عقدت حجاجها هيله تناظر جوالها ورفعت راسها من دخلوا البنات ومعهم اغراضهم:شفتم اللي شفته ؟
دلع خطت الاغراض:لا وش صاير ؟
وقفت هيله ومدت جوالها وتقدمت نجود وابتسمت:عسّاف وتوليب
رنا تقدمت:هذي المشهوره مصورتهم بسنابها؟
همست دلع تقرأ الكلام:أصحاب براند دبل تي
هيله:وش يعني ؟
دلع رفعت راسها:امي هذا مشروع توليب وعسّاف
هيله عقدت حجاجها:من الحين صرف عليها ودخلها مشاريع ؟
رنا:اوه خبرك عتيج امي من قبل يتزوجون مشروعهم ذا
هيله:وبعد ؟ صارف عليها من زمان
نجود:امي ويصرف يعني زوجته بالنهايه
هيله:لا ما يصرف يضيع فلوسه عشانها ؟
نجود رفعت حاجبها:امي ترا بطاقة ابوي بجيبك
هيله:انكتمي نجود انكتمي
دلع تنهدت:امي ترا المشروع بينهم بالنص
هيله:اي والحين بعد الزواج يصير لها لوحدها ، تبي تسرق كل حلاله طمعانه فيه
رنا:امي بالغتي ترا يحبون بعض مالها شغل الفلوس
هيله:تدافعون عنها من الحين ؟ باقي مادخلت بيتنا
دلع جلست:صح ترا عزمتها ملكتي
هيله:على كيفك؟
دلع:اي انا العروس وهي زوجة اخوي اكيد لازم تحضر
هيله ناظرتهم بجنون ورفعت راسها على رياض اللي دخل:سلام عليكم
هيله مدت جوالها:شفت اخوك ؟
اخذ الجوال رياض وابتسم:ماشاء الله مشروعه جديد ؟
هيله:وشو ماشاء الله مشاركته العقربه
رياض رفع راسه:مشاركته حياته الحين جات على فلوسه
ضحكت نجود من ردة فعل هيله وجلس رياض على ذراع الكنبه:امي بتكلم معك من الحين عشان ما تسوين لي نفس مشاكل عسّاف
سكتت هيله وكمل رياض:بخطب
لفت دلع بصدمه:تطور الوضع؟
رياض:لا بس ابي اهيئ امي
هيله:ليه من بتخطب ؟ حمدلله العقربه ماعندها خوات
رياض ناظر خواته ورفع راسه لامه وابتسم:باخذ صديقتها
ضحكت نجود من الوضع وعقدت حجاجها هيله:تستهبل رياض ؟
رياض:والله لا ابي صديقة توليب وحده اسمها غايه يعرفونها خواتي
هيله:يعني ما يكفي عسّاف ؟ تبي تاخذ شي من ريحة سمر وتوليب ؟ انت صاحي ؟ خلصوا البنات ؟ وين اللي كنت تبيها من المدينه بنروح لهم
رياض:ما ابيها ابي غايه
هيله ناظرته بصدمه:لا تجلطني رياض
رياض:عاد هذا العلم لين يصير شي رسمي برجع افتحه معكم
وقف ومشى تاركهم وابتسمت دلع تناظر امها وناظرتهم هيله:ليه عيالي ضاعوا مني ؟
دلع:امي عسّاف ورياض عندك وعيالك محد اخذهم بس تزوجوا بنات يحبونهم
هيله:وش ينحب فيهم ؟ كلهم شرّ ونيتهم شينه كله من راس العقربه سمر غزتهم ببنات تعرف عيالي طيبين وخلت حوالينهم بنات يتزينون ويغرونهم
نجود:عسّاف من زمان يشتغل مع بنات كاشفين وحتى مفاصيخ اجانب ماله علاقه ورياض محامي كل يوم مستلم قضيه لبنات
هيله:انتي تمشي لك راتب سمر عشان تدافعين عنها؟
نجود:لاحظي اني تكلمت عن اخواني مو عن سمر
هيله:يعني عن سمر
تنهدت دلع ووقفت نجود تتركهم وجلست هيله ورجعت تفتح الصوره تناظرها
'
دخل يوسف غرفته وناظر العود وابتسم وتقدم له ياخذه وفتح شباكه يناظر شباكها المفتوح وجلس عند الشباك وحط العود بحضنه وحاول يعزف عليه لكنه ما يعرف له وأثار بأصابعه نشاز عزفه عشان بس تسمعه وطلّ براسه وابتسم وسع مبسمه من شاف ظلها ورفعت راسها مها تشوفه ونطقت ترفع صوتها:رجعه
ابتسم يوسف وتقدم:ليه مطفيه نور غرفتك ؟
مها:شرايك يعني ؟
يوسف:عشان ما اشوفك ؟
مها:ابي العود
يوسف:اول علميني ليه تخبينه ؟ وعن من ؟
لفت مها تناظر خلفها وقفلت شباكها وعقد حجاجه يوسف ومشى لجواله ودور رقمها ودق عليها وتقدم للشباك
وردت مها تقفل بابها:نعم
يوسف:ماعاد تبينه ؟ اتدرب عليه ؟
مها تقدمت للشباك:رجعه لا تطولها
يوسف:ليه تخبينه ؟
مها:ابوي مطوع زي ماشفت واضطريت اصرفه قبل يشوفه
يوسف:وتطلعين فيه وين تودينه ؟
مها:ابوي يسافر مكه كل فتره واذا رجع اوديه عند وحده من صحباتي ، خلصت تحقيق ؟ رجعه
يوسف:اذا راح ابوك مكه رجعته لك اخاف عليك يكسره فوق راسك
مها:شدخلك ؟ رجعه ولا يكثر
يوسف:جزاتي اخبيه لك بأمان ببيتي وغرفتي
مها:ندمت والله ليتني كسرته ولا عطيتك
يوسف:وش جوّك تعزفين عود ؟
مها:ليه المفروض ما اعزف ؟
يوسف:الا بس نادر بنت تعزف عود وعزفك حلو سمعته
مها:طيب بتسولف كثير ؟
يوسف:اي ودي
مها:ابي العود رجعه
يوسف:تم بس تعزفين عليه عند الشباك عشان اسمع عزفك
مها تنهدت بملل وصدت:طيب بس جيبه
يوسف:خلاص بكره
مها:ليش ؟
يوسف:بريّح الحين تعبان بكره كلميني واجيبه لك
سكتت مها وابتسم يوسف يقفل شباكه:تصبحين على خير
مها عقدت حجاجها:الساعه ١ الظهر !
يوسف:تمسين على خير ولا يهمك واضح تبين تسولفين معي بس تراني نعسان مواصل
كشرت مها تقفل بوجهه وضحك يوسف يقفل جواله
'
مشت توليب تخرج مع عسّاف وهي ماسكه كفه وفتح لها باب سيارته تركب ومشى يركب ولفت عليه:مين يرجع لسيارتي ؟
عسّاف:تشيلين هم شي وانتي معي ؟
ابتسمت توليب تهز راسها بالنفي وحرك عسّاف:بمرّ العم لطفي اشوفه
توليب:أنا معاك
ابتسم من جملتها يناظرها ولف لطريقه لين وصلوا للمشتل وعقدت حجاجها توليب:هذولا هم ؟
وقف عسّاف خلف السياره والتفت العم لطفي اللي كان على وشك يركب سيارته
ونزلت توليب ونزل عسّاف:وين رايحين ؟
العم لطفي:كنت حوصلهم المطار
تقدمت توليب وناظرت صفيه وزينه ومحمد راكبين:بتروحون ؟
صفيه:اه ياحبيبتي محمد حتبدأ امتحاناته
عسّاف:ليه ما قلت لي انا احجز ؟
العم لطفي مسك كتف عسّاف:مش مشكله ما حصلش حاقه
عسّاف تنهد وانحنى للشباك:بنرجعكم للزواج قريب
ضحكت صفيه تهز راسها:على خير ياحبيبي
ابتسم عسّاف وتقدمت توليب لشباك صفيه:توصلون بالسلامه
صفيه:حنشتاء لك ياعروسه
ضحكت توليب واشرت لزينه اللي راكبه بالخلف وركب العم لطفي وابتعد عسّاف يوقف بجانب توليب وحرك العم لطفي وتنهدت توليب:اكيد بيزعل انهم سافروا بيشتاق لهم
عسّاف:نرجعهم يزورونه كل ماوده
ابتسمت توليب ولف عسّاف:تبين ندخل المشتل نقعد شوي ؟
هزت راسها ومشت معاه ودخل عسّاف المشتل ومشت توليب تناظر الورد بالمكان وتقدمت:عمو لطفي كل فتره يزرع شي جديد ، اول مره اشوفها هنا
تقدم عسّاف يناظرها تجلس عند الورد ولفت عليه تضيق عيونها:تتوقع يلاحظ لو اسرق الشتله ؟
ضحك عسّاف:اذا بتزرعينها ببيتنا أنا أسرقها لك
ابتسمت ووقفت:ماجبت طاري لأمي باقي كنت بشغلها بالاثاث بس شكلها بتنشغل بابوي
عسّاف:انا ما تكلمت مع امي للحين من يوم الملكه ترضين بذوقها لو اطلبها هي تأثث ؟
رفعت كتفها توليب بهدوء:عادي اكيد ما بتأثث بيتك بشي مو حلو لانها تكرهني
ضحك عسّاف يهز راسه بالنفي:لا ما تسويها وبشغلها قبل زواجنا
توليب سكنت ملامحها وتقدمت له تلمس كفه بخفه:حددت يوم معين ؟
عسّاف:المفروض انتي تحددين
توليب:باقي تبي بعد ما تخلص عدة أمي ؟
عسّاف:بعدها بالضبط
توليب:اخاف يسبقونا امي وابوي
عسّاف رفع كفه لشعرها:ويسبقونا مو انتي تبين ؟
توليب:ماعاد اعرف شي عن ابوي
سكت عسّاف وهو يناظرها وابتسمت توليب له:شكراً عسّاف على اليوم ودبل تي ما كنت متخيله بيوم انه بينجح
عسّاف:ليه ما ينجح وانتي معي ؟
ابتسمت تتأمله وصد عسّاف يناظر المشتل:ليه اشتهي سيقاره كل ماجيت المشتل ما ادري
مسكت كفه تناظره:ماراح تشمّها وانا موجوده
لف عليها عسّاف وابتسم:عشان الورد والا عشانك انتي ؟ لان اذا عشان الورد يخسى
ابتسمت تهز راسها بالنفي وعض شفته عسّاف يحذرها وسكنت ملامحها من حركته ترتبك منها وبلعت ريقها
وهمس عسّاف:عوضيني
سكتت توليب تناظره ونزل عيونه عسّاف لثغرها ورجع ناظر عيونها ولانت ملامح توليب من نظراته وصوته تدري انه يمتنع عشانها هي وعشان مارده يجبرها على شي وتشوف بعيونه ودّه وتقدمت له بهدوء لاحظه عسّاف ينزل عيونه عليها ما تفكر ما تتسرع ولا تتردد لانه على قد ما انتظرها هي ودها ترضيه وتعيش معه أحلامها ، غمضت عيونها من لمست ثغره تقبّله بخفه وسكنت ملامح عسّاف من ابتعدت بعد ثواني ما استوعبها وناظرته تبلع ريقها بتوتر من نظراته ورفع كفوفه عسّاف لوجهها وتقدم يرجع يقبّلها التقبيل الصحيح بالنسبه له وإشباع رغبته فيها وإشباع صبره عنها ، رجع يقبّلها على طريقته يسرق وقته يرضي قلبه يرفع كفوفه لمنابت شعرها يختلط ريقه بريقها يقطع أنفاسها ويضيّع أنفاسه منها
-
