عشق المهاب

البارت سابع

- في عالم مليء بالاختيارات ، دائما أختر نفسك.🖤

________

عشق

هدوء بعد حرب من رصاص لاكن هاذا يسمو فيه الهدوء مابعد العاصفه حسيت اني نموت على البطيئ واني نسمع في خطوات جايه بإتجاه سياره قعمزت لوطه وحاطه يديا على وذاني وكأني مانبيش نسمع الأفكار لي في داخلي بديت نتخيل في تخيلات حتى ابليس يخاف منها وهاذا الهم وين منا اني شن نقول ؟! تنفسي زاد دقات قلبي يسمعها الاطرش جسمي يرعش مع بعضه وحسيت انها نهايتي وفي لحظه جت صورة بابا قدامي مفهمتش علاش وكأنها يحس بيا وقت دنيا تضيق بيا 💔
حسيت في حد واقف بجنب باب سياره ! بديت نتخيل انه بيقتلوني ومرات يعذبوني والأفكار هاذي بروحها تخلي ضغطي يشيط وأول مانفتح الباب غمضت عيوني وصورت بابا جت قدامي لا إراديا عيطت بكل ماعندي : ياا باباااااااااااااااااااااااااااا م...
طبعا اني عاطيه للباب بضهري ومنقدرش نشوف منو واني مستمره نعيط حسيت بيد سكرت فمي وقال بصوت نقدر نميزه من كمية البرود والحقاره والاستهزاء والعصبيه لي فيه لاكن شيء هاذا ريحني منكذبش عليكم رغم نكرهم لاكن نحس بالأمان معاهم نحى يده وتكى على باب سياره ويشوفلي واني متجمده في مكاني قال بستهزاء: وأخيرا سمعنا صوتك
عدلت تقعميزتي ورفعت راسي وجت عيني البنيه في عينه سوده قال برفعة حاجب: تكلمي عودي لسانك على نطق خير مايهرب صوت ثاني
اني قعدة في حالة صدمه لدرجة اني منعرفش حتى شنو نحس نفتحو عيوني برعب من منظر دم ااايه هاذا مش فلم هاذا حق !؟ هلبا رجاله ميتين ولا اني نتخيل هوا طول اول محس بيا شفت المجزره سكر عليا الباب بكل برود وركب سياره اني نسيت وراح من بالي اني تكلمت اصلا لانه صدمتي بلصار نستني أمنيتي لكنت ديما ندعي انه يرجع صوتي ولما رجع مدرتش بال ليه نهائي كل همي وين بيرفعني هاذا ؟! وينه جلال لكان معاه ؟! وشنو لصار بزبط؟؟! وين الباقي؟!وهما شرطه ولا مافيه ولا عصابه ولا شنو؟! زعمك ميتين كلهم؟! معقوله قتلهم كلهم وتوا جي دوري ؟! الفكره هاذي خلتني نقرب للباب حتى كان صار شيء نحذف روحي من سياره لانه بديت نشك في كل شيء وتفكير مش قادره نفكر وطبعا سيد منقذ لي اسمه مهاب يسوق ولا كأنه لي ماتو بشر؟! معقوله بنكمل عمري مع ناس مهناش في قلوبها ذرة من الإنسانيه!!؟ ولا اني متوهمه؟! شن مصيري واني منعرفش ولا حاجه عليهم ؟! وقفضني من تفكيري الفاسد صوته البارد
قال بكل برود ولابس نضارات شمسيه ولد لذينه طالع طرف نصدمة ووخفت حسيته قري أفكاري لما قال: معاش تفكري لصار كان سوء تفاهم والباقي شويه وبيلحقو
رفعت حاجبي بستهزاء سوء تفاهم قال ههه والله ربي يستر على الايام لجايه قعدنا ساكتين اني فتحت روشن وقعدت نشوف لطريق وبعد ساعه تقريبا دخلنا لمنطقه ريفيه وفي نفس الوقت اثريه بجديات نحكي حسيتها غريبه وزادت صدمتي لما لقيت قصور مش حياش من طولها صح نضام العصور الوسطى لاكن تخلي العين لاإراديا عليها من جمالها🖤 واني منسجمه نتفرج حسيته تحمحم وقال: خيرك ساكته
لاحول ولا قوة إلا بالله مش عارفه شن قصته مع صوتي غصب يبيني نتكلم تنهدت بملل واني توا كيف ستوعبت اني نقدر نتكلم قلت بصوت متقطع وجاف: شش شش شيء طط طبي طبيعي
هز راسه بهدوء وسكتنا بعد فتره وقف سياره ونحى نضاراته وقال : هي إنزلي وصلنا
فتحت الباب ورفعت راسي وبلعت ريقي الجاف بتوتر معقوله هواا ؟؟؟هاذا القصر لكان بابا عايش فيه 💔
بابا ولد اهني بابا لعب اهني بابا كبر اهني بابا قري هني بابا عاش اهني 💔 الله يرحمك ويغفرلك يا حنين
قعدة واقفه وعيوني تنتقل على هالمكان الواضح العز ودلال على أصحابه جت عيني على الجنان لكبير وسطه نافورة ميه ومعبى شجر زينه ورد منضره يريح النفس 🤍 تقول رسوم مش حقيقه لانه اول مره نشوف ع طبيعه زي هكي رغم حوشنا حلو كان لاكن مش بهالجمال هاذا استغربت يعني سمع بالمنطقه ريفيه ديما يهزو على ناسها وفقرهم أصحاب وهما مش محصلين ربع لعندهم
قال برود: خيرك واقفه ادخلي
توترت وحسيت بشعور اخي منعرف حد منعرفش شن بيكون مصيري في هالقصر!!
