غايه:حياتي الولد حسافه طاح بهالتراب
توليب:وشو ولد اقولك رجال كبير
غايه:مدري يوم قلتي لي طايح بالارض حزنت عليه احسه ولد صغير حزين وجيتي انقذتيه بين هالورد
توليب ضحكت:مو بس امي متأثره من المسلسلات التركيه
غايه:عاد منجد كيف هالرجال على قولتك ؟
توليب:مدري انا من التوتر اخذت الورد وخرجت
غايه ابتسمت:خل نروح نشوف المشتل مره ثانيه
توليب:غايه ما توفرين ؟ اي رجال بحياتي يطلع لازم تكشفين عليه وتحللين حياته ترا ما خطبني !
غايه:وانتظره يخطبك يعني ؟ نحلله الحين نشوف وش يطلع ومن ولده ووش يشتغل
توليب:غايه منجد فاضيه
ابتسمت غايه تناظر الورده اللي بشعر توليب المرفوع:والورده هذي من مشتله ؟
ابتسمت توليب تشرب من عصيرها وتهز راسها
غايه:محليتك
تنهدت توليب:خلينا من هالسالفه امي تحوم على رجال بالدوام
غايه:والله امك اللي ما توفر
توليب:انا مشكلتي اخاف ينلعب عليها زي كل مره ، هي مقتنعه انها بتتزوج بعد هذا العمر بس غايه كل اللي تعرفهم ما يبون منها غير فلوس والا لعب
غايه:امك لو تخطت علاقتها مع ابوك وزوجة ابوك كان الحين عايشه حياتها بس تبي تنتقم منهم وتتزوج
توليب:مو راضيه تقتنع
غايه:خليها بكره تطفش وتتركه والا هو يتركها
سكتت توليب وهي تاكل ونطقت غايه:صح وش سويتي بمشروعك ؟ سددتي ديونك ؟
توليب:لا تذكريني
غايه:طيعيني توليب منجد اقولك اطلبي ابوك يساعدك مافيها شي تراه ابوك
توليب رفعت عيونها:مستحيل غايه خلاص عاد كل مره تقولين ابوي وابوي ، كل ذي السنين ما يعرف حتى انا كم عمري واروح اطلبه فلوس ؟
غايه:تراه ابوك ويحول لك كل شهر مصروف لك يعني ماهو قاطعك بس اللهم ظروفك مع امك صارت صعبه تشوفينه ويشوفك
توليب:ماراح اخذ منه شي انا أدبر عمري بدور لي شغل واسدد
غايه:شغل ؟ وش بتشتغلين بشهادتك ادب فرنسي ؟ تترجمين اغاني وافلام ؟
توليب:خلاص غايه وش هالتحطيم من الصبح
غايه:اساعدك ياغبيه الحل انك تكلمينه وتطلبينه فلوس
توليب:لا وخلاص قفلي الموضوع
تأففت غايه ووقفت توليب:برجع البيت انا
ناظرتها غايه ومشت توليب تخرج ركبت سيارتها وحركت تمشي بهدوء بالشوارع ، شوارع يُنبع البهيّه
مستحيل تفتح الباب بينها وبين ابوها بهذا الطلب وكأنها تبيه عشان الفلوس وحاجتها الماديّه فقط
وقفت عند البيت ونزلت واخذت شتلات الورد من الخلف ودخلت الحوش
مشت لباب غرفتها المطل على الحوش وفصخت عبايتها وحطتها على شنطتها وانحنت تحفر مكان الشتلات وتفرغه وتحط فيه التربه اللي اخذتها من المشتل
رفعت كفوفها تشيل شعرها من على وجهها عن التراب وحطت شتلات التوليب وغطتها بالتربه الرطبه وابتسمت:ياويلك تموتين
رجعت تزرع بإستمتاع على نور الشمس ومشت تغسل يدها وتدخل البيت
دخلت غرفتها وفتحت باب شباكها وناظرت الزرع وابتسمت:حلوات
حطت شنطتها وربطت شعرها وجلست على السرير
'
دخل البيت وتثاوب بتعب وتقدم يدخل الصاله وناظر خواته جالسين مع أمه:هاه متجمعين اليوم !