لأن القبله الأولى شهادة العشق الأبدي العشق الحرّ ، مكافأة ماضي صبور وأحلام مستقبل شغوف ، زهور تفتحت تصرخ فوحان شذى عطرها وورود تتلون بجميع أشكالها ، العالم من كل جهاته منشرح الكون راضي والشمس قبل ما تغرب وتعلن غروبها أشرقت من جديد داخلهم ، تلوّن الكون لا أبيض ولا أسود ولا حتى رمادي تلوّن بكل ألوان الربيع ، الحُب الأندى العفيف غاية النيّه الطموحه عنفوان الصبر واللهفه ، جواب اليقين في صراع الشك والتشكيك ، قنديل الفرح صفّق وغنى وأطرب وهنّى ، ردهة المشتل إنبثقت بعد ماكانت سجينة حضور وغيبه وجيّه ، أرسى جبل تهدّه لحظه مع الحبيب هدّ ثمود وتنزع الهموم من كل طرف كبود
'
سمر فتحت الباب وتنهدت من شافته:شتبي تركي؟
تركي:بتكلم معك
سمر:اي تكلم وش تبي
تركي:عند الباب ؟
سمر سكتت وبعدت عن الباب وتقدم يدخل وقفلت الباب سمر ومشت خلفه وجلس
تركي:سمر اذا نحنا رجعنا ماله داعي يخرب كل شي مع حنان
ضحكت بذهول سمر:والله ؟ عشان يصير عندك بيتين ؟ وزوجتين ؟ وتقوم حرب عليك ؟
تركي:ماهو عشان كذا عشان عيالي بس
سمر:اي طيب روح لعيالك شتبي فيني
تركي:سمر اتكلم منجد انا
سمر:وانا اتكلم منجد يا أنا ياحنان
سكت تركي وصدت سمر:وبعدين ليه مستنكر طلاقك لها بالثلاث ، سويتها فيني مو غريبه
تركي لف من سمع الباب ودخلت توليب وناظرته وتقدمت:سلام
سمر لفت:وعليكم السلام شصاير معك
جمد وجه توليب:وش صار ؟
سمر:مشروعك
توليب صدت تحاول تتذكر بس كل اللي تشوفه هو عسّاف ولفت من جديد عليها:بريّح واجيك
مشت تترك تركي بدون تكلمه ودخلت الغرفه وقفلت الباب وغمضت عيونها ، تذكر الموقف تماماً وكيف ابتعد عنها يطيّر عقلها وتركته محله واقف تخرج من المشتل وتركب سيارته
لحقها يركب وابتسم يلف عليها يشوفها تلعب بدبلتها وصاده عنه وحرك سيارته بهدوء ينطق:ارجعك البيت والا لسيارتك ؟
كانت تقاوم خجلها وودها تجاوب بس ماقدرت وابتسم عسّاف ومد كفه لكفها اللي كانت تلعب بدبلتها ولفت توليب عليه من قبّل كفها يمسكه ولف عليها مبتسم وصدت للطريق ترجف كفها بكفه هي تحت تأثيره الى الان وفراشات بطنها أبت أن ترتاح
انسدحت على السرير تبتسم وتمسك قلبها تعيش معه أفضل لحظاتها وكل مره ما يفشل انه يربكها
اخذت جوالها تقرأ رسايل غايه عن المشروع وصورتهم سوا وابتسمت تكتب لها:بيموتني من الحب
ضحكت غايه من تعبير توليب ووقفت عند بيت رياض وارسلت لرنا:انا تحت
انتظرتها وهي بسيارتها وناظرت سيارة عسّاف اللي وقفت خلفها ونزلت غايه وتقدم لها عسّاف:جايه تهدّين البيت على راس رياض ؟
غايه:يخسى ، جايه اعطي رنا اختك الكاميرا حقتي تبغاها عشان تصور تجهيزات دلع
فتحت الباب تاخذ الكاميرا وخرج رياض وابتسم عسّاف:عطيها رياض اجل
لفت غايه وناظرت رياض اللي جاي لها وضرب كتفه عسّاف يدخل تاركهم واخذت نفس:خذ
ناظرها تمد الكاميرا واخذها:وليه من قفى خشمك ؟
غايه ركبت ومسك بابها رياض:انتم مجانين ؟
غايه:مين احنا ؟
رياض:جنس حواء
غايه:لا انت غبي
رياض:وش تبي الوحده اكثر من انها تنخطب وما ينلعب فيها ؟
غايه سحبت حزامها:مدري اسأل عسّاف أخبر
رياض:عسّاف وعسّاف هذاك عسّاف انا رياض
غايه:عشان كذا محد يبغاك
سحبت بابها وناظرها رياض بذهول وحركت تاركته ومشى يدخل رياض وناظر عسّاف اللي منسدح على الكنبه بالصاله وحده ومغمض عيونه
رياض:وش فيك انت بعد ؟
عسّاف:سكري مرتفع من الحلاوه
رياض:وانت ليه تاخذ حلاوه ؟
ابتسم عسّاف ما يرد عليه واخذ نفس رياض يحط الكاميرا بحضنه:عسّاف انا حمار ؟
ضحك عسّاف وجلس وناظر رياض:على حسب
رياض:ياخي ليه مرتين انرفض ؟ والله اطلبهم صادق وانوي اخطب صادق
عسّاف:ردتك ؟
رياض:واخس من نجمه على الاقل نجمه اختفت لا هذي هبلت فيني
عسّاف ابتسم:ياخي سوّ شي تستنكره على نفسك
رياض:ازرع مية ورده عند بيتهم ؟
ضحك عسّاف:لا بس نفس المستوى
وقف عسّاف تاركه يطلع لغرفته واخذ الكاميرا رياض وفتحها وابتسم بذهول من شاف صور غايه وفتح فيديو من عيد ميلادها تصوره امها:تمني امنيه غايه
غايه:يعني ليش مو جايبين لي طراطيع كبيره ؟ حفله صغيره بالبيت ؟
أم غايه:قطعي الكيكه
ابتسمت غايه تقطع الكيكه وتضحك لهم ، كمل المقطع رياض وهو مبتسم ورفع عيونه من نزلت رنا وقفل الكاميرا:وينك انتي انادي عليك من اول
رنا:ما سمعتك ناديت
رياض:الا ناديت ، خذيها
رنا اخذت الكاميرا ووقف رياض وابتسم يطلع غرفته
'
البندري وقفت عند دلع اللي تقيس الفستان:وكيف وافقتي ؟
دلع ناظرت شكلها بالمرايه:ما اعرف حتى انا احسني بسرعه وافقت بس في داخلي شي يخليني ما اخاف
ابتسمت البندري تدور حوالين الفستان:حلو لايق عليك
ابتسمت دلع:صح ، بدخل اغير واجي نحاسب
هزت راسها البندري ورفعت صوتها دلع من داخل غرفة القياس:كيف خالتي ؟
البندري:باسوأ حالها
دلع:تكلمتي مع ابوك ؟
البندري:تكلمت بس واضحه نيته
خرجت دلع وهي تلبس عبايتها:تتوقعين تصير ويتزوج ام توليب من جديد ؟
البندري:ماعاد استبعد شي
دلع:ياليت خالتي تلين شوي على امي ويرجعون زي قبل يمكن امك تكون احسن مع امي
البندري:اخاف يرجعون بالشرّ لو تجمعوا
دلع:لا لا ما ظنتي امي عقلت خلاص بعد ما هبّل فيها عسّاف
سكتت البندري ثواني ولفت دلع:بخلي امي تكلمها تجرب تجي معكم الملكه
البندري:نهاية هالاسبوع ؟
دلع:اي تخيلي مشى اسبوع وباقي اسبوع
البندري:الله ييسرها
دلع ابتسمت:امين
مشت دلع تحاسب وتقدمت لها البندري:ما حددوا الزواج ؟
دلع:مين ؟
البندري:عسّاف وتوليب
دلع رفعت كتفها ولف على البندري اللي مشت تخرج قبل دلع ووقفت عند سيارتها تركب وركبت جنبها دلع:اوف اخيراً خلصنا كل شي
البندري حركت وهي هاديه ودق جوالها واخذته ترد:هلا أريام
أريام ضحكت:تعالي في خبر حلو
البندري:ابوي موجود ؟
أريام:لا بس تعالي
البندري:طيب بوصل دلع واجي
قفلت جوالها ووقفت عند البيت ولفت دلع:شكراً البندري مره
ابتسمت لها البندري ونزلت دلع وحركت البندري لبيتهم ونزلت تدخل وغطرفت حنان وعقدت حجاجها البندري:بسم الله امي شفيك
أريام:كنا نحتاج خبر يخلي امي تخرج من غرفتها
البندري:وش صاير ؟
حنان:جوك خطاب
جمد وجه البندري وتقدمت لهم وابتسمت حنان:تعرفين أم ناصر وبتول اللي كانوا جيراننا ؟
هزت راسها البندري وكملت حنان:ولدهم ناصر تعيّن طيار ودقت تخطبك له
أريام:طيار البندري طيااار
ناظرتهم بصدمه البندري وجلست برعب وابتسمت حنان:اي والله هذا العوض بحدد معهم يوم يجون وتشوفينه ويشوفك
البندري:امي شوي شوي تكفين خل استوعب
حنان طنشتها تاخذ جوالها ومشت تدخل ولفت أريام عليها:تحتاج مناسبه سعيده عشان امي وعشان يرجع ابوي
البندري:تتوقعين يرجع عشاني ؟
أريام:يرجع عشانك وعشان يوقف معك بخطبتك مستحيل يخليك
سكتت البندري تحس بتوترها وربكتها من الموضوع وصدت تفكر
'
دق الباب عسّاف ودخل راسه يشوف امه اللي ماسكه دفتر وتكلم واشرت له يدخل ومشى يدخل يسمعها:الله يسلمك وتشرفونا الملكه في بيتنا ان شاء الله حياك الله انتي وبناتك
جلس عسّاف قدامها وابتسمت هيله:امين امين
قفلت جوالها وتأففت:من بقي افتر راسي وانا اتصل اخاف انسى احد
سكت عسّاف يناظرها تقرأ من الدفتر ونطق:خالتي
هيله:عزمتها بتجي حنان وبناتها وشكلها ودها نتصالح
عسّاف:خالتي سمر مو خالتي حنان
رفعت عيونها هيله:تخسى اناديها
عسّاف:ليه ؟
هيله:لا تقعد تقولي ام زوجتي وما ام زوجتي سمر ما تدخل بيتي
عسّاف:عشانها سمر طليقة تركي والا عشانها سمر اخت حمد
سكتت هيله تناظر عسّاف وجلس بإعتدال:تكلم معي بملكتي
تغيرت ملامحها وهمست:وش يقول ؟ معك ابوك ؟
عسّاف:وحدي ، بس ماكان عندي خبر واظن حتى ابوي وعمي تركي ماعندهم خبر
هيله:موضوع قديم لا تفتحه من جديد
عسّاف عقد حجاجه:دامه موضوع قديم ليه تحاربين للحين ؟ ماهو عشان خالتي حنان ولا عشان عمي تركي تحاربين في حمد اللي فصخ خطبتكم بسبب اخته اللي اقنعته
بلعت ريقها هيله تسكت وكمل بهدوء عسّاف:امي عشان نسلم من حمد واللي عادي يسويه وعشان ما تخسرين ابوي نفس ما عمي تركي بتخسره خالتي حنان بسبب اطباعها ، اعلني الرايه البيضاء
هيله صدت بربكه وكمل عسّاف:زوجتي توليب واهل زوجتي توليب صاروا اهلي وابيك تحشمينهم وانا بحشمك واحشم ابوي واخواني بس امنعينا من الحروب
ضرب كفوفه ببعض:قضت خلاص وانتهت شيبنا وكبرنا والحين كل واحد منا بيتزوج
هيله همست:ابوك لا يدري عن شي مابي يفهم غلط
عسّاف:لو سمع كلام حمد يومها ؟ يقول انك تحاربين فيه للحين بيفهم انك تبينه للحين
هيله لفت بحده:عسّاف !