خطيت خطوه وهوا خطوه حسيته يمشي بهدوء وكأنه يبي يحفظ كل خطواتي غريب هالراجل؟!
وقفت بجنب البوابه لقيت راجل كبير في سن( شيباني) لاكن سبحان الله ‏(سِيمَاهُمۡ فِي وُجُوهِهِم )🤍 ابتسملي بوجهها البشوش وقال بطيبة نفس: سلام عليكم بنيتي
وأخيرا كيف حسيت براحه رديت سلام بإبتسامه وبكل رحابة صدر: وعليكم سلام عمي
وقف هاذا لإسمه مهاب وراي توترت وحسيت روحي سخنت واني نشم في ريحة عطره المميزه بطني وجعتني من الإحساس هاذا هوا زاد قرب لاكن وقف من جيها ثانيه و مشي لشيباني وقال بأدب وإحترام مش طالع عليه: عمي محسن كيف الحال
وزادت صدمتي لما باس يده وراسه واضح انه يعزه هلبا لاكن زادت حيرتي لما سمعت صوت شاب طويل وشخصيه قال بستهزاء: ماهذا تواضع ياسيد مهاب لبواب حوشنا !؟
رد عليه بإبتسامه لاكن كأنها إبتسامة شيطان وقال: خليها في بالك في لحظه نخليك تشحت في شوارع وهوا نخليه الحاكم في كل شيء وأولهم عليك انت
حولت عيوني لشاب هاذا لسكت وعقد حواجبه بغضب مكتوم طلع وخذي المفتاح من جيبه وطلع سيارته الغاليه من منضرها من الكراج وطلع
تكلم شيباني بطيبه وبتعب: مهاب ولد عمك هاذااا
ضحك بستهزاء: هاذا منعترفش بيه حتى في سوق الخضره
اني نتفرج عليهم بصمت وراسي مطلع دخان من لنشوف فيه قدامي قلبي دق بخوف لما جت عيني في عينه وقال ببرود: وانتي خيرك واقفه زي صنم
رفعت حاجبه بعصبيه من اسلوبه: لتذكير يا بابا اول مره نشوفه لمكان هااااذااا ومنعرفش حتى الباب وين؟! شني وضحت صوره ولا نعاود؟!
قعد ساكت ومفهتش علاش يشوفلي هكي قال بهدوء: وأخيرا صوتك تحسن
وووااك منه وااك اني وين وهوا وين قلبت عيوني بتعب منه مشي قدامي واني وراه وقف شويه وإلتفتلي قعد ساكت ويشوفلي بعدين تنهد وقال: هاذي أخر مره
استغربت قتله: شنهوا اخر مره؟؟!
