خرج عسّاف من الحمام وهو ينشف شعره واخذ جواله اللي يدق وناظر الاسم ورد:الو ياكريمه
العم لطفي:ماقانيش نوم
عسّاف هز راسه وجلس:وليه ياعم لطفي بس ؟ اسمع لك ام كلثوم تنام وترتاح وتطمن
العم لطفي:لأ اللي فيني ما تئدرش عليه ام كلثوم
عسّاف:قول ياعمي قول
العم لطفي:عايزك تكلم البت الغلبانه دبل تي وتساعدها
عسّاف غمض عيونه بتعب ونعاس:اي بنت ؟
العم لطفي:توليب انت نسيت والا ايه ؟
عسّاف:نعسان ياعم لطفي اترك كل شي للصبح نتكلمه مع فنجان شاهي من يديك
العم لطفي:مش عايز انام لحد ما تئولي تساعدها والا هاه ، اسيب ينبع واهرب لمصر خلاص
عسّاف:لا الا مصر ياعمي خلاص الصبح اشوف موضوعها
العم لطفي:تساعدها ؟
عسّاف:اساعدها ولا يهمك بس نام واطمن
العم لطفي:دي الوئت ائدر انام
عسّاف ضحك وقفل جواله بتعب وانسدح على سريره الكبير وبلحاف سميك وعدة مخدات وغمض عيونه ينام على طول من طول يومه من الصبح لـ ٨ العشاء ، وقت منتظم وجدول مرتب بعيد عن السهر ، جسد صحي وبال صافي وراحه داخليه بأول صفوف المصلين مبتعد عن سفاسف الدنيا ومشاكلها ومنشغل في صحته وصلاته وشغله
فتح الباب رياض وناظر عسّاف نايم وخرج ومشى لاهله بالصاله:نام
هيله:توقعت والله ما يبطي عن تسع
عبدالمحسن:متى اقابله يعني ؟ لو بغيت منه شي ارفع له برقيه عشان نشوفه ؟
هيله:الولد يصحى من قبل اذان الصبح انت اللي نومك مخربط
عبدالمحسن ناظر رياض:طيب وش قال لك ؟ ما يعرف هذا عدنان ؟
رياض هز راسه بالنفي:لا والله بس ابوي شتبي فيه دامه شرّاي خله يشتري من عمي مو لازم تطلع له برنت كامل
عبدالمحسن:بشوفه انا بعدين
رياض:طيب دامكم موجودين انت وامي ابي افتح معكم موضوع
هيله:اللهم اجعله خير
ابتسم رياض:خير خير ان شاء الله
عبدالمحسن:وش عندك ؟
رياض:ابي اتزوج
ابتسمت هيله ورفعت حاجبها بذهول وكمل رياض:واخترت البنت وعاجبتني وابي تخطبونها لي
عبدالمحسن:من بنته ؟
رياض اخذ نفس:البنت مو من ينبع البنت من المدينه
عبدالمحسن عقد حجاجه:وش عرفك فيها ؟
رياض:عرفتها وعرفتني وابيها
هيله:نطق مشوار للمدينه واحنا ما نعرفهم ؟
رياض:انا اعرفها امي ويكفي اني اعرفها
هيله:وش اصلها وش فصلها وكيف اهلها وكيف عيشتهم ؟
عبدالمحسن:عطني اسم ابو البنت اشوف العلم وبعدين نقرر
هز راسه رياض ووقف وخرج من عندهم ودخل غرفته وابتسم يدق عليها
ردت:اهلين رياض
رياض ابتسم:في خبر حلو تبين تسمعينه ؟
نجمه هزت راسها:اكيد
رياض مسك جبينه بتوتر وبدون تصديق:فاتحت امي وابوي بموضوع الخطبه واني ابيك
سكتت نجمه بصدمه وكمل رياض:وتجرأت اخيراً اتكلم معهم
نجمه:رياض انت وش سويت ؟
رياض:وش سويت ؟ فاتحت اهلي بالخطبه مابي يطول موضوعنا اكثر يكفي سنتين من عمري معك
نجمه:بس انا قلت لك مو مستعده للزواج بهذا الوقت
رياض عقد حجاجه:وش تنتظرين ؟ تراني كبرت ومستقر من سنين بس كنت انتظرك والحين الوقت المناسب ليه لا ؟
نجمه:يناسبك انت انا ما يناسبني
رياض:وشو يعني الحين ما تبين ؟
نجمه تنهدت بتعب:رياض انا متوتره حالياً واعصابي تالفه عطني وقت ارتاح واكلمك متى ماقدرت اكلمك
سكت رياض وقفلت جوالها نجمه وناظر اسمها رياض وتنهد بتعب
'
يفطر ويسمع العم لطفي اللي سرد له القصه مليون مره بمحاوله انه يقتنع ويساعد توليب
رفع عيونه عسّاف:انت وكلتك محامي البنت وانا مدري ؟
العم لطفي:ده تسخير من ربنا عشان نساعدها ، انت ليه مش عايز تساعد وتشتغل زي ما تشتغل مع كتير ، ده انت تعرف السعوديه كلها
عسّاف:انا اشتغل مع ناس معروفه وادخل شراكه بدون خوف مع محامي يوثق كل عقد وورقه ، تبي تطيحني مع وحده جات شرت ورد من عندنا ليه ؟
العم لطفي:لانها غلبانه
عسّاف:وانا مجبور اساعد كل الغلبانين ؟
العم لطفي:طيب كلمها انت شوف شغلانتها وبعدها ازا مش عايز حبطل اتكلم
عسّاف ناظر العم لطفي:اخذ زيقاره برا واصفي ذهني واشوف
وقف عسّاف وخرج برا يشرب من فنجان الشاهي اللي بيده ومشى بالمشتل وهو يدخن وساهي يفكر
ناظر خطواته بشرود ذهن ومسح دقنه باصابعه يغرق بتفكيره ورمى الزيقاره ودعسها وطلع جواله
ناظر رقم الواتس اب اللي كلمتهم عليه للمشتل وفكر دقايق وهو يطالع في الرقم وطلع جواله الثاني ينقل الرقم ويتصل عليها
لفت تسمع جوالها يدق ولفت للورد اللي تسقيه وحطت الدلو ونفضت يدها ومشت تدخل غرفتها
اخذت الجوال وناظرت الرقم الغريب وتأففت:اوف لا تكونون الديّانه تكفون
تنهدت وردت بتوتر:اهلاً
عسّاف سكت ثواني من سمع نبرة صوتها الناعمه الهاديه ونطق:انتي توليب ؟
بلعت ريقها من سمعت خشونة صوت الرجل اللي يكلمها:اي انا ، انتوا شركة التصدير ؟
عسّاف ناظر الورد بالمشتل وهز راسه:لا
توليب جلست على السرير:شركة التصميم ؟
عسّاف:لا
توليب:اذا شركة التسويق راح تجيكم دفعه من الدين بالوقت اللي حددناه سوا
سكت عسّاف يسمعها وكملت توليب:بس بالوقت اللي حددناه
عسّاف:أنا عسّاف
سكتت وعقدت حجاجها وكمل عسّاف ما يترك لها مجال للتفكير:صاحب المشتل اللي تشترين منه ورد ، اللي يشتغل فيه العم لطفي
هزت راسها بحيره:اوكيه !
عسّاف:دقيت عليك لان العم لطفي طلب مني اساعدك بموضوع الديون
غمضت عيونها توليب بإحراج وكمل عسّاف:اذا عندك وقت بعد الظهر برسل لك موقع مكتب ونتكلم فيه
توليب همست:مو محتاجه مساعده
عسّاف رفع حاجبه يناظر العم لطفي اللي تقدم له:مو محتاجه مساعده ؟
بقق عيونه العم لطفي وركض له:ازاي ؟ لا دي محتاقه مساعده
سكتت توليب تسمع العم لطفي ونطق عسّاف:انا مستعد اشوف موضوعك واخذ من وقتي عشانك ، بس اذا ودك انتي
بلعت ريقها توليب تفكر وطال سكوتها وهز راسه عسّاف:يصير اذا ودك تجيني على الموعد ، سلام عليكم
قفل عسّاف وناظره العم لطفي:هاه !