عسّاف:عشان كذا اقفلي الموضوع مع سمر
هيله:وانسى اللي سوته فيني ؟
سكت عسّاف وكملت هيله:كنت مخطوبه كتب كتابي بعد اسبوع راحت تشيش اخوها يفصخ الخطبه شوهت سمعتي ، الناس قالوا عايبه وفيها الف عيب
عسّاف:ليه قالت كذا ؟
هيله بلعت ريقها تناظر عسّاف:ما ادري
عسّاف:يمكن تعرف اطباعك ومشاكلك
هيله:وتروح تخرب فرحتي ؟ ويصدقها اخوها ما يسمع مني ؟
تنهد عسّاف يتربع امامها:امي السالفه اكبر من اخوي رياض حتى خلينا ننتهي منها ولا تدخلين بين عمي تركي وخالتي حنان ومشاكلهم ، سمر هذي صارت ام زوجتي وزوجتي بتصير وحده من بناتك مابي مشاكل تكفين
سكتت هيله تناظر عسّاف ووقف عسّاف يناظرها بهدوء ومشى يتركها
'
ركبت رموش علويه طرف وهي تتكلم:وعسّاف ؟
ردت توليب اللي تسوي شعرها بجانبها:ما شفنا بعض من اسبوعين هو كان مشغول وانا كنت مشغوله
غايه:قررتي قاعة زواجك ؟
توليب:قالي بيدور شي مناسب
غايه:يمديك تخلصين كل شي بشهرين بس ؟
توليب:اذا ساعدتيني
غايه لفت عليها:خلصت شرايك بالميك اب ؟
لفت توليب وابتسمت:حلوه زي القمر
غايه ابتسمت:بقوم البس وخلصي انتي عشان لا نتأخر
توليب عدلت روجها:ونتأخر عادي
غايه مشت لفستانها تفتحه:تدرين انصدمت ان دلع عزمتني ، ماتوقعت
توليب:في راسها شي اعرفه
غايه:تلمح لرياض اخوها ؟ راح اسحب عليها اجل
ضحكت توليب ووقفت:بلبس واجيك
لبست فستانها غايه ورفعت صوتها:باخذ دبل تي
اخذت الكريم تمسك يدينها العاريه واكتافها وتعطرت وخرجت توليب وابتسمت:شرايك ؟
لفت غايه تشوف فستان توليب الفوشي مع اندماج الوردي الفاتح وميلت راسها:توليب والله وردة توليب
ضحكت توليب وتقدمت للمرايه تعدل شعرها المنسدل على جهة اليمين ومن الخلف ورافعته من اذنها اليسار واكتافها عاريه ولابسه قلفز دانتيل نفس لون فستانها ولفت لغايه:تعالي اساعدك
لفت غايه وقفلت فستانها توليب وابتسمت:مو بس انا ورده
ضحكت غايه تشوف فستانها الاحمر:والله ؟
توليب:والله ، خلصتي ؟
غايه:اي بلبس كعبي واخلص
اخذت عطرها توليب تتعطر واخذت الباتشولي تتعطر فيه على شعرها ولفت تلبس عبايتها ومشت تخرج غايه ولحقتها توليب ولفت سمر:اهخ على الريحه الحلوه
غايه:عطور بنتك
ابتسمت سمر تناظرهم بإعجاب:تبارك الله ورداتي
توليب ابتسمت:ياليتك معانا ننبسط
سمر:مابقي الا هيله اروح اوجبها في بنتها ، لا روحوا انتم انبسطوا
غايه:ماراح نترك ولائنا لك اي كلمه ما تعجبنا بنردها عشر
ضحكت سمر ورمت بوسه بالجو لغايه وابتسمت غايه تخرج وتقدمت توليب تنحني تحضن سمر:استودعتكم الله
ابتعدت توليب ومشت تخرج مع غايه وركبت سيارة غايه وحركت غايه:كان رحنا بسيارتك
توليب:ما اعرف اسوق بالكعب انتي اشطر
تأففت غايه تسوق وابتسمت توليب من وصلتها رساله وقرتها منه:وينك ؟
عضت شفتها ترد عليه بربكه:جايه
قفلت جوالها ولفت تناظر الطريق بتوتر ووقفت غايه عند البيت:ماشاء الله السيارات كل هذولا موجودين
توليب:يالله لا تسولفين
نزلوا ومشت غايه وحضنت ذراع توليب تدخل معها ودخلوا يسمعون صوت الاغاني بالبيت وتقدمت للاستقبال توليب وطلعت رنا:هاااي
لفت غايه وضحكت:اخت العروس
تقدمت تسلم عليهم وابتسمت توليب:تأخرنا ؟
رنا:عن توقيع دلع اي ؟ بس باقي ما انزفت
توليب لفت تفصخ عبايتها وتعلقها وعدلت شكلها ولفت غايه:في ناس كثير ؟
رنا:على حسب مقدار الرهاب الاجتماعي عندك
ضحكت غايه تمشي مع توليب ودخلوا المجلس الكبير واخذت نفس توليب من انتبهت لنظراتهم لها وابتسمت بتوتر لنجود اللي استقبلتها وسلمت عليها:تعالي اعرفك
تقدمت توليب مع نجود للحضور:هذي عمتي عزه
ابتسمت توليب تسلم عليها وكملت نجود:وهذول بناتها
سلمت عليهم تسمع تعريف نجود للحضور ولفت من شافت حنان والبندري وأريام ووقفت عندهم ماتعرف هي تنسحب او تسلم لانها امام انظار الحضور ووقفت البندري وناظرتها توليب وتقدمت تسلم عليها بهدوء ووقفت أريام تسلم عليها ولفت توليب لحنان اللي جالسه وصدت تتركها ووقفت هيله تجامل امام الحضور:هلا هلا
صافحتها توليب تشعر بنظراتها ومشت تجلس مع غايه وناظرت الحضور اللي يناظرونها وهمست غايه:اول مره يشوفونك ؟
توليب:لا بملكتي حضروا بس ما اعرف الصدق
تقدموا موظفات يصبون لهم قهوه واخذت فنجان توليب وضحكت غايه:بتشربين قهوه من التوتر ؟
توليب:باخذها عشان ما يقولون شايفه نفسها
ضحكت غايه تشرب قهوتها ولفت توليب تناظر حنان وهيله اللي يسولفون دليل عودتهم وتحسن علاقتهم
'
قاعد ويشوف الحضور من الرجال اللي يتبادلون العلوم الغانمه كما يقال عنها ، تحت ريحة الهيل والبن وضجيج فناجين القهوه وبيالات الشاي لف على رياض اللي بجانبه:أبوي ما ترك ضيدان لحظه شكله بيحبه اكثر منا
ضحك رياض يناظر ابوه اللي يسولف مع ضيدان ولف لعسّاف:بوريك شي
طلع جواله ومدّ لعسّاف الرساله وعقد حجاجه عسّاف ورفع حاجبينه بذهول:وشو شاعر صرت ؟
رياض:لا كلمت شاعر يكتب لي قصيده بلحنها واخلي مغني يغنيها
ضحك بذهول عسّاف:والله اطلق من مية ورده ما انت هيّن
رياض:نقدت نفسي بس شكلي بديت افهم جنس حواء متى ما نقدت نفسك اعرف انك بتعجبهم
ضحك عسّاف واخذ جواله من جيبه يرسل لها:بشوفك
لفت توليب من وصلتها الرساله وابتسمت تقراها ورفعت عيونها للحضور اللي موجودين وارسلت له:بوسط كل هذا الازدحام ؟
عسّاف:غرفتي مافيها ازدحام
عضت شفتها بتوتر ولفت لغايه:بعدل مكياجي وراجعه
هزت راسها غايه ووقفت توليب تخرج وبيدها شنطتها وطلعت مع الدرج بحذر وهدوء عن ضجيج كعبها وطلت على الغرف تجهل غرفة عسّاف ومكانها وتقدمت تعقد حجاجها واخذت جوالها من شنطتها وشهقت من سحب ذراعها وعقدت حجاجها بألم وفتح باب الغرفه يدخل وناظرته برعب توليب:عسّاف !