معدلش عليا ومشي قدامي بكل هيبه ورزانه بجديات رغم تصرفاته الغير مفهومه نهائي!؟ لاكن شخصيته وشكله ماعندي مانقول فيه🤍
ضحكت في سري على روحي بللهي أني بنت صافيه؟! اكيد لا ههههههه
وأخيرا وصلنا لباب كبير لونه أبيض وقبل حتى مايطق نفتح الباب ولقيت قدامي وحده زي لي في المسلسلات لابسه قونه طولها لتحت ركبه لونها اسود ومخصره وفوقها بلوزه بيضه رسميه ومدايره شرها كوده ولابسه نضارات طبيه وملامحها أقسم بالله تشبه للأنسه منشن هههه ( لي كان يتابع في سالي حيعرف قصدي 🤭) وقف بجنب الباب وحاط يديه في جيوبه وقال برود : تفضلي يا أنسه عشق
وطبعا اني طول شفتله لأنه هاذي أول مره حد ينطق إسمي من اول ما شفتهم رفعت حاجبي بتسأل: معليشي انت مستغبيني ولا شنو
شافلي بعيونه لي فيهم سحر غريب قال برود: لا حشاك
ابتسمت بستهزاء : تمام !!!بااهي اني نبي نعرف وين جايبيني وحسيت دنيا فاضيه ومهناش صوت انسان؟؟!هاذا حوش جدي لحامله إسمه على اسمي واني مش شايفاته في حياتي ولا لا؟؟؟!
قلب عيونه وشافلي: قداش مافيك من دوا
فتحت عيوني بصدمه وأشرت على روحي: اااني ؟!
شاف للواقفه على الباب وقال برود: نجاة دخليها وريلها دارها اني شوي وجاي
الحقير فاتني وكأني مش موجوده مشي بكل برود واني مشيت وراه بعصبيه ونتكلم : انتتتت هيييي نكلم فيك وين ماااااشي اني ووووين جايبيني نكللللللللللم فيك
وقف واني وقفت إلتفت وحواجبه عاقدهم: خييييرك شني تبي ياحصله
فتحت عيوني بعصبيه : اننني حصله؟؟!
مسح يديه على وجها وأشر على ساعته ذهبيه : لاا اني .. تعرفي مسكرتش خمس ساعات نعرفك لاكن اقسم بالله درهتيلي كبدي لنممم
شفتله بستفزاز: كول خيار
مشي واني قعدة نعيط وراه حق وربي صوتي يصدع راس وقف وهوا ينفخ وقال بعصبيه وبصوت عالي: خيرررك شن تبيي
وقفت بهدوء وخوف: نبي نعرف هالمكان لي منو وين؟! حوش جدي!؟ ولي على أساس عمامي ويين؟! وينها جدتك لي تقولو تبي تشوفك حتى هيا ؟!!!
ولع طرف دخان برود ونفخ دخان من خشمه وقال:هاذا لمكان ليا وهالحوش ليا اما عمامي والباقين غدوه كلهم تلقيهم قدامك اليوم أرقدي ونوضي تلقيهم بحداك ومعاش نبي نسمع حسك لغدوه
فتحت عيوني بصدمه: قصدك هالقصر هاذا لكبببير ليك انت!!!!!!!!!!!!!
نفتح دخان وعيونه مغمضات: ايه وشنو الغريب في الموضوع كله !؟
سكتت اصلا ماعندي مانقول من صدمتي وربي ماتوقعت انه عنده حوش كبير زي هاذا معناته هاذم هوامير ( المعنى أغنياء) يستر الله منين يجيبو فيهم هالفلوس وسؤالي لي اول ماخطر على بالي
فلوس حرام ولا حلال؟!
قعد يدخن وشافلي بعد فتره وقال: بري إدخلي صقع لمطر بتصب
قعدت واقفه في مكاني ونشوفله وهوا يشوفلي تنهدت وسمعت كلامه رجعت للباب لقيته مفتوح دخلت بخوف وحيره من مصيري المجهول وأول مادخلت تقول دخلت لواحد من القصور اليونانيه بدون مبالغه !!
يعني حتى لو خدم عمره كله مستحيل يبني قصر بالهجمال وثراء في إنه في الموضوع اني متأكده !!!!
اوا ماتدخلي تلقي صالة كبيييره وفيها ثريه كبيره وذهبيه نازله وإضاءه تقول شمس وبعدها في درج ملوي في صالة وعرصات ذهبيات والأثاث يخليك ليل نهار تتفرجي عليه من نزاكته وصاله كبيره هلبا وكلها صالونات بلون الأبيض وشاشة بلازمه اكبر من الحيط معلقه فوق وطاولات كبار لونهم ذهبي و الحوش كله ذهبي وأبيض وبجنب صاله بمسافه في كوجينه طبعا مش كوجينه يلي في بالي وبالكم لا!
