"حور "
رجعت من بيت الجبل مع غنوان .. وفي الطريق ظهرت عربية هايس قطعت لينا الطريق .. اتفاجأت بغنوان بتسلمني ليهم تسليم اهالي كانها متفقة معاهم ..!
من شدة ما كنت مصدومة من فعل غنوان .. راسي شطب وما حسيت بروحي غير مربطة في كرسي في غرفة ضيقة ..
كوركت وصرخت بعد حلقي وجعني سكتا .. وانقذتي باقي صوتي اللي كان ماشي يروح ..
كنت خايفة شديد خصوصي انو من لما جابوني المكان ده .. مافي اي زول ظهر لي ماشفت اي بني ادم ولا حتى بني جن ..!
تاني يوم الظهر دخل علي راجل اصلع ، ضخم .. شايل اكل في صينية وموية باردة كنت عطشانة بطريقة خلتني اشوف كباية الموية اتنين اتنين .. ختاهم في التربيزة وفك لي يديني ومشى اتجاه الباب ..
قال بصوتو الشبه صوت القرد : نص ساعة وبجي بشيلهم ..
طلع وقفل الباب وراه ..
استنيتوا لغاية ما طلع ، وجريت ع كباية الموية شربتها .. فكرت اضرِب عن الاكل عشان اضغط عليهم يخلوني اطلع فخليت الاكل زي ما هو .. راسي كان بودي واجيب هل هم خاطفني وحايطلبوا فيني فدية ؟ وحتى ولو هم عايزين يكسبوا فيني قروش غنوان دخلها شنو ؟ وليه عملت كدة معاي ؟
عقلي يودي ويجيب كنت حاطق من كثرة التفكير .. عاينت يمين شمال لشباك اهرب منه .. الغرفة كانت عالية شديد وضيقة مافي غير شباك صغير فوق ومستحيل اصله ولو وصلتو مستحيل اقدر اطلع منه ..!
يئستا و قعدت في الارض بكيت وشبعتا بكا .. ما حسيت بالوقت غير لما الباب فتح للمرة التانية .. كان نفس الراجل عاين للاكل وعاين لي .. شالو بهدوء واتلفت عايز يمش
= عايزين مني شنو؟ عايز قروش ؟ انت عارفة انا بت منو ؟ انا حور عبدالغفور اذا بابا بيعرف بالبتعملوا فيني .. حايطبق الدنيا في راسكم يا حيوانات ..
عاين لي بنظرة باردة : بعرف انتي منو وبعرف ابوكي كمان و اذا عايزة قروش انا ممكن اديك !!
عاين لصحن الاكل : سواءً اكلتي او لا انا ما فارق معاي .. بس بجيب الاكل عشان دي الاوامر اصلا انا جعان فكويس ما اكلتي
= رئيسك ما جاب ليك اكل " ضحكت " يا مسكين !
شال السندوتش اكله في لقمه واحدة و قال : لا انا اللي ما بشبع ..
كان واقف جنب الباب المفتوح ومركز مع الاكل باغتو بحركة بطولية وجريت ناحية الباب عشان اهرب منه .. حرك رجلو بهدوء وعتر لي وقعت علي بطني .. وقبل ما استجمع قوتي واقوم اكمل البديتو .. لقيتو شايلني زي شوال السكر ورابطني في الكرسي ..!
المساء لز لي الاكل من غير ما افك رباطي : بما انك ما حابة تاكلي فانا حاساعدك في رغبتك ..
