انتي جمالك بيت قصيد يكتبه بدر ويغنيه ابو نوره..

البارت الثالث (وش قصة بدر)

رجال عمي امير يركضون صوبي صرخت بس هم
الحين فوق رأسي خلاااص انتهيت كنت مغمضه عيوني
ولا ابي اشوف شيي فقال واحد من الرجال الا هو عماد اعرفه :
حنا ندور على بنت شعرها طويل
وطولها حوالي 160 م شفتها
فتحت عيوني وقلت :
لا لاا
استغرب مني و راحوا
بس انا منصدمه الحمدلله معرفوني ابد
اكيد لاني بهوية ولد فاكيد ماهم متخيلين
اكون ولد
كملوا طريقهم الا قدامهم بدر
لا خلاص اكيد بينكشف المستور
بدر بهدوئه و بروده يناظر لهم
فقال عماد :
ندور على بنت شعرها طويل أدهم
وطولها حوالي ال160 م شفتها ؟
بدر سكت شوي
انا هنا خفت شكل بدر كشفني وبيعلم عليي
الا قال بدر :
لا .
قال عماد :
طيب
وكملوا طريقهم بالبحث
بدر مد عيونه لي ساكت
الا دخل وتجاهلني
خذيت نفس :
الحمدلله شكلي بالمستور محد كشفني للحين
وصارت خفقات قلبي تزود بعد ما عمي وصل
لهذا المكان اللي خذيته مخبأة لي عمي ماراح يرتاح
الا لمن يلقاني اكيد
ياربي وش اسوي الحين عمي طاغيه كبيرة
ويبي كل شي على هواه بس ماني مستسلمه
له راح احارب لنهايـه .
**
بالليل وكالعاده العصابة هجمت على البقالات
الصغيرة وقاموا يخربون كل شيي وانا معهم
ما كان هالشي هذا يسرني والأمن يلحقون
بنا كالعادة وقدرنا نهرب
وباليوم الثاني بالليل كنت بغرفتي
وطلعت على اساس اشرب مويه الا
اسمع اصوات يسولفون كان بدر و عايض
اشوفهم من فتحت الباب الباب كان مفتوح شوي
عايض تقل مضايق ومعصب شوي وهو يسولف
على بدر انا خذني الفضول لهم تقدمت واحاول
اسمع كل شيي الا سمعت عايض يقول :
بدر ابوك ماهو بساكت لو عرف انك وراء
هالتخريب اقل شيي انه بيذبحك
بدر بابتسامة السخريه :
ماني بخايف منه وخله يفرد عضلاته
عايض قال :
انا صاحبك من واحنا صغار اعرف انك
مستحيل تفوز على ابوك اعرف اللي سواه
بك انت و امك ماهو قليل
انا انصدمت من اللي اسمعه بالحيل
وقلت :
يعني بدر عنده قصه و ابوه هو اكبر عدو له
بالدنيا وأمه ليه وش صاير معها
انا خنقتني العبرة وتذكرت كلام عمتي
آمنه يوم أهرب من القصر يوم قالت السر
عن امي انا تضايقت حييل ومشيت حتى
خلصت الرغبة اني اسمع باقي كلامهم
مشيت بضيقتي وانا افكر واجد
جلست قبال الدريشة مثل العادة اللي
احس انها متنفس لي وصرت افكر
لوقت الا جاء عايض من وراي وقال :
براء !!
**
جاني عايض وقال :
براء انت بخير
درت عيوني له وباين الضيقه بوجهي
قلت :
لاا ولاشيي
ما اقدر حتى افضفض لأحد لو فضفضت
بينكشف المستور .
فقال عايض :
شعندك صاحي
قلت :
انا اسف صحيت عشان اشرب مويه
وبلغلط سمعتك انت و بدر تسولفون
تفاجأ عايض وقال :
سمعت وش كنا نسولف فيه
قلت :
تقريبا تحذر بدر من أبوه
سكت عايض شوي وقال :
ودك تسمع قصة بدر
قلت بحماس مستغرب :
اييه
قال عايض :
طيب اسمع
الا جاء بدر وقاطع كلامنا
وقال بعصبيه :
الوقت الحين نص الليلول وش مصحيكم
روحوا لغرفكم وناموا
افترفنا انا و عايض وانا كلي لهفه اسمع
قصة بدر بس للاسف جاء بدر كالعاده
وخرب كل شيي .
حطيت رأسي على المخده وباقي افكر
بقصة بدر واقول بنفسي كل انسان
عنده قصه مخفيه بها من الألم والحزن
الكثير فعشان كذا لا نحكم على الناس من
مظهرهم نفس بدر الوحش اللي اشوفه كذا
شكل وراءه قصه كبيره خلته يصير قاسي
كذا .
**
من بكره طلب مني ضاري اروح معه
للمكتبة هو يحب عالم الحشرات يأخذ
كتب تتكلم عن الحشرات وبنفسه يقول
راح اكتشف شيي عن الحشرات ولا عالم
بالدنيا اكتشفها
كان يقدر يأخذ خلف معه لأنه اقرب واحد
له بس خلف ما يحب الكتب والمكتبة والثقافة
هو يحب اللعب والصراخ والهبال هاذي