لفت هيله وابتسمت:هلا عسّاف
تقدم وباس راسها وجلس:شعندكم مو طالعين ؟
دلع:خالتي والبنات جايين
لف عسّاف:ماشاء الله الصبح كلمت خالتي امداها تكلمكم
هيله:خلها تجي نسولف ونحش شوي والبنات يقعدون مع بعضهم
عسّاف سكت ووقفت نجود بجوالها:وصلوا بفتح الباب
وقف عسّاف ومسكت كفه هيله:اقعد شوي
عسّاف:اعرف وش تبين عشان كذا بطلع غرفتي
هيله:اقعد عشان خاطري شوي
تنهد عسّاف وجلس ودخلت حنان وخلفها البندري وأريام متحجبات وابتسمت حنان:عسّاف عندنا
ارتبكت البندري من وقف:حيّ الله خالتي ماقصرتي لبيتي الجيّه
ضحكت حنان تسلم عليه ومسكت كفه تناظره اطول منها:اسم الله عليك كل مالك تحلو
ابتسم عسّاف:خذوا راحتكم ، امي رياض بالبيت ؟
هيله:لا ماهو موجود
هز راسه عسّاف ومشى يخرج من عندهم وابتسمت دلع تناظر البندري اللي واقفه:حياتي احنا هنا
ضحكت نجود تناظر البندري اللي فكت حجابها:احتريت
جلست أريام ووقفت دلع:لا لا تعالوا غرفتي احسن
هيله:اي انحاشوا عشان ما نسمع السواليف
ضحكت البندري ووقفت مع البنات ودخلت غرفة دلع
مشت تجلس نجود وجلست بجانبها رنا:شفتوا وجه البندري يوم دخلت وعسّاف اخوي موجود ؟
ضحكت البندري بإحراج ولفت دلع:الحب يا اختي وش يفهمك بس
البندري:الحين تستلموني يعني ؟
أريام:بتكونين حديث القعده
البندري:كان جلسنا مع امي وخالتي تحت اجل
أريام:امي بتعلم خالتي سالفة هوشتها مع ابوي الصبح ومالي خلق اسمعها مره ثانيه
دلع:ليش تهاوشوا ؟
البندري:عشان بنته وزوجته هذيك
نجود:خالتي كل مره تفتح السالفه واضح ما تخطت
أريام:محد تخطى ، يوسف اخوي وده يقرب العلاقه بيننا وبين توليب
رنا:شتبون فيها ؟ مدري انا سالفة بنات الأب من وحده غير أمي ما حبيتها
البندري:حتى انا مو حابه نفتح باب لها تدخل حياتنا يمكن زي امها
أريام:يمكن قلتيها انتي حتى ما تعرفين اطباعها حتى العيد مانروح مع ابوي نشوفها
دلع:الحين منجد ما تعرفون شكلها ؟
البندري هزت راسها بالنفي:اذكر شفتها بالمتوسطه بس وحتى صدفه
نجود:حياتي احس مالها ذنب يعني باللي صار ، المفروض ابوكم يحتويها ويزورها كثير
رنا:ليش يزورها ؟ خلاص طلق أمها شيبي فيهم
أريام:بنته اللي يزورها مو طليقته
البندري:يوه خلاص قفلوا الموضوع بالله
دلع:جوالي نسيته بالصاله رنا جيبيه تكفين
رنا:ياشيخه ! قومي انتي
البندري:انا اجيبه خليكم
وقفت تطلع من الغرفه وناظرتها أريام وهي خارجه
مشت البندري بخفّه وتوتر رايحه لغرفة عسّاف ووقفت عند الباب وبلعت ريقها وفتحته بهدوء وناظرت الظلام اللي استقبلها وعرفت انه نايم
طلت براسها تناظره نايم على السرير ووقفت ثواني وشهقت بخوف من اللي سحبتها من ذراعها
سحبتها بقوه وقفلت الباب وناظرتها:صاحيه ؟
بلعت ريقها البندري:خوفتيني
أريام:شتبين جايه غرفته ؟ البندري اعقلي هذي مو حركاتك !
البندري:خوفتيني طيب
أريام:لو مو مسويه شي غلط ما كان خفتي ، ليه جيتي غرفته ؟ جاوبيني
بللت شفايفها بتوتر ولفت من سمعته يقفل الباب بالمفتاح ولفت أريام تناظر الباب وفهمت ان عسّاف قفل الباب عند دخولهم لأنه عرف بدخول البندري
لفت أريام تناظر البندري اللي جامد وجهها تراقب الباب ومسكت ذراعها بقوه أريام:خليه ياخذ هالفكره عنك ويقفل بيبانه
لفت البندري تناظر أريام وهزت راسها أريام ومشت تاركتها
لفت تناظر الباب البندري وفركت يدينها ببعض بتوتر من ردة فعل عسّاف
'
تاكل بهدوء قدام امها ورفعت عيونها سمر:اقول توليب
رفعت عيونها وكملت سمر:من وين الورد اللي زرعتيه عند غرفتك ؟
توليب:اخذته من مشتل جديد
سمر ابتسمت:عجب عدنان قالي اسألك عن مكانه
رفعت راسها توليب وعقدت حاجبينها:وعدنان وين شافه ؟
سمر:اوه ماقلت لك انا ! اليوم رجعت مع عدنان لان السواق تعبان ماقدر يرجعني للبيت
توليب:وليش ما كلمتيني انا اجيك ؟
سمر:شافني عدنان وحلف يوصلني البيت
توليب:امي ! انا افهم حركاتك هذي
سمر:طيب وش تبين ؟ بتحاسبيني ؟
توليب:لا ماراح احاسبك بس راح احذرك للمره الالف من طريقتك هذي
سمر:بتعطيني اسم المشتل والا لا ؟
سكتت توليب تناظر سمر وكملت سمر تاكل:دخل الحوش يوصلني للبيت وشاف الورد وعجبه
توليب:للحوش وصلك ؟
هزت راسها سمر:بتعبك لو تجيبين شتله بعطيها له بالدوام يحطها عند مكتبه
توليب:هو يروح ياخذ له شجره لو يبي
سمر:توليب تكفين عاونيني شوي الاقي نصيبي بهالدنيا تبغيني اعيش وحيده يعني ؟
توليب:مو بهالطريقه تعيشين ، اذا ماجاك لا تدورينه
سمر:ما بيجيني شي لين عندي لازم اسعى عشان يجيني اللي ابيه
سكتت توليب واخذت نفس سمر:تجيبينها لي بكره ؟
هزت راسها توليب وسكتت تناظر سمر اللي تاكل مبتسمه
دق جوال توليب واخذته تناظر الرقم الغريب وردت:هلا
ابتسم وهو يمشي بالحوش وحك شعره:توليب ؟
توليب عقدت حاجبينه:اي
رفعت عيونها سمر وهي تاكل وجلس:شلونك ؟
توليب:مين معي ؟
يوسف:يوسف
عقدت حجاجها بغرابه:مين يوسف ؟
رفعت راسها سمر تناظر توليب ورجعت ظهرها للخلف بهدوء تتوقف عن الاكل
يوسف عض شفته:أخوك
سكتت توليب تناظر امها وكمل يوسف:اعذريني دقيت بهذا الوقت بس لاني اخذت رقمك من ابوي وترددت اتصل عليك خفت ما تتقبلين اتصالي رغم اني اتصلت عشان اطمن عليك وشـ
ابتسمت بهدوء توليب:اهلين يوسف كيف حالك ؟
ابتسم يوسف:الحمدلله انتي كيف حالك؟
توليب وقفت:الحمدلله بخير
يوسف:كيف الدنيا معاك ؟ ادري مقصر معك بس تعرفين الظروف بيننا كيف
توليب:لا عادي عارفه كل شي
ابتسم يوسف:دقيت عشان تسجلين رقمي عندك متى ما احتجتي شي انا موجود ، اخوك
رفعت حاجبينها بغرابه توليب من كلمة اخوك وشعورها وهزت راسها:ماقصرت يوسف شكراً لإتصالك
يوسف:ماسويت شي
قفلت وناظرت سمر اللي رفعت حاجب:يوسف من ؟ لا يكون ولد العقربه !