قفل الباب وناظرها وابتسم وارتبكت وبلعت ريقها ولفت تناظر غرفته ونزل عيونه عسّاف لفستانها يناظره وابتسمت تتأمل غرفته:اول مره اشوفها
رفعت شعرها وعينه عليها وعقد حجاجها وابتسم من الدانتيل اللي يغطي نص ذراعها وكتوفها عاريه تلمع بشكل يذهل العين مرتويه بجلد زجاجي
تقدم لها عسّاف ومسك كفها:ومن فتره ماشفتك
لفت عليه توليب وابتسمت:جربت تشتاق لي ؟
عسّاف:انا دايم مشتاق لك
بلعت ريقها من نظراته وصدت بعيونها:غرفتك تشبهك كل شي ساده مريح بدون تكلّف
ابتسم عسّاف ورفع كفه يلمس شعرها ولفت تناظره:ماراح أطول جيت اشوفك وبرجع عشان دلع
عسّاف رفع كفوفه لشعرها وعنقها يبعد خصل شعرها:مين دلع ومين إحنا ؟ وكيف خليتك عمري كله اللي فات ؟
ابتسمت تناظره وكمل عسّاف:ليه أشغلتني دنيتي عنك ؟
نزلت عيونها لثوبه:قدرت تخليني اسبوعين
عسّاف:اشتميني
عضت شفتها تحذره وضحك من حركتها اللي تنسخها عنه وابتسمت تسمع ضحكته وتشوفه كيف رفع راسه يضحك ورجع ناظرها ما يقاوم شوقه لها وتعبيرات وجهها معه وجمالها امامه اليوم وتقدم لها اكثر وعرفت بنيته
توترت ترفع كفوفها لكفوفه ودها توقّفه بس هي تحت تأثيره وعرض جسمه أمامها وحجم الشوق داخلها وهمست:ثوبك أبيض
كان مقصدها تخاف ينعدم وهو فهمها يهمس:فِدا
ابتسمت ترفع عيونها لشماغه وعقاله ، تموت على هندامه وشكله ، تموت على فصاحة حبه ووضوح مشاعره ووفرة افعاله معها
ورجعت ناظرته وتقدم لها يستوعبها يقبّلها وغمضت عيونها تشد على كفوفه ورجع بها خطوه وهو يقبّلها وابتعدت عنه تاخذ نفسها وهمست:عسّاف
ميّل راسه يبوس دقنها ومسكت كفوفه تترجاه:عسّاف
ابتعد عنها وناظرها:مو جيتي تشوفيني ؟ هذي نتيجة الشوق
ناظرت عيونه وهي ساكته وهز راسه بالنفي عسّاف وعض شفته يحذرها:لا تطالعيني
ابتسمت ابتسامه خافته واقترب منها يكرر تقبّيله لثغرها واخذ شماغه بكفه يبعده ومسكت الطاوله اللي خلفها توليب تشعر بتقبيله لها وغمضت عيونها من ابتعد عنها يناظرها وفتحت عيونها بخفوت وسكون وابتسمت تشوف شعره ولفت تشوف شماغه اللي بيده:لازم ارجع
عسّاف:قبل تطيرين عقلي اكثر ؟ اي لازم
انسحبت من أمامه ولف عسّاف عليها ومسك ذراعها ولفت عليه تضحك:قلت لازم
ابتسم:ريحتك حلوه
ابتسمت وتقدم لها يحضنها وعضت شفتها ترفع ذراعينها حوالين رقبته وغمضت عيونها تستند براسها على كتفه ترتاح بحضنه في ذراه وحنيّة جناحينه
ونزل راسه عسّاف يقبّل كتفها يشمّ عبق جسدها ونعومته وابتعدت عنه وهي مبتسمه
ونطق عسّاف:انا برجعك لا ترجعين مع احد
ابتسمت تهز راسها ومشت عنه وابتسم وهو يعدل شماغه من جديد وضحكت بخفوت تخرج تاركته ومشت تنزل وهي مبتسمه ودخلت المغاسل تعدل روجها وجات بتخرج ووقفت تسمع اللي يتكلمون عند الباب
:شفتي اللي اخذوها لعسّاف ؟
:قصدك سرقته من اختها ، ياحياتي البندري قامت وسلمت عليها هذا وهي سارقته منها
:كل هذا عشان تنتقم لامها ؟ تقوم تسرق رجّال اختها ؟ الله العالم وش سوت له عشان ياخذها ويترك اختها
:وش اسمها هي ؟ ورده مدري جوري !
خرجت توليب ولفوا يناظرونها وتغيرت وجيههم وناظرتهم توليب:توليب اسمي توليب
سكتوا ومشت تتركهم واحتدت ملامحها بغضب من اللي سمعته ودخلت وجلست بجانب غايه ولفت عليها غايه:شفيك ؟
توليب:مافيني شي
رفعت راسها من اشتغلت زفة دلع ووقفت هيله تستقبلها وابتسمت من دخلت دلع ورجفت كفوفها اللي تمسك وردها تناظر الحضور وام ضيدان اللي تغطرف عند الكوشه الصغيره اللي بصدر المجلس وتقدمت تخطي وابتسمت من شافت وقوف البندري وأريام وتقدمت البندري تحضن دلع ولفت حنان تناظر توليب وفهمتها توليب بإن مقصدها هم بنات خاله ومردهم يرجعون لبعض وهي المفروض تكون دخيله بينهم ، صدت توليب عنهم تشرب من العصير اللي أمامها وجلست دلع وسطهم وابتسمت لها توليب من مكانها تشوف وقوف خواتها بجانبها وضحك البندري مع نجود ورنا ووجود أريام بينهم تصور دلع
لفت لغايه وهمست:أحسني غريبه بينهم
غايه:شتقولين عني ؟ الأطرش في الزفه فعلاً
توليب صدت ونطقت غايه:طيب نسلم على دلع ونروح ؟
هزت راسها توليب ووقفت ومشت لدلع اللي وقفت وحضنتها وابتسمت توليب:مبروك دلع الله يوفقك يارب
دلع ابتسمت وابتعدت عنها:الله يبارك فيك
تقدمت غايه وضحكت دلع:عقبالك
ابتسمت غايه تسلم عليها:انا وتوليب نستأذن
لفت هيله تناظرهم ووقفت حنان تتكتف تناظرهم
دلع ناظرت توليب بذهول:لا توليب بدري ما تعشيتي حتى
توليب:ماودي اتأخر على امي
دلع:طيب كلمتي عسّاف ؟
ابتسمت توليب:شفته قبل شوي
صدت البندري تناظر امها اللي واقفه وتقدمت هيله:تدلّون
ناظرتها توليب وسكتت ومشت تخرج وخلفها غايه ووقفت توليب تاخذ عبايتها وخرجت حنان تتبعها البندري:امي خلاص
لفت توليب تناظر حنان اللي متجهه لها ووقفت أمامها وسكتت توليب
حنان:امك بترجع تلعب معي وتاخذ ابوك ؟
توليب:انتي ما فهمتي الى الان ؟ ابوي يموت في تراب امي
وقفت البندري تناظرهم وكملت توليب:فرقتيهم ٢٠ سنه واكثر بس ما قدرتي تشيلينها من قلب ابوي
حنان:مستحيل تركي يتزوج امك
توليب:ليش بترجعين تسوين مشاكل من جديد ؟
خرجت هيله ومعها رنا وتقدمت لهم ولفت توليب عليها:لو بتجربون تضرون امي وابوي من جديد بيوقفون قدامكم عيالكم
سكتت هيله وناظرتها توليب:واكيد ماودكم تخسرونهم
هيله:تلمحين ان عسّاف بيوقف بوجهي ؟
توليب:عسّاف ورياض والبنات وحتى يوسف والبندري وأريام
لفت على حنان:كلنا بنوقف قدامكم
حنان:قبل ما ادمر زواجك بعسّاف والا بعده ؟
البندري:أمي !