شغلته ويتقرف من ضاري اللي مولع بالكتب
وعالم الحشرات
دخلنا المكتبة طبعا دخلناها على اساس
حنا ناس عاديين مو حراميه
المكتبة كبيرة مره والكتب واصله لسقف
كنت اشوف نفسها بقصر عمي امير
ضاري صاير يتامل الكتب اللي
تتكلم عن الحشرات بعيون مليانه شغف
خذ ساعه على ما يأخذ الكتب اللي يبيهم
حاسب وطلعنا وقال بكل حب وشغف :
احب عالم الحشرات حسيت اني لقيت
نفسي به احس بشعور حييل حلوو
اذ قريت عنهم و اكتشفت أشياء جديدة
كنت اناظر له مبتسمه واهنيه انه لقاء
نفسه بهذا المجال اللي احسه غريب شوي .
آخر الليل :
جت بدريه اخت بدر لـ بدر
وجايبه معها أخبار وكالعاده
كنت قريبه بالمطبخ تحديدا
قالت تحذره :
ترا ابوي شدد الا يعرف من هذا
اللي يخرب حلاله
بدر ببروده وماهو مهتم قال :
خليه يعرف ويشد حيله اكثر
عصبت بدريه :
بدر تكفى خلااص ادري اللي
سواه بك و امي ماهو هين
بس تعرف طبع ابوي شديد
ومعاملنا حنا يعياله معاملة العدو
سكتت بدريه شوي وقالت :
و سلمى تراها تحبك وتحراك
انصدمت شوي وقلت :
سلمى من سلمى
بدر ببرود :
حتى هاذي اشغلتوني بها
**
انا خذاني الفضول وقربت وللاسف طحت
وانتبهوا عليي بدريه مدت عيونها لي بشك :
هذا مره ثانية شكل ما عنده شغل بحياته
غير الشفايه على سوالف خلقه
بدر ارتبك شوي وقال :
تعال براء ..
جيت بعد ما ناداني بدر
وعيون بدريه كلتني بنظراتها
قالت بدريه مستغربه :
هذا ولد ؟
الصدفه ان انا و بدر ارتبكنا سوا وبررنا
سوا قلنا :
اكيد ولد . قلنا حتى نفس الجملة
بدريه استغربت منا وقالت :
بس وجهه حلوو نفس وجه الأنثى
قال بدر :
لا تجلسين ادققين واجد مثل عادتس
هذا براء واحد من عصابتي
انا ضليت مصدومه واناظر لـ بدر
ليش ارتبك مثل ما انا ارتبكت
وقال اني ولد معقوله ..
بدر عصب من بدريه وقال :
بدريه هذا ماهو مكان مناسب للبنات
انا احذرتس م تجين بس تحبين العناد
وتجين واجد يلاا طسي
بدريه تاففت وقالت :
يلاا بروح ما ناقصني الا تصيح بوجهي
قال :
هذاا اللي بيصير اذ ما رحتي
راحت بدريه بدر ناظر لي وقال :
"ما تعرف تجلس بغرفتك انت ‏‏"
كانت نبرته قاسيه جرحتني فقلت بضيق
وانا منزله رأسي :
آسف ..
راح بدر متجاهلني مثل العاده ولا هو شايفني شيي .
هالبدر اسراره واجد حتى ما اتخيل ان عنده قلب
و مشاعر بالأول قصة أمه  و عداوته مع أبوه
و سلمى !! هاذي من تكون بعد وين عايض
يعلمني بكامل القصة عندي فضول اعرف
حتى اشك ان بدر من عالم الوحوش ماهو
من البشر .
**
قصر عمي امير :
جالس يصارخ ومعصب بالحيل
وقدامه مرته امنه فقال :
هاذي وين اختفت بكل مكان دورت
عليها كان الارض انشقت وكلتها
بس هين والله ماراح اخلي هربتها
هاذي تعدي بدال ما كنت مدلعه
هالمدلعه تسوي بي كذا
هين يا براء اذ ما خليتك
تعضين الأرض وتنسين من
انتي حتى .

اجتمعنا مع بدر وقال :
الليلة بنسطوا على محلات داخليه
خلوكم مستعدين
قلنا :
تم
جاء الليل :
رحنا للمكان المقصود قال بدر :
يلاا تفرقوا وخربوا كل شيي
بكذا افترقنا وصرنا نكسر ونخرب والناس
تصيح خوف كسرنا و خربنا المكان
وطلعنا بسرعه صرنا نركض على الشارع
الطويل الا اشوف قبالي سيارات فاخرة
هالسيارات ماهي غريبه عليي خصوصا
السيارة اللي بالوسط الطويلة انفتح
الباب ونزل منها شخص بغروره وكبريائه
وسيطرته وعظمته هالشخص ما تغير
على ملامحه القاسية والباردة ايه
كان عمي امير بذاته انا توقفت وعجزت
اتحرك صرخ خلف :
ليه وقفت بساع ولا بيمسكون بنا الأمن
بدر لف عيونه صوبي ولاحظ نظراتي
الطايره بعمي امير ولف انظاره لعمي
امير
هنا عمي طاحت عيونه علينا
انا اللي تجمدت بمكاني وعجزت اخطوا
خطوه قدام .