عشق المهاب

البارت الثاني

أحيانًا قد يفتح باب كان علينا قفله ولاكن هيهات انها القلوب تدفعنا لشيء اسمه الحب ونضطر لفتح أبوابه كلها 🖤
______________

عشق
لقيت خالي يأشر عليا واني بطني بدت توجع فيه وزاد الوجع لما شفت نضرت شاب ما تبشر بالخير حسيت بيد سنابل جبدتني ودخلنا للحوش نجرو لقيت مرت خالي مقعمزه ياروحي توزاي في الخضره بيد وحده واليد تانيه مش قادره تحركها وربي تقطع القلب كيف تلقط في المعندوس وشاده عبرتها 💔 نبي نعرف وين رجوله في الموضوع راجل يضرب في مرته ليل نهار وهيا تبلع وتسكت على خاطر ضناها وين العدل ؟؟؟ هاذا ذل وإهانه الله يرحمك يا بابا كيف كنت راجل محب وزوج الوفي والأب الحنين كان قدوه ليا وحتقعد لن نموت إلله يرحمك يا حنين💔 مشت سنابل لي أمها وهيا دموعها في عينها باست راسها ورفعتها لدارها ومرت خالي مخليه راسها لوطه وتزحف بسبب رجلها حتى هيا طيح عليها الطاوله حسبي الله فيه قعمزت نساوي في الخضره على جنب ونفرح في البساط واني قعده بزي متعي كملت وخذيت شنطي وكيف بنمشي
خالي بعصبيه: هيااااااا نوضو فيسع نلقاكم في سياره
شفتله بستهزاء وركبت لدار واني نسمع فيه يقربع ويكسر في الكوجينه يعني بالمختصر ليس على المريض حرج طلعت عبايتي ونقابي وقفازاتي وقعدت نستنى في سنابل لن دخلت وجها احمر من لبكي فتحت دولاب بكل هدوء وطلعت عبايه ونقاب وقفازات زيني لبسناهم ونزلنا فيسع قبل ما يدير مصيبه وطيح في رأس مرت خالي لاكن تأخرنا للأسف واحني لقيناه شاد شعرها بقوه ويحرك فاها يمين يسار وهيا تبكي معاش تحملت خذيت مرت خالي بقوه وقلت بعصبيه: جيناااا هيا اركب سياره وقت
نحسابه بيضربني لاكن نصدمت صدمه ثلاثية الأبعاد لما سمع كلامي وركب سياره بجديات قبل أي وحده فينا توقف في وجها يقعد للفجر وهوا يضرب لن نقولو توبه! شافتلي مرت خالي بتعب : بري بنيتي قبل ما يولي هاذا متعرفوشي قعدين اكيده وراه مصيبه برو معاه فيسع
وفعلا مرت خالي صدقت كانت وراه مصيبه غيرتي حياتي ميه وثمانين درجه وخلتني ندعي عليه كل يوم مية مره 💔 طلعنا اني وسنابل نجرو ركبنا سياره وهوا ساكت ويدندن وضعه مش طبيعي شفنا اني وسنابل لبعض مستغربين بعد دقايق وصلنا للمكان لكل سنه يجيبنا ليه تعرفو شن هوا !؟
مكب خرده وسيارات وصوت الآلات تصنيع توا بللهي عليكم هاذا راجل صافي؟؟؟! اكيد لا
بدينا لقطو في لحديد ونحطو في سياره وهوا واقف بعيد يدخن ويهدرز على تيلفون واني وسنابل يعلم الله بحالنا كيف
قرب راجل كبير شوي في العمر منا لقانان ندورو في حديد بين سيارات الهالكه واحني مش منتبهين لوجوده لن هوا تحمحم : هئحم معليشي
إلتفتنا اني وسنابل بخوف : تفضل عمي
قال وهوا رافع حاجبه: بنياتي شن ديرو في عز القايله
قلت والغصه في حلقي : نلقطو في لحديد
شافنا بحزن وهوا يستغفر مشي من غير ما يقول حرف كملنا اني وسنابل وضهورنا نكسرو واضحه يعني مش خدمة بنوت لاكن الله ع ظالم سكتنا واحني نلقطو وفي لحظه رجع راجل ثاني واحني مستغربين وأول ماطلع ضرف متع فلوس غمضت عيوني وحذفت لحديد من يدي ومشيت نجري لسياره واني نحس في روحي بنتفجر خلاااص مش لهدرجه شني يحسابنا شحتات!! وربي اول مره نحس بذل والحقاره ودنائه وجعتني حالي لدرجه بديت نغطي في يديا على وجهي واني نشهق بالعبره ونادي في بابا داخلي ونتمنى اني نلحقهم خلاص طاقتي تمت أول مره نحس بشعور زي هكي اااخ وين كنتي يا عشق وين تعاالى يا بابا شوف بنتك بدت ناس تعطي فيا واني لكنت نحب نعطي اني لكنت نسخف على حد نلقاه في طريق نمشي ونعطيه فلوس من غير ما يدري اني لكنت نبكي على ناس لمعندهمش توا جي دوري ونقلبت الأدوار 💔 وييينك ماما خوك كرهني في العيشه أكثر مما اني كارهتها يخلي فينا نلقطو في الحديد حتى حضرته يصرفه على سكير ونكير وعلى قلة الخير
سمعت صوته الحقير وهوا يقول بعصبيه: شنننن جييبك بروحك وينها سنابل تكلمممي
اني شياطين فوق راسي وكيف بندفل في وجها دفله تقعد في وجها سنين لاكن للأسف جت سنابل في أخر لحضه وهيا تهدي في الوضع وجابتله لحديد في كيسه كبيره سكت وبدي يسوق وهوا يسب ويلعن فينا اني شاده يدي بكل قوتي لاني شويه ثانيه وبنخنقه وبنعطيه كف نعدل بيه خليقته كرهنا في رواحنا نم نزلنا من سياره واني خلوقي في شيشه لقينا مرت خالي مسكينه واقفه على طنجرة وريحة العصبان يسهف قالت مبتسمه: هيا بنياتي إغسلو يديكم وتعالو تعشو هي
رغم خالي وحقارته لاكن مرته مافيش من أطيب من قلبها وأغلب وقتها ساكته وصابره وملتزمه بصلاتها والقرآن اغلب الوقت في يديها حتى نور واضح في وجها والله بدون مبالغه انسانه طيبه وحنينه تعامل فيا زي سنابل واحسن 🤍 غسلنا فيسع فيسع وبدينا نعاونو فاها ونحطو في سفره
______________