توليب:ولد ابوي ، اخوي
ضحكت سمر وشربت من كاستها:اخوك اجل
توليب:دق يطمن علي فيه الخير
سمر:كم عمرك توليب ؟ الحين يدق ؟
توليب:والله انا افهم تأخيره اصلاً وبالعكس مبسوطه بإتصاله
سمر:لا تقربين منهم احسن لك ما يجي منهم غير عوار الراس
توليب ماردت عليها ومشت تتركها ودخلت الغرفه
'
خرج من غرفته متوضي ومشى بيلحق الصلاه بالمسجد ونزل وخرج وناظر سيارة خالته والبنات اللي بيركبون ولفت حنان وابتسمت:صح النوم
تقدم عسّاف وناظر البندري اللي تناظره وناظر حنان:سهرتم هنا ؟
حنان:اي والله اخذنا الوقت للفجر
عسّاف هز راسه:بلحق الصلاه دربكم خَضر
مشى من عندهم ولفت البندري تناظره يفتح سيارته ويركب وركبت حنان:هذي سياره جديده ؟
أريام:اي
حنان:ماشاء الله هالولد الفلوس تحبه مدري وش يسوي بعمره
أريام:زي مو شايفه وش يسوي ، رايح يصلي
صدت البندري تراقبه يحرك سيارته ولف عسّاف يناظر سيارتهم ومشى لطريقه
وقف عند المسجد ونزل من سيارته ودخل وناظر الصف الأول على وشك يكتمل ووقف معهم وابتسم لأنه لحق الصف
رفع كفينه يكبر من أقام الإمام وصلّى ، سلم بعد انتهائه ولف يناظر المسجد بهدوء وهمس:يالله التوفيق من عندك
اخذ نفس وقام وخرج من المسجد ركب سيارته وشغلها وحرك
لف يناظر شروق الشمس كان خروجه بعد الصلاه مباشره قبل الضجيج ووقت الازدحام وهذا أكثر وقت يحبه
وقف عند المشتل ونزل ودخل ناظر عم لطفي يفتح رشاشات المويه وابتسم له:صباح الخير ياباش مهندس
ابتسم عسّاف وحط مفتاحه بجيبه:صباح النور على اهل الخير ، في فطور والا اطيح بين الورد ؟
ضحك العم لطفي:لا ازاي اكيد في ، مش عايزينك تطيح ما نلائيش دبل تي تنقزك
ضحك عسّاف ودخل وجلس على الكرسي ودخل العم لطفي للمطبخ الصغير وطلع جواله عسّاف يرد على رسايله وحط الشاهي العم لطفي وجلس:الشاي سخن ، بسم الله
حط جواله بحضنه وبدأ ياكل مع العم لطفي
العم لطفي وهو ياكل:بئولك ياباشا امتى حتتقوز ؟
عسّاف:يالله صباح خير من هالفجر ، امي ما صبحت علي كذا ياعم لطفي
العم لطفي:عايز افرح فيك بئى اي ده ياعمي مش عايزنا نفرح ؟
عسّاف:افرح افرح ياعمي انت بس اللي افرح بس لا تفرح فيني
العم لطفي:خد بالك تتقوز بت خالتك دي ده انا مش راضي
عسّاف شرب من الشاهي:لا مشروع مستحيل يصير
العم لطفي:الحمدلله دي الوئت بئى عايزين ندور على دبل تي ، هاه عاقباك ؟
ضحك عسّاف:دبل تي هذي اشغلتك انت ودك فيها ؟ اخطبها لك ؟
العم لطفي:انا ؟ انت عارف كم عمري ؟ لا دي البت زي الورده عايزه واحد يبئى شبهك كده راقل اسم الله عليه حلو وحنيّن ورقل أعمال يشتغل بكل حاقه
عسّاف هز راسه وهو مبتسم وياكل ورفع راسه العم لطفي يناظر باب المشتل من مكانهم:دبل تي بحد زاتها
لف عسّاف ونزل لقمته من ناظرها داخله ولف العم لطفي يضرب ذراع عسّاف:ايوه ياعمي اليوم يومك
لف عسّاف يشرب الشاهي ويناظر توليب اللي تناظر الزرع ووقف يحط الشاهي ومشى يخرج وابتسم العم لطفي من مكانه يناظره
ناظرت الورد توليب بتمعن تختار شتله مناسبه لمكان صغير بالمكتب تناسب عدنان
انحنت عند التوليب وابتسمت ترفع شعرها خلف اذنها وتناظره ورفعت اصابعها تلمس اوراقه
ولفت من نطق من خلفها:توليب
ناظرته بجمود وخوف من اسمها اللي نطقه وناظرها عسّاف ودخل يده بجيبه وتقدم لها وناظر الورد:توليب اسم هالورد
لفت تناظر الورد تفهم انه يقصد وجودها عند التوليب وبلعت ريقها ووقفت بربكه تناظر الورد وهزت راسها:اعرفه
ناظرها عسّاف ينتبه لصوتها الدافي الناعم المهموس اللي قريب للهمس وعقد حاجبينه:تبينه ؟
لفت تناظر التوليب بتوتر وهزت راسها بالنفي:ابي شي يعيش
عسّاف سكت ثواني يناظرها تناظره وهز راسه عسّاف ولف للورد:كل الورد يعيش