عسّاف:ماتبي البنت ليه تنشبني معها ؟
العم لطفي:هيه ئالت كده عشانها بتستحي ياحرام
عسّاف:انا ماعندي وقت ياعم لطفي عطيتها موعد جات كان بها ماجات الله معها ما بترجاها اساعدها
العم لطفي:لا لا ان شاء الله تيقي انا عارف
هز راسه عسّاف:طيب سلام عليكم
مشى تارك العم لطفي وخرج من المشتل يركب سيارته
'
قفلت توليب تناظر جوالها ولفت تناظر الفراغ ، هي تتقبل اي احد غريب يساعدها بس ابوها لا
وقفت ومسكت خصرها بيدينها:طيب توليب وش بتسوين ؟
عضت شفايفها تفكر ولفت تفتح دولابها وتغير ملابسها وطلعت عبايتها ولبست واخذت شنطتها وخرجت وهي تشوف الساعه ١١:٣٠ ص
ركبت سيارتها وشغلتها تربط حزامها وهي بكل ما تعنيه الكلمه تهوجس ، شاردة ذهن ما يستحضر عقلها غير الفرصه اللي تقدمت لها
حركت سيارتها تتبع الموقع ووصلت تناظر المبنى متعدد الطوابق ووقفت بالمواقف ونزلت تدخل
تقدمت للسكيورتي اللي عند المصاعد:ابي مكتب عسّاف
السكيورتي:عسّاف عبدالمحسن ؟
سكتت تجهل اسمه كامل وكمل السكيورتي:ماعنده مكتب هنا بس مكتب رياض اخوه
عقدت حجاجها بعدم فهم:يعني وين اقدر اشوفه ؟
السكيورتي:هو موجود بمكتب رياض بالدور السابع
هزت راسها ومشت تركب المصعد وطلعت تشوف عداد الارقام وخرجت تناظر المكاتب ومشت بهدوء تناظر الموظفين والمكاتب الزجاجيه اللي بالمبنى
وتقدمت للموظفه:مكتب رياض
اشرت لها الموظفه ولفت توليب تشوف نظرها للمكتب وتشوف عسّاف جالس ويتكلم مع رياض
تقدمت تناظرهم ورفعت ساعتها تشوف الوقت وماقدرت تدخل لانها سبقت وقت موعدهم
وظلت واقفه وماسكه شنطتها وتناظر المبنى
رفع عيونه عسّاف يناظرها وسكت ينتظر جيّتها لكنها واقفه تنتبه لساعتها ورفع ساعته يشوف الساعه ١١:٥٠
لف رياض:ياعسّاف بطبع لك العقد وخذه انت وبخلي نسخه عندي ، بس خلاص حطيت لك الشروط
لف عسّاف عليه وهز راسه ووقف:دقايق وأجيك
مشى ولفت توليب بإنتباه من شافته يخرج من المكتب ووقفت بإعتدال ومشى عسّاف لها:ليش واقفه ؟
توليب ناظرت رياض اللي بالمكتب يناظرهم ورجعت ناظرت عسّاف:موعدنا ١٢
عسّاف سكت وهز راسه:حيّاك الله
مشى ومشت خلفه تدخل المكتب ورفع عيونه رياض يناظر توليب ومشت بتوتر وجلس عسّاف
وناظرها رياض:هلا تفضلي حيّاك
جلست تشوف اسم رياض على المكتب ويسبقه اسم المحامي تعريف لوظيفته
عسّاف:وشو المنتج اللي تبيعينه ؟
توليب فتحت شنطتها وطلعت الايباد تفتحه وناظروها رياض وعسّاف ومدت الايباد لعسّاف واخذه
ناظر مشروعها وترخيص العمل والسجل التجاري ورفع عيونه:ليه طحتي بالديون ؟
توليب:كنت بسدد بالأرباح
هز راسه عسّاف ورجع ظهره للخلف رياض:وما وصلتك أرباح ؟
توليب ناظرت رياض:مو بالعدد الكافي
عسّاف ناظر مشروعها ونطق رياض:ولمين الديون ؟
توليب:لثلاث شركات
رفع حاجبينه رياض ونطق عسّاف:تسويق وتصدير وتصميم
لفت له من تذكرها وحط الايباد على المكتب وحك جبينه بتفكير:طيب انتي ودك تسددينها والا تكملين بشغلك ؟
ناظرته توليب تجهل اجابتها ونطق رياض:اذا تبين تتسدد بيختلف العرض والشروط والاتفاق
توليب لفت لرياض:واذا بكمل بشغلي ؟
رياض:بتشتغلون شراكه انتي وعسّاف
لفت لعسّاف اللي هز راسه:وانا ودي تكملين اسهل وعشان تطلعين فلوس
توليب:يعني تسدد الديون وانا اسددك ؟
رياض:شي زي كذا
توليب ناظرتهم بحيره ورفعت كتفها بعدم معرفه
ورجع ظهره للخلف عسّاف:دام شغلك نظامي ومشيتي تمام كملي
توليب:ماراح يتغير شي
عسّاف:لو ما شاركتك أنا ماكان تغير شي بس انا موجود الان
سكتت توليب تناظره وكمل عسّاف:وبيمشي المشروع بتسويق وأمور نظاميه أسهل
توليب:المقابل ؟
رياض ناظر الورق:المقابل ياطويلة العمر شراكه ٧٠٪ لعسّاف و ٣٠٪ لك
سكتت توليب وكمل رياض:ولو تبين تبيعين نصيبك بعد الشراكه تقدرين
توليب ناظرتهم وهز راسه عسّاف:الشغل نظامي بيطبع لك ورق رياض وخذيه لمحامي تعرفينه وبيشرح لك كل البنود والشروط واقريه وخذي وقتك بالتفكير ، اذا ودك توكلنا على الله ماودك قفلنا الموضوع هنا
مد الاوراق رياض لتوليب واخذته تناظره ونطق رياض:الله يوفقك
وقفت بربكه ومشت بالورق وشنطتها بيدها وخرجت بدون تنطق شي ومشت تطلع من المكان وتركب سيارتها
ناظرت الورق بحيره وجهل لكل شي قالوه وكتبوه وخافت ، خافت تجرب شي وتطيح بمصيبه او كارثه
جلست بسيارتها فتره وهي بالباركنق تفكر وتناظر الأوراق ، كاتبين شروط وبنود وبتوقيع وتحت إشراف شركة محاماه رياض عبدالمحسن
'
خرج من مكتب رياض ونزل من المبنى ومشى لسيارته واخذ جواله يقفل الاتصال ورفع عيونه من شاف سيارتها من بعيد رغم انه يجهل سيارتها الا انه لمحها داخلها تقرأ الاوراق
وقف محله ودخل جواله بجيبه يناظرها تقرأ ورفع ساعة ذراعه ، هي من وقت خروجها مرت نص ساعه وهي لا زالت بنفس المكان
تقدم بهدوء لسيارتها يفهم حيرتها ووقف عند شباكها ولفت وتغيرت ملامحها بذهول من تواجده وفتحت الشباك بعد ثواني من وقوفه ولفت تخفض صوت أنغام اللي كان يشدو بسيارتها
وناظرها عسّاف:وش يخوفك ؟
سكتت تناظر عسّاف تستغرب سؤاله واحساسه بشعورها ورفعت يدها تمسك الدركسون بتوتر وكمل عسّاف:هذا مكتب اخوي صحيح وهذا شغلي صحيح وانتي تجهليني وتجهلينه ، بس ما بقولك ثقي فيني لان اعرف ان الثقه ما بتجي بكلام بس بقولك لا تتركين الفرصه
ظلت تناظره توليب وكمل عسّاف:ولولا خاطر العم لطفي ما تعنيت بس قلت عشانه
لفت تناظر الأوراق توليب بدون تتكلم وحط كفه على باب سيارتها:موترك موقف غلط
لفت عليه ومشى عنها عسّاف وتوجه لسيارته
رفعت نظرها للمرايه تشوف انعكاسه وحطت الاوراق يمينها وقفلت شباكها وحركت سيارتها
دقت على غايه وهي تناظر طريقها وردت غايه:قولي توته
توليب:فاضيه غايه ؟
غايه:قولي قولي
توليب:المكان اللي انتي فيه قولي لي واجيك على طول ضروري
غايه عقدت حجاجها:فيك شي ؟ صار شي ؟
توليب:مافيني شي بس اي صار شي وغريب مره ابغاك تشرحينه
غايه:تمام تعالي لي البيت
توليب:اوكيه
قفلت جوالها توليب وتوجهت لبيت غايه ووقفت ونزلت
ابتسمت من استقبلتها ام غايه:هلا بتوليب وينك ما نشوفك ؟
توليب هزت كتفها:مقصره اعرف
ام غايه:المهم شوفتك لا تقطعين
هزت راسها توليب ومشت لغرفة غايه ودخلت
لفت غايه:بسرعه قولي بدون مقدمه
اخذت نفس توليب تجلس وحطت الورق:هذا اللي بيصير ، كلمني عسّاف
عقدت حجاجها غايه:عسّاف مين بعد لا يكون اخوك مع يوسف اللي طلع فجأه
توليب:صاحب المشتل اللي اخذت منهم ورد
سكتت غايه تحاول تتذكر وكملت توليب:اللي معاه سكر وعطيته عصيري
غايه:اها اي اي تذكرت ، شفيه طيب ؟
توليب:كلمني لان العم لطفي اللي بالمشتل قاله عن ديوني وقال بيساعدني
ابتسمت غايه بصدمه وكملت توليب:ناداني مكتب اخوه محامي وعنده شركة محاماه وعطوني اوراق مافهمت منها ولاشي
غايه غطت فمها وهي مبتسمه:توليب يحبك
توليب غمضت عيونها بإستفزاز من غايه وضحكت غايه:بيساعدك مافرط فيك ! تكفين خلينا نشوفه بحلل شخصيته
توليب:غايه الموضوع ما ينمزح فيه
غايه اخذت الاوراق:طيب بيساعدك كيف ؟
توليب:بياخذ حصه من مشروعي وحصته كبيره غايه وبيسدد كل الديون ونرجع نبدأ بالمشروع
غايه رفعت حاجبينها بذهول تقرأ البنود:وسيتم الإهتمام بالمشروع من ناحية التسويق المكثف
رفعت عيونها غايه:يالله كويس يفكني من تسويق التيك توك
توليب:بس انا ما وافقت باقي
غايه:وليش ؟
توليب رفعت كتفها بقلق:يعني ماراح يجيني ربح غايه راح يسدد وياخذ من الأرباح سداده ، وانا ؟ ومشروعي اللي احبه ؟
غايه:توليب بس بيسدد عنك ديون هذا اهم شي
توليب سكتت تناظر غايه ومسكت كفها غايه:وماراح يضيع مشروعك ولا راح تخسرينه بتشتغلين معاه لين تقدرين تشترين شراكته ويصير المشروع كامل لك
توليب مسكت راسها تصد وتفكر وناظرت الاوراق غايه:بس مافهمت هذا عسّاف وش شغله ؟
توليب:ولا انا عرفت بس صاحب المشتل
غايه:اكيد المشتل ما يدرّ ذهب مع الورد
توليب:ما اعرف شغله وسيارته اصدار جديد وماكان يهمه فلوس احس
غايه شهقت:توليب لا يكون يتاجر بشي حرام !
