عشق المهاب

البارت السادس

ماوَجَدتُ يَوماً اجمَل مِن يَوم جَمعني بِك...♥️

______

عشق

الوجع ديما يجي من الأقارب ويلي من دمك سبحان الله مرات الغريب يكون أحن عليك من القريب هاذا شيء فهمته من عمامي يعني حطو مكانكم في مكاني هكي بتتقبلو ناس بعد سنييين طويله وفراق ولا شفتهم ولاشافوني تواااا قالولي إحني عمامك وأهلك ومن اليوم انتي مكانك في حوش جدك !!؟ الخلل في تفكيرهم ولا في تفكيري منعرفش؟؟
قعدة نشوفلهم ونضراتي تنتقل بين لوجوه حسيت الباب تسكر عرفته خال سنابل طلع حسيت بنضرات شاب لساعدني من لكلاب وهربني من الحديقه عيونه كأنهم ليزر إرتبكت وحسيت وجهي أحمر اني واقفه في نص كمشة رجاله واضح عليهم الهيبه والوقار مننكرش؟! وشيء لزاد توتري نضراتهم وكأني جايه من كوكب ثاني؟؟! وطبعا بتقولو وانتي كيف تأكدي هما عمامك ؟؟! تاكدة من شبه بينهم وبين بابا اكبر واحد فيهم يشبه لبابا هلبااا لدرجة قلبي نقبض وكأني شفت بابا قدامي لاكن يختلفون في البشره بابا ابيض منه بشوي اااف عارفه عارفه مش وقته لكلام هاذا ههه عالمهم هاذا ليشبه بابا ناض وقف وباين عليه الحكمه والطيبه والهيبه ورزانه يعني غصبا عليا نحترمه حتى مش طايقه شوفته زيه زي خوته !!
ابتسم وضمني بحنيه فاقدتها سنين 💔قال متنهد وعيونه حمر : اااخ الله يرحمك ياوخي الله يرحمك نسخه منك
سكت شوفي وبدي ينادي على اسم مراء الحق مفهمتش لاكن وجعني كيف عيونه حمر لدرجه انه حط يده عليهم وهز راسه بأسى على فقدان خوه وكأنه مش بنسبه ليه خوه بس لاكن أكثر من اخ حط يده خوه ثاني على كتفه وكأنه يواسي فيه💔
كمل وصوته في بحه تعلن على ذكرى حزينه مر عليها وقت: ااخ يااجميله عزيزك تركلك ضناه حتى تصبري روحك على فراااقه تعالى يا ساالم نسخه منه شووف شوفهااااا نفس لعيون شوفها
زاد حضني بقوه أني متجمده ومصدومه هاذي اول مره يحضني رااجل حتى خالي ماعمره دارها عيوني دمعو وكرهت روحي لما حسيت بالدفئ وكلامهم لخلاني نغمض عيوني بوجع كرهتهم اكثرررر لما حسيت بحنيه لاأهل لكانو حارميني منهااا 💔علاش؟؟؟؟!💔 حسيت بإني حاضنه بوي ايه وربي نفس الدفئ نفس الحضن نفس ريحته ايه هاذي ريحة بابااااا والله نفسهااا💔💔 وجعتني حالي هاذم رجاله هاذم عمامي لواضح عليهم العز والنعمه اني نذكر في تعب والقهر لعشته ورغم هاذا الحمدالله والله مرت أيام نشربو في ميه ونرقدو وبطني من الجوع منرقدش نصبرها ونوضو صبح نلقطو لحديد ونبيعوه حتى نلقو شن ناكلو والله حرام عليكم والله
بعدت منه واني حابسه دموعي منبيش نبكي قدامهم منبيش نضعف رفعة يدي لترعش واني نبعد بخطواتي وهما وقفو وعيونهم فيهم عطف اااايه متعاطفين مش قصة محبه والله مايحبوني في داافع لجيتهم 💔
تكلم جلال وقال بعد مامسح وجها بتعب وحزن: بنيتي فاهمك لاكن الله غالب هاذا قدر ومكتوب والماضي دفناه واحني اليوم نبو نسدو البعد ونبوكم من اليوم تحت ضلنا