لف يناظرها:بس بالاهتمام
سكتت تناظره توليب وانحنى عسّاف يلمس التوليب:حتى ورد المواسم اللي يعيش بفتره قصيره ، يعيش عمر طويل اذا اهتميتي فيه
مسكت كفوفها ببعض تناظره عند الورد ولف عليها:يعني على حسب اهتمامك بعطيك الورد اللي تبينه
هزت راسها بالنفي:مو لي
هز راسه ووقف:فهمت ، هديه يعني ؟
هزت راسها بالايجاب ولف عسّاف يناظر الورد:الجوري يناسب الهدايا ، يعيش ودلالته تناسب الودّ
لف عليها يناظرها:بس التوليب أغلى وأشوفه يستاهل شخص يستاهله
سكتت تناظره ولف عسّاف للعم لطفي اللي واقف من بعيد يناظرهم:تعال ياعم لطفي
مشى لهم وابتسمت له توليب من نطق:صباح الخير على احلى دبل تي
ضحكت توليب بخفه وابتعدت خطوات بخجل
ولف العم لطفي يناظر عسّاف اللي نطق:نبي هديه جوري حلوه
العم لطفي:احلى جوري لأحلى دبل تي
ابتسمت توليب ولف العم لطفي عليها:لا مؤاخزه بس اش معنى دبل تي ؟ من امبارح مش فاهم خالص
توليب سكتت ثواني وناظرت العم لطفي:اول حرف من اسمي واسم ابوي
رفع حاجبينه بذهول العم لطفي:الله اي المعنى القميل ده !
ابتسمت توليب ومشى بيروح العم لطفي ولف عليها:لا مؤاخزه
ضحك عسّاف يناظره وابتسمت توليب وكمل العم لطفي:اسمك ايه ؟
رفع عيونه عسّاف يناظر توليب اللي مبتسمه وهمست:توليب
تلاشت ابتسامة عسّاف بذهول من اسمها اللي ما توقعه ابد ولف العم لطفي بصدمه على عسّاف:البت ورده ياباش مهندس
رفعت عيونها توليب على عسّاف اللي يناظرها ولف العم لطفي:والله انا ئلت دي فيها حته من الورد اللطيف طلعتي انتي زيهم ورده ؟
ابتسمت توليب بخجل تصد بعيونها للمشتل وابتسم العم لطفي:عايزاني اندهلك بتوليب والا دبل تي ؟
ضحكت بخفوت توليب:اللي عايزه
ضحك العم لطفي من قلدته باللهجه:الله ده انتي خفيفة دم والله ، حدلعك النهارده بالورد
مشى العم لطفي يدخل ولفت توليب تناظر عسّاف اللي واقف وصدت للورد تمشي حوالينه وتناظره
وخرج العم لطفي يرفع صوته:تعالي يادبل تي حنضيفك تعالي
مشت توليب بهدوء ودخلت داخل وابتسمت تشوف العم لطفي يصب لها شاهي:عسّاف دايم بيئول حياك الله وانا بئولك النهارده حياك الله
ابتسمت توليب تحضن الشاهي بكفوفها الثنتين ودخل عسّاف ومشى يجلس
العم لطفي طلع احواض الورد:بتشتغلي ايه يادبل تي ؟
اخذت نفس توليب تناظر العم لطفي:حالياً ولاشي
لف العم لطفي:وليه ؟
توليب:تعطل شغلي واضطريت اوقف
العم لطفي:ليه لا سمح الله ؟ حصل حاقه يعني ؟
توليب رفعت كتفها وابتسمت تخفي السبب اللي تستحي تقوله وهو الديون
وناظرها عسّاف وهز راسه العم لطفي:والله ما فهمتش بس شغلتك ايه ؟
توليب:كان عندي موقع الكتروني
العم لطفي التفت عليها بكامل جسمه:انتي بتتكلمي ئليل يابت ، احكي لي اسمعك
ابتسمت توليب بتوتر:كنت ابيع منتجات عنايه سكرب وبودي لوشن واشياء كذا
العم لطفي:الله دي حاقه قميله اوي ، وليه وئفتي ؟ كنت حكون زبونك
توليب ناظرت الشاهي ورجعت ناظرت العم لطفي:يحتاج فلوس
رجع ظهره للخلف عسّاف يناظرها ويلمس طرف شاربه ونطق العم لطفي يحط التربه بالحوض الصغير:كل حاقه بفلوس ، طب ما تأخدي من أبوك والا أمك
توليب هزت راسها بالنفي ولف العم لطفي:انا مش فاهم عليكي بس حاسس انك بتخبي حاقه
توليب لفت تناظر عسّاف اللي جالس وفهم عسّاف ربكتها بوجوده ولف العم لطفي يناظر عسّاف ووقف عسّاف ومشى يخرج من عندهم ونزلت عيونها توليب للشاهي
العم لطفي همس:انتي كنتي مكسوفه عشان الباش مهندس ؟
ابتسمت توليب بربكه وعضت شفتها:ما أتكلم كثير مع أغراب
العم لطفي:انا مش غريب احكي لي اسمعك
تنهدت توليب وناظرت العم لطفي:والله ياعمو لطفي قفلته عشان الديون ، فتحته بعقود على اساس اسدد بالربح بس الربح ما غطى شي واضطريت اوقف شغلي لين اسدد ديوني