توليب:لا تخوفيني
غايه:لا لازم نراقبه واكشف عليه من نظرتي الثاقبه واحلل كل شي
توليب:نراقبه كيف ؟
غايه:بكره الصبح نلحقه نشوف تحركاته ونفهم كل شي انا واياك
توليب سكتت وهزت كتوفها غايه:انا سوبر هيرو ماراح اخليك تضيعين
ابتسمت توليب لغايه وضحكت غايه لها
'
دخلت البندري غرفة دلع ولفت دلع:وين قهوتي ؟
ابتسمت البندري تمد لها القهوه وجلست دلع تاخذها من يدين البندري
وفصخت عبايتها البندري تجلس:اي وش الاخبار ؟
دلع:نجود ورنا حاضرين مع امي عرس
البندري:ليش مارحتي ؟
دلع:مالي خلق اسئلة الناس
ضحكت البندري وناظرتها دلع من لفت عليها:عسّاف بالبيت ؟
دلع هزت راسها بالنفي:بس هذا وقته لازم ينام بدري
لفت البندري تناظر قهوتها ونطقت بتردد دلع:البندري صراحه صار شي وبقوله لك
لفت البندري تناظر دلع وبلعت ريقها دلع:شفتي يوم رجعنا مع عسّاف من السوق ؟
هزت راسها البندري ورفعت كتفها دلع:عرف انك انتي طلبتي
لفت بذهول البندري:ليش تعلمينه دلع ؟
دلع:كان باين اني اكذب ما قدرت اقول غير كذا
البندري توترت تناظر دلع وكملت دلع:وتوقعت ردة فعله عادي بس مره عصب عليّ
البندري:ليش ؟
دلع:مافهمت بس ما تقبل اللي صار
سكتت البندري وصدت وبلعت ريقها
دلع:تعرفين اني واضحه معاك دايم ومابي اخبي عليك شي واجاملك ، بس اظن ان عسّاف تغيرت خططه
لفت البندري تفهم دلع وكملت دلع:او كان معصب وقتها او زعلان منك مافهمت منه شي بس عسّاف عصب من طاريك
شدت على قبضة يدها البندري وهي تسمع دلع وارتبكت ووقفت تمشي للشباك من سمعت صوت سياره
طلت مع الشباك وناظرت سيارة عسّاف وناظرته ينزل من السياره ويدخل البيت
لفت لدلع تحاول ما تبكي من خوفها ووقفت دلع:لا يأثر عليك تكفين بس لا تتأملين دايم البندري مابي يصير شي ويعورك
البندري:وش يعورني دلع ؟ من يوم ولدت بالدنيا وبوجهي عسّاف وكل من شافنا قال انه نصيبي حتى لو ما تكلم بس كان يسكت ، امي وامك خوات وابوي وابوك اصحاب وش اللي يعورني ؟ علميني وش اللي بيعورني ؟
دلع همست:عسّاف نفسه
سكتت البندري وكملت دلع:تأكدي من مشاعره قبل يفوت الآوان
رجفت كفوف البندري تناظر دلع وتنهدت دلع تراقبها
-
وقفت بسيارتها غايه من فجر الله وهي لابسه نظارتها الشمسيه:هذا المشتل ؟
هزت راسها توليب اللي جنبها
غايه:هذي سيارته ؟
توليب:اي
غايه هزت راسها بإعجاب:سيارته شيك الصراحه
انتظروا قدام المشتل وفزت غايه من خرج ونطقت توليب:هذا هو
شهقت غايه وابتسمت ولفت لتوليب:ذوقك حلو يابنت
توليب:بخطبه انا ؟ غايه ركزي شوي فوكس
غايه شغلت سيارتها من ركب سيارته وحركت خلفه ومشوا الطريق كله لين وقف عند مبنى عظم وفيه عمال يشتغلون وعنده لوحه كبيره بإسم عسّاف عبدالمحسن
نزل عسّاف يدخل العماره ونطقت غايه:وش هالعماره ؟
توليب:يشتغل بعقار يعني ؟
غايه:اقعدي لا يشوفك بنزل اسأل عامل واجيك
هزت راسها توليب:بدون فضايح غايه تكفين
نزلت غايه ومشت تدخل وناظرت العامل اللي يشتغل:صديق تعال شوي
مشى لها وناظرت حوالينها:هذا حق مين ؟
عامل:في مكتوب برا
غايه:اي قريت هذا عسّاف شنو شغله ؟
العامل:ما يعرف بس هذا يسوي عماره كذا بعدين بيع
هزت راسها غايه:كم عماره يسوي انت ؟
العامل:يمكن ٥
غايه لفت تناظر العماره:ماشاء الله
مشت تخرج مبتسمه وجايبه العلم كله لتوليب وجمدت محلها من شافت عسّاف عند شباك توليب
بلعت ريقها توليب وفتحت الشباك وناظرها عسّاف:عسى خير ؟
توليب سكتت تصد عنه ولفت تناظر غايه اللي ركبت:اخوي بغيت اسأل العماره للبيع ؟
سكت عسّاف يناظر توليب اللي صاده وناظر غايه:لا والله
غايه:موفقين
قفلت الشباك غايه وابتعد عسّاف يناظر سيارتها الورديه اللي لمحها من لحظة خروجه من اللون المميز
ومشت غايه ولفت توليب:قلت لك بيبان
غايه:مافهم خلاص انتي لا تشكين اهم شي عرفنا شغله
توليب:وشو يبيع عماير ؟
هزت راسها غايه:يشتري اراضي يعمّر ويبيعها بعدين العامل يقول هذي خامس عماره يسوونها له
رفعت حاجبينها توليب تفكر ولفت غايه:خلاص كلميه وقولي انك وافقتي ووقعي
توليب لفت لغايه:غايه بياخذ ثلاث ارباع مشروعي مابقدر اسوي شي فيه
غايه:الا تقدرين بجي معاك للمحامي هذا اخوه ونتفاهم على شروطنا
توليب تنهدت تلف للطريق ونزلت عيونها من دق جوالها وردت:هلا
سمر ابتسمت تقفل باب البيت:وينك ؟
توليب:مع غايه
سمر:تعالي في سالفه بقولها لك
توليب:تمام راجعه انا اساساً
قفلت ولفت عليها غايه:مواضيع جديده من خالتي سمر ؟
توليب:قصة مسلسل تركي جديد
ضحكت غايه ووقفت عند بيت توليب ونزلت توليب ودخلت البيت
حطت شنطتها وناظرت سمر اللي جالسه ومبتسمه وهزت راسها:وشو الموضوع ؟
سمر:اجلسي
جلست توليب وحطت ذراعها تحت راسها تناظر سمر وابتسمت سمر:اليوم تكلمت مع عدنان
سكتت توليب تسمع سمر وكملت سمر:وقالي بكل وضوح يبغى يخطبني
لانت ملامح توليب تناظر سمر وضحكت سمر:ويبي يجلس معاك وتتعرفين عليه
جلست بإعتدال توليب:يخطبك ؟
هزت راسها سمر وجمد وجه توليب تناظر سمر بصدمه وابتسمت سمر:قلت لك هالمره لقيت اللي يقدرني ويصونني
سكتت توليب تناظر امها بذهول ولفت سمر لجوالها من جاتها رساله وصدت توليب بجمود وهي ساكته
ووقفت تاخذ شنطتها وتدخل الغرفه وتقفل الباب
انصدمت من التغير اللي صار بحياتها ومن دخول شخص جديد ما تعرفه ومن مجازفة سمر انها تتزوج بهذا العمر
جلست على السرير توليب ومسكت راسها ولفت لجوالها من جاتها رساله واخذتها تقرأ رسالة غايه:ارسلي لعسّاف بنروح سوا توقعين
قفلت جوالها تتراكم عليها كل مخاوفها وتشتت وتتعب من اختلاف روتينها وتدهور الوضع المستقر
مشت تفصخ عبايتها وتجلس قدام باب شباكها وتحضن رجلينها وتناظر الورد قدامها وياخذها تفكيرها
اخذت جوالها وناظرت اسم عسّاف وبلعت ريقها تكتب له:بكره الساعه ٩ نتقابل نوقع العقد
طلع جواله يناظر اسمها على شاشة جواله وأول رساله منها وقرأ موافقتها وظل يناظر الرساله ثواني وقفل جواله وطلع سيقارته يولعها ويناظر العمال اللي يتكلمون معه ويناقشونه
'
صحت من بدري وتجهزت ولبست عبايتها ماتبي تلتقي بأمها من بدري
اخذت شنطتها وجوالها وخرجت من باب شباكها للحوش وخرجت من البيت
ناظرتها سمر من شباك الصاله وتكتفت
قفلت الباب خلفها ومشت لسيارتها ركبت وسحبت حزامها وحركت
وردت على جوالها:هلا غايه
غايه:وينك ؟ حركتي ؟
توليب:طلعت من البيت
غايه:تمام بفطر واجيك
هزت راسها توليب وقفلت جوالها تسوق سيارتها بهدوء وهي تفكر ووقفت عند مكتب رياض تنتظر غايه
رفعت عيونها تشوف سيارة عسّاف من وقف ونزل من سيارته وهو يكلم ودخل
نزلت عيونها لجوالها تشوف رسالة يوسف:صباح الخير توليب صاحيه ؟
تنهدت ترد عليه:صباح النور
قفلت جوالها من وقفت بجانبها غايه ونزلت من السياره