قال سالم بطيبه: بنتي نحنا فاهمينك ونضراتك تتكلم قبل لسانك ومش طايقتنا كلنا معاك والله غالب لفات مات وزي مقال عمك جلال انتي حتجي معانا وتسكني في الحوش لولد فيه بوك
طلال بهدوء: انتي وصية المرحوم بونا قبل مايموت وحتى يستريح في قبره لازم تجي معانا
عصام ابتسم بهدوء: هيا إكسري شر وجدتك تستنى فيك من امس تبي تشوفك
معتز تنهد داخله والعبره خنقاته وهوا يشوف في بنت خوه وبنت حبيبته لكان يباها لاكن كانت مش نصيبه وكانت نصيب خوه قرب منها وعيونه حمر إبتسم بوجع وقال بصوت يشبه للهمس: حسناء 💔
إلتفيت بسرعه وبغضب واني نسمع في اسم أمي إيه متأكده سمعته هاذا إسم نقي مانبيش حد ينطقه ويلوثه بسببهم هما أمي عااانت منهم هماااااا إيه هماااا
تحولت نضراتي لواحد واقف قريب مني وكان متوتر وعيونه حمر متوجهه ليا وكأنه شبهني لحد اني مش غبيه ومن قبل نفهم في نضراات لعيون ونحب نقراهم
وأخيرا وقف لكان ساكت ويستنى بهدوء وملامحه البارده وعيونه بلونهم الغامق تحكي قصة مدفونه ليها سنين تقرب وريحة عطره تغلغلت داخل أنفاسي لاكن بخوف برهبه واني نشوفه يقرب وقف ويفصل بينا سنتيمرات قصيره قال بهدوء: اني سمعت الكل تكلم لاكن صاحبت شأن مانطقتش ولا حرف !!!! لو في مانع يا أنسة نبو نسمعو صوتك ؟؟ ولا خايفه عليه ههه
جلال تحمحم بهدوء وتوتر: مهاب مش هكي !!
مهاب شافله بستهزاء وحول نضراته عليا وعاود سؤاله برود: شني بكوشه ؟؟؟
غمضت عيوني بوووجع من هالكلمه ودموعي لحاولت منرخصهمش قدامهم لاكن للأسف كلمه منه خلتني نبكي حسيت بلسانه لاذع حسيت بإنه ميفهمش بجبر الخاطر ؟! حسيته مش بشر وميعرفش يتعامل مع الأنثى ؟؟! نقذتني سنابل وهيا تدخل بعصبيه ودموعها يجرو واضح إنها سمعت هالكلمه قبل ماتدخل لدرجة خلتها عصبيه هكي وجسمها يرعش من الأعصاب رفعة يدها بقوه وتأشر عليا: اييييه متتكلمش تعرررفو علاااش لأنها شااافت بعينها كيف أمي ماااتتت 💔💔شافت بعينها كيف قتلهاااا وهرب هاذي البنت تعبت ونذلت من كل نااس من صغرها اول ماتوفو أهلها كانت مدرستنا دير في حفلالات وكل كانو أهالينا حاضرين إلا هياااااا رغم كانت الأوله وذكاءها يثنو عليه المعلمين لاكن مالقتش حد يفرح لفرحتها كاانت بروحها 💔ودخلت في حالة نفسيه وهيا فاقده شيء إسمه عيله شيء اسمه طيبه وحنيه 💔 مرت سنين وبدت بنت كبيره والعين عليهااااا تعرفو شن قالو يقولو ولاد شارع أول مايشوفاها هاذي لا ام ولا بو اكيده وحده صايعه وعاطيه روحها لكل من هب ودب مستحيل وحده حلوه شكل وجسم مش مدايره علاقه مع فلان وعلان وبدت الإشاعات ويطعنو بشرفهاا لي هوا شرفكم 💔يقولو عشق تكلم في هاذاك وفي فلان وهئ هذاك لي اسمه محمود كل ليله يجي يضرب ويقطع عليها في الماكله وشراب تعبت هالبنت رغم أمي