العم لطفي التفت عليها وعقد حجاجه بحنيّه:يانهار أبيض ما بتطلبيش من أهلك يساعدوك ليه ؟
توليب:لأن أنا فتحته بنفسي وانا بقفله بنفسي
العم لطفي:ايوه اعتدمي على نفسك بس دي ديون وانتي صغيره اوي على الديون
توليب ابتسمت:بتنحل ان شاء الله
العم لطفي:ابئي طمنيني
هزت راسها توليب ووقفت تحط الشاهي وتاخذ الشتله وتقدم منها العم لطفي وهمس:بس حطي ببالك الواد عسّاف ده سُكر محلي محطوط على كريمه
ابتسمت توليب وكمل العم لطفي:يعني بأي وئت تعالي عندي وما تئليش من وقوده
هزت راسها توليب وابتسم العم لطفي:والله ارتحت لك يابت يادبل تي
ضحكت توليب:شكراً عمو لطفي
العم لطفي:دي خليها هديه مني انا
ابتسمت توليب:بس لازم ارد الهديه
العم لطفي:مش مشكله ابئي رديها بوئت تاني
هزت راسها توليب ومشت تخرج وناظرت عسّاف اللي يكلم بعيد عنهم ومشت تخرج
ابتسم العم لطفي وخرج يجري بثقل من عمره الكبير:عسّاف
لف عسّاف يأشر له ينتظر وهو يكلم ووقف عنده العم لطفي:ائفله عايزاك
لف عسّاف وعقد حجاجه وهو يكلم واشر له ينتظر
وتأفف العم لطفي وهز راسه عسّاف:تمام بعد الظهر أشوف
قفل جواله وناظر العم لطفي:خير
العم لطفي:والله كل خير البت دبل تي انا عرفت ليه وئفت شغلها
عسّاف:هي ما تكلمت بوجودي لانها ماتبيني اعرف تجي تعلمني انت ليش ؟
العم لطفي:عشان تساعدها
عسّاف عقد حجاجه ونطق العم لطفي:البت عليها ديون عايزه تسددها وبتشتغل شغل كويس بس مافيش حد يدعمها وده واضح ، بئول ايه ما تيقي تساعدها وتخش معاها شراكه النص بالنص يعني
عسّاف:انت متى امداك تخطط وتحل ؟
العم لطفي:دماغي شغال اربعه وعشرين ساعه
عسّاف:وقررت اساعدها وانا ما اعرف شغلها ولا اعرفها عشانها عجبتك
العم لطفي عقد حجاجه بحده:ما تعرفهاش ازاي ؟ دي اسمها توليب وعندها منتقات بتبيعها عايز تعرف ايه تاني
ضحك عسّاف:لا يكفي
العم لطفي:عشان خاطري كلمها وشوف شغلها دي البت غلبانه وسكر والله سكر محلي محطوط على كريمه وبتناديني عمو
ابتسم عسّاف للعم لطفي:طيب ياكريمه انت بخلص شغلي ونتكلم معاك انت بعدين
العم لطفي:حتساعدها ؟
مشى عسّاف بخرج واشر له بيده وضحك يخرج
'
وقفت عند شغل أمها واخذت الشتله ونزلت من سيارتها ومشت تدخل الشركه ودخلت تناظر المكاتب وبيدها الورد وتقدمت تناظر صديقة أمها وابتسمت:هاي كيفك ؟
ابتسمت لها ووقفت:اهلين توليب اهلين نورتينا
توليب:شكراً ، بس ادور على ماما شفتيها؟
هزت راسها:بالمكتب هذا
مشت توليب ووقفت عند المكتب الزجاجي وناظرت امها جالسه على المكتب وقدامها رجال معطي توليب ظهره
وقفت ثواني تراقب ابتسامة امها وملامحها المفبركه اللي ترسمها وعقدت حاجبينها توليب بإنزعاج من وضع امها
ومشت تدخل ورفعت عيونها سمر:توليب ؟
لف عدنان وناظر توليب ووقف
ابتسمت سمر ووقفت ومشت لتوليب وسلمت عليها ولفت لعدنان:توليب
ابتسم عدنان وتقدم:ماشاء الله اللي يشوفكم يقول خوات
ضحكت سمر ولفت تناظرها توليب وتقدم عدنان:كيفك توليب ؟
هزت راسها بدون رد ولفت تتجاهل عدنان:جبت لك اللي طلبتيه
اخذت الشتله سمر وابتسمت:شكراً توته تعبتك
توليب هزت راسها بالنفي ولفت تناظر عدنان ومشت تخرج
تنهدت تمشي بخطوات سريعه وتخرج من المكان
ركبت سيارتها وعقدت حجاجها تتذكر عدنان وتلطف امها بجانبه
لفت لجوالها اللي يدق وناظرت اسم يوسف وسكنت ثواني تناظره وردت:الو
يوسف ابتسم وهو يسوق:صباح الخير متأخر شوي
ابتسمت توليب تشغل سيارتها:يمدي
ضحك يوسف:ان شاء الله مافطرتي لان ودي احد يشاركني فطوري
عقدت حاجبينها توليب وسكتت ثواني:افطرت والله من بدري
يوسف:طيب حلو لان وقت قهوه الحين ، تشربين؟
ابتسمت توليب بغرابه:اوكيه عادي
