رواية أحببتُ مشوهًا بقلمي أمنية أشرف

الفصل الثالث

بعد مرور عدة ايام
طرقت باب المكتب بخفه ثم طلت من خلف فتحة صغيرة وهي تهتف بمرح : البيزنس وومن الحلوة بتاعتنا بتعمل ايه
ضحكت چومانا وهي تشير لها لتدخل: تعالي يا تالي.. عامله ايه يا حبيبتي
دخلت تالين وصافحت چومانا بمودة وأردفت: انا كويسه جدا... انتي عامله ايه
جلست چومانا علي مقعدها بتعب وهتفت : طالع عيني يا اوختي شغل الشركة كله ع دماغي.... بس تعرفي انتي جيتيلي من السما
ضحكت تالين وهتفت بمحبه: كان الله في العون يا حبيبتي ثم استطردت بنذالة : بس اوعي تفكري مجرد تفكير انك تستغليني وتخليني اشتغل معاكي... النهارده انا جايه اشوفك وماشيه ع طول
قهقهت چومانا وقالت: طول عمرك ندله
ابتسمت تالين ولم تعلق لتستطرد چومانا موضحه: متخافيش مش هشغلك بس عندي ميتينج كمان نص ساعه مع آسر عمران وانا بصراحه ببقا قلقانه منه ومش بحب اقعد معاه لوحدي
هزت تالين رأسها بتفهم وهمست: بس ليه يعنى بتقولي كدا... هو صدر منه اي حاجه ضايقتك
هزت چومانا رأسها بنفي وقالت: لا طبعا بس انا مبحبوش شخص غامض كدا ومخيف انا اصلا مكنتش عاوزه اشتغل معاه نهائي بس مضطره للاسف
تفهمت تالين موقفها رغم انها المرة الاولى التي تراها فيها بهذا التوتر من احد فدائماً چومانا واثقة من نفسها ولا تعير لاحد اي اهتمام ولكنها أثرت الصمت وقالت: طب خلاص انا معاكي واعتبريني من النهارده
مديرة اعمالك وهكون معاكي في اي ميتنج ما بينك وما بينه
هللت چومانا بفرحه: حبيبتي يا توتي ربنا يخليكي ليا يا روحي
مرت النصف ساعة سريعاً وابلغت السكريتره چومانا ان آسر قد حضر لتهف چومانا بسخط: في معاده مظبوط مش كان يتأخر شويه
ضحكت تالين بقوه: انت مش طيقاه بجد بقا
زفرت چومانا بسخط: اومال يعني بهزر... انتي يعني مش عارفه الحاجات اللي بيعملها واللي بنسمعها عنه كل يوم
أومأت تالين برأسها إيجابًا وقالت: ايوا... بس احنا مالنا... اللي بينا وبينه شغل وبس مش هناسبه يعني
وافقتها چومانا قائله: ايوا عندك حق.. يمكن انا...
ولكن قطع عليهم كلامهم دخول السكرتيرية ومن خلفها أسر الذي كان يدخل بغرور متأصل في شخصيته لترحب به چومانا وهي تمد يدها بالسلام: اهلا بشمهندس أسر نورت المكتب
استقبل يدها بين يده بترحاب شديد وهتف: ميرسي چومانا... بنورك
شعرت چومانا بالسخط من طريقته ونطقه لاسمها مجرداً دون ألقاب ولكن حافظت على ابتسامتها وأشارت لتالين لتعرفه عليها ولكن قاطعها وهو ينظر لتالين بتفحص وأعجاب وهتف وهي يمد يده اليها: تالين السيوفي... اكيد غنية عن التعريف
ابتسمت تالين وصافحته بخجل .. لتهمس چومانا في نفسها بغيظ.. هو هيعاكس تالين ولا ايه انا ايه اللي خلاني اقولها تحضر معايا الميتينج يادي النيله عليا
استفسر أسر قائلا : بتقولي حاجه يا چومانا
هزت چومانا رأسها بنفي سريعا : لا مفيش... بقول اتفضلوا ع تربيزة الاجتماعات
جلست چومانا على رأس الطاوله وجلس أسر مقابل تالين وبدأ يشرح لهم التصاميم الخاصه بالقريه السياحية الجديده التى على وشك البدأ في بناءها والتي تكون شركة والد چومانا شريك اساسي بها
ظلت تالين تنظر الي التصاميم بإنبهار شديد وهي تتفحصها بخبرة ومهنية لتقول: التصاميم تحفه لو اتنفذت بنفس الدقه دي هتبقى قريه مالهاش مثيل
ثم سألته على غفله: كل التصاميم دي بتاعتك يا بشمهندس
تلجلجل أسر قليلا ولكنه حافظ على ملامح وجهه ثابته وأردف بخفه: الصراحه انا بشتغل انا والتيم بتاعي كلنا بنتشارك الأفكار والرسم
سألته تالين بغرابه : ازاي بس التصميم شكله كأن ايد واحده بس هي اللي اشتغلت عليه... غريبه اوي إنه يكون تيم وطلع بالدقه دي
صمت آسر غير قادر على اختلاق المزيد من الاكاذيب يكاد ينفجر بسبب هذا الوضع الذي يضعه فيه والده بإستمرار لما لا يثق فيه..... لما يزج فارس في كل شئ ويضعه في هذه المواقف فهو غير قادر على الكذب والتبرير فقد سأم كل هذا ولو بيده لترك كل ذلك وذهب الي آخر العالم حيث لا يعرفه احدا ولا يفضل احد أخيه عليه... افاق من شردوه على صوت چومانا وهي تبرر: معلش يا بشمهندس أسر... تالين بردو مهندسة ديكور وعندها خبره في المجال فعشان كدا تلاقيها دقَيقه في كل حاجه
ابتسم أسر وهتف : تمام انا فاهم قصدها... ودا يدل علي انها مهندسة شاطره واكيد هنستفيد من الشغل سوا
ابتسمت تالين وظلت تتناقش معه حول الرسم والتصميم وأضافت بعض اللمسات الخاصة بها ليشيد أسر بكلامها ووعدها انه سيضيف ما قالت من تعديلات وانتهى الاجتماع على وعد بإجتماع آخر لمناقشة ما تم تعديله
.............................