جواز صالونات

الفصل الاول

فى صباح يوم جديد
نهى:بت يا ساره انتى يا بت
ساره وهى تغطى وجهها بالمخده:اممممم
نهى:امممم ايه اصحى يلا..انتى يا زفته
ساره وهى تتقلب:ايه يا ماما نعم
نهى:اصحى يلا
ساره:طب شويه وهروح الجامعه
نهى:انتى هبله يا بت تروحى فين النهارده الجمعه
ساره استيقظت سريعا وهى تقف على السرير:ايه انتى قولتى ايه
نهى:قولت إن النهارده الجمعه
ساره بفرحه:بجد الجمعه لولولولولولى ياااااااه اخيرا جه يوم الجمعه انا مستنياه بفارغ الصبر
نهى:طيب يا ختى قومى يلا عشان نعمل الفطار قبل ما ابوكى واخوكى ييجوا من الصلاه
ساره وهى تنزل من على السرير:طيب يلا هدخل الحمام واحصلك
نهى وهى تخرج من غرفتها:طيب انجزى
ساره:حاضر حاضر يا ماما
_______________
بعد قليل يدخل سعيد ووالده
نهى:يلا يا خويا الاكل جاهز يلا يا واد يا سعيد
سعيد بلهفه وهو يتجه ناحيه الصانيه:ايوه ياما..اصل جعان اوى
نهى وهى تضربه:روح يا منيل اغسل ايديك الاول
سعيد بابتسامه سخيفه:طيب ياما قايم
جلس محمد وجاءت ساره وجاء سعيد وجلسوا جميعا
محمد:ايه يا ساره عامله ايه النهارده
ساره:ياااااه يا حج انت عارف بستنى يوم الجمعه عشان اخد اجازه
محمد:ربنا يعينك يا بنتى
سعيد وهو يمضغ الطعام:يا حج دى بتستهبل دى مش بتعمل حاجه
ساره وهى تنظر له بغيظ:كل إلى فى بوقك الاول وبعدين اتكلم
سعيد:اتكلم براحتى
نهى:اتلموا واسكتوا بدل والله انزل عليكوا بالشبشب متفتكروش نفسكوا كبرتوا على الشبشب هااا
سعيد وهو يبلع الطعام:هو حد قال إن احنا كبرنا ده انا لسه عيل
نهى:ايوه اتعدلوا
بعد قليل انتهوا من الطعام وقاموا بتنظيف المنزل وكانت تساعدها ساره وهم ينظفون
نهى:دى خالتك وابنها جايين النهارده على بليل كده
ساره فى سرها:يا دى النيله ابنها الرخم جاى معاها
ساره :اه طبعا يشرفوا ماشى يا ماما
فى الليل رن الجرس فتح سعيد الباب وهو يسلم على خالته وابنها
سعيد:اهلا اذيك يا حسن
حسن وهو يحتضنه:اذيك يا كابتن عامل ايه
سعيد:الحمد لله ادخل ادخل..خالتووو
سماح:اذيك يا واد يا سعيد مالك كده كبرت وحلويت
نهى فى سرها:الله واكبر فى عينك
نهى بإبتسامه:سماح حبيبتى اذيك
سماح:اذيك ياختى عامله ايه مش بتيجى ليه..اممم ده انتى تخنتى شويه بس لسه قمر
نهى بخوف فى سرها:الله واكبر  الله واكبر قل اعوذ برب الفلق
نهى:اممم ده ياختى القولون تعبنى ونافخ بطنى
سماح وهى تجلس على الأريكة بضحكه:احسن تكونى حامل هههههههه
نهى بضحكه مزيفه:يوه كتك ايه يا سماح ههههه
حسن:احم امال فين ساره يا خالتى
نهى:اه هندهلها ممكن تكون بتعمل حاجه..بت يا ساره انت يا بت
ساره بداخل غرفتها
ساره وهى تكلم نفسها فى المرآه:ياربى انا مش بحب اشوف وشه سمج اوى ويقعد يتنحلى اوووف بجد مش عارفه اعمل ايه ده رخم
سمعت ساره صوت والدتها تنادى عليها
ساره:طيب يا ماما جايه ثوانى
خرجت ساره اول ما رآها حسن ابتسم..سلمت على خالتها ولا تسلم على حسن اكتفت بإبتسامه فقط
جلس بإحراج وتلاشت إبتسامته تدريجيا
ساره بإبتسامه:اهلا وسهلا
سماح:اهلا بيك يا حبيبتي..ايه يابت ده الفستان ده جديد صح
ساره فى سرها:الله واكبر
ساره:لا يا خالتو ده قديم لبسته فى فرح إسراء بنت خالتو شهد
سماح:ااااه..شوفتى يا نهى اختك شهد مش بتتصل بيا ولا بتخلينى اجى عندهم انا مش عارفه من ساعت ما رحت عندها البيت ورجل البت إسراء اتكسرت وهى مش بدخلنى بيتها بتتحجج بأى حاجه
نهى:معلش اعذريها يمكن مشغوله اتصلى انتى (فى نفسها:اكيد خايفه من عينك إلى تفلق الحجر دى)
سماح بملاحظه عدم وجود محمد:اده امال فين ابو سعيد
نهى بتفكير:أصله عند واحد صاحبه عامل عمليه ولازم يحضر معاه
سماح:لا طبعا الأصول اصول وجوزك ابن اصول على الاخر
نهى بابتسامه:ربنا يخليك
سماح:بصى يا ختى انا كنت جيالك فى موضوع كده هون
نهى:ايه هو قولى
سماح:بصى انا كنت عامله حسابى انى الاقى ابو سعيد بس حظ بقى خلاص المهم..انت عارفه طبعا إن حسن ابنى الحمد لله ميكانيكى قد الدنيا وكسيب وعارف قيمه القرش
نهى وقد فهمت قصدها وابتسمت وهى تنظر لساره :اه طبعا ربنا يخليهولك
سماح:تعيشى يا حبيبتى..المهم بنتك الحمد لله اتعلمت احسن تعليم و قمر وحلوه وسنها مناسب لبنى هو اه فرق ١٠ سنين بس مش مشكله مش بالسن(وهى تخبط على رجل ابنها) انا جايه اخد بنتك ساره لإبنى حسن
سعيد بإبتسامه:واحنا هنلاقى فين زى حسن
ساره وهى تنظر له بغيظ
ساره بجمود:معلش يا خالتو انا مش بفكر فى الموضوع ده دلوقتى وكمان انا عاوزه اكمل دراستي وطبعا ابن حضرتك مش هيستحمل مصاريف الدراسه..انا بعتذر انا مش موافقه عن ازنكم (ودخلت غرفتها)
__________________
لا اله الا انت سبحانك اني كنت من الظالمين 🤍