" عزيزي القارىء .. الرجاء ترك لايك وكومنت لطيف عند الانتهاء من القراءة لتظهر لك الحلقات بإنتظام .. " " متابعة ممتعة "------' " حور " رجعنا بعد خلصنا مدة الجلسات مع الشيخ .. اقناع ابوي كان ساهل بانه اخر منطقة زرناها كانت ما فيها شبكة كويسة .. وعشان اثبت كلامي ويكون منطقي لمن يسال امي .. زرنا كذا مكان وقعدنا يوم في كل منطقة ! ماما ما كتير بتطلع الا معانا ف ثقافتها عن الاماكن السياحية قليلة .. ما ركزت في ان التلاتة اماكن اللي زرناها كانت في نفس البلد بس طولت الطريق عن طريق السواقة في كذا طريق !.عناب حالتها اتحسنت كتير .. بطلت تمتم بالكلمات الغريبة اللي كانت بتقولها . بس الصراخ والخوف نص اليل لسه مستمر .. وعشان كدة الشيخ قرر نجيه تلاتة مرات في الشهر . مهمة صعبة ما عارفة كيف حاقنع بابا بس ما عندي حل غير اني استخدم تميم كرتي الرابح الوحيد .__________ " تميم "الساعة كانت 1 بليل لمن ليا اتصلت لي وهي خايفة .. كانت بتمتم بكلمات ما فهمتها من سرعة كلامها .. اصوات بتناديها والمرة الفي المراية بتظهر ليها في احلامها .. كلام غريب بخوف وما بطمن ابدًا ..الصباح بدري طلبت منها تلاقيني بس ما جات ! اتصلت ليها ما بترد .. رجعت لي المساء قالت كانت مشغولة وما لقت طريقة تطلع بيها .. فجأة تصرفات ليا اتغيرت من اخر مكالمة لي معاها .. سهيلا قالت انها ما حضرت اول جلسة من الميد تيرم .. وحتى المشروع ما سلمته الا مشت نياز سلمته بدالها واعتذرت بحجة انها عيانه مع ان الدكتور كان طالب التيم كامل يكون موجود لحظة التسليم حسب كلامها ! بعد يومين تفكير ما قدرت اتمالك نفسي كتير واكون تحت رحمة رنة تلفون منها .. اسبوع مختفية بدون اثر بعد كلامها الاخير ما ببشر بالخير ابدًا .. اخدت قراري ومشيت ليها البيت ..استقبلتني ميتسي في الباب = وين الكل ؟ _ ليان و المدام سافروا رحلة و الست كبيرة م موجود من امس ..= وليا ؟ سكتت مسافة وردت بحزن : حابسة روحها في الغرفة ليها اسبوع ما بتطلع .. _ طيب انا طالع ليها ..وقفت قدام الباب دقيته مرتين ما ردت .. ناديت عليها : ليا انا تميم افتحي ..كررت الجملة اكتر من مرة وانا بدق الباب .. ما جاني رد خوفت ولزيت الباب بقوة .. كانت واقعة في الارض غمرانة .. اسعفتها المستشفى عملت كل الفحوصات ما كان في شي غير ان ضغطها انخفض وباقي الفحوصات سليمة ! كملت درباتها فتحت عيونها ..= انتي كويسة ؟ قامت مفزوعة بتلفتت : وين انا ؟ _ اهدي انتي في المستشفى ! حاسة بوجع ولا تعب ؟ اتلفتت : وين المرة ؟ _ ياتو مرة ؟ سكتت ..= المرة الفي المراية ؟ هزت راسها " لا " وهي بتلفتت : انا ما عايزة ارجع البيت ؛ ما عايزة ارجع البيت ..= اهدي حانمشي بيتنا طيب ؟ مح ارجعك البيت اصلا مافي زول هناك ..هزت راسها وهي خايفة ؛ كانت ماسكة يدي طول الوقت وهي بترجف .. مشينا بيتنا دخلتها غرفة قريبة من غرفتي وغرفت نانا .. حسيتها هدت وروقت شوية بعد نانا وجدي عبدالله جو ونسوها .. نانا طلبت تبيت معاها وباتوا سوا في نفس الغرفة .. بليل جيت اشقر عليها لقيت نانا خاته يدها في راسها وبتقرا ليها قرانانبسطت لمن جيت الصباح اطمئن عليها لقيتها بتصلي ..