ناظرتها توليب ورفعت كفها اليسار:تأخرتي
ناظرت الدبله حنان وصدت هيله عنهم ومشت تخرج غايه وتبعتها توليب ولفت حنان لهيله:شفتي وش سووا فيني ؟
هيله:ماهو وقته الحين المجلس مليان ضيوف خليهم يطلعون ونتكلم
حنان:هيله ماراح تخلينهم يفوزون بتركي ، ماراح تخلينهم ياخذون عسّاف وتركي
تكتفت البندري بضيق تناظر امها ومشت تدخل هيله مع حنان ولفت رنا:امك باين تعبانه
همست البندري:حيل
تنهدت رنا ومشت تدخل البندري خلفهم واخذت جوالها رنا ترسل على عسّاف
'
مد ذراعه وهو يرحب:حياكم الله
فتح صحون العشاء رياض واخذ جواله عسّاف ورفع راسه من تقدم ضيدان:اقلط عسّاف
ابتسم عسّاف:انت العريس انطح فالك
ضحك ضيدان:شفت ابوي يسولف مع عمي عبدالمحسن ناسين موضوعي بس ماودكم ادخل ؟
تقدم رياض وضحك:حنا سوينا نفسنا ناسين نغار على اهلنا
ضيدان:عاد صاروا اهلنا الحين
ابتسم عسّاف:ثواني اكلم اهلي
ابتسم ضيدان ومشى عسّاف ودق على رنا وردت:قريت رسالتي ؟
عسّاف:لا ضيدان بيدخل عطي امي خبر بيدخل مع ابوي
رنا:طيب ثواني
قفل من رنا والتفت لابوه يناديه ومشى عبدالمحسن:هلا
عسّاف:ما بتدخل مع ضيدان ؟
عبدالمحسن لف للضيوف اللي يتعشون:الا عطنا درب
عسّاف:كلمت رنا الحين
عبدالمحسن لف لضيدان:حياك ضيدان
مشى ضيدان ورفع ذراعه رياض على كتف عسّاف:تعال
مشى عسّاف مع رياض خلف ضيدان وابوه ودخلوا وطلعت لهم هيله وابتسمت:يامرحبا يامرحبا
ابتسم ضيدان يتقدم لها يسلم عليها:مبروك ياخالتي دايم الافراح
ضحكت هيله:انت اللي نبارك لك ، مبروك وزين ما اخترت عز الله
ضيدان:انا اشهد
لفت هيله على عسّاف:باقي موجود ماشاء الله
عسّاف:ليه وين بروح ؟
هيله:حياك ضيدان
عقد حجاجه عسّاف ومشى خلف ضيدان وابوه يدخلون على غطاريف النساء والاغاني الطربيه ووقفت دلع بربكه تناظره داخل مع ابوها وتقدم لها ومسك كفها وتقدم يسلم على خدها بخده وابتعد:ماشاء الله تبارك الله
توترت دلع ولفت لابوها اللي تقدم وحضنته وابتسم عبدالمحسن:اغلى بناتي
دلع ابتسمت وابتعدت عنه وتقدم رياض وضحكت تحضنه:لا تودوني معاه
ضحك رياض وابتعد يسلم عليها:انتي أشرّي وتم
ابتسمت دلع وتقدم لها عسّاف وحضنته دلع:باقي اختكم أنا
عسّاف ضحك:ازهليني اي غلطه بيروح فيها
ضحكت دلع وابتعد عنها ومسك كفها عسّاف يطمنها وتقدمت هيله بالشبكه وجلست دلع بجانب ضيدان
لف عسّاف يناظر حوله والتفت من قرصته من الخلف نجود:لا تدور عليها ماهي موجوده
عقد حجاجه عسّاف:توليب ؟ وين راحت ؟
رنا تقدمت:ارسلت لك ليش ماقريت رسالتي ؟
طلع جواله عسّاف يقرأ رسالة رنا:توليب خرجت مع غايه وتهاوشت مع امي وخالتي حنان بس كانوا لوحدهم
تنهد عسّاف والتفت يناظر امه اللي تمد الدبل لضيدان واخذ الدبله ضيدان ومسك كف دلع ورجفت كفها ورفع عيونه لها:لا ترتبكين مامن خوف
بلعت ريقها ولبسها دبلتها وغطرفت ام ضيدان وابتسم ضيدان واخذت الدبله دلع تلبسه ومسك كفها قبل تتركها وابتسم والتفت للمصوره اللي تصورهم وخرج عسّاف وناظرته هيله ومشت خلفه وطلعت:عسّاف
لف عسّاف عليها وعقد حجاجه:جات وتهاوشتم ؟
هيله:ماهو أنا خالتك
عسّاف:وخالتي تصالحت معك من هنا وسببت مشاكل من هنا ؟
هيله:ما قالت شي غلط تكلمت عن تركي
عسّاف:وينه تركي هذا ؟ ليه يدخل بكل شي ويدمره ؟ حتى ملكة اختي دلع ما حضرها
هيله تنهدت تصد ولفت من جديد على عسّاف
عسّاف:أمي هذا البيت بيت أهلي واللي كانت موجوده زوجتي ، ان جات لهنا تجي محشومه وتطلع محشومه قدرها من قدري
سكتت هيله ومشى يخرج عسّاف واخذ جواله ودور رقمها يدق عليها
دخلت البيت توليب تسمع رنين جوالها ولفت سمر:رجعتي بدري
اخذت جوالها توليب وناظرت اسمه وردت:هلا عسّاف
عسّاف ركب سيارته:ليه رحتي ؟
توليب تقدمت لسمر اللي تناظرها:سويت واجبي وخرجت
عسّاف:وصلتي البيت ؟
توليب:اي
عسّاف:طرّفي شباكك
سكتت ثواني توليب وابتسمت بخفوت وقفلت جوالها وجلست
سمر:وليه وجهك كذا ؟
تنهدت توليب:ما اعرف حسيت نفسي غريبه بالمكان
سمر:ماخذه ولدهم كيف غريبه ؟
توليب ناظرتها ورفعت كتفها:اكتشفت اني بوجود عسّاف احس بأمان بس بدونه اليوم شفت نفسي غريبه
سمر اخذت كوبها:عادي اي وحده تتزوج شخص من بعيد تشوف نفسها بعيده
سكتت ثواني توليب وهي تناظرها:ابوي ماجاك ؟
سمر:الا بس مافتحت الباب سويت نفسي مو بالبيت
توليب:ليه ؟
سمر:مالي خلقه
توليب:بتتزوجينه
سمر لفت على توليب وهزت راسها ورجعت تصد:اي طيب
توليب:امي انتي متأكده انك سامحتي ابوي ومستعده تعطينه فرصه ثانيه ؟
سمر:مو وقته ، تعشيتي ؟
توليب:عسّاف جاي
سمر:اي زين روحي غرفتك وانا بدخل انام
وقفت سمر تحط كوبها ومشت تتركها وتنهدت توليب تلاحظ تهرب سمر ومشت تاخذ عبايتها وشنطتها وتدخل الغرفه وجمدت ملامحها من شافت عسّاف جالس على الكرسي:عسّاف !
عسّاف حط شماغه وعقاله بجانبه:مو كنتي تنتظريني ؟
مسكت صدرها تاخذ نفس ودخلت تقفل الباب:بس ماقلت انك وصلت وكيف دخلت ؟
عسّاف ناظرها واقفه بفستانها وسكت ومشت توليب تنزع القلفز الدانتيل من يدها:ماتعشيت ؟
عسّاف:لا
لفت تناظر نظراته لها:ببدل واجيك
وقف ومشى لها واخذت نفس تسكن ملامحها من مسك كتوفها:خرجتي من بيت أهلي زعلانه ؟
ماردت عليه توليب ورفع كفه عسّاف لشعرها:تهقين يمرّ عادي عليّ ؟
توليب:ماصار شي يزعّل ، معتاده مع خالتك اللي هي زوجة ابوي لا تحط اللوم على نفسك إنت
عسّاف:ببيت اهلي يعني ببيتي وإنتي زوجتي
توليب ابتسمت:مره ثانيه لا تخليني لحالي عندهم
ابتسم عسّاف من ابتسمت له:ازهليني
اتسع مبسمها وهزت راسها:ببدل واجي
مسك ذراعها قبل تروح:سكري منخفض
تلاشت ابتسامتها بقلق:دقيقه اجيب لك شي حالي
عسّاف:نبدله بالموجود ؟
سكتت تناظره وتقدم لها يميّل راسه يقبّلها وابتسمت بمنتصف قبلته ومسك وجهها ورفعت كفوفها على صدره تبعده وابتعدت عنه:اذا بتكون مشاغب راح اطردك
عسّاف رفع كفوفه يستسلم وابتسمت تاخذ شماغه:هذا بيبقى عندي
مشت عنه تحط شماغه على سريرها ونطق عسّاف:ثاني شماغ تاخذينه كل مره بجيك لابسه بترجعيني بدونه ؟
ابتسمت توليب تتجاهله:ماتعشيت
عسّاف سكت من دخلت تغير واخذ جواله يطلب لهم اكل ولف يرفع صوته:توليب تراني صادق سكري منخفض
توليب رفعت صوتها من داخل غرفة ملابسها:مالي تأثير عليه ؟
ضحك من مكانه وصد للشباك وخرجت توليب وهي لابسه روبها:بجيب لك عصير لا تدوخ
عسّاف نزل عيونه لروبها الوردي:دخت وخلصت
ابتسمت تخرج من الغرفه وحك شاربه عسّاف يرتاح على الكرسي بغرفتها ولف يناظر غرفتها كان حلمه يقعد فيها لها بريق وتأثير وكأنها حضن ماهي جدران ، وريحتها لا تقاوم
دخلت توليب ومدت له عصير واخذه ومشت تشغل شموع غرفتها ونطق عسّاف:طلبت عشاء لهنا
توليب ابتسمت:تلمح انك بتطول هنا ؟
عسّاف:يومين ثلاث ؟ اي المح
لفت عليه توليب ومشت تجلس أمامه وابتسمت:تركتهم وجيتني ؟
عسّاف:هذا المفروض ليه تستغربينه ؟ أهدّ الدنيا وراي واتعشى هنا معك بغرفتك
ابتسمت وميلت راسها تناظره وحطت رجلها فوق الاخرى وهي لابسه سليبر فرو وخلخال ملون وناظر قدمها عسّاف ورجع ناظرها:ما اسمع صوت أنغام بالغرفه ليه ؟
ضحكت توليب ولفت تقوم وناظرها عسّاف تتجول أمامه بالغرفه لابسه روبها وترفع شعرها عن وجهها حوالينها شموع الغرفه وشمعدانات طويله وورد توليب بفازه ، اشتغل صوت أنغام بصوت منخفض بالغرفه واخذ جواله اللي يدق ورد:هلا
ناظرته توليب ومشت تجلس أمامه وحط العصير وقام:طيب
قفل جواله:العشاء وصل
ابتسمت ومشى يخرج من الشباك وغمضت عيونها توليب ترفع راسها براحه ولفت من دخل عسّاف وبيده الاكياس وحطها بينهم:تعرفين وش يعني جيعان ؟ زين ما اكلتك للحين
ضحكت توليب واخذت الاكل تحطه قدامهم وفتح عصيره عسّاف يشربه وابتسمت توليب تتأمله ياكل لابس ثوبه وساعة يساره ودبلته وبشعره المبعثر وبدأ ياكل وبدت تاكل أمامه
ابتسم عسّاف يتلذذ بالاكل:الاكل لذيذ والا انا جيعان والا عشانك قدامي ؟
ابتسمت توليب:الثلاثه
رجع ياكل عسّاف ودق جواله واخذه يناظر الاسم ورد:هلا
رياض:وين اختفيت ؟
عسّاف:رحت بيتي عند أهلي
ابتسمت توليب وضحك رياض:ابوي يسأل عليك ماتعشيت
عسّاف:تعشيت ماهو حلو عشاكم
رياض:اثقل اثقل ماهي زينه هالخفه
عسّاف:لحنت الاغنيه والا باقي ؟
عض شفته رياض يضحك وضحك عسّاف:سلام
قفل جواله وناظر توليب يوقف:بغسل
هزت راسها ومشى يدخل الحمام وناظر البانيو والشموع ومنتجات دبل تي وابتسم يغسل وهو يتأمل اغراضها وفرشاة أسنانها ومشى يخرج وهو ينشف يده وتلفت يناظر اغراضها وابتسمت توليب تشوفه يفتح ادراجها:عسّاف !