هئ أمي الله يرحمها كانت مترضى فينا وجعة شوكه علمتنا على دين علمتنا مانفوتوش صلاة علمتنا نعيشو في دنيا بإحترامنا لاكن نفكرو لأخرتنا أمي نعمه وبلاها عشق واني إنتهيناااااا 💔 إنتم وين علاها لما تمشي لشوراع مكب سيارات  تلقط في لحديد حتى تلقى شن تاااكل وينكم علااهااااا توا بعد ماكبرت وفهمت دنيا صح ووقفت على رجليها تبو تجو ترفعوها هاااذي من دمكم كيف ضميرمكم خلاكم تسيبوها من غير حتى ما تسألو علاهاااااا كييف وين رجوله ؟؟ وانتم سيبتو بنت خوكم ولا وين تمشي ولا وين ترقد ؟؟ وييين
مهاب ساكت ضحك بستهزاء وقال لعمه جلال: عمي جيبها تلقاني في سياره ستين الف حاجه في راسي وهاذا زادت نفختهم
فتحت عيونها سنابل بصدمه ليها ساعه تثرثر وهما ولا واحد فيهم عبرها لا وطلع وطلعو وراه هاذا لإسمه مهاب حسيت بنضرة سنابل تحكي حسيتها قالت الله يعينك على ما بلاك
كانت عيونها فاتحتهم مستغربه من قلة ذوقهم وتجاهلهم ليها وكأنها فرخه نفختلهم رأسهم بدوتها الفارغه بنسبه ليهم ؟؟
قرب هاذا لإسمه جلال مني قال بإحراج: بنتي ولد عمك هاذا اسمه مهاب وهوا طبعه حاد وو.. اسف بنتي ماكنتش نعرف إنك فقدتي نطق لاكن بإذن الله حنعرضك لأحسن دكاتره ويرجع صوتك لكنت نتمنى نسمعه وتوا يا حبيبه اني عمك وبمثابة بوك يعني لتبيه يجي لعندك انتي بس نبيك تكوني متفهمه الوضع وتجي معانا لانه والله الوقت ضيق والوضع مش لصالحك اااني فاهمك وعارف كل شيء لاكن بإذن الله حنتفاهمو على كل شيء ونحكو بجميع تفاصيل وانتي لتبيه يجرالك تمام
عشق شفت لسنابل لغمضت عيونها وفتحتهم بمعنى وافقي اني قعدت على موقفي وساكته هوا تفهم وقال اني برى نستنى طلعو كلهم وقعدت مع سنابل
سنابل بحنيه رغم تعب والحزن باين فيها شدت يدي وقعمزنا على صالون قعدنا ساكتين ونشوفو لبعض تنهدت سنابل وقالت : عشق اسمعيني كويس اني اختك قبل مانكون بنت خالك تربينا مع بعض وحلينا مشاكل بعض اني من بعد اليوم معاش نقدر نقعد في هالبلاد اني امي ماتت على يد محمود لي هوا بويا ههه💔 اني خلاص معاش عندي جهد نهائي تعبانه لدرجة اني نفكر مستحيل حنستريح واني أمي تحت تراب 💔 لاكن انتي حياتك مستمره عارفاتك تكرهيهم ومن حقك لاكن انتي مجبوره مش مُخيره اني تمنيتك تجي معايا لاكن عمامك واضح عليهم إنه سلطة في يدهم والحده في اسلوبهم ومش حيخلوك معانا وخوالي مش قدهم عشق نجو من ناحية الواقع انتي بنت وتبي سند انتي ذكيه وتعرفي كيف تتصرفي خوذي حقك وانتي بين يديهم ايه شن تشوفيلي هكي؟؟! خوذي حقك منهم وعيشي برزق بوك وفوتيهم وامتا ماتحسي انك خذيتي كل شيء ووصلتي لمرادك  خوذي شن تبي وتعالي ألحقيني حتى نكملو قرايتنا مع بعض واني حنقعد نستناك
