" اكرمني ب "لايك " ايها القارىء اللطيف "
" متابعة ممتعة ♡ "
سمعت صوت همس بناديني اتلفت يمين شمال .. ما كان في شي ! ؛ وقفت مسافة بعاين في الاتجاه الصدر منو الصوت ..
دقيقة ؛ دقيقتين ؛ خمسة دقايق .. وقفت خمسة دقايق كاملة مستنية اسمعهُ تاني بس ما سمعت شي !
هل بسبب الفترة الصعبة المريت بيها الايام الفاتت بقيت بتهيأ لي ؟ ولا هلوست بسبب الضغط النفسي ؟ ضغطت على مدامع عيوني شوية ؛ رمّشت عيوني الكانوا بوجعوني وطلعت غرفتي النوم طار من عيوني تمامًا فضلت مبلحقة في السقف لغاية الساعة 2ص.. سخانة عيوني كل شوية تزيد .. نزلت المطبخ اجيب ليهم تلج ، وانا راجعة خطيت خطوتين على السلم ؛ ختيت يدي في الدربزين .. لمحت " ستو " نازلة من الاتجاه التاني للسلم اللي واخد شكل الحرف " n " على امتداد غرف الطابق العلوي كلو ..
الوقت متأخر شديد وين ماشة ؟
فكرت اوقفها اسألها وقبل انطق اول حرف من اسمها كانت فتحت الباب وطلعت .. بهدوء ومن غير ما تحس بي مشيت وراها ..
مشت الباك راوند وقفت في مساحة بين تلاتة شجرات طويلة .. التلاتة شجرات ديل بتذكر زرعتهم هي بنفسها وبتهتم بيهم على طول .. الباك راوند حقنا ده مافي اي زول بجيه لا من الشغالين ولا حتى نحنا .. حتى مناسبتنا ما بنعمله في و بنكتفي بالمساحة الامامية للبيت واللي تقريبًا قدر المساحة الخلفية تمامًا لو ما كانت اذيد بشوية ..
كان في اتنين من رجالها مستنينها وهنا انا لغيت فكرة اني اناديها تمامًا .. و اكتفيت باني اختفي ورا اصيص كبير في زاوية من زوايا الحوش .. من غير ما تتكلم معاهم كانوا عارفين يعملوا شنو !
واحد من رجالها نزل رفع الارض بيده ! .. قلعت عيوني واستغربت الموقف بمجمله .. الارضية الواقفين عليها مزروعة نجيله حقيقة ما صناعية .. كيف قدر يرفعها بالسهولة دي ؟
دخلت بالفتحة لتحت الارض ..!
وهم فضلوا واقفين في مكانهم .. قعدت مسافة طويلة مستنياها تطلع ما طلعت .. تعبت من القعدة على ركبي فرجعت غرفتي وما استنينتها تطلع ..
شلت باقي اليل افكر لغاية غلبني النعاس ونومت .. صحيت على صوت ميتسي بتصحيني للصلاة .. من تعبي ما اشتغلت بكلامه وكملت نومي .. بس ما اديتني فرصة وجات صحتني تلاتة مرات زي ما وصيتها ما تسمح لي افوت صلاة الفجر لاي سبب كان وتكشح فيني موية بارة ان لزم الامر .. في الرابعة صحيت ليها ..
صليت ورجعت نومت تاني ..
سخانة عيوني استمرت طول اليوم ؛ غشيت الصيدلية اللي في طريق الجامعة وانا راجعة جبت قطرة معقمة على ما يبدو حساسية بسبب الغبار .. وفعلا حسيت براحة من استخدمتها .