عسّاف:مابين المتزوجين خصوصيه
عضت شفتها بحيا وقامت من فتح ادراجها وقفلتها:عسّاف
عسّاف:شفيك ؟ خليني اشوف
وقفت قدام الدولاب:ارجع اجلس والا بطردك واقفل شباكي
عسّاف ابتسم ورفع كفه لاطراف شعرها يلعب فيها:ما تسوينها ، تحبيني
ابتسمت تناظره لانه يوترها ونزل عيونه عسّاف لروبها:ما من حدود بيني وبينك ، كل شي تملكينه لي وكل شي يخصك لي وانتي وحدك لي
مسك ربطة روبها ومسكت كفه توليب ومشت بتروح وحط ذراعه الاخرى حولها وهمست:عسّاف
عسّاف ناظر عيونها:اي أحب اسمي منك كرريه
سحب ربطة روبها وناظر قميص نومها ورجع ناظرها:هو في غير الروب ؟
صدت بربكه بعيونها تمسك كفه ونزل عيونه عسّاف لدانتيل قميصها اللي يغطي صدرها وبقيته حرير وانحنى يقبّل رقبتها ودخل يده على ظهرها من تحت الروب وغمضت عيونها توليب من اندفاعه لها ومن الدولاب اللي خلفها ورفعت كفها على شعره ورقبته وابتعد عن عنقها يقبّل خدها وفتحت عيونها من ابتعد عنها وناظرها من قريب وسكنت ملامحها تتأمله وعض شفته يحذرها وتقدمت تقبّله ورفع كفوفه لوجهها يقبّلها وابتعدت عنه تسمع الباب يدق وناظرت الباب والتفت عسّاف على الباب ورجع ناظرها:ماهو لازم تفتحين
تركته تمشي وتربط روبها وفتحت الباب وناظرت سمر وتكتفت سمر:ابوك برا
عقدت حجاجها توليب ورفع حاجبينه عسّاف اللي يسمعها من مكانه ولفت توليب على عسّاف:انت رايح اساساً
هز راسه بالنفي وابتسمت توليب تخرج تاركته وابتسم عسّاف ومشى وتنهد واخذ جواله ومشى يخرج من الشباك
'
خرجت توليب وناظرت تركي اللي جالس وجالسه امامه سمر ومشت وناظرته:تبيني ؟
تركي:اي جاي عشانك
توليب جلست ورفعت حاجبينها:غريبه
رفعت روبها على رقبتها تناظر تركي ولف تركي على سمر ورجع ناظر توليب:أنا وأمك بنرجع لبعض وبنتزوج من جديد
سكتت توليب وكمل تركي:اعرف انك تظنين انه عشان انا ودي بأمك بس هو عشانك انتي بعد
توليب ابتسمت:فهمت اللي ابي افهمه ابوي من زمان ماراح تعدل شي
تركي:توليب اسمعيني لا تقاطعيني
توليب تقدمت تناظره:انت تحاول تنجح كزوج بس فشلت كأب ، لي ولاخواني ، انت حتى ما حضرت ملكة دلع الليله وهي تعدك عمها
سكت تركي وناظرتها سمر وهي ساكته وكملت توليب:تبي تتزوج عشاني لا تتزوج ، تبي تتزوج عشان امي الله يهنيكم
تركي:توليب ادري اني غلطت معك ومع اخوانك بس انا حياتي للحين ما استقرت
توليب:انا حياتي استقرت ركضت وراك وكنت بخسر الرجّال الوحيد اللي بيعوضني عنك ، الحين انا بتزوج ومابدور منك شي يكفي تعوض امي
وقفت تتركه وسكت تركي ينزل راسه وناظرته سمر ورفعت حاجبينها:وش كنت متوقع يعني ؟
تركي رفع راسه:ادري بتلين بعد فتره بعد ما نتزوج
سمر:قصدك بعد ما تطلق حنان ونتزوج
تركي سكت وناظرته سمر:وشو لا يكون ما بتطلقها ؟ لا تحاول تلعب بي تركي زواج ما راح اتزوج وحنان على ذمتك
تركي:البندري جوها خطّاب وبكون معها بعدها نتكلم
سمر:الله يوفقها
ناظرها تركي ووقف يتركها ومشى يخرج من البيت ووقفت سمر ومشت لغرفة توليب ولفت توليب:انتي ناديتيه ؟
سمر:هو جاء بنفسه
توليب:ما اصدقه
سمر:كنتي تصدقينه
توليب:قبل ما الاقي عسّاف اي ، ما كنت اتوقع اني بنحب لهالدرجه كان شحيح عليّ ابوي وماعاد ابي قلّته
سمر تكتفت تناظر توليب وفصخت روبها توليب:بنام تصبحين على خير
مشت تخرج سمر ودخلت الحمام توليب ورفعت شعرها تغسل وجهها وبكت من حست المويه وناظرت شكلها ماتعرف ليه الضيقه اللي جاتها من ابوها ولا تعرف كيف تداوي نفسها منه وتتخطاه ، بلعت ريقها تنشف وجهها وخرجت وفتحت سريرها تنسدح وسهت بين مخداتها تناظر السقف وغمضت عيونها تتذكر عسّاف اللي ترك كل شي وجاها ياكل معها عند شباكها ، لفت تاخذ جوالها واتصلت عليه
ونزل عسّاف من سيارته واخذ جواله وابتسم من اسمها ورد:اليوم كل شي مستغرب منك
توليب سكتت تسمعه ودخل عسّاف يقفل الباب بهدوء:مادريت انك مندفعه لي ، تتصلين زياده ؟
توليب اخذت نفس وهمست:أحبك عسّاف
وقف عسّاف يسمع صوتها ولانت ملامحه يسكت وكملت توليب:إنت أحلى شي بحياتي
عسّاف لف يناظر الباب:أرجع لك ؟
ابتسمت توليب وانسدحت تنغمس بمخداتها:لا بس لا تتركني
عسّاف:أبوك وش قال لك ؟
توليب:ولاشي مهم
هز راسه عسّاف وابتسم:وأنا أحبك أكثر
ابتسمت توليب:تصبح على خير
عسّاف:وإنتي من أهله
ابتسم يقفل جواله وناظره ومشى يدخل البيت
'
دخلت عليها وهي تحط مكياج ولفت:ابوك وصل ؟
البندري:لا كلمته يقول جاي
حنان هزت راسها ووقفت:زين شكلي ؟
ابتسمت البندري تهز راسها وابتسمت حنان:بنتكلم انا وابوك بعد ما يروحون الخطّاب متأكده بيرجع البيت
البندري:ان شاء الله
مشت تخرج حنان ولحقتها البندري وتقدمت تشوف الضيوف اللي وصلوا وتسمع ترحيب حنان لهم
تقدموا يسلمون عليها وابتسمت البندري لانها تعرف بنات الجيران وعلاقتهم جيده بس ما ظنت بيوم ان ممكن نصيبها يكون بجانب بيتها وهي ماتدري ، ماظنت ان بيوم كل احلامها اللي رسمتها مع عسّاف بتكون مع شخص اخر ماتعرفه
لفت تجلس بجانب حنان وابتسمت بهدوء تعكس ربكتها اللي تشعر بها ومشاعرها ولفت أريام من سمعت صوت تركي ينادي وابتسمت البندري براحه ووقفت أريام ولفت حنان تتوتر من سمعت صوته ووجوده بالبيت ولفت تداري ربكتها:نورتونا يا أم ناصر من يوم نقلتم وانقطعت اخباركم
أم ناصر:انشغلنا بالبيت الجديد وناصر على طول توظف وعبير بنتي ولدت قبل شهرين
ابتسمت حنان:ماشاء الله مبروك ماجاكم
ابتسمت عبير تهز راسها وناظرت البندري اللي تناظر فنجانها وهي ساهيه:شلونك البندري ؟
رفعت راسها البندري وابتسمت:حمدلله بخير
عبير:من زمان ما شفناك احلويتي
لفت حنان وابتسمت للبندري:قومي صبي لهم
قامت البندري ودخلت أريام وناظرتها حنان وابتسمت لها أريام:أمي ابوي يبيك
وقفت حنان بلهفه:عن إذنكم
مشت وهي مبتسمه وخرجت وناظرت تركي:هلا تركي
تركي:ناديت البندري وينها ؟
تلاشت ابتسامتها حنان وهزت راسها وكمل تركي:الولد يبي يشوفها
بلعت ريقها ومشت تدخل وناظرت البندري:البندري شوفي ابوك وش يبي
لفت البندري ووقفت تخرج وجلست حنان وابتسمت ببرود تاخذ فنجانها ووقفت اريام تخرج مع البندري
تقدمت البندري لتركي وابتسمت:ابوي
ابتسم تركي وتقدمت تحضنه ومسح على ظهرها:ادخل معك ؟ الولد بيشوفك
البندري مسكت كفه تبتعد:لا تخليني
سكت تركي يناظرها ليه يسمع هذا الرجاء دايم من بناته ليه عايشين في خوف فقدانه وهو حيّ
هز راسه ومشى معها وكفه بكفها ودخل المقلط ووقف ناصر من شافهم وناظرته البندري وسكنت ملامحها تشوف ابتسامته ، شخص ماتودّه ماتعرفه ما حلمت فيه ولا تمنته
بلعت ريقها تجلس بجانب تركي وصدت بعيونها تشد على كف تركي وابتسم تركي:أغلى عيالي بنتي البندري
لفت البندري على ابوها وابتسمت له وكمل تركي:ويوم اقول اغلى شي ابي اللي ياخذها يقدّرها غاليه ما يبخس بها
ناصر ابتسم يهز راسه:ان جات تحت جناحي وربي تمم بتكون غاليه عندي نفس ماهي غاليه عند ابوها
لفت البندري تناظر ناصر ونزلت عيونها بربكه لكفوفها وابتسم تركي يهز راسه وقامت البندري تخرج وقابلتها أريام تبتسم:شصار ؟
البندري اخذت نفس بتوتر تهز راسها:ما اعرف بدخل غرفتي دقايق
هزت راسها أريام ومشت البندري تدخل واخذت نفس متكرر وجلست عند مرايتها ثواني ودخلت حنان لها وابتسمت:شلون لقيتيه ؟
رفعت كتفها البندري وتقدمت لها حنان ومسكت كتوفها:والله انهم طيبين
سكتت البندري ولفت من دخل تركي وناظرته حنان وتقدم لها تركي:لا تفكرين وتخافين انا معك بأي قرار تاخذينه مهما كان
ابتسمت البندري تناظره ولفت حنان على تركي:تركي ودي نتكلم
لف تركي عليها:بودع الضيوف واجيكم
مشى يخرج وخرجت حنان وابتسمت من قاموا:نشوفكم على خير يا أم يوسف