قعدة نسمع في كلامها إلقيته هوا صح !! اني لي أمتا بنهرب منهم خليني نواجهم وناخذ حقي من بين عيونهم ونكمل حياتي كيف مانبي صح قرار صعب لاكن اني بنت وحيده وفي وقت توا مافيش حد بيدير خير بلا مقابل واني مش حنطلب يد العون من حد حنوقف على رجليا بروحي
ابتسمت ودموعي نزلو وضميت اختي ايه والله مافيش يوم حسيتها مش اخت بالعكس حضنه بعض وقعدنا كل وحده تواسي ثانيه وقفنا واحني ناوين نتحدو اي شيء يكسرنا طلعنا من المربوعه ورفعت عيني لي جت في عينه لكانت نضراته كلها إستهزاء ومش عاجبه شيء لقيتهم كلهم في سياراتهم دخلت للحوش لشهد على هلبا مواقف فيها الحلوه وفيها شينه لاكن حتقعد ذكريات مستحيل يمحيها الوقت🖤
سكرت شنطي بعد ماحطيت كل شيء نحتاجه وقفت وحضنة سنابل ثاني صح منقدرش نتكلم لاكن عيوني كفيله بتعبير كل شيء داخلي نزلت من درج وشنطي في يدي شفت للكل شيء بنضره اخيرا سلمت على خالت سنابل لكانت ابتسامتها تخليك مطمئنه بإنه الدنيا مزال فيها خير🤍 واني بنطلع وقفت على صوت سنابل لكانت تجري وفي يدها صندوق استغربت وقفت قدامي وهيا داهشه من جري قالت وعيونها فيها حزن عميق ابتسمت وحطت صندوق بين يديا: عشق هاذي ذكرى من أمك كانت ماما داستهم سنينن وقالت أول ماتطلع عشق عروسه من هالحوش اني حنكون في مكان أمها ومش حنقصر معاها وناخذ بوصية أمها لقالت ياسهيله انتي أحن وحده في عيلتي وكان صار شيء لسامح الله بنتي عندك امانه وهاذا صندوق خليه معاك متندريش على دنيا وقولي لعشق هاذا ذكري من أمك وماما قالت ضروري تاخذ ذكرى أمها قبل ماتطلع من عتبة الباب 💔 صح طلعتي وانتي مجبوره ومش عروسه ومش مرغوبه وفاقده ناسك ومهجوره لاكن صدقيني ﴿لا تَحسَبوهُ شَرًّا لَكُم بَل هُوَ خَيرٌ لَكُم﴾
إبتسمت بكسرة وجع مش حنوصفه لأنه مستحيل حد يفهمه إلا لمجربه إكتفيت بإني نحضنها بقوه ونعبر إمتناني ليهم طول هالسنين طلعت ورفعت يدي حتى نودع أقرب إنسانه ليا ضحكت سنابل وقالت بغمزه : ساد من درامه كل يوم نهدرزو فيديو لن تملي مني تو تشوفي
ضحكت بحزن وهزيت راسي وطلعت من هالحوش ومن هالجنان واخر شيء من البوابه لقيت خوال سنابل حتى هما جاين وخال سنابل يستنى في سياره حتى يسافرو والباقي يهدرزو مع عمامي وكيف بنرفع شنطي  ونمشيلهم  حسيت بيده شدتني بقوه من مرفقي ومنو القوه حسيتها قالت طق الله يكسر ايده ومنو غيره سيد منقذ ههه حسيته من سرعته مايبي حد يلاحظ وجودي على اساس في حد بيلاحظ انسانه ميته جسد بلا روح  الحمدالله💔
خذي شنطه خت فت ولقيت روحي في سياره عاليه جيب سوده ومضلمه وريحة عطره المميزه تخنق يعني نحسه مفرغ نص شيشة في سيارته رغم الخوف لنحس بيه وشك لي في قلبي لاكن فيا حاجه تقول هاذم أهلك لااكن للأسف مش طبيعين نهائي وحتى حركتهم غريبه وسياراتهم كلها مضلمه وتخوف كأنهم مافيات ضحكت على تفكيري وقعدة نستنى
ركب سياره وركب بجنبه جلال إلتفتلي وابتسم: شني بنيتي مستريحه ؟! وشنو سياره دافيه ؟!
