اتفاجأت انها بتعرف خالي درغام .. مع انها ما حصل شافتو ولا حصل زار بيتهم قبل يتوفى ..
من غير تفكير سالتها :
= نانا انتي بتعرفي خالي درغام من وين ؟
نانا : كلنا بنعرفوا الطاهر النقي ، ما يستاهل الحصل ليه .. بس حقو حايرجع قريب
= ليه شنو حصل ليه ؟
تميم همس لي : نانا بدت تخرف ما تهتمي بكلامها
= لاا دقيقة م بتخرف
اتلفت عليها : نانا احكي لي عن الحصل لخالي
عاينت لي : خالك منو ؟
بأبتسامة : ليا انتي جيتي متين ؟
شوفتي الفنيلة العملتها ليك ؟
" رفعت فنيلة الكورشية الشبه خلصت "
حلوة ؟ عجبتك ؟
هزيت راسي بيأس غير واضح : ايوة حلوة تسلم يدك
نانا : بس انا زعلانة منك
= ليه زعلانة مني ؟
_ بقيتي ما بتزوريني كتير ؛ زعلانة منك شديد
بوست يدها : حقكك علي يا نانا ، حابقى ازورك كل يوم
نانا : وعد ؟
ابتسمت : وعد
رجعت ترتل بقية السورة من غير ما تهتم بوجودنا ..
حسيت بخيبة امل للحظة حسيتها ح تحل لي اللغز .. اللي فضلت سنين بحاول احله .. كانت ولا زالت وفاة خالي درغام لغز محير بالنسبة لي .. مع انه الكل بقول انو اتوفى في منجم الذهب الكان شغال فيه بس انا ابدًا ما صدقت وحاسة انو في شي غامض في القصة ..
قطع حبل افكاري صوت تلفوني ، طلعتو من الشنطة كانت سهيلا ..
سهيلا : اذا فاضية مُري علي في البيت وياريت تكون معاك عربيتك ..
_ طيب جاية عليك ..
فصلت منها واتلفتت لتميم كان واقف بعيد وبتكلم مع غفير بيتهم .. استنيتوا لغاية خلص معاه وجا علي ..
_ سُهيلا ضربت لي حامشي ليها
= والشاي ؟
_ نعوضها يوم ؛ ماله نانا كانه بقت بتنسى ؟
= شوية ذاكرتها اتراجعت ؛ الدكتور كان معانا امس مبادىء زهايمر قال البحصل ليها طبيعي بسبب العمر ..
_ غريبة جدو عبدالله اكبر منها وما نسى زيها !
ضحك ورفع يدينه في اشارة لعدم معرفتو ..
طلعت منه على سُهيلا ؛ طول الطريق كنت بفكر في كلام نانا وما راح من بالي ابدًا ..
وصلت البيت رنيت الجرس جات خالتو " عائشة = امها " فتحت لي .. بملامح آسيوية بريئة وحفاوة تشبه قلبها الكبير .. حضنتني وسلمت علي .