حنان:على خير يارب
خرجوا وقفلت الباب حنان وجلست بالصاله ودخل يوسف:هاه وين العروس
ضحكت أريام:لا تغثها واضح متوتره
يوسف ابتسم ودخل تركي ولف عليه يوسف:كيف لقيت الولد ابوي ؟
تركي:طيبين نعرفهم جيران وولدهم مصلي بس ماودي اضغط على البندري
أريام تنهدت ولف تركي على حنان:وش بغيتي قبل اطلع ؟
سكتت حنان ولف يوسف:وين رايح ابوي ؟
تركي:مكان ما كنت
وقفت حنان:خلونا لوحدنا
لفت أريام على ابوها ووقفت ومشى يوسف يتركهم وتقدم تركي وجلس وناظرته حنان:هذا ماعاد هو بيتك ؟
تركي:الا بيتي وعيالي فيه
حنان:تركي قعدنا اكثر من عشرين سنه نربي فيهم ليه الحين بتشتتهم ؟
تركي:عيالي ما يتشتتون انا موجود متى ما بغوني
حنان:وأنا ؟
تنهد تركي يصد وناظرته حنان:وأنا تركي بوشو قصرت ؟ وش بغيت وما عطيت ؟ كبرنا سوا الحين تبي تخليني ؟ يرضيك وضعنا انت بمكان وانا بمكان واحنا متزوجين ؟
تركي نزل راسه وبلع ريقه ولف عليها:أنا قررت نتطلق
جمد وجه حنان وكمل تركي:هذا أنسب شي
حنان:أنسب لمن ؟ أنسب لسمر ؟
تأفف تركي ووقفت حنان تناظره بجنون:تبي تشتت عيالك نفس ما تشتت بنتها ليه ما تفهم انها تبي تنتقم مني
تركي:محد بينتقم من احد عيالي كبروا كلهم بيتزوجون ماهم متشتتين
جلست حنان وبكت برعب وناظرها تركي:كبرنا حنان كبرنا على ذي الحركات الانفصال انسب شي لنا ولعيالنا حتى ليه نقعد مع بعضنا ومشاكلنا ما تخلص
حنان رفعت عيونها تناظره وسكنت ملامحها تشوفه عايف
دخل يوسف وناظرهم وبكت حنان تناظر تركي:وانا من يقعد معي ؟ اتطلق بذا العمر ؟ صكيت الخمسين تركي صكيته
صد تركي عنها ورفعت عيونها حنان على يوسف وهي تبكي وعقد حجاجه بضيق يوسف ومشت حنان له تحضنه ولف تركي وناظر يوسف اللي حضن امه وهو يناظر تركي وتنهد تركي ومشى يوسف يخرج ومعه حنان
ودخل غرفتها وبكت حنان:يوسف ابوك بيخليني ابوك بيطلقني عشانها عشان سمر
جلس يوسف وجلسها قدامه:امي اهدي لا تبكين
حنان ضربت صدرها وهي تبكي:بيتركني مرتين بيتركني نفس قبل عشانها
يوسف مسك كفوفها:أمي هذاك قبل الحين أنا معك والبنات معك ، اذا ابوي ما يبيك إحنا نبيك
بكت حنان بتعب وتقدم يوسف يبوس راسها:والله لأغنيك عنه انتي ما انتي بحاجته وأنا موجود
ناظرته حنان وهي تبكي وابتسم يوسف:حتى لو تزوجت بقعد معك
صدت حنان تغمض عيونها وتقدم يوسف يمسح دموعها:الحين خلينا نزوج البندري ونفتك منها وتفضين لي تخطبين لي
لفت حنان عليه وضحك يوسف:تزعلين عشان ابوي ؟
حنان:بيخليكم ويخليني
يوسف:انتي تكفينا واحنا نكفيك
بكت حنان تناظره ومسحت على وجهه وباس كفها يوسف:ان تمت على خير خطوبة البندري ابيك تخطبين لي بنت الجيران
عقدت حجاجها حنان وضحك يوسف:في سرّ بهالبيت كل من شراه خطبنا منه
حنان:من هي ؟
يوسف:اسمها مها ابيك تشوفينها وتزورينهم
حنان ابتسمت بين دموعها تهز راسها وابتسم يوسف:هي صاحبة العود اللي بغرفتي
ضحكت حنان تهز راسها بأسف وابتسم يوسف وباس كفوفها وتقدمت تحضنه حنان وتنهدت بضيق
'
خرج عسّاف من شغله واخذ جواله يدق عليها وركب سيارته وردت وابتسم:ملهوف
ضحكت توليب وناظرتها غايه بنص عين وابتسم من ضحكتها:بجيك وين ما انتي
توليب:انا مع غايه برا طالعين ومهددتني اليوم كله لها
عقد حجاجه عسّاف يحرك سيارته:صرفيها
توليب عضت شفتها:ودي
ضحك بعلو صوته عسّاف وابتسمت توليب تموت خجل من ضحكته وصدت عن عيون غايه وابتسم عسّاف:متى ما صرفتيها كلميني اجيك
توليب ابتسمت:اوكيه
قفل عسّاف وضحك وهو يناظر طريقه والتفت من دق جواله واخذه وعقد حجاجه من المتصل ورد:هلا يوسف
يوسف ناظر طريقه وابتسم:كيف الحال ؟
عسّاف:نسأل عنك وينك ؟
يوسف:والله مهموم كلمت رياض يطلع معي بس قال ما يمديه قلت اشوفك
ابتسم عسّاف:موجود أنا
يوسف:كنت بروح مع اخوياي بس ما بفضفض لهم عن امي وابوي
عسّاف:وينك اجيك انا
يوسف ناظر طريقه:طالع من حيّ الشاطي
عسّاف:اي خلاص انا قريب بجيك
قفل عسّاف جواله واخذه يرسل لتوليب:انا طالع مع يوسف
قرت رسالته وابتسمت وناطرت غايه:كان واحشني طيب
غايه:توليب كل يوم وهو عندك اثقلي ما بقيتوا شي للزواج
توليب:توتر طاري الزواج لا تفتحينه
غايه:لو انا وخالتي ما نغصبك على التجهيزات ما خلصتي شي
دق جوال توليب واخذته ترد:ايوا امي
سمر:اي وينكم انتي وغايه ما بتجون نشوف لك فساتين ؟
توليب:الا كنا ننتظرك
سمر:يالله خرجت أنا قابلوني هناك
توليب:اوكيه
وقفت توليب:امي طلعت قبلنا
غايه مشت معها تخرج وركبت توليب مع غايه وحركت غايه:فستانك بنخلصه اليوم
توليب:غايه ! ترا فستان زواج مو شي بسيط نخلصه بيوم
غايه:ما يمديك ياغبيه خلصينا اليوم
تأففت توليب بتوتر تناظر الطريق وناظرت جوالها فارغ من الرسايل وابتسمت هي تشتاق له اكثر من قبل لانه صار يجيها بشكل طاغي اكثر وياخذها من نفسها ويقرّب منها قرب تمنته وتخيلته ، توترت من تذكرته ولفت على غايه اللي تناظرها ولفت تشوفهم وقفوا وضحكت:اوكيه سرحت شوي بس لا تعصبين
ضحكت غايه تهز راسها بأسف ومشوا ينزلون ودخلت توليب وناظرت سمر اللي جالسه وبيدها كاتلوج ورفعت عيونها:عروسة قلبي ودنيتي
اتسمت توليب وتقدمت تبوسها ولفت تشوف الفساتين البيضاء:اوف توترت اكثر
غايه:هذا البياض اموت عليه بياض الافراح
سمر:اي الله يكفينا شرّ بياض الاكفان
توليب لفت لامها:أمي يخوف لا تقولين كذا
غايه:خالتي خلي النكاده وتعالي ندور شي للورده
ابتسمت توليب تدخل معهم وتقدمت تقيس الفساتين أمامهم وابتسمت سمر تشوفها تلبس الأبيض وتقيس وتبدل ولبست فستان تضحك تشوف ردك فعل سمر وغايه وتناظر شكلها بالمرايه:مو مصدقه
غايه:يجنن توته كل شي حلو قستيه
سمر:كل شي حلو عليها كل شي هي تحليه
ابتسمت توليب وعضت شفتها تناظر شكلها تتخيل ردة فعل عسّاف بيوم زواجهم وفرحته
دق جوال سمر واخذته تبتعد وترد:هلا
تركي:انا عند البيت محد يفتح لي
سمر:مشغولين خرجنا انا وتوليب
تركي:بنتظركم
سمر:اي براحتك بس ماحنا مستعجلين
سكت تركي وقفلت سمر ولفت لتوليب:هاه توليب وش قررتي
توليب:ما اعرف كلها حلوه
ناظرتها الموظفه وابتسمت:اذا حابه تصممين شي على مزاجك نقدر نساعدك
توليب:هذا حلو بس احتاج تعديل عليه
الموظفه:نعدله لك
توليب ابتسمت ودخلت تبدل وتقدمت غايه للموظفه اللي رسمت الفستان وخرجت توليب تتناقش معها وناظرتها سمر من بعيد وابتسمت واخذت نفس بتعب توليب:خلصنا دخت والله
سمر:بس أنجزنا
توليب هزت راسها ولفت لغايه:بروح مع أمي على البيت على طول
غايه:تمام حياتي
تقدمت تبوسها ومشت تخرج غايه وخرجت توليب مع سمر وركبت معاها
سمر:ابوك ينتظرنا عند البيت
لفت توليب عليها وصدت تاخذ جوالها وعقدت حجاجها مالقت من عسّاف شي
'
عقد حجاجه عسّاف من الزحمه اللي دخل فيها واخذ نفس واخذ جواله يتصل على يوسف وهو يناظر الطريق واقف ولارد عليه يوسف
رجع يكرر الاتصال وجاه الرفض وميّل راسه يناظر السيارات وفتح محادثة يوسف وسجل فويس:يوسف نشبت في زحمه شكلي بتأخر عليـ
سكت من سمع صوت الاسعاف وقفل جواله عسّاف ولانت ملامحه وناظر رسالته ليوسف وبلع ريقه وفك بابه ينزل ومشى بهدوء وهمس:تكفى يارب
تقدم بين السيارات يسمع صوت الاسعاف اللي ابتعد يفتح الطريق ودارت الدنيا فيه من شاف سيارة يوسف بمنتصف الطريق ركام محروقه وعندها رجال الدفاع المدني ، هو يعرفها حتى بحالتها هو متأكد انها سيارة يوسف
رفع عيونه تشتعل أهدابه من دموعه ومشى لهم ومسكه العسكري:ابتعد لو سمحت
عسّاف:يوسف سيارة يوسف
لف يناظر السياره ورفع صوته:وربي سيارة يوسف
العسكري:ان شاء الله انه طيب الحقهم المستشفى دامك تعرفه
لف عسّاف يناظره بجنونه:وش فيه ؟ وش صار ؟ حيّ ؟
