رواية أحببتُ مشوهًا بقلمي أمنية أشرف

مشهد مستقبلي

دخلت تالين من باب الفيلا وخلفها فارس وأسر وهي تصرخ بحنق: الست دي لو شوفتها في الشركة تاني مش هيحصل كويس... انا قولت اهووه
زفر أسر بملل وهتف: ما خلاص بقا....احنا زهقنا
نظرت له تالين بحده وصرخت: انت تسكت خالص... انت السبب اصلا
رفع أسر شفتيها وهتف: انا السبب ليه يا اختي... انا مالي... هو انا اللي خليتها تعاكس جوزك
أحمرت عين تالين ووضعت يدها في خصرها قائله: لا والله وهي كانت بتعاكس جوزي لوحده....ليه مسمعتهاش وهي بتقول...وقلدت طريقة المرأه بلغتها الأجنبية قائله: اووه من الرائع ان يكون هناك نسختين بكل هذه الوسامة والجمال
= قالت ايه
كان هذا صوت مليكة التي كانت تجلس على مقعد مريح في بهو الفيلا وهي تضع على حجرها طبق كبير ممتلئ بالفاكهة وهي تأكل منه بنهم
نظرت تالين لأسر بإنتصار وقد حصلت على من يساندها في هذا الموقف أمامهم فوجهت حديثها لمليكة قائله : الشركة الزفت اللي جوزك اتعاقد معاهم بعتولنا واحدة النهاردة بترطن ميه لغة... وأول ما شافت فارس وأسر كانت هتاكلهم بعنيها الوقحة..و
قاطعتها مليكة قائلة: ايوا قالت ايه عشان مسمعتش كويس... الكلمة اللي انتي لسه قيلاها من شويه
هزت تالين رأسها بتفهم وكررت مقلدة المرأه بميوعة: أووه... من الرائع ان يكون هناك نسختين بكل هذه الوسامة والجمال
حركت مليكة نظرها بين الاثنين فارس وأسر وهي تنظر اليهما بتمعن ثم هتفت بجدية: عندها حق الصراحه
انفجر فارس وأسر في الضحك فنظرت لهم تالين بحدة ثم هتفت بغيظ: مليكة
تلجلجت مليكة وقالت : ايه... اي الوقاحة وقلة الأدب دي..... مجبتهاش من شعرها ليه الست دي
ابتسمت تالين بشر وقالت وهي تتذكر ما فعلته بالمرأه: كان نفسي الصراحة... بس انا ماسكتش حميتها بكوباية العصير
هللت مليكة وشجعتها قائله: برافو عليكي
نظر لهما أسر بقرف وهتف: برافو عليها... دي خسرتنا صفقة بملايين
هزت تالين كتفيها بلامباله وقالت: فدايا
قَلب أسر عينيه وقال بغيظ: فداكي... انا مش عارف انتي شغالة معانا في الشركة ليه اصلا
انطلق الشرر من عين تالين وصرخت: انا مش شغاله معاك اصلا... انا شغالة مع جوزي
تحرك أسر وجلس بجانب مليكة وهو يتمتم بغيظ وغيرة طفولية : اه جوزك... ما هو السبب في كل البلاوي اللي احنا فيها دي...... عمال يدلع فيكي لحد مبقيناش عارفين نكلمك
دبدبت تالين في الأرض بغيظ وهي تنظر الي فارس كي يدافع عنها فزجره فارس قائلا: أسر
جز أسر على أسنانه وقال: خلاص أسر سكت اهوه... دلعها زي ما انت عاوز.... بعد كدا مش هتعرف تسيطر عليها
جعدت تالين وجهها ثم نظرت لهم بحزن وانطلقت تصعد الي الجناح الخاص بها هي وفارس
فنظر فارس لأسر بلوم وانطلق يصعد خلف تالين