توليب:بختار كوفي وبرسل لك موقعه
توليب:تمام
قفلت من يوسف وناظرت طريقها وهي تسوق ودقايق وصلتها رساله من يوسف ومشت دربها للموقع
ووقفت عند الكوفي ونزلت
مشت بتوتر تدخل الكوفي هي نست شكله وما تذكره كثير وتعدي بهم سنين ما يتقابلون
بس دخلت الكوفي وناظرت الطاوله اللي فيها شخص واحد فقط ، وحيد لحاله على جواله
ووقفت محلها تراقبه من بعيد ورفع عيونه يوسف وناظر وقوفها ونظراتها ووقف وابتسم
مشت له بخطوات هاديه وابتسم من اقتربت:توليب ؟
هزت راسها تمسك بكفوفها شنطتها وتقدم لها وحضنها بهدوء:شلونك ؟
ابتعد عنها وابتسمت له:حمدلله
يوسف:حيّاك
جلست وجلس يوسف وناظرها وهو بشوش الوجه:تغيرتي مره عن اخر مره شفتك فيها
ضحكت بخفوت توليب وحطت شنطتها بجانبها:اخر مره شفتني كنت بالمتوسطه
ابتسم يوسف:صوتك كذا دايم والا مستحيه مني ؟
توليب ابتسمت:لا صوتي كذا
يوسف:طيب بتطلبين شي ؟
توليب اخذت نفس:عصير يكفي
يوسف هز راسه ولف يطلب له قهوه ولها عصير والتفت:عصير ايش ؟
توليب:رمان اذا في
لف يوسف بعد ما طلب وابتسم:تخرجتي من الجامعه ظنتي
هزت راسها توليب:لي سته شهور متخرجه
يوسف:اي نفس البندري اختي
ابتسمت توليب من قال اختي وكمل يوسف يضحك:اختنا يعني ، كان ودي يجون معي بس مشغولين
هزت راسها تسايره في تصريفته وكمل يوسف:وش كان تخصصك ؟
توليب:أدب فرنسي
يوسف:وش خططك بعد التخرج ؟
سكتت توليب تناظر العصير اللي انحط قدامها ورفعت كتفها وسكتت
يوسف:بدري يمديك تتوظفين بس ارتاحي شوي
ابتسمت له توليب تشرب من عصيرها وشرب قهوه يوسف ورجع ظهره لورا:اول ماقلت لابوي باخذ رقمك قالي اسلم عليك
هزت راسها بهدوء توليب وكمل يوسف:والمره الجايه نطلع كلنا مع البندري وأريام بعد
رفعت عيونها توليب تبتسم له وناظرها يوسف ثواني:ما تتكلمين كثير توليب ليه ؟
توليب ضحكت بخفوت:مو بس معاك يوسف انا كذا
يوسف ابتسم:وصوتك ناعم ورقيق استحي اتكلم معك
ضحكت توليب من شخصية يوسف وكلامه معها وابتسمت له:لا تستحي مني ، شكراً مره لانك كلمتني
يوسف:ابد انا موجود من الان وان احتجتي شي كلميني ، تبين شي حالياً ناقصك شي ؟
هزت راسها بالنفي توليب تتجاهل فكرة انها تبلغه بالديون اللي عليها
وبلل شفايفه يوسف:اعرف انك ما تطلبين من ابوي شي بس اذا ممكن يضايقك انك تطلبينه وتبين شي ؟ كلميني اخذ منه انا واعطيك بدون ما يدري
عقدت حجاجها وهزت راسها بالنفي:لا لا صدقني انا بخير
هز راسه يوسف وابتسم:حمدلله
'
تمشي مع دلع ورنا وأريام ونجود بالسوق ويشترون سوا
تدخل المحلات وتناظر الملابس ولفت لدلع:مين بيرجعنا ؟
دلع ناظرت الملابس:اكيد السواق
البندري:دلع عادي اطلب طلب
لفت دلع:شفيك ؟
البندري:كلمي عسّاف يرجعنا قولي اي شي له ، قولي السواق نايم تعطلت السياره اي شي
ضحكت دلع:مو صاحيه البندري اثقلي حياتي ، عيب هذا وانا اخته
البندري:بليز دلع انتي كبيره وبيسمع منك عسّاف
دلع ابتسمت:عشان اجمع طيور الحب بس
ابتسمت البندري بتوتر واخذت جوالها دلع ومشت بالسوق تتفرج:عسّاف
رد عليها وهو يسوق:هلا
دلع:وينك ؟
عسّاف:مشغول ليه ؟
دلع:بغيتك تجي تاخذني مع البنات في السوق
عقد حاجبينه عسّاف:ليه ؟
دلع:السواق مشغول مع امي وخالتي حنان
عسّاف:طيب كلمي رياض
دلع:رياض كلمته قال مشغول ، هيا عسّاف ملينا ننتظر احد يجينا
عسّاف:من معكم ؟
دلع لفت للبندري وابتسمت:بنات خالتي حنان
سكت عسّاف وهو يسوق وعقدت حجاجها دلع من سكوته:بتجي ؟
عسّاف:طيب
قفل من دلع وغير اتجاه طريقه وتنهد بضيق من الوضع ووقف عند السوق ينتظرهم وخرجوا
ناظر خواته مع بنات خالته وصد بعيونه وركبت دلع يمينه وركبوا بالخلف
رنا:تخيل عسّاف اول مره اركب سيارتك هذي !