حتى هاذي صالة لاكن تقدري طيبي فاها بجديات رغم منعرفش نطيب هلباا لاكن سهفتني إني نمثل دور منال العالم من نضافته وجماله كملت من الكوجينه المفتوحه بلونها الأبيض وتورابي ( البيج الفاتح) لقيت قدامي بوفي طاوله ملكيه بكراسيها كبيره وطووويله فاها 30 كرسي تقريبا !!
ومرايه بجنبها طويله وفيها إضاءة يعني منضر يفتح نفس ساد معاش بنشرح دهشت ههه
وهاذا كله مش حنقدر نوصف الإبداع لشفاته عيني واني ندور فيه تقول حوشي وفي لحظه نلقى ورايه كمشة بنوت لابسات نفس طاقم ضربت في راسي اكيده خدم اصلا واضح انه لمكان الوهمي لنشوف فيه في المسلسلات يحتاج خدم ! مشيت وراهم بعد ماقالوللي فتحت الباب وقالت بحده وبهدوء: يا أنسة تفضلي ندخلك لغرفتك
هزيت راسي مستغربه من إسلوبها واني قعده من صدمه لصدمه يستر الله خايفه ننجلط
مشت قدامي واني وراها ركبنا من دروج واضح إنه على 3 دوار ولا 4ولا 5 منعرفش عالمهم نمشي وراها ونتفرج وكأني ماعمري شايفه بساط وماعمري شايفه باب وماعمري شايفه روشن هههه هوا الحق الحق حتى روشنهم طويل وشفاف وفيه تقعميزة ودرجيحه يعني كان تلقي تقعدي طول العمر ساكنه فيه قعدة نمشي وراها والممر أطول من حياتي وفي هلبا ديار والبيبان كلهم بلون الأبيض كلهم في نهاية الممر في باب لونه أسود وكبير زي الباب الحوش رئيسي وبجنبه في باب اسود والبجنب ثاني أبيض اني بكل ثقه وبكل فضول وصحة وجه بنفتح الباب الأسود لكبير لاكن شدت يدي وقالت بإحترام : معليشي ممنوع انك تفتحي أي باب غير باب دارك يا انسه تفضلي
خزيه الكلبه حرجتني دخلت لدار وقعدت نتفرج على كل إنش فاها من جمالها نسيت كل شيء لن نفتح الباب ثاني ودخلت بنت في عمري تقريبا لابسه نفس لبستهم حطت شنطتي وحجاتي بإبتسامه بشوشه: كان تبي أي شيء في بجنب التلفزيون شاشه صغيره انتي ماعليك إلا تقولي تعالو تلقينا قدامك
إبتسمت بطيبه: شكرا حبيبتي خوذي راحتك
هزت راسها بابتسامه وطلعت واني قعمزت على السرير ناعم الواسع بلونه الأبيض وبورغان الأحمر وفرشة فرو حمره والباقي كل شيء على الأبيض ودار كبيره وفي زي متع المسلسلات مدفئة بالحطب لاكن هاذي إلكترونيه شاشه مدايره صوت حطب تاكل فيه نار وهيا دفايه في الأصل المهم لمكان يجنن وفي روشن كبير زجاجي وفي صالونات من جيها ثانيه يعني دار ثانيه لاكن مفتوحه بلا باب فيها شاشة تلفزيون ودار صغيره فيها مكان للحوايج والأحذيه ومرايه على طول الحيط وربي ماعمري حلمت بيه لمكان لدرجة اني خفت هاذا شنو يخدم ؟! لدرجة انه عنده هالقصر مش معقوله اكيده يكذب ؟! لاكن واضح من شكله مش كذاب تنهدت من تعب تفكير وفتحت الحمام طبعا الحمام تقول دار نوم كان تلقي ترقدي فيه من كبره وريحته لتخلي نفس ترتاح رغم صقع برا ومطر لاكن دار دافيه ومريحه فتحت لميه ودخلت في حوض كبير لونه أحمر وابيض حتى الحمام ههه
قعدة مسترخيه ونفكر في العيشه معاهم رغم رفاهية لمكان وأي حد يتمنى يقعد فيه حتى اني طبعا