نزلت توليب ومشت لها غايه:شفيك ؟
توليب:ولاشي شايله هم بس
غايه:لا تشيلين هم ما بخليك توقعين لين اضمن حقك
هزت راسها توليب ومشوا يدخلون
انكتم نفسها بخوف وتوتر وهي تمشي لمكتب رياض وتشوف عسّاف جالس داخل المكتب ويتكلم مع رياض
بلعت ريقها ولفت عليها غايه:ندخل ؟
رفعت كفها لكف غايه وهزت راسها ومشت غايه ودقت الباب ولفوا يناظرونهم ورفع عيونه عسّاف لتوليب اللي تناظره ودخلوا ونطقت غايه:سلام عليكم
رياض:ياهلا وعليكم السلام
جلست توليب وجلست بجانبها غايه:جينا بنشوف البنود ونقراها قبل توقع توليب
هز راسه رياض:محاميه انتي ؟
غايه ابتسمت:محامية دم لتوليب
ابتسم بسخريه رياض يهز راسه ويناظر الاوراق
مد الاوراق ووقفت غايه تاخذها وسحبها رياض ورفعت حاجبها غايه
ونطق رياض وهو يناظر غايه:دامك مو محاميه استريحي ، الاخت توليب تاخذ الورق
سحبت الورق بقوه غايه وابتسمت:انا وتوليب واحد
ناظرها رياض وجلست غايه وهي تقرأ الورق ورفعت عيونها لتوليب:وش شروطك توليب ؟
توليب اخذت نفس:شرطي اللي كنت بقوله مذكور وهو ان كل شي يتصدق بورق
هز راسه عسّاف وناظرتها غايه:ماتبين شي ثاني ؟
توليب ناظرت غايه ولفت لعسّاف:بتغير اسم البراند ؟
هز راسه بالنفي عسّاف وهو يناظر توتر توليب أمامه
توليب:يبقى دبل تي ؟
عسّاف:يبقى دبل تي
رياض:دام اتفقنا بنضيف الشرط ونجيب الورق من جديد عشان توقعون
هز راسه عسّاف ووقف رياض وخرج ورفعت عيونها غايه لعسّاف اللي تقدم وهو يناظر توليب:في عيّنه مو تالفه نقدر نشوفها ؟
توليب:في تقريباً ٣٠ بكج
عسّاف:وينها ؟
توليب:بالمستودع اللي اتعامل معاهم
عسّاف عقد حجاجه:تعرفين مكانه ؟
هزت راسها توليب ونطق عسّاف:تمام نصير نشوفه
غايه:بتشتغل تسويق للمنتج ؟
عسّاف:بتعامل مع شركة دعم وتسويق هي بتعرض أفكار جيده للبراند
هزت راسها غايه وهي تناظر عسّاف ودخل رياض بالورق وحطه قدام عسّاف:وقع ابو الزّين
ابتسم عسّاف ووقع ومد الورق والقلم لتوليب
وبلعت ريقها توليب واخذت القلم من يدين عسّاف ولفت لرياض تناظره
غايه:وقعي توليب
هزت راسها ووقعت واخذ الورقه رياض:بعطيها السكرتير يسجل الاسماء والهويات وجايكم
سمعت اتصال جوالها ووقف عسّاف:عطيني عنوان المستودع اشوفه
توليب وقفت تقفل جوالها:انا بجي بعد
هز راسه عسّاف ومشى يخرج وخرجوا توليب وغايه خلفه
وهمست لها غايه:بتفتكين من الديون واخيراً
دق جوال توليب من جديد ووقفت خلف عسّاف عند المصعد وردت:هلا يوسف
رفع عيونه من انفتح المصعد ودخل ودخلوا معاه
ولفت غايه تناظر عسّاف بتمعن
توليب:كان عندي شغل
رفع عيونه عسّاف يناظر عداد المصعد التنازلي
توليب:عطني نص ساعه يوسف وبعدين اشوفك
غايه لفت لتوليب وابتسمت توليب:تمام
قفلت جوالها توليب وناظرت عسّاف اللي خرج من المصعد
غايه:وش يبي يوسف ؟
توليب اشرت لها ببعدين ومشت تركب سيارتها ومشت لها غايه:توليب علميني وش يصير معاك
هزت راسها توليب تشغل سيارتها وتحرك ومشى خلفها عسّاف بسيارته
واخذ جواله من دق وابتسم يرد:هلا يوسف
يوسف ضحك:هاه ولد الخاله اخيراً رديت علينا
عسّاف:انت لو تدق قبل انام كان لقيتني
يوسف:متى تسهر ونتقابل ؟
عسّاف:مامن سهر البال صافي ويبي النوم المريح
يوسف:طيب وين رايح الحين ؟ عندي نص ساعه فاضي فيها خل نتقابل
عسّاف:والله مشغول بعدها ادق عليك واشوف
يوسف:كلمني ونشوف
هز راسه عسّاف:ان شاء الله
قفل جواله عسّاف يشوف سيارة توليب من وقفت عند المستودع ولف للمستودع وهمس:مالقيتي الا هذا !
نزل من سيارته وعقد حجاجه ومشى لتوليب:تعرفينهم ؟
توليب:لا
عسّاف مشى معها ونطق:ما يعجبوني
توليب لفت عليه ودخل عسّاف:عمر
لف عليه عمر وتقدم:ماشاء الله اليوم عسّاف عندنا
عسّاف:ما اتفقنا انا واياك بس ما بتخلص مني
ضحك عمر وهز راسه:بوش نخدمك ؟
عسّاف:في بضاعه تخزنت عندك ابيها
عمر:بضاعة وش ؟
تقدم عسّاف:دبل تي ؟ تقرأ بضايعك ؟
عمر سكت لانه يجهل البضاعه ولف يناظر العمال وتقدمت توليب:قبل شهر كانت هنا
عمر:بنطلعها بنطلعها يا اختي
عسّاف سحب كرسي وجلس:اي انا ابيك تطلعها يا عمر لانك ما تعجبني
مشى عمر وخرج دخانه عسّاف يدخن وناظرته توليب يولع سيقارته وابتعدت عنه بإنزعاج من ريحة الدخان وتكتفت تنتظر العمال
وتشوف البضايع اللي بالمستودع وطال الوقت فيهم وانتهى من زيقارته عسّاف من وقت
ووقف يفهم سبب تأخير عمر ورفع صوته بالمستودع يزرع صدى داخله:ياعمر
لفت توليب تناظره وخرج عمر:البضاعه في بس تالفه
عقدت حجاجها توليب بذهول وهز راسه عسّاف:انا وش قلت لك ؟ قبل ما نشتغل واحط يدي بيدك قلت تعرف بضايعك وين تحطها ؟ تحرص عليها ؟
عمر:هذا ماهو خطئي
عسّاف عقد حجاجه:خطأ من اجل ؟ وينها البضاعه ورني
مشى عمر ومشت خلفه توليب ودخلوا يناظرون الكراتين اللي فوق بعضها وشهقت توليب تشوف منتجاتها ذايبه بالكرتون وانحنت تشوف اهمالهم
وناظرها عسّاف تفتح الكرتون وتمسك منتجاتها بيدينها وعاقده حجاجها ولف بحده على عمر:بتعوضني بقيمتها وانت تعرفني من قبل ياعمر اقسم بالله اقفل هالمستودع كله واهده فوق راسك
تأفف عمر ونطق عسّاف:تفهم ؟
هز راسه عمر وتقدم عسّاف لتوليب وانحنى يجلس يشوف الكراتين ولف عليها:خلاص اتركيها
ناظرت السكرب الذايب والزيت اللي تسرب بالكرتون ولفت لعسّاف بقهر تناظره وهز راسه عسّاف:بيعوضك بخشم الريال
تنهدت بتعب ومشت تخرج من المستودع وخرج خلفها:توليب
لفت من ناداها بإسمها ووقفت وتقدم لها:معد بتتعاملين مع هالمستودع انا اعرف مستودع افضل
ناظرته توليب بدون رد هي تعيش دوامه كبيره من التغيرات بحياتها ووجود شخص يملي عليها اختياراتها صعب تتقبله
ناظرها ساكته تناظره ونطق يكسر الصمت:ماعندك عيّنه غيرها نشوفها ؟
توليب هزت راسها:تمام
مشت تفتح باب سيارتها وعقد حجاجه:تمام وش ؟
توليب ناظرته قبل تقفل بابها:بجيب لك عيّنه
سكت عسّاف وقفلت باب سيارتها توليب وحركت واخذت نفس بضيق وردت على اتصال يوسف:هلا يوسف
يوسف:طولتي اذا مشغوله اشوفك بوقت ثاني عادي
توليب بللت شفايفها ماهي مستعده لأي حديث تخوضه
يوسف:بس بغيتك تجربين معي كوفي جديد
توليب:اسفه يوسف بوقت ثاني ان شاء الله رايحه البيت انا
يوسف:شريتها توليب بمرك اعطيك تشربينها
سكتت من اصراره ووقفت عند البيت:تمام انتظرك
يوسف:بس ارسلي لي الموقع
هزت راسها وقفلت جوالها ترسل الموقع وجلست بالسياره وهي تفكر
وناظرت اسم غايه بجوالها واخذته ترد:هلا غايه
غايه:شصار معاك ؟
توليب تأففت:كل اللي بقى عندهم اتلفوه واهملوه كل اللي كنت مخبيته
غايه عقدت حجاجها:كيف يعني اتلفوه ؟ انتي مو دافعه لهم فلوس استئجار ؟
توليب:دافعه بس كل شي تالف غايه ، السكرب والبدي لوشن والاويل كل المجموعه تالفه
غايه:يالله توليب !