عسّاف ابتسم:تباركت اليوم اجل
ضحكت رنا:يازينك قبل شوي كلمت رياض يسأل عنك يقول ليش ما يرد
عسّاف ناظر جواله واتصال رياض اخوه:كنت اسوق وش بغى ؟
لفت دلع تناظر الطريق وكملت رنا:ما ادري سأل قال وينكم قلت ننتظر عسّاف يجينا قال ليش ما كلمتوني وانا فاضي
لف عسّاف على دلع اللي ناظرته بسرعه ورجع ناظر الطريق
نجود:عسّاف تمر فينا ناخذ قهوه ؟
عسّاف:اذا وصلنا بنات خالتي
رفعت عيونها البندري تراقب عسّاف يسوق ولفت عليها أريام تناظرها وصدت
بلعت ريقها دلع ووقف عسّاف عند بيت خالته ونزل عيونه لجواله يفتحه وناظرته البندري ثواني ونزلت خلف أريام
لف عسّاف اول ما قفلوا الباب وناظر دلع:ليش تكذبين ؟
لفوا رنا ونجود على عسّاف وبلعت ريقها دلع:بقولك بس لا تعصب
سكت عسّاف ونطقت دلع:البندري قالت تبي تشوفك وكلمتك
عسّاف:ومتى بتطلعون سوالف البندري من مخي انتم ؟ انا قلت امي كبيره بالعمر ولها خيالاتها واحلامها فيني وفي بنت اختها ، بس انتم وش تبون توصلون له ؟
دلع:عسّاف شدعوه البنت ماسوت شي بس تبي تشوفك وادري بخاطرك انت بـ
عسّاف:متى بعمري قلت ابي البندري والا ابي اشوفها ؟
رنا ناظرته وناظرت عصبيته:يعني وشو ماتبيها ؟
سكت عسّاف يتنفس وغمض عيونه ولف لدلع:اخر مره تسوين هالحركات تفهمين ؟
هزت راسها دلع تسكت وحرك السياره عسّاف وهو يستغفر
'
ركبت غايه بجانب توليب وناظرتها غايه:غريبه جيتي تاخذيني العاده تروحين بيتكم وترسلين لي اجيك
ابتسمت توليب:عندي سواليف ما تحملت
ابتسمت غايه بحماس:امانه ، قولي بسرعه اسمعك
توليب حركت:لا نوصل البيت واسوي لك الذ عصير من يديني الثنتين ونجلس عند زروعاتي الحلوات نسولف
غايه:يالله حركاتك ياتوليب ماعمرك قلتي سالفه بدون تجهيزات
ضحكت توليب تسوق ووقفت عند البيت ونزلت معاها غايه
فتحت باب البيت توليب ودخلوا
غايه:خاله سمر موجوده ؟
توليب:مداومه ماترجع الحين
غايه اخذت نفس تدخل غرفة توليب:اعشق ريحة غرفتك تعرفين ؟ دايم احس ريحتك فيها
ابتسمت توليب وفصخت عبايتها:اجلسي عند الشباك جايه
جلست غايه عند الكراسي اللي عند الشباك وفتحت الشباك تشوف الزرع اللي زارعته توليب
ودخلت المطبخ توليب وربطت شعرها وخرجت الفواكه من الثلاجه
غسلتها تقطعها وتحطها بالخلاط وصبت بكاستين ومشت لغايه وقفلت الباب برجلها:سلمك الله اليوم طلعت افطر مع شخص تتوقعين مين
جلست توليب وناظرتها غايه تاخذ العصير:فطرتي مع شخص غيري ؟ اكيد امك ماتعرفين احد اكثر منا
ضحكت توليب تشرب من عصيرها:يوسف
شهقت غايه:مين هذا ؟ خطيب جديد ؟
توليب:اخوي يوسف غايه شفيك ؟
عقدت حجاجها غايه:اخوك يوسف ؟ شخباري هذا من وين طلع
رفعت كتفها توليب ولفت تناظر الزرع:ما اعرف بس كلمني عشان يشوفني
غايه:اي وش طلع يبي ؟
توليب ابتسمت:يطمن علي تخيلي
غايه:عشتوا ، يطمن عليك الحين ؟
توليب:صراحه غايه كان مره حبوب وبشوش وضحك معاي وسولف معاي وكان وده يكونون موجودين خواته بس اتوقع رافضين الفكره
غايه:من زينهم عاد بنات العقربه
توليب:لا تصيرين نفس امي تفتحين لي دفاتر مقفله ، حكيتك عشان تعرفين ان يوسف يكلمني ويتواصل معاي
غايه:طيب ابوك ما جاك معاه ؟
هزت راسها بالنفي توليب وهي تشرب عصير ورفعت حاجبها غايه:حسافه كان طلبتيه فلوس
توليب:حتى لو كان موجود ما بطلبه