لاكن محسيتش بالأمان وكأنه مكان يخليك تخافي من جماله لانه مجهول الهويه قعده لتوا مش فاهمه شيء قعدة فتره في الميه وطلعت لقيت ديشمبر جديد لونه أحمر حاطينه على طاوله موجوده في الحمام فاها جميع انواع المناشف وشامبوات والمنضيفات والمعطرات وربي ضحكت لما لقيت حتى المنشف أحمر وابيض وتسعيرة قعدة عليهم واضح اليوم شارينهم ضحكت وطلعت قعمزت على كرسي زيانه واني عايشه لحظه فتحت درج نحسابه بنلقى مكياج وعطور وحركات لقيته فاضي خزيه طلعت شنطي وخذيت مكياجي البسيط وعطري المفضل والإستشوار وحوايجي لبسة قفطان طويل لونه أسود واسع وشاح اسود اني لوني لي نحبه وردي لاكن من يوم لتوفت مرت خالي سهيله أيامي سودت 🖤 وتعايشت مع هالون رغم كرهي ليه لاكن متوقعتش إني داخله في عيله حياتهم اسود من قفطاني 💔
لبست وجففت شعري ورتبت حوايجي ونضمت أموري حطيت تيلفوني في شحن وفتحت نت هدرزت مع سنابل لقيتها مسكر ومقفل تيلفونها المشكله ماعندي مع من نهدرز ونفضفض غيرها هيا سكرت تيلفوني وخليته في شحن طلعت من دار وندندن في أغنية منعرفش علاش نغني فاها من صغري وهيا على لساني بحثت على اليوتيوب وطلعتلي استغربت شنو قصة هالاغنية وليش نغني فاها من قبل ماتوفو أهلي او بعد تقريبا معاش نذكر لي نعرفه هالاغنيه ديما على لساني وين؟! وعلاش؟! منعرفش سبب!!
في حزن وسع المدى
في وجع جوى عميق
واني نغني وعايشه لحظه وصلت لدرج ونغني لاكن بصوت هادي وصلت لأخر درجة وفي لحظه نطفي ضيء وصوت رعد قوي لدرجة يخوف وقفت متجمده ودنيا ظلام ولما يجي رعد يضوي الحوش ويرجع لظلامه تنفسي زاد من الرعب لنحس بيه واني مش قادره لانرجع ولا نقدم حتى كان بنادي الحوش فاضي يلعن بو ساعه لطلعت فاها من دار قطعت تنفسي وعيوني طلعو لما جي رعد وضوى الحوش حسيت بحد واقف لاكن أسود ميبان منه شيء اني خلاص قلبي وقف ورجليا خيوط قعمزت على درجة وجسمي بدون مبالغه تقول جاني صرع قمزت وجهي شحب وصفر وشفايفي زرق ويتراعشو لما سمعت هالمره صوت رعد زاااد وكأنه بينزل للأرض من قوته ولما ضوى حسيته قرب الاسود اني لساني نعقد مره ثانيه اول ماحسيت في حد يتنفس خلاص حسيت بننجلط عيوني دغدشو وصداع حاد غمضت عيوني ولساني يلهث بذكر الله💔 ومعاش نندري على روحي فتحت عيوني واني نحس اني راقده في فراش دافي وناعم قعدة نشوف يمين يسار لقيت روحي في نفس دار شكيت في روحي وقلت اكيده كنت نحلم لاكن لما ذكرت الموقف قلبي دق بقوه وشعور الرعب يدب في عضامي لي توا !!!!! يعني لصار حق مش حلم ؟ باهي كيف وصلت لدار!؟ وشنو لصار؟! حسيت بالباب نفتح غمضت عيوني بقوه ومن كثر الخوف حسيت السرير يهتز معاي حسيت بصوت كندره تقرب قلبي يدق على نغمة الخوف من اول ما شفت هناس شعور الخوف في كل لحظه وين مانمشي معاي!
اني في داخلي نحس بالموت يقرب!!! واني في مكان لانعرفه ولانعرف أصله لمنو ؟! وهل لقال مهاب كذب ولا حق منعرفش ؟! زدت ضغطت على عيوني ويدي لضاغطه على الورغان ترعش اول ما سمعت صوته فشلت مع بعضي وحسيت براحه غريبه وكأنه توا كيف حسيت بأني في امان قال بهدوء: نضتي
فتحت عيوني ببطئ لقيته واقف بعيد شوي عليا ومتكي على الحيط اني عدلت تقعميزتي وساويت وشاحي وقلت بجديه بعد ماحسيت انه الخوف راح تكلمت معاه بكل شجاعه: معليشي حتى لو كنت ولد عمي وحتى لو كان حوشك تعلم طق على الباب هاذي اول نقطه لاني محجبه وعيب ولو عندك ذرة من الحياء والحشمه ههه !!! ثاني شيء تواااا دبر انشالله تجيب طياره أرفعني لمكان في ناس فيه بشر اني بتركبني حاله نفسيه رغم مسكرتش ساعتين واني عندك!!! ثالث حاجه في غوله في حوشك في حالة انك مطلعتش تكذب عليا ويطلع لا حوشك ولا حوش جدك وتطلعووو تكذبووو عليا من الأساس وماعنديش عمام مره وحده واصلا ان..