ابتسمت مليكة بيأس وقالت بلوم: امتى هتبطل ترخم على تالين بقا
ضحك أسر وقال: مش هبطل... هي اصلا عارفه اني برخم عليها فمبتزعلش
هزت مليكة رأسها بتفهم فأردف وهو يقرب رأسه من بطنها و يطبع قبله حنونه عليها: حبيبة بابي عاملة ايه النهارده
ابتسمت مليكة وتمتمت ببؤس: مطلعه عيني والله
مسد أسر على بطنها بحنان وهمس: خلاص هانت
ثم اعتدل ورقد على قدمها براحة ونظر الي الثرايا الموجودة في السقف وشرد قائلا: متتخيليش انا فرحت قد ايه.... لما عرفت انها بنت.... انا بحب البنات اوووي
ضحكت مليكة وقالت بسخرية : انتي هتقولي انا عارفه انك بتحبهم طبعا
قهقه آسر بقوة وهتف: لا مش اللي في بالك... انا خلاص تبت الحمدلله
ابتسمت مليكة وقالت بتضرع: ربنا يثبتك.... وتفضل كدا ع طول
ابتسم أسر وقال بتفكير: عارفه ايه اكتر حاجه شايل همها من دلوقتي
انتبهت مليكة وسألت: ايه
تمتم أسر ببؤس: انها لما تكبر هيجي عيل عِره يخطفها مني
ضحكت مليكة بقوة وهتفت بلا تصديق : لا والله
هز آسر رأسه بتأكيد قائلا: اه والله... والكارثة الكبيرة بقا لو حد من الكلاب آمن ولا يامن حبها ساعتها بقا
هتفت مليكة بتساؤل: ها هتعمل ايه
رد أسر بنبره شريرة : هقتلهم او اقتل ابوهم
ثم ابتسم وهمس بغيرة طفولية: او اقتل امهم وارتاح منها
قهقهت مليكة بقوة وهي تهز رأسه بيأس منه ومن غيرته الطفولية من تالين التي ما ان يراها حتى ينقلب الي طفل صغير مشاكس... شاركها آسر الضحك وهو يبتسم على سخافته وجنانه.... فهو يحمد الله كثيرا على صفاء نفسه وعلى وجود مليكة المبهج في حياته وانها سوف تنجب له صغيرة تشاركها مكانتها في قلبه.

دخل فارس الي الجناح الخاص به فوجود تالين تجلس على الفراش وهي تبكي بصمت فهرع إليها سريعا وضمها الي قلبه قائلا: ايه يا حبيبتي بتعيطي ليه... انتي عارفه إن أسر بيهزر معاكي مش اكتر
هزت تالين رأسها وهي تمط شفتيها بحزن: عارفه
استفسر فارس قائلا: اومال زعلانه ليه
نكست تالين رأسها وهمست ببكاء : عشان انت ما بقتش تحبني
اتسعت عين فارس وسأل: مين قال كدا
ردت تالين بحزن: محدش... دا مجرد احساس
همهم فارس وقال: لا دا احساس قليل الأدب... مينفعش يفضل ما بينا أبداً
ثم حرك عينه في الجناح وسأل: هما الولاد ناموا
أومأت تالين برأسها إيجابا وسألت: ايوا بس بتسأل ليه
همس فارس بجوار أذنها وكأنه يفشي سر حربي: عشان عندي مهمة خطيرة
سألت تالين بغباء: مهمة ايه
ضحك فارس وهمس : مهمة عشان نقضي على الإحساس اللي عندك دا...... مينفعش اسيبه كدا احسن ينتشر
تاهت تالين وسألت بعدم فهم: هو ايه دا
ضحك فارس وقال: الإحساس يا تالين ركزي
ثم غمز قائلا: هنبدأ منين
ابتسمت تالين وقالت بدلع: مش عارفه
غمز فارس وهمس: مش مهم انا عارف.... بس لازم تعرفي اني بحبك جدا وجدا وجدا
ثم غرقها وغرق معها في بحر من بحور عشقهم وهو يثبت لها بأقواله وأفعاله كم يحبها ويذوب عشقا فيها وكيف سقط صريع هواها دون القدره علي النجاه.

30/8/2023

أحب اشكر اختي وصحبتي وأحسن حاجه طلعت بيها من الكلية.... ضحي يوسف

وشكر واجب للي لها الفضل بعد ربنا في كتابة الرواية دي واللي داعمتني في اكتر وقت كان نفسيتي فيه تحت الصفر.. وانها دايما خير داعم ليا...إسراء إيهاب

وكل الشكر للي شاركني رحلة أحببت مشوهًا من البداية للنهاية وإن شاء نلتقي في حكاية أخرى من حكاوي أمنية أشرف

بحبكم جدا
ودمتم بخير

#أحببت_مشوهًا
#أمنية_أشرف