سكتت توليب تشوف سيارة يوسف ونطقت:اذا نزلت البيت كلمتك
غايه:طيب ضروري توليب
هزت راسها:تمام
قفلت جوالها وناظرت يوسف اللي نزل ونزلت من السياره وابتسمت ، قفلت سيارتها ومشت ليوسف
تقدم يسلم عليها:شلونك توليب ؟
ابتسمت تهز راسها:حمدلله انت كيفك ؟
مد القهوه:ان شاء الله تعجبك انا جازت لي وعجبني الكوفي يبي لنا مره نروحه سوا
ابتسمت تاخذ القهوه تخجل تقوله انها ما تشرب قهوه وهزت راسها:ماقصرت يوسف شكراً
يوسف ابتسم:لا شدعوه عادي كنت فاضي ووحيد
لفت توليب من وقفت سياره عندهم وتلاشت ابتسامتها تناظر عدنان
نزل من السياره وبلعت ريقها توليب وابتسم يناظرهم ومشى:سلام عليكم
يوسف ناظره:وعليكم السلام
لف عدنان لتوليب:كيف الحال توليب ؟
توليب هزت راسها بربكه من وجود يوسف وناظرهم يوسف بإستغراب ونطق عدنان:بلغت امك بحضوري هذا الوقت عندك خبر ؟
لفت توليب تناظر يوسف اللي واقف ورجعت ناظرت عدنان:امي تنتظرك
ابتسم عدنان ومشى يدخل البيت وعقد حجاجه يوسف وناظر توليب:من ذا ؟ ليه داخل بيتكم ؟
سكتت توليب بربكه تناظر البيت ووجوده ببيتهم بالمكان اللي تعودت تكون مرتاحه فيه
ونطق يوسف:توليب اكلمك انا
لفت تناظر يوسف واخذت نفس:خطيب أمي
جمد وجه يوسف بصدمه وناظرت ملامحه توليب وبلعت ريقها:مشكور على القهوه ، استأذن
مشت تدخل البيت وعقد حجاجه يوسف يناظر سيارة عدنان ومشى يركب سيارته
ومشى للبيت ووقف من وصل ونزل يدخل البيت وناظر ابوه يشرب شاهي وامه موجوده وخواته
وتقدم:سلام
رفع عيونه تركي:وعليكم السلام
حنان:من وين جاي ؟
جلس يوسف وناظر ابوه:من عند توليب
لفوا البندري وأريام يناظرونه ورفعت حاجبها حنان
تركي:كيف حالها ؟
يوسف هز راسه:بخير بس كنت عند البيت حقهم وجاهم رجال ماعرفته
عقد حاجبينه تركي ونطقت حنان:رجال من ؟ خالها ؟
يوسف هز راسه بالنفي:لا
تركي:اجل من ؟
يوسف:تقول خطيب امها
شهقت حنان بصدمه وعقد حجاجه تركي بذهول وعضت شفتها البندري تناظرهم
جلس بإعتدال تركي:كيف يعني خطيب أمها ؟
يوسف:والله ابوي هذا اللي قالته يوم سألتها ودخل بيتهم وسلم على توليب يعني يعرفها
تركي:وشو يعرفها ما يعرفها ؟ وشو تعيش بنتي مع واحد غريب
حنان:مصيبه سمر هذي ما توفر ؟ من وين لقت لها رجال ؟
تركي:وش يطلع ذا الرجال ؟
يوسف:ماعرفته بس شكله نظيف وسيارته جديده
سكت تركي يناظر يوسف بذهول وكمل يوسف:بس ما ظنتي راضيه توليب
أريام:حرام أحسها بتتشتت كيف تعيش مع رجال غريب ؟
تركي:يخسى ما تعيش معه وتخسى سمر معها
حنان لفت عليه:وش عليك منهم ؟
تركي:بنتي حنان بنتي ، لا تفتحين الموضوع من جد وجديد ، ترضين البندري بهالعمر تعيش مع رجال ما تعرفه ؟
حنان:والله البندري بنتي عايشه مع اهلها حمدلله
تركي رفع صوته:وتوليب لا
لف ليوسف يناظره بحده:انا اشوف الموضوع
حنان:وش بتسوي ؟
تركي:اذا كان الموضوع صدق بنتي بتسكن معي ماني مخليها تسكن مع رجال غريب عشان جنان امها
يوسف:ابوي بتكلمها ؟
تركي:انت لا تدخل انا احلها واشوفها
هز راسه يوسف ووقف تركي بعصبيه يترك المكان وعضت شفتها البندري:كنت اسمع ان سمر هذي عليها ملاحظات بس انصدمت يوم بتتزوج بهذا العمر
ناظرتها حنان بحده ونطقت أريام:ليش احس الموضوع عادي وانتوا مكبرينه ؟ ترا زوج أمها مو غريب
يوسف:لا ياشيخه ؟ الا غريب ونص بعد
البندري:ومنجد ابوي ناوي يجيبها معنا البيت ؟
حنان:اذا قبرتوني
يوسف لف على حنان بذهول ونطقت البندري:اسم الله عليك أمي وش هالكلام
حنان وقفت:ولا يمكن تسكن معي بنت العقربه ولا يمكن
مشت تتركهم وتنهد يوسف يناظر خواته ورفعت حاجبينها أريام تناظر وضع اهلها الغريب
'
دخلت توليب تناظر عدنان اللي جالس بالصاله وسمر لابسه عبايتها وجالسه
وابتسم عدنان يناظر توليب:تعالي توليب بسولف معك
مشت وجلست بالصاله وناظرتهم
سمر ناظرت توليب وابتسمت تلف لعدنان
عدنان:جيت اتكلم معك قبل اتكلم مع خالك واخطب امك وودي علاقتنا تصير احسن وتعرفيني اكثر
سكتت توليب تناظرهم بربكه وضغطت على يدينها الثنتين
عدنان:وانا ناوي اسكن هنا معاكم لان هذي رغبة سمر وبعدها بفتره بدور بيت نستقر فيه بالنهايه هذا بيت ابوك ونصيبك
ماردت عليه توليب ولفت سمر تناظرها ونطق عدنان:توليب !
ناظرتهم ثواني ووقفت تخرج من عندهم ولف عدنان على سمر يناظرها وبلعت ريقها سمر
دخلت غرفتها توليب وفصخت عبايتها ترميها على السرير ومسكت راسها تغمض عيونها
ولفت من دخلت سمر وقفلت الباب بقوه وناظرتها توليب وهي ساكته
تقدمت سمر لها:فسري لي تصرفات الأطفال اللي قبل شوي
توليب ماردت عليها وهي تناظرها ونطقت سمر بحده:ليش تسوين كذا ؟
توليب:لاني مو متقبله
سمر عقدت حجاجها:ومين انتي عشان تتقبلين ؟
سكتت توليب ونطقت سمر:مين انتي توليب تجين تقررين عني والا تتقبلين شي لي ؟ هذي حياتي انا ارسمها بيدي وماراح اتعب عمري كله اربّي فيك واصرف عليك واشتغل عليك عشان اذا جاني الوقت المناسب اللي اعيش فيه حياتي تجين تقولين ما تقبلت
توليب:انا مين ؟ انا اللي عشت معاك سنينك كلها تملين عليها غدر ابوها وانتقام زوجة ابوها واني غلطه ولو ماجيت ما ربطك بتركي شي صح ؟
سكتت سمر تناظرها ونطقت توليب:الحين انا مين وما يهمك قبولي للموضوع ؟ بتجيبين رجال غريب ينام معانا بنفس البيت وتبغيني اتقبل ؟
سمر:اي لازم تتقبلين لاني مهمشه من والدك العزيز اللي تدافعين عنه دايم ، والدك اللي رماك عندي من صغرك ولا شفتي منه غير فلوس بس يحولها عشان يسد تأنيب ضميره وعايش مع عياله الثانين بكل مشاعره وجوارحه وانتي هنا تحاربين قرارات امك الصحيحه
سكتت توليب تناظرها ونطقت سمر:ما عشت هذا العمر كله عشان توقف قدام قراري بنتي ، الا حياتي ياتوليب الا حياتي نهاية عمري بتتزوجين انتي وانا بقعد لوحدي ، لوحدي
مشت سمر تخرج وجلست توليب وبكت بقهر داخل صدرها ومسكت قلبها وهي تبكي بدون صوت
ناظرت رقم غايه بجوالها وتجاهلته تبكي تسمع رنينه المزعج المتكرر
واخذته بعيون تمليها الدموع تحجب رؤيتها وردت وهي تبكي:غايه تكفين مو وقته اللي فيني مكفيني
سمعت السكوت ومسحت دموعها:اذا تقدرين تعالي لي
بلعت ريقها تمسح دموعها وعقدت حجاجها:غايه !
حك شاربه بهدوء:لا
لانت ملامحها بصدمه وناظرت الجوال تقرأ اسمه وغمضت عيونها بقوه ووقفت واخذت نفس ترد:اسفه
سكت عسّاف يسمع رجفة صوتها الناعم المهموس:محتاجه شي ؟
كان يعني بسؤاله لانه سمع صوتها واحتياجها وما يهون على قلبه يسكت ويتجاهل
هزت راسها بالنفي:لا
عسّاف وقف عند البيت وناظر بيت أهله ونطق:أكلمك الصبح
بلعت ريقها تجلس:وش بغيت ؟
عسّاف:شي ينفع يتأجل صدقيني
سكتت توليب تشد على قبضة يدها بإحراج وتعب وقفل سيارته عسّاف:سلام
قفل منها وناظر جواله ونزل من سيارته ودخل البيت
ناظر امه وخواته:سلام عليكم
نجود:اخونا المحبوب الوسطاني نفسي
ابتسم عسّاف:سهرانين اشوف
ضحكت رنا:اي سهر عسّاف ؟ الساعه ٩ العشاء
هيله:انت سهرت ليه تأخرت ؟
عسّاف تثاوب:شغل
ناظر دلع اللي على جوالها وناظرهم:تصبحون على خير
مشى يدخل ونطقت هيله:بس كذا سلام عليكم وتصبحون على خير
رنا:ياليت ياخذ اجازه عسّاف نقعد سوا ونتجمع
نجود:قاعد يشتغل عشان يجيب سياره احسن من سيارته الحاليه
ابتسمت هيله:الله يوفقه لو يتزوج تزين اموره وتشوفونه بس ماهو راضي
لفت دلع:صح امي بسألك انتي تكلمين عسّاف على البندري ؟
هيله:كل فجر ومساء
دلع:وش يقول ؟
هيله:ماهو وقته
سكتت دلع ولفت نجود:مدري وش ينتظر ؟
ضحكت رنا:يمكن ينتظر وحده ثانيه
هيله عقدت حجاجها:تكلمي زين
ناظرتهم دلع وصدت من جديد على جوالها
-
صحت من نومها بتعب ولفت تناظر الشمس دخلت غرفتها إثر الشروق وجلست بتعب واخذت جوالها تقرأ رسالة عسّاف وعقدت حجاجها تشوف وقتها قبل دقيقه بالضبط محتواها:اذا امداك مرّي المشتل نتكلم
قفلت جوالها واخذت نفس وقامت تدخل الحمام
فتحت درج الحمام تشوف منتجاتها اللي تستخدمها واللي بقت من اللي تعبت عليه واشتغلته
حطت المجموعه على الرف بتاخذها معها لعسّاف بس شكل المجموعه شهّاها تاخذ شاور
وقفلت باب الحمام تملي البانيو مويه ورشت ملح استحمام وصابون وبدت تتروش وتاخذ من مجموعتها سكرب وزيت ولوشن
خرجت بالروب وجلست تسوي شعرها وتعدله
لفت المَكر واخذت جوالها اللي يدق وردت:هلا غايه
غايه:انتي وينك سحبتي علي ؟ من امس ادق عليك
توليب:نمت
غايه:قلت لك طمنيني
توليب:طيب بس الحين طالعه ومستعجله اذا خلصت كلمتك
غايه:ياويلك تسحبين علي بستناك
توليب:اوكيه
قفلت تحط ميك اب وتفتح شعرها وتلبس وتاخذ عبايتها وتلبسها
اخذت شنطتها وخرجت من غرفتها للحوش ومشت تخرج من البيت
ركبت سيارتها تحرك للمشتل ووقفت خلف سيارة عسّاف ولفت للمشتل ونزلت
دخلت المشتل ومشت وابتسمت تشوف العم لطفي اللي جالس عند الورد ويقطع أغضانه بتنظيم:صباح الخير
لف عليها العم لطفي بإستغراب ومن شافها ابتسم:الله الله اللي قاب الئمر على وش الصبح النهارده ؟