غايه:اوف يالعناد مين يسدد ديونك يعني ؟
توليب ناظرت غايه:هذا الموضوع الثاني اللي بكلمك فيه
غايه:وش صار ؟
توليب ناظرت الورد:تعرفين اللي اخذت من عندهم شتلات الورد ؟
غايه هزت راسها وابتسمت تناظر الورد:العم لطفي
غايه:اي شفيه تكلمي
توليب لفت عليها:سولفت معاه عن شغلي كان منصت لكلامي وجرب يعطيني حلول
غايه:اكيد قالك خذي من ابوك
هزت راسها توليب:بس افكر اشتغل بالمشتل معاه
غايه؛نعم ؟ تخرجتي ادب فرنسي وتشتغلين بمشتل ؟ صاحيه انتي توليب ؟ تعدمين يدك وبشرتك من التراب هذا اللي بتزرعينه
توليب؛مافي مكان ثاني برتاح واشتغل فيه
غايه:وكم سنه بتقعدين تحفرين في هالورد عشان تسددين ؟
توليب سكتت تناظر الورد والزرع وتنهدت غايه:توليب افهم شتاتك وضياعك بس هذا مو حل ، اكيد في حل افضل
توليب ماردت عليها ساكته بهدءو وتفكر
وشربت من عصيرها غايه:اطلبي يوسف دامه مهتم
لفت توليب تناظر غايه اللي تشرب عصيرها وتناظرها
سكتت توليب تفكر بتردد وحضنت كاسة العصير بيدينها الثنتين
'
نزل من سيارته عسّاف وناظر رياض نازل من سيارته:هلا ابو عبدالمحسن
ابتسم رياض:وينك انت ؟
نزلوا البنات من السياره وناظرهم رياض:مشوار عائلي بس انا ماني موجود ؟ وش هالخيانه
دخلت دلع البيت وناظرتهم نجود:مو مشوار عائلي كانوا معنا بنات خالتي حنان
هز راسه رياض وناظر عسّاف اللي ناظر دلع وابتسمت رنا تشرب من قهوتها:انت لك نصيب بالليل تطلعنا نسهر
رياض:تعرفين ان عسّاف ما يسهر بعد ٩
ضحكت رنا تهز راسها وابتسم عسّاف:النوم زين نامي
رنا:النوم ملل بس محد بيقتنع
رفع حاجبه رياض وضحك ودخلت نجود مع رنا ولف عسّاف لرياض:وش بغيت اتصلت ؟
رياض:ابوي عطاني اسم لواحد شرّاي قلت اسألك لانك تعرف رجال سوق العمل
عسّاف ابتسم:زين انك تسولف بعيد عن اي احد
رياض ضحك:ماتبيهم يعرفون انك رجل أعمال ياولد عبدالمحسن ؟ ترا مابقي احد ماعرف انت بس اللي ماتعرف
ضحك عسّاف يعض شفته:رجل أعمال كبيره ترا
رياض:والله رجل أعمال تعرف بالعقار وتعرف بالاسهم وتعرف بالشراكه وش باقي ماجربت ؟ باقي تبيع سيارات
ابتسم عسّاف وسكت ورفع حاجبه رياض:احلف انك دخلت سوق السيارات ؟
عسّاف ضحك وصد:اخلص علمني منهو اللي بيشتري
رياض:من يقدر عليك انت ؟
عسّاف:خلصني رياض بدخل انام
رياض:عدنان خالد
رفع حاجبه عسّاف:ما اعرفه
رياض:غريب المهم يبي يشتري بيت من عند عمي تركي وقالي اسأل عنه وشوف قلت اسألك
عسّاف:وليه ابوي يسأل دامه شرّاي ماهو مستاجر ؟ يبيعه لو على يهودي وش يهمه
رياض:مدري عن ابوي يقول عشان الجيره ومدري وش
عسّاف:ابوي حريص زياده على اللزوم
رياض دق جواله واخذه ومشى عسّاف:انا داخل
مشى عسّاف يدخل البيت وناظره رياض لين دخل ورد على جواله وابتسم:هلا
نجمه:فاضي ؟
رياض فتح سيارته:افضى لك
دخل وقفل الباب واخذ نفس:اتصلت عليك من الصبح مارديتي
نجمه:اي كنت نايمه
رياض:امس الليل كله نايمه توقعت تصحين بدري
نجمه:مافهمت رياض بتحاسبني على يومي ؟
عقد حجاجه رياض:احاسبك ليه ؟ انا اسولف بس
نجمه هزت راسها:طيب بس دقيت عشان تطمن علي مافطرت ولا شي
رياض ناظر الساعه تشير لـ ٧ المغرب ورفع حاجبه:طيب انتظر اتصالك
قفلت نجمه وناظر الجوال رياض وتنهد ونزل وقفل سيارته ودخل البيت
-
( لا تنسون النجمه 🌟 )