العسكري:الحقهم للمستشفى
لف عسّاف وهو يرجف وركض لسيارته وركب يفتح الخط للي خلفه ومشى من جنب سيارة يوسف وتنفس بصوت عالي من اختناقه ورعبه وبلع ريقه يسوق بيد راجفه واخذ جواله يتصل وهو يناظر الطريق
رد رياض اللي على مكتبه:هلا عسّاف
عسّاف بكى برعب:رياض الحق تكفى
جمد وجهه ووقف بصدمه ونطق:وش فيك ؟
عسّاف:يوسف احترقت سيارته فيه تكفى رياض الحق تكفى
مسك مكتبه رياض بذهول وقفل جواله عسّاف ومسح دموعه يوقف عند المستشفى ومشى يدخل يركض ودور بعيونه بالمستشفى ووقف محله يناطر حوالينه ومسك راسه ما يبي يسمع شي ما يسرّه مايبي يشوف شي يعوره
مشى للجدار وتمسك فيه ما يتجرأ يبحث عن يوسف وحده
'
دخلت البيت توليب تسمع سؤال تركي:تحتاجين شي ؟
لفت عليه تناظره ووقفت سمر ونطقت توليب:تكلمني ؟
تركي هز راسه وصدت تهز راسها بالنفي ودخلت تجلس بالصاله ومشت سمر:غريب هالوقت ياتركي وش عندك
تركي:مالي مكان غير هنا
جلست سمر ولفت عليه واقف:ليه وين بيت حنان هو البيت الاولي ؟
تنهد تركي يجلس وناظرته توليب وابتسمت سمر تصد ولفت لتوليب:وين عسّاف ماله حسّ
توليب:مع يوسف
عقد حجاجه تركي:مع يوسف ؟ ليه ؟
توليب:ما اعرف قال بيقابله
سكت تركي يتذكر يوسف مع امه وكيف خرج من البيت تارك الوضع فوضوي ودق جوال تركي يطلعه ويرد:هلا
لفت توليب تاخذ جوالها وارسلت لعسّاف:رجعت تنام ؟
رفعت عيونها من نطق تركي:ايش ؟
لفت سمر وعقدت حجاجها ووقف تركي:به شي كايد ؟
جمد وجه توليب برعب تشوف ملامح تركي وهز راسه تركي وقفل جواله وناظرته سمر:وش صاير ؟
تركي:يوسف صار عليه حادث
لانت ملامح توليب ولفت سمر على توليب بصدمه ومشى يخرج تركي ولفت توليب وهمست:عسّاف
سمر:قومي قومي نروح نشوفه قومي
اخذت طرحتها توليب تخرج مع سمر وركبوا مع تركي وحرك تركي وهمس:يارب خير يارب خير
سمر:ما سألت عن عسّاف ؟
تركي:ماجابوا طاري الا يوسف
مسكت صدرها توليب تحاول تتنفس من رعبها ولفت تناظر الطريق وهي ترجف من رجلينها لاطراف يدينها ونطقت سمر:ماهي اول مره يوسف يصير عليه حادث ان شاء الله هينه ان شاء الله خير
مارد تركي وهو يناظر الطريق بقلق ما يشعر باطرافه ابد ووقف عند المستشفى ونزلت توليب تسبقهم ومشت سمر مع تركي ودخلوا
لفت توليب تناظر حوالينها وركضت بالممر تتبع صوت الصراخ والإنهيار ولفت وبكت بخوف تناظر حنان اللي جالسه وتبكي بالارض وتصرخ وهيله وعبدالمحسن عندها والبنات متجمعين حوالينها ولفت تشوف رياض اللي واقف وجالس بجانبه طرف ثوب أبيض وهمست:عسّاف
لف رياض ينتبه من دخل تركي وسمر ولف لعسّاف يبتعد ورفع راسه عسّاف وناظر توليب وبكت برعب من شافته جالس ووقفت محلها ما تشيلها رجولها ووقف عسّاف يمشي لها وتقدم تركي لعبد المحسن:وش صاير ؟
مشت توليب تحضن عسّاف وبكت بحضنه وناظرته سمر وحاله وجموده ولفت تشوف حنان وهيله وظلت محلها تناظرهم
عبدالمحسن هز راسه بالنفي وهمس:يقولون جابوه ميت
جمد وجه تركي ولف على حنان وبناته اللي يبكون وتقدم رياض:هم داخل ينعشونه ان شاء الله خير
تركي رفع ذراعه ومسكه رياض بقوه يثبته وجلس عبدالمحسن وهو ماسك راسه
ابتعدت توليب وناظرت عسّاف تلمس ملامحه:خفت عليك
عسّاف صد يناظر اهله من بعيد وناظرته توليب ولفت تناظرهم ورفعت راسها حنان:كله منكم كله منكم ولدي راح ولدي راح ، دعيتي عليه انتي دعيتي عليه
لفت توليب على سمر اللي واقفه وحنان تصرخ عليها وبكت بخوف توليب وماردت سمر تناظرهم بهدوء وخرج الدكتور ومشى عسّاف يفلت ذراعه من توليب ويتوجه لهم ولف تركي:يوسف يوسف
الدكتور:حمدلله استجاب للانعاش بس فقدناه إثر نزيف بجزء بالدماغ سبب له غيبوبه
عقد حجاجه رياض وكمل الدكتور:في اضرار ناتجه عن الحادث بنتأكد اذا في اعاقات لا سمح الله لكن اذا فاق من الغيبوبه واستجاب ، ادعوا له
مشى يتركهم ولف عسّاف وضغط على عيونه بقوه وصد رياض عنهم هو كلمه وطلب يشوفه لكنه تعذّر عنه والان ودخ يدخل له ويقعد معه ما يفارقه ابد ولا يفقده للابد
'
خرج تركي ومسك كتف عبدالمحسن:يقولون تهدأ وترتاح
عبدالمحسن:الله يعين
تقدمت البندري تمسح دموعها:امي مافاقت؟
تركي:لا خلكم عندها واذا قامت هدّوها
دخلت البندري ولف تركي لأريام اللي جالسه وتبكي ومسك كتفها ووقفت تحضنه وهي تبكي وتنهد تركي ما يقدر يطمنها ما يقدر يقول شي لان آماله خابت وظنّه مشكوك فيه
ووقفت هيله:بدخل لحنان
مشت من عندهم تدخل ولفت دلع على عسّاف اللي جالس بجانب توليب
رفعت كفها توليب على كف عسّاف وهمست:عسّاف
مارد عليها وهو يناظر الفراغ وتقدمت له اكثر توليب:تجي معي البيت ؟ تجي تاكل شي عشان سكرك ؟
لفت سمر تناظرهم وهمست:قوم عسّاف قوم عشان لا تطيح
عقدت حجاجها توليب ماتبي تبكي اكثر ولف عسّاف على رياض اللي واقف وساهي ولف لتوليب:أخاف اروح
شدت على كفه توليب تناظره وهمس عسّاف:اخاف يموت وأنا بعيد
بكت توليب تصد براسها ماتقدر تقول شي لان غصتها تدمرها وتقدمت سمر:ما بيصير الا كل خير قوم عسّاف قوم معنا تشرب لك شي عشان سكرك
حضنت ذراعه توليب ووقف عسّاف ولف رياض يناظره ومشى عسّاف وتوليب حاضنه ذراعه ومسحت دموعها تمشي معه يخرجون
ووقفت عند سيارة عسّاف:انا اسوق
دخلت يدها بجيبه تطلع مفتاحه ومشى عسّاف يركب وركبت بالخلف سمر وركبت توليب يساره ولفت تناظره ساكت ، هو عاش مع يوسف اكثر منها وكأنه اخوه أكثر منها وكانوا اكثر من عيال خاله وبكاء البنات وتأثر رياض وعسّاف دليل قوة علاقتهم ببعضهم
ساقت بهدوء تتذكر يوسف وبكت بدون صوت وهي تناظر الطريق ووقفت عند البيت ونزلت سمر ونزل عسّاف وتقدمت له سمر تمسك ذراعه وامشي معه وتتكلم بهدوء:اذكر الله عسّاف وإنت رجّال مصلي ومؤمن وتعرف ان ربي قادر على كل شي ويوسف ان شاء الله بيقوم بالسلامه
هز راسه عسّاف ومشت خلفهم توليب ودخلوا وجلس بالصاله عسّاف وجلست سمر بجانبه:بسوي لك شي تاكله انت وتوليب
قامت تتركهم وتقدمت توليب لعسّاف ورفعت كفها لظهره:تجي غرفتي تنام شوي على سريري ؟
مسح وجهه عسّاف:بيأذن للفجر
توليب:ريّح شوي عسّاف
لف عليها عسّاف يناظرها ووقفت توليب ومدت كفها له ومسك كفها يوقف ومشى معها ودخلت الغرفه معه وتقدم يجلس على السرير وجلست بجانبه توليب ومسكت كفه تناظره:تعرف ان يوسف بيقوم
هز راسه بالنفي عسّاف وهو يناظر الفراغ وهمس:كلمني كان متضايق من امه وابوه وكأنه موادع
بلعت ريقها توليب ماتبي تبكي وكمل عسّاف:وماكان حادث نفس طيشه تنكسر يده ينكسر ضلع من ضلوعه ، مريت من عند سيارته كانت سوداء رماد ما اعرف احترقت فيه والا سلم
لف على توليب يناظرها:ما ادري تعذّب والا ما شعر بشي
بكت توليب تعض شفتها وصد عسّاف:ليته كلمني وفضفض لي ، ليته ركب معي
حضنته توليب وغمضت عيونها تسند راسها على كتفه وهي حاضنته ودخلت سمر ولفت توليب تمسح دموعها وحطت الاكل سمر ومدت له العصير:تفوق وترجع لهم بس اشرب شي عشان السكر
اخذ الكاس عسّاف وحطه بكفوفه يناظره ولفت سمر على توليب تناظرها وتنهدت تخرج ولفت توليب عليه:اشرب عسّاف
رفع الكاس يشرب العصير دفعه وحده وحطه وهمس:مابي اكل
توليب:طيب ارتاح هنا جنبي في حضني
عسّاف هز راسه بالنفي:أخاف أنام يحتاجوني هناك
توليب:وإنت تحتاجني
لف عسّاف عليها وشدت على كتفه وميّل جسمه عليها وحضنته توليب تمسح على جبينه وشعره وغمض عيونه عسّاف بتعب ، عاش ضغط ومخاوف وجرب دموع العين رغم ان يوسف معتاد لكن هذي المره عساف شهد منظر سيارته ورعبه انها كانت محترقه رعبه الحريق اللي ما يعرف لمس يوسف والا لا ، تنعاد ذكريات يوسف معه وايامهم عليه وكأن ذكرياته تعاقبه اكثر
-
( لا تنسون النجمه ⭐️ )