ابتسمت توليب له بحيا ووقف العم لطفي وبيده غصون من الورد قاطعها من جذورها:ساعديني وامسكيهم
اخذتها من بين يدينه تحضن الورد وابتسم العم لطفي وهو ماسك بيده مقص الزراعه:والله مافيش فرء كلكم ورد
ضحكت توليب وهي حاضنه الورد وناظرت الورد من جلس العم لطفي يكمل شغله:عسّاف بيفطر حيقي دي الوئت
توليب:عسّاف قالي انك أصريت عليه يساعدني
العم لطفي:ماحصلش
ابتسمت توليب ووقف العم لطفي:يساعدك في ايه ! اصل انا زاكرتي مش بتشتغل السنين الاخيره
ضحكت توليب لانه يخفي عليها حاجتها وضعفها وابتسم العم لطفي من ضحكت:انتي صوتك حلو اوي في حد بيئولك كده ؟
هزت راسها بالنفي وهي مبتسمه والورد بحضنها وكمل العم لطفي:صوتك مختلف ما سمعتش زيه في حياتي ، مهموس وناعم ومخارق حروفك فزيعه
ابتسمت توليب ولفت لعسّاف من خرج وناظرهم وتلاشت ابتسامتها تشوفه
وناظرها عسّاف وهي حاضنه الورد ومبتسمه للعم لطفي ومن لفت له تغيرت ملامحها
ارتبكت لوجوده ولف العم لطفي لعسّاف:انت ملاحزتش وقود دبل تي خالص صح ؟ اصلها بتشبه الورد اللي في حضنها
تقدم لهم عسّاف وابتسم يناظر توليب ولفت توليب للعم لطفي:احطها فين ؟
العم لطفي:هاتيهم
مدت له الورد واخذه ونثرت عن يدينها التراب ولفت لعسّاف اللي واقف:جبت مجموعه
عسّاف عقد حجاجه:من وين ؟
مدت الكيس اللي بيدها:عندي بالبيت
اخذه من يدها ومشت تدخل توليب ودخل خلفها يناظر المجموعه حطها على الطاوله وناظرها العم لطفي:دي بتاعتك ؟
هزت راسها توليب وتقدم العم لطفي واخذ اللوشن واخذ السكرب عسّاف وفتحه يناظر قوامه وقربه يشمه
حط العم لطفي اللوشن على يده:ايه الريحه الحلوه دي ؟ دي بتشبه ريحة المشتل
ابتسمت توليب وهز راسه عسّاف:جيده وين تسوينهم ؟
توليب:في شركه بالدوحه يصدرونها لي
عسّاف:اوله الدوحه ؟
هزت راسها توليب:اخترت الروائح هناك وكل شي
عسّاف حك جبينه يناظر المجموعه:طيب نكلمهم من جديد ونتفق معهم اتفاق جديد بعقد جديد
ماردت توليب وطلع جواله عسّاف:عطيني رقمهم
خرجت جوالها تدور الرقم ومدت جوالها له
واخذه ينقل الرقم ورفع عيونه من دق جوالها بإسم ابوي
ولفت توليب من دق جوالها وناظرها عسّاف:ابوك
تغيرت ملامحها بذهول وبلعت ريقها من تذكرت يوسف
ومدت يدها تاخذ جوالها ومشت تخرج من عندهم وردت:هلا
تركي:شلونك توليب ؟
اخذت نفس بتوتر تهز راسها هي غابت عن مسامعها صوته من سنين طويله كانت تسمعه يعايدها كل عيد فقط:بخير حمدلله انت شلونك ؟
كان زمن طويل ما دق عليها وسمع صوتها ونطق تركي:الحمدلله ، دقيت اسأل اذا فاضيه بعد العصر تمريني بشوفك واتكلم معك
رفعت يدها على جبينها بربكه من تخمينها للموضوع وهزت راسها تعض شفتها
تركي:وبرسل لك العنوان برساله
توليب:طيب
ناظرها عسّاف من بعيد وهو يشم السكرب ولف العم لطفي:مالها تغير وشها
عسّاف رفع حاجبينه بتعجب ولف العم لطفي وهمس:شكلهم مش متفاهمين والا ازاي ابوها موقود وما بيسددش ديونها
عسّاف رفع عيونه لتوليب اللي تكلم وماسكه جبينها بتوتر ونزل عيونه للمجموعه من قفلت ودخلت
العم لطفي:مالك حصل حاقه ؟
توليب هزت راسها بالنفي وناظرت عسّاف:اخذته ؟
عسّاف ناظر جواله:اخر رقمين
توليب ناظرت الرقم:صفرين
هز راسه عسّاف يدق وجلس ولفت توليب تناظر المشتل وهي ساهيه
ونطق عسّاف اللي اتصل مباشره:سلام عليكم ، مرحبا فيك انا عندي منتجات استوردها من عندكم بالدوحه بس من فتره انقطع الطلب وابي استرجع الطلب من جديد
عقد حجاجه عسّاف:دبل تي
لف العم لطفي يناظر توليب اللي صاده عنهم تناظر المشتل ولف لعسّاف من نطق:بس ما تغير شي هو نفس اللي نطلبه من فتره ، ما ينفع يعني ؟ لازم اجي ؟
لفت توليب تناظر عسّاف وهز راسه عسّاف:تمام اشوف وقتي ، سلام عليكم
قفل جواله وناظر توليب:يقول تغير المدير من فتره وتغيرت كل الطلبات والعملاء ، بروح انا الدوحه واشوفهم
توليب:كيف تغير كل شي ؟ يعرفوني وانا اتواصل معاهم وزرتهم واخترت كل شي
عسّاف:والله هذا اللي قاله تغير كل شي ويبي لي روحه من جديد
غمضت عيونها بتعب توليب وجلست وناظرها العم لطفي:مش مستاهله ياتوليب حيروح عسّاف وحيحل كل حاقه ما تئلئيش
توليب رفعت عيونها لعسّاف:متى تروح ؟
عسّاف اخذ نفس:مدري اشوف وقتي وابلغك
هزت راسها توليب وناظر المجموعه عسّاف:واتركيها هذي معاي احتاجها
وقفت توليب وهزت راسها ومشى عسّاف يخرج برا ويولع سيقاره وناظرته توليب ولفت للعم لطفي اللي نطق:هو باباك ئلك حاقه ؟
توليب اخذت نفس:لا بس من فتره طويله ما سمعت صوته
ناظر المشتل قدامه عسّاف يسمعهم خلفه وشغل سيقارته ونطق العم لطفي:ليه هو بعيد ؟
توليب رفعت كتفها وابتسمت:بعيد مره
العم لطفي:بيشتغل فين ؟
توليب اخذت نفس ونزلت عيونها:في ينبع بس بعيد في بيت ثاني
لف عسّاف يناظرها وسكت العم لطفي واخذت نفس توليب تشم ريحة الدخان اللي انتشرت بالمشتل وناظرت عسّاف اللي يناظرها:تدخن هنا ؟
عقد حجاجه ومشت تتقدم له وناظرها:ليه لا ؟
توليب ناظرت الورد والزرع حوالينهم:ما اعتقد الورد يحب الدخان
هز راسه العم لطفي:صح عليك وحتى الصحه ما بتحبش الدخان خصوصاً كده مريض السكر
تجاهله عسّاف يسمعه يلمح له بكلامه ولفت توليب لعسّاف:اذا حددت موعد بلغني عشان اعطيك موقعهم بالدوحه
هز راسه عسّاف ونزل سيقارته يطفيها برجله ومشت تخرج توليب وناظرها عسّاف ولف للعم لطفي:بلاش نصايحك
العم لطفي:النصايح ببلاش ما تخفش
عسّاف اخذ نفس وطلع جواله:متى نلاقي وقت للدوحه الحين ؟
العم لطفي:بئولك سمعت البت بتئول ايه على بابتها
هز راسه عسّاف ونطق العم لطفي:طب والله صعبت عليه
عسّاف ناظره:انت صعبت عليك ديونها وكلمتني اسددها والحين صعبت عليك بأبوها تبغاني اتبناها ؟
ضحك العم لطفي:طب انت عسل والله
ضحك عسّاف يدق ومشى يدخل يجلس وناظر المجموعه قدامه
'
وقفت عند المكان ولفت تناظر الحديقه اللي مقابله للبحر وبلعت ريقها
لفت للأمام تهدي نفسها وتمنع ربكتها تبان عليها
اخذت شنطتها وفتحت باب سيارتها ونزلت
كانت تمشي بخطوات متردده لكن المسافه كانت قريبه بصرياً لعيونها تشوف ابوها قاعد معطيها ظهره يناظر البحر
بس كل شي داخلها يشعر بالبُعد بالمدى وبالصدى وبالهجر
توقفت عند تركي وناظرته ولف عليها تركي يناظرها
ووقف وشدت على يدها اللي ماسكه شنطتها تناظر تركي ، الشخص اللي كان المفروض تعتاد ملامحه وتأمن جواره لكنها تناظره بغرابه بإختلاف شكله وحاله بسبب الهجران والسنين الفايته
رفع كفه تركي:شلونك ؟
مدت كفها تحضن كفه وتحس بدفاها وامتلت دموعها بعيونها من اللقاء المهيب وهزت راسها
وجلس تركي وجلست بجانبه واخذت نفس تناظر البحر
تركي سكت ثواني يناظر البحر:الربيع بدأ والجو يزين بينبع
ماردت عليه توليب تناظر البحر والجو الهادي ولف عليها تركي:يوسف قالي انك تقابلينه
هزت راسها له بدون تلتفت وكمل تركي:امك وش ناويه عليه ؟
تنهدت تسمع مقدمة الحديث اللي خافت منه ولفت على تركي وناظرته وهي ساكته
وكمل تركي:تبي تتزوج ؟
هزت راسها وابتسم تركي:عاشت تلوم كل رجل بالدنيا واحنا متزوجين ويوم تطلقت مني راحت تدور على رجّال جديد
صدت توليب بإنزعاج من حرب امها وابوها
ونطق تركي:من يكون ؟
توليب لفت عليه تنتظر بس يسألها عن حياتها دراستها وضعها مشاعرها بس كان مصرّ يفتح باب الحرب مع سمر حتى بعد سنين هجر
تركي:تعرفينه ؟
توليب:يشتغل معها بالدوام
تركي عقد حجاجه:شسمه ؟
توليب:عدنان
تركي:عدنان وش ؟
توليب:عدنان خالد
سكت تركي من تذكر إسمه ما يعرف هو نفس اللي بيشتري منه عماره أو تشابه أسماء وهز راسه ولفت توليب للبحر ولف لها تركي:ومتى بتتزوج ؟
توليب رفعت كتفها بجهل وهز راسه تركي:اذا استجد شي بالموضوع علميني
لفت تناظره توليب من وقف بيروح عنها وينهي حواره بدون يسألها عن حياتها أبد وناظرها:عشان تتركين بيت امك وتجين بيت ابوك
جمدت ملامحها بصدمه وذهول تناظره ووقفت بصدمه وهز راسه تركي:ما بتعيشين مع رجال غريب بتعيشين مع ابوك واخوك وخواتك
سكتت تناظره بذهول بوجه جامد ونطق تركي:وتكونين قريبه مني حتى لو متأخر من عمري
مشى تاركها ولفت توليب تناظره رايح وظلت تناظره بصدمه وخوف
خوف انها تدخل بحرب بين امها وابوها لحضانتها وهي بهذا العمر ، تخاف تتغير حياتها وتعيش دينا جديده عليها بناس ما تعرفهم ببيت ما ترعرعت فيه ، تخاف التغيير
حطت يدينها على الكرسي تشد عليه وتناظر أمامها وبلعت ريقها بخوف وغمضت عيونها ، خبت كل إحتياجها ونقص حياتها وكتمت بداخلها كل اللي ودها تعيشه بس تحس ان كل شي يفوق طاقتها من كتمانها
طفولتها أثرت عليها بشكل كبير وكابرت وكبرت تحارب في ظل الإحتياج وتكذب وتمثل سنين طويله ، بس اكتشفت انها بكل مره تلتقي بأبوها تندمر تزعزع ثقتها وتفقد شغفها ويغمرها خوف ما تنجو منه الا بصعوبه
وقفت من دق جوالها وردت وهي تمشي رايحه لسيارتها:هلا
عسّاف:بسافر بعد بكره وبحجز بعد شوي بس بلغيني وين مكانهم وانا اتصرف
وقفت ثواني ولفت تناظر مكانها مع ابوها وهي ساكته ونطق عسّاف:توليب !