مسح على وجها وهوا شاد على عصبيته بسيف: انتي حق مفروض صوتك يريح مره وحده لانك بجديات تنفخي راس
وقفت بعصبيه ونعيط: بالك مش عاجبك!!!! جايبني لمكان يخوووف فيههه جنون وضيء يهرب والحوش فاضي ومهناك حد شيء يخوووف ويااريته حتى صغير هوا اكبر من الكره الارضيه !!
كااان عندك ضمير ولو شوي ارفعني ولا رجعني وين ماكنت نهااار أحرف شويه ثانية ونجلطت اقسم بالله مع صوت رعد اول مره ننرعب هكي وربي تقول فلم رعب ولي توا منعرفش حتى كيف وصلت لداري وعلى سري..
قال وهوا يدخن بكل برود وبستفزاز: اني جبتك
نشوفله ومفهمتش شن قال : شن قلت؟
قعمز على كرسي زيانه ويدخن غبقها دار رجع كمل بكلللل بررود: أني جبتك وحطيتك على سرير وعلى فكره خالك لوسخ ميوكلش فيك واضح لأنك ضعيف هلبااا
قربت منه واني عين ترمش وعين مفتوحه أيقنت اني حننجلط حق على يده أشرتله بصبعي بهدوء: إنت!!! إنت رفعتني بيديك وحطيتني على سرير معناته انت نفسه لكنت في صالة لما هرب ضيء ولاه
رفع حاجبه : لا اني جيت لقيت ضي هرب ولعت المولد والخدم في الملحق لقيتك انتي طايحه بجنب دروج ورفعتك في ح..
نسيت كل شيء في لحظه وركزت في كلمة "لا" يعني حق في غوله في الحوش ولصار حق مش حلم قربت منه وهوا مستغرب من تصرفاتي ولا يتصنع الاستغراب معاش فهمت وين الحقيقه وين الكذب بديت نشك حتى في روحي شديت يده واني جسمي يختض زي سعفه من الخوف : قول انت بلاش كذب والله لما ندير كل شيء تبيه قول انت نفسه لشفته في صاله
حسيته توتر من قربي منه مسح يده فوق يدي بخفه ووقف مسح على وجها وبعد يدي بهدوء : انتي أرجعي أرقدي واني تو نشوف شيء لخلاك هكي
اني أول ما حسيت انه بينزل شديت في تجاكته وسنوني يطقطقو مع بعضهم: ووين ماااشي ومخليني برروحي
خذي تجاكته مني بهدوء وابتسم على خوفها ومنضرها البريء وكأنها طفله تخاف ترقد بروحها : متخافيش مهناك شيء انتي تتخيلي ! خليك في دارك شوي وجاي نشوف شن هناك وغدوه العيله كلها جايه انتي تحملي هاليله بس
هزيت راسي بسرعه بخوف واني نسمع في رعد ودموع في عيوني: تربح بللهي عليك والله نقعد وراك من غير ماننطق بحرف واحد والله كان مشيت وخليتني لما نموت خليني معاك
قلب عيونه بملل وبرود وبعد من الباب وأشر بيده: قداااش مافيك من دوااااااا وربي حصللله حصلللله هيا تعالي
هزيت راسي بإرياحيه رغم كلامه الكلب تقول بناكل من رزقه وحتى لو كليت في نهاية رزق بابا عندهم والله!!