هزيت براسي بهدوء وهوا ابتسملي ورجع يشوف قدام طلع وسيارات طلعو في خط واحد تقول بيمشو لحرب إيران ايه اني نوعيتي نركز على كل شيء صح نخاف لاكن متفوتنيش فايته
وعندي ميزه نقدر نتحكم في أعصابي ونبرجم شيء لنفكر فيه قبل مانتسرع حسيت بيهم كل واحد عنده سلاح في خصره والهدوء سيد الموقف وبعد ساعه هكي وقفو ونزلو وطبعا إلا اني قعدة في سياره بعد دقايق فتح الباب هاذا لإسمه مهاب وحط غدي جاهز مسلفر وبجنبه مشروب ومقبلات وشيشة ميه حطهم بجنبي وسكر الباب ركزت في لمكان لقيتهم نزلو لمطعم يتغدو استغربت مطعم على طريق ودنيا فاضيه ومهناك حد غيرنا يعني صحراء قاحله فاها مطعم قلبت عيوني برود من هالناس وجت عيني على الكيسه هوا الحق اني جعت لانه متغديتش بكري رغم كرامتي متسمحش لاكن ريحة تطبق راس فتحت سلفر وريحة تجنن وسخونه بديت ناكل فيسع فيسع قبل مايجي حد شربت مشروب وطبعا نصه قعد مقدرتش نكمله كله بطني تعْبت سكرت الكيسه ومسحت يديا بالكنينكس وطلعت تيلفوني من شنطه لكنت حاطه فاها إحتياجاتي البسيطه ولعت نت وقعدت نفسفس تبو الحق وربي راحه عبيت بطني وسياره دافيه وريحتها تساعدك الاسترخاء قعدة نهدرز مع البنات لمره مشينا مع بعض للحديقه قعدو يتناقشو شن بيدخلو ومش عارف شني اني سكرت وتنهدت لاني وضعي توا لايسمح بقرايه ولا يسمح اني نفكر في مستقبلي ضروري نرجع صوتي قبل واني غاطسة في أفكاري وفي أقل من ثانيه صار رصاص يطاير فوقي وصوت تكسير وكأنه حق بدت حرب البسوس اني نزلت لوطه ويديا على وذاني ونعيط بجديات اني قعده مش مقتنعه اني نمشي معاهم وبطلوع روح وكل هاذا قعده شاكه فيهم وعقلي كل مره طالعلي برأي وتوا كملت لما حسيت رصاص فوق سياره والخوف دب في عضامي واني نتخيل إنهم قتلوهم وبيجي يقتلوني رجعت ذاكرتي لهذاك اليوم منعرفش علاش وكيف قتل الكلب في راسه وكيف مرت خالي طاحت ودم يطلع من راسها  حسيت بقشعريره مرعبه حسيت تجمعت في راسي كل ذكره سيئه تمنيت حد معايا يطمني بربع كلمه زاد رصاص وعياط رجاله اني ذبت وجسمي يرعش مع بعضه واني مش فاهمه شن القصه اصلا ؟؟؟!!
حسيت هدت دنيا ومعاش هناك صوت وصوت خطوات تقرب اني خلاص قلت اكيده قتلوهم وبيجو يقتلوني حتى اني!!! رهبة الموت واااعره واني نحس في الموت يقرب مني بشوي بشوي وأول مانفتح الباب قلبي بيوقف وعيطة عيطه من الرعب لعشته اول اسم جي على لساني ومن حرارة الموقف لا إراديا : باباااااااااااااااااااااااااااااااا
________