هزت راسها:أسمعك كمل كلامك
عسّاف:ارسلي لي المكان
توليب لفت لسيارتها وفتحتها:بحجز واجي معاك
سكت عسّاف بإستغراب وركبت توليب:أي وقت حجزك ؟
عسّاف:ما يحتاج انا ادبر الأمور
ربطت حزامها:لا انا ودي اروح
هز راسه عسّاف:طيب بشوف موعد وأبلغك
قفل منها وفتح اللابتوب ودور حجز لقطر ، الدوحه ، شخصين
ارسل التذكره عليها مباشرةً وفتحت جوالها تشوف التذكره ودخلت تحجز لنفسها تذكره بنفس الوقت
اخذت نفس من دخلت غايه غرفتها:اخيراً !
صدت توليب للورد تناظره من شباكها وتقدمت غايه تفصخ عبايتها:وش صاير معاك توليب ؟ كنتي برا ؟
هزت راسها توليب وصدت عن غايه وهمست غايه:فيك شي ؟
بكت توليب وناظرتها بخوف غايه وتقدمت لها تحضنها:وشفيك ؟ علميني
مسكت ذراعينها توليب وهي جالسه وتبكي
وجلست غايه قدامها ومسكت كفوفها:علميني وش صاير ؟
توليب مسحت دموعها:امي بتتزوج
سكتت غايه بصدمه تناظرها وكملت توليب:ودخل عدنان بيتنا عشان يتكلم معي ويقنعني بفكرة زواجهم ، وبيسكن هنا بعد الزواج وبتتغير حياتي كلها
غايه:منجدك توليب ؟
توليب رفعت كتفها:يوسف شاف عدنان وبلغ ابوي واليوم قابلني ابوي
ناظرتها غايه بصدمه من الأحداث وكملت توليب:وقالي اذا تزوجت امي بياخذني منها لبيته
بكت توليب بخوف:بترجع حروب زمان من جديد
عضت شفتها غايه وشدت على كفوف توليب:تكلمتي مع امك ؟
هزت راسها توليب:ما تشوف رايي شي وما يهمها قراري
غايه:تكفين توليب لا تبكين وتحرقين قلبي
ناظرتها توليب بخوف:خايفه غايه اخاف من الجاي
غايه:لا تخافين محد يقدر يجبرك على شي ما تبينه حتى ابوك اللي عرفك الحين ، ولا احد يقدر يعورك حتى امك انا معاك ولو توصل مرحله نسكن انا واياك بشقه مع بعض بس ما اخليك تعانين
بكت توليب تناظر غايه وحضنتها غايه:بس لا تبكين
تنهدت توليب تحضن غايه بقوه وابتعدت عنها ومسحت عيونها:بعد بكره مسافره
غايه عقدت حجاجها:عشان ايش ؟
توليب:مع عسّاف
ابتسمت غايه بصدمه ونطقت توليب:بنروح الدوحه عشان دبل تي
غايه:والله ماقصر عسّاف اختار الوقت المناسب تهجين
توليب:ما اتوقع اطول يمكن ليله بس
توليب اخذت نفس تكمل:تتوقعين ينحل مشروعي ويتيسر ؟
غايه:دام عسّاف هذا واقف على المشروع صدقيني بينجح ، الرجال باين عليه شاطر بالشغل وللحين يتكلم معك بالشغل وبس لان هذي نيته
توليب صدت للورد تناظره ونطقت غايه:بتقولين لامك ؟
توليب:لا بتقولين لها انتي اني بروح معاك
غايه:ليش ما تقولين الصدق ؟
توليب:مو وقته تعرف اني رجعت لمشروعي
غايه:طيب بقولها انا بس علميني بالوقت اللي بتسافرينه عشان اختفي
توليب ناظرت التذكره:نص الليل رحلتنا
غايه:امانه توليب انبسطي وانشغلي بشغلك ولا تفكرين بأي شي انا واثقه انها بتنحل
هزت راسها توليب وقفلت جوالها وصدت لشباكها
'
قفل لابتوبه وخرج من الغرفه ونزل ووقف محله من خرجت البندري مع دلع من المطبخ وصد بعيونه يرجع يطلع بسرعه للغرفه
وجمدت محلها البندري تناظره يصد ويهرب لأنها بدون عبايه ولفت دلع عليها:ماكنت ادري عسّاف بالبيت ، ادخلي الصاله بشوفه
مشت دلع وابتسمت البندري وبلعت ريقها بربكه
طلعت دلع ودخلت الغرفه ولف عسّاف:متى جات خالتي مادريت
دلع:قبل شوي بس انت ما شفناك
عسّاف:دخلت مالقيت احد
دلع:وش بغيت ؟
عسّاف:بغيت امي بس خلاص ارسل لها رساله تقراها
دلع:وش عندك ؟
عسّاف:مسافر الدوحه
دلع:شغل ؟
هز راسه عسّاف:بس ما بطول
دلع:تمام عادي انا اقول لامي لا تشيل هم
هز راسه عسّاف وناظرته ثواني دلع:شفت البندري ؟
هز راسه بالنفي وصد يفتح لحافه وكملت دلع:جايين لان خالتي حنان محتاسه مع عمي تركي
عسّاف انسدح وناظرها بنعاس:ليه ؟
مشت دلع وجلس على السرير:مشاكل خالتي حنان مع طليقة عمي تركي ما تخلص
عسّاف:الله يعينهم مالنا شغل
دلع:بخاطري أفهم سبب جنون عمي تركي عشان طليقته
عسّاف:دلع هذي السواليف سولفيها مع نجود ورنا انا زين اسمعك ما غفيت للحين
ضحكت دلع:اوكيه اطردني بس جامل شوي
ابتسم عسّاف ومشت دلع تخرج وتقدم عسّاف بيطفي ابجورته وناظر كيس دبل تي قريب منه
جلس بإعتدال وسحب الكيس وطلع من داخله المنتجات وفتح الكريم يشمه وغمض عيونه من ريحته الزكيه ، ريحة ورد صريح وكأنه انتزع من عصارة مشتل
ناظر العبوات مستعمله وجزء منها مخلص دلاله على استعمال توليب لها
ظل يناظر المنتجات يذكرها شايله الورد بيدينها تبتسم بوجه خجول ما تقدر تخفيه وحذر منه ما تقدر تهرب منه ، تتبدل ملامحها كل ماشافته وكل موقف معها كان أغرب من اللي قبله
وقف واخذ نفس يطلع شنطته من الدولاب ويحط ملابسه ومنتجات دبل تي ويقفل الشنطه ويرجع ينسدح بسريره
'
حطت ملابسها بالشنطه ولفت من دخلت امها وصدت تطلع ملابسها من الدولاب
ناظرتها سمر وتكتفت:وش يعني غايه تقولي انكم بتسافرون ؟
توليب رفعت كتفها ولفت للميك اب تاخذه وجلست سمر جنب شنطتها تناظر اغراضها:ما استأذنتي
توليب:ماراح ترفضين
سمر:بس يحق لي تستأذنين مني لاني ماني رجل كنبه هنا بالبيت
توليب وقفت وناظرتها:طيب تسمحين لي اروح والا ارجع ملابسي كلها ؟
سكتت سمر تناظرها وناظرت سكوتها توليب ورجعت تحط اغراضها
وقفت سمر بتخرج ونطقت توليب:كلمني ابوي
لفت سمر بذهول وعقدت حجاجها وناظرتها توليب:وصله خبر عن عدنان
سمر تقدمت بصدمه:من قاله ؟
توليب:يوسف شافه عند بيتنا
سمر:ويوسف شدخله ؟ ووين شافه ؟
توليب:صدقيني هذي التفاصيل ماتهمك اللي يهمك وش قال ابوي
سمر تقدمت لها:وش قال لك ؟
توليب اخذت نفس ووقفت قدام امها تداري عبرتها:قالي بياخذني من عندك لو تزوجتي
جمد وجه سمر تناظر توليب وكملت توليب:يعني بتعيشين حرب حضانة بنتك بس وهي كبيره
سمر ناظرتها بصدمه:وش تقولين انتي ؟ وين تروحين عنده واي ابو اللي تتكلمين معه ؟ ومن بيسمح له اصلاً ياخذك ؟
توليب ناظرت سمر اللي ازدادت غضب:وهو شدخله فيك ؟ وش يبي فيك الحين ؟ يبي يدمرني يعني ويخرب فرحتي وحياتي اللي برسمها ؟ وش يبي تركي وش يبي ؟ ما كفاه اللي سواه فيني من سنين بيرجع يحاربني من جديد ؟
سكتت توليب ونطقت سمر:وش قلتي له ؟
توليب:من متى يهمك قراري ؟