وقعدة نمشي قدامه وكل دقيقه نلتفت نتأكد انه ورايا وطبعا هوا يد فيها تيلفونه ويد في جيبه وعيونه على تيلفون بكل تركيز حسيت بصوت لمطر قويه ورعد زاد وكأنها عاصفه اول ماوقفت هوا قعد يمشي بلامبالاة ولا كأنه قدامه بشر قلت بصوت عالي واني نشوف في الأثاث الفخم : متأكد هاذا القصر ليك
تجاهلني الحقير ونزل من درج تعصبة من اسلوبه الفظ قعدة نمشي وراه وهوا عيونه على تيلفون نزلنا من درج رفع عيونه للكاميرا موجوده فوق الباب رئيسي حسيته قعد يشوفلها بتركيز وضعه مش طبيعي للحظه خفت اول ما إلتفتلي قرب مني وقال بهدوء : فيسع بري لأخر باب تلقيه في الممر وسكري على روحك بالمفتاح فيسع
خفت من كلامه وحسيت انه الحادثه لصارت بكري حتتعاود قلت بتوتر مختلط بعصبيه وخوف: اااسمع انتم منووو؟! اقسم بالله بتختشوني واني قعدة مسكرتش يوم عندكم مش معقوله مره رصاص مره دم مره تهديد مره غوله في صالة قصرك لمشعارفه حتى كيف جبت حقه وهوا يسوى في الملاين نبي نعررف انني ويييين ؟! وااااانت منوووو؟!
طبعا اني نرغي وهوا عيونه على الكاميرات ومره على الباب ومره عليا ومره على تيلفونه ومره على ساعته ولا كأنه اني موجوده قال برود: كملتي
بعصبيه: لاااا
شد يدي بسرعه وبرود: كملي في المكتبه
جبدت يدي منه بقوه بسبب القشعريره لجتني زاد خوفي أكثر واكثر وكأني توا كيف ستوعبت انه اني وياه بس وشيطان ثالثنا وبدت الأفكار زي كل موقف تتجمع واني مش ناقصه
هوا كأنه فهم عليا تنهد بصوت عالي وعيونه تتنقل على الباب والكاميرا وكأنه يدرس في حرب طاحنه قبل ما تبداء قرب مني بهدوء: اسمعيني كويس الأفكار لي في بالك فاهمها وعارفك قعده لتوا مش مستوعبه ولا اني فلهاذاا قتلك تحملي هاليله بس وغدوه العيله كلها جايه وسبب شفتيه بعينك بكري وحتى توا حيصير نفس شيء اني مش حنكذب عليك لأنك واضح تفهمي على طاير ومش غبيه فلهاذا اسمعي لكلام لانه لبيصير مش حيعجبك نهائي
قلت بصوت عالي وبعصبيه: ااانت اسمعني كويس اني مش ملزومه نعيش مع ناس لا عارفه أصلها من فصلهاااا ولي شفته اليوم كان مكفي وزياده مستحيل نننننقعد ساعه معاااك اني بعيني شفت الموت وربي اول مره نخاااف لهدرجة اني طالعه من حالة نفسيه وكان صوتي ليه شهور هارب وتوا انت كمل عقابها واجلطني شن رايك؟!
توااااااا ترفعني لحوش أهلي الله يرحمهم ومانبي شيء منكم بس انكم تبعدو علياااااا ومعاش نبي نشوف خليقتكم وفلوسكم واملاكم نقعو فيهم واشربوا ميتهم اننننني مااانبي منكم شيء ... تسممممع فيااا شن نخرررف لياااا ساعه
طبعا عيونه واضح فيهم توتر طول ما أني نرغي
لاكن البرود كاسي على ملامحه وعيونه على الباب والكاميرات وكل دقيقه يبعت حاجه وأول ماكملت طلع من تجاكته منديل وفي زي البخاخ صغير رشه عليه رفع حاجبه بهدوء وقلة حيله: انتي تقول بالعه راديو واني مصدع وانتي مش حتساعديني سبب منك قبل مانبيش نستعمل الإسلوب هاذا لاكن انتي سببب
قرب مني خطوه واني نبعد خطوه ونهز في راسي بخوف ورعب: شنن بدير
سرع خطوته في لحظه وحط يده على رسي ويد لي فيها المنديل على فمي قال بهدوء: معنديش حل ثاني حيوجعك شوي لاكن مش هلبا .. هيااا تنفسي هياا متعبينيش وقت
حركت راسي بقوه ونضرب فيه برجلي واني قاطعه نفسي ومانبيش نشمه لاكن زاد قربني منه أكثر وضغط على فمي وخشمي ويده على ضهري تعبت وشميته ودمعتي في عيني اخر شيء شفته هوا عيونه بلونهم لأسود الخالي من اي مشاعر 💔