ناظرتها سمر بذهول ورفعت كتفها توليب:انا غلطة وصل بينك وبين تركي طليقك ، كل واحد منكم يحارب الاخر فيني انا ، طيب احد جرب يسألني عن حياتي ؟ واستقراري اللي ما جربته ؟
سمر:انتي ماراح تطلعين من بيتي ومن وصايتي حتى لو تزاعلنا انا واياك مليون مره
تقدمت سمر منها:انتي بنتي انا
توليب تجمعت دموعها بعيونها ونطقت سمر:اكسر يده لو ياخذك مني
توليب سكتت ومشت سمر تخرج بغضب وجلست توليب بتعب ومسكت راسها تستعد للحرب اللي بتندلع وهي ضحيتها
قفلت شنطتها تمسح دموعها اللي انهمرت بدون جهد منها رغماً عن تماسكها
وقرت رسالة غايه اللي كتبت لها:انا بوصلك للمطار
قفلت جوالها واخذت عبايتها تلبسها وخرجت بدون وداع لأمها
وناظرت غايه اللي واقفه عند البيت وحطت شنطتها بالخلف ومشت تركب بجانب غايه
حركت غايه ولفت توليب تناظر الشوارع الخاليه بسبب الوقت المتأخر
وقفت عند المطار غايه ونزلوا سوا ومشت توليب وغايه تجر شنطتها ودخلت معها لين شافت وقوف عسّاف اللي شافها من بعيد
ناظرته غايه ولفت توليب لغايه وابتسمت غايه لها:روحي اثبتي مشروعك وارجعي
ابتسمت لها توليب وحضنتها ومشت توليب لعسّاف اللي واقف ينتظرها
وقفت بجانبه وناظرها عسّاف بتعب ينهش من حيله النعاس وهمس:استعجلت يوم حجزت هالوقت
سكتت توليب تمشي معه ودخلوا البوابه وجلسوا
جلس بتعب عسّاف ومسك راسه ولف يناظر المطار
وقفت معاه من نادوا رحلتهم ومشوا يركبون الطياره وجلست بكرسيها بجانبه
بلعت ريقها من كتمانها لحزنها وعبرتها وغمضت عيونها من أقلعت الطياره وبكت بدون صوت
ولف عسّاف يغمض عيونه عشان ينام تعويض عن نومه اللي ما قضاه بوقته المعتاد
لف وجهه وفتح عيونه وناظرها وعقد حجاجه واعتدل بجلوسه وتقدم لها وهمس:توليب
فتحت عيونها ومسحت دموعها واخذت منديل وهزت راسها بالنفي
عسّاف:وشفيك ؟
هزت راسها بالنفي بتكرار تمتنع عن الكلام وسكت عسّاف يناظرها مافهم اللي تشعر به بس ماقدر يغفى ابد
ظل بجانبها صاحي وساكت طوال الرحله لحد ما هبطت الطياره بالدوحه
نزلت بعد ما استجمعت نفسها ومشت معه على اذان الفجر بالدوحه
يمشي بجانبها لين خرجوا من المطار وتقدموا للسياره اللي تنتظرهم
وركب بالخلف وركبت بجانبه ، فتحت شباكها تسمع صوت اول نور للفجر ولف عسّاف يناظرها ورجع يصد لشباكه
وقف عند الفندق ونزلوا وتقدم للسواق يتكلم معه ودخلت توليب ووقفت:ابغى حجز غرفه
دخل خلفها عسّاف وتقدم:في حجز لا تحجزين
ناظرته توليب من نطق:حجز بإسم عسّاف عبدالمحسن
هز راسه الموظف وناظرته توليب:ماله داعي انا احجز لي
عسّاف مارد عليها ياخذ كرت الغرف ولف لها عشان يمشون ومشت معه وطلعوا لغرفهم ومد لها الكرت:افطري فوق عندهم قبل تنامين
هزت راسها ومشت تدخل الغرفه ودخل عسّاف ومسك راسه بتعب من نعاسه اللي وصل لحدّ الأربع وعشرين ساعه
بس بيغلبه السكر لو نام بدون يفطر ويعرف انه لازم ياكل قبل ينام
غير ملابسه واخذ جواله وخرج يطلع فوق ، مشى يناظر الفطور بالفندق ورفع عيونه وناظر توليب جالسه لوحدها تاكل
ولف ياخذ له فطور ومشى لها ولفت عليه وناظرته يسحب كرسي قدامها ويجلس
بلعت ريقها وناطرت صحن الفواكه اللي تاكله وناظر صحنها وناظرها:ليه ما تفطرين زين ؟
توليب:اكل فواكه قبل انام
بدأ ياكل عسّاف وناظرها ورجع يناظر اكله:تخافين من الطيران ؟
ناظرته ورفع عيونه يناظرها وهزت راسها بالنفي
عسّاف:ليه كنتي تبكين ؟
نزلت عيونها لصحن الفواكه تنقي من بين الفواكه حبيبات الرمان:مشاكل أسريه
هز راسه عسّاف يناظر الرمان اللي تفصله عن الفواكه عشان تاكله ورجع ياكل وناظرته توليب:قد مره احترت بين امك وابوك ؟
سكت عسّاف وهز راسه بالنفي وابتسمت توليب تناظر صحنها:انا احترت
عسّاف اخذ نفس ورجع ظهره للخلف:ابوك ما يدري عن ديونك صح ؟
هزت راسها بالنفي وكمل عسّاف:ليه ؟
توليب:لاني ما اكلمه سنين طويله ماقدرت اطلبه فلوس
سكت عسّاف يناظرها وكملت توليب:والوضع كل ماله يصير اسوأ
رفعت عيونها توليب لعسّاف:امي بتتزوج وبتدخل بحياتنا رجال ما اعرفه وابوي وصله خبر ويبي ياخذني بيته
رفعت كتفها توليب وهي تناظر عسّاف:يعني حياتي بتصير رأساً على عقب
عسّاف ابتسم:يمكن الحياه تكون احلى وهي مقلوبه على راسها
ابتسمت من ابتسامته وروحه الحلوه بالرد وكمل عسّاف:او يمكن ماود العمر يخلص وانتي بعيده عن ابوك وصار الوقت تعرفين ابوك من قريب
توليب سكتت وكمل عسّاف:اللي جات معك المطار اختك ؟
هزت راسها بالنفي:ماعندي خوات من امي
عسّاف:ولا اخوان ؟
توليب:لا
عسّاف هز راسه وتقدم:الحياه متقلبه مره تاخذ بك يمين مره تاخذ بك شمال ، بس بكل جهه تاخذين درس
توليب:ما احب التغيير واخاف من الغموض والاسئله
عسّاف:كل ما داهمك سؤال دوري اجابته لا تقعدين بدوامة اسئله وغموض
رجع ياكل عسّاف:والتغيير حلو يعرفك على ناس جدد
ابتسم وناظرها:زيي انا يعني
ابتسمت توليب تناظره وصدت تناظر المطعم ونطق عسّاف:زرتي الدوحه من قبل لوحدك ؟
لفت توليب وهزت راسها بالنفي:معاي غايه
عسّاف سكت وناظرته توليب:شغلك بالعقار بس ؟
عسّاف ابتسم من سؤالها وعضت شفتها بإحراج:اذا ماتبي تجاوب عادي
عسّاف:لا عادي بس ما احب اسولف عن شغلي
توليب:ليه ؟
عسّاف:اللي تبينه يضبط لا تتكلمين عنه خليه سرّ
سكتت توليب ونطق عسّاف:اشتغل بعقار وسيارات وعندي اسهم شراكه بكذا شركه ، يعني اشتغل بكل شي اشتري مره وابيع عشر مرات
هزت راسها توليب بإعجاب ورفع راسه وهو ياكل:ابوك وش يشتغل ؟
توليب:ما اعرف
ناظرها عسّاف وعقد حجاجه يتذكر:تركي وش ؟ يعني وش لقبه
جات بتنطق بلقبها بس لفت لجوالها من دق وناظرته ووقفت ومشت بعيد عنه
رفع عيونه عسّاف يناظرها من بعيد وهو ياكل وناظر صحنها قدامه ورجع ياكل بهدوء
لفت توليب تناظره وصدت:وصلنا ايوا
غايه:وحليتوا موضوع دبل تي ؟
توليب:لا باقي موعدنا معاهم عشره بحاول انام تعبانه
غايه:لا يفوتكم ، انتوا حاجزين بس اليوم ؟
توليب:اي
غايه:تمام انتبهي على نفسك
هزت راسها توليب:وانتي كمان
قفلت جوالها ولفت لعسّاف:برجع الغرفه
هز راسه عسّاف ومشت تاركته ووقف يمشي لغرفته
( لا تنسون النجمه 🌟 )