هدوئها واطمئنانه كمل لبقية اليوم ودي حاجة ريحتني ..كل يوم بحس بالاسف اتجاه ليا .. كل يوم بضايق انها لسه موجود في البيت داك .. كانت غمرانة ويا عالم ليها كم واقعة في الغرفة دي وما في زول من ناس بيتهم جايب خبرها .. وكمان كلهم سافروا وخلوها براها .. معقولة مافي حد انتبه ليها او سال عنها ! بعد الحصل معاها بقيت مقلق عليها بزيادة .. رغبتي في اني اتزوجها واخليها جنبي بتزيد كل يوم .. انا مح اطمن ويهدا لي بال الا اتاكد ان في زول واحد على الاقل .. مهتم بيها وشايل همها .فكرت اتصل بابوها واتكلم معاه واحكي ليه الحصل .. لغيت الفكرة وجدعت التلفون .. ما عارف اتصرف كيف اكلم اهلها ولا حاشغل بالهم ..ده لو بالهم اصلاً كان في يوم معاها ! كانت قاعدة مع نانا برا بشربوا في قهوة .. قعدت جنبهم ونانا كبت لي " فنجال" قهوة ..نانا : انتي كيف وقعتي ؟ ليا عاينت لي وحولت نظرة لنانا : ما عارفة فجأة ما حسيت بروحي ولمن صحيت لقيت روحي في المستشفى ..نانا : وقعتي متين ما بتذكري ؟ يعني صباح ولا مساء ولا متين ؟ تميم قال ما لقى لا امك ولا ليان ليا : انا خليتهم عايزين يسافروا ودخلت الغرفة و راسي لفاني ووقعت ..كلامها ما اقنعني ولا اقنع نانا مع انها ما حسستها بشي .. ما سالتها خالص حسيتها ما عايزة تتكلم قدام نانا .. واكدت لي لمن قالت انها زهجانة وعايزة تطلع شوية .. وطلبت مني اطلع معاها .. وطلعنا ..في الطريق ..ليا : تميم شالت نفس : انا .. انا ما غمرت عاينت ليها ..واصلت : .. .. " ليا " كنت مع نياز لوقت متاخر بنقرا للجلسة الاولى .. رجعت البيت والتعب هالكني ما صدقت وصلت السرير ونمت فورًا .. على امل اصحى الصباح بدري اراجع قبل امشي الامتحان .."كان كائن اسود ما ليهو ملامح بحاول يقرب مني .. جسمي كانه ملصق في السرير بمسامير .. ما قدرت ارفع اصبع .. قريت آية الكرسي وكررتها كم مرة .. ما متاكدة اذا قريتها صاح بس الشي الاسود اختفى بمجرد ما قريتها "فتحت عيوني مفزوعة وضربات قلبي بتزيد .. الظلام كان مخيم على المكان ؛ فتحت النور بسرعة وانا بلهث .. عاينت يمين شمال في ركن من اركان الغرفة ما كان في شي .. انا كنت بحلم ! اتعوذتا وجريت الدفاية اتغيطت بها وانا برجف من السخانة ! جسمي كان بكب موية و حاسة ببرد شديد .. شغلت قران و ركبت السماعةقعدت ساعة كاملة بنفس الوضعية .. بعد اطمنت وهديت شوية ..حسيت بريقي ناشف ما كان في موية جنبي نزلت المطبخ اشرب موية .. انتبهت لستو وهي طالعة بس المرة دي انتبهت لوجودي ! ستو : ليا !جات اتجاهي : ليه صاحية لهسي ؟ = عطشت نزلت اشرب موية عاينت للكباية الفي يدي .. ستو : كلمي الخدم يملوا ليكي الجك موية عشان ما تتعبي نفسك هزيت راسي ايجابًا وكنت حامشي وقفتني : ما تخافي مح يقدر يإذيك طالما انا موجودة جنبك ! اتلفت عليها باستغراب : ما فهمت ! قربت مني : ما تحاولي تفتشي من ورا ظهري سامعة ؟ = انا ما فتشت وراك ! _ انا ما هبلة يا ليا ! فاكرة تمثيلتك يوم لقيتك واقفة قدام باب غرفتي مشت علي ؟ بعرف انك كنتي ناوية تخشي تفتشي غرفتي .. كنت عايزة ابرر وانكر حطب بس قاطعتني ..ستو : انتي شاكة فيني ؟ ليه ما بتقول لي بوضوح اللي عايزاه ! = العفو منك ستو ابدًا ما شاكة ..ستو : طيب ليه كنتي عايزة تفتشي غرفتي من ورا ظهري ؟ الشي العايزة تعرفي قولي وانا بوريك ليه! = هسي انا ما فاهمة كلامك الاول وضحيي ليه جملتك ما فهمتها منو اللي مح يإذيني ! = فضولك يا ليا .._ ما فهمت ! = مح اسمح لفضولك ورا قصة موت خالك .. يخليكي تاذي نفسك _ وليه لحتى فضولي بالقصة يإذيني ! مسكت يدي : تعالي معاي .. ساقتني برا جنب المسبح ..ستو : خالك يا ليا كان شخص كويس بس في يوم خالك ارتكب غلطة كبيرة .. والغلطة دي دفع تمنه حياته .._ وشنو الغلطة دي ؟ = غلط في مسؤولين كبار وعالم الكبار يا ليا مافيه لعب وده الشي اللي هو ما قدر يفهمه ومع الاسف ده الشي الاتسبب في موته _ يعني خالي ما مات في منجم زي ما بقولوا ! = لا عاينت لي : مات مقتول ؛ دمه كان موزع بين كذا شخص عشان كدة ما عرفوا منه القتله واتقيدت القضية ضد مجهول .. وعشان سمعت العيلة قولنا انه اتوفى في المنجم اللي كان شغال فيه .. الماضي ما لازم ينفتح يا ليا عشان ما نخسر الجاي .. الناس دي واصلة ممكن ينتهوا مننا كلنا امك واختك وابوك " عاينت لي " وتميم وكل حد غالي عليك ح ينتهوا منه .. = فهمت ..سكت مسافة .. = اسفة اني كنتي بحاول اخش غرفتك بدون اذنك .. ما كنت قاصدة شك فيك .. انا بثق فيك كل القصة انو انا ..قاطعتني : بعرف لمن كنت في عمرك كنت فضوليه زيك .. واخدني حماس الشباب وبفكر اني ممكن احتل العالم و اوحد المجرات .. ولمن اخت في راسي حاجة الا اعرفها .. " بابتسامة " غرفتي ما فيها دليل ممكن يوصلك لشي .. و اهو كدة عرفتي القصة واتمنى تكوني لقيتي اجابات كافية للاسئلة اللي في راسك .. مسكت يدي : امشي نومي وانسي الموضوع وركزي في دراستك طيب ؟ هزيت راسي ايجابًا وعاينت ليها : زعلانه مني ؟ هزت راسها : اكيد لا ..ابتسمت وبوستها : تصبحي على خير باستني : وانتي من اهله .. دخلت الغرفة و انا مطمنه بكلام ستو وفجأة سمعت صوت بهمس : ما تصدقيها ..اتلفت وراي اتجاه مصدر الصوت ما كان في شي ! بتردد وخوف : منو هنا ؛ منو بيتكلم ؟ اظهر نفسك ..الصوت : عايزاني اظهر ؟ = خليك شجاع واظهر قولت كلمة شجاع وانا من الخوف عايزة اقد الحيطة واجري برا البيت ! الصوت : اوعك تصدقي القالتو .. الحفرة فيها سر افتحي الحفرة بتعرفي " الطاهر " ليه مات ! = الطاهر منو ؟ الصوت : ... = اظهر قولت ليك ..الصوت : ..اختفى الصوت و انا حسيت روحي للحظة مجنونة وفقدت عقلي ! هل هو شيطان ؟ ولا ده شنو الكان بتكلم ده ؟ اكيد شيطان والا منو عنده القدرة يخفي نفسه غيره .. هل انا جنيت ولا بتهيأ لي ؟ لحظة قبل دقيقتين انا كنت برجف من حلم والان انا بتكلم مع مجهول وما خايفة ! ولمن استوعبت الموضوع حسيت بحرارة جسمي بترتفع .. نومت وما صحيت الا تاني يوم العصر ! .الصداع كان حايفجر راسي ما عارفة كيف نمت الوقت ده كلو ؟ طلعت على ناس البيت لقيتهم بيتغدوا .. اكلت معاهم ورجعت غرفتي لقيت مكالمة من نياز و سهيلا وتميم .. ما كان لي مزاج اتكلم جدعت التلفون بعيد وم رجعت لاي حد فيهم .. فضل اليل اكتر شي مرعب في حياتي.. بسمع ذات الاصوات بتناديني .. احلامي بالمرة الفي المراية بتزيد كنت خايفة وما عارفة اجري لمنو واكلم منو .. بلا وعي ضربت لتميم حكيت ليه كل شي حصل معاي .. بقيت بصحى العصر ومرات المغرب ..امي وليان قرروا يسافروا وخلوني عشان امتحاناتي .. فاتتني جلسة وتسليم مشروع .. كنت منهكة وجسمي هلكان من الارق و الخوف والرعب البعيشه كل ليلة .. قررت اقاوم روحي على الاقل احضر جلسة بكرة .. شغلت القران جنبي و نمت بدري على امل اصحى الصباح اقرا ..صحيت على نفس الصوت بناديني .. كان صوت مرة المرة دي ..= امشي افتحي الغرفة ..بزهج وعصبية : ما ماشة وما بهمني لا انتي ولا ولا طلباتكم .. زهجت منكم ليه ما بتظهروا يا جبناء ! الصوت بسخرية : متاكدة من طلبك ؟ بزهج : ياخ اظهري وخلصيني ..ببرود : زي ما تحبي ..ظهرت قدامي مرة وقبل اتاكد من ملامحها غمرت ! __________ ليا : ده كل الحصل وانا حاسة روحي حاجن بجد تميم : انا اسفه اني ما صدقتك لمن حكيتي لي في المكتب ..ما كنت فاكر الموضوع جدي كدة ! ليا شالت نفس : القران كان شغال لمن ظهرت ما عارفة ليه ما عمل ليها شي ! تميم سكت مسافة : عندك مشكلة نانا تعرف ؟ حاتفيدنا ! ليا : لالا مافي داعي نعمل قلق على الفاضي .. اصلا اليومين القعدتهم هنا ما حصل شي .. حا اقعد لغاية الامتحانات ماما وليان مح يجو هسي .. وانا ما عايزة ارجع البيت ..تميم : بكرة الجلسة التالتة ؟ هزيت راسي : اي خلينا نرجع عشان اذاكر دور العربية : ليا _ نعم = اوعديني اذا حصل معاكي اي شي ما تستني وتتصلي لي فورا !_ تمام تميم نزل ليا قدام البيت ومشى قابل حور اللي كانت مستنية في الكافيه ..!! _________ " ليا "نانا كانت بتهتم بي طول فترة وجودي معاها ♡ حضرت بقيت الامتحانات بهدوء وسلام .. و الامتحانين الفاتوني امتحنتهم كبديل بعد جبت ورنيك من المستشفى يثبت اني كنت عيانة الفترة الفاتت .. على الاقل استفدت شي من الحصل .. ما سمعت اي اصوات في بيت عمو عبدالماجد .. بالعكس كنت مرتاحة ومطمنه قررت ما اصدع روحي بالاسئلة بخصوص الحصل .. وكنت اظن رُقية نانا اللي بتقراها علي كل ما انوم هي البتساعدني .. لكن اكتشفت ان البتقراها هي المعوذات الثلاث بتحصن بيهم ما اكتر ..= يعني ما رقية ! نانا : ومنو القال ليك ما رقية ؟ المعوذات دي اقوى رقية وابسطها .. اقريها صباح ومساء وما بصيبك اي شر بمشيئة الله = نانا ممكن اسئلك سؤال ؟ نانا : احكي ..= انتي بتعرفي شنو عن خالو ضرغام ؟ كان ذكرتي انو بيشبهني صح ؟ اوصفي لي ابتسمت : صح كان بشبهك بس في روحه ما شكله ! = كيف يعني ؟ _ ضرغام روحه كانت طاهرة .. كان متدين وشيخ نقي رغم الوسخ الحواليه = قصدك شنو ؟ _ ليا ؛ زي ما في ناس بيعبدوا ربنا تقربًا وطمعًا فيه .. في ناس بيتظاهره بعبادته لمصلحه .. بيستغلوا الدين عشان يصلوا لاهدافهم السيئة .. وديل ربنا متوعدهم بعذاب شديد = ستو قالت انو اتوفى عشان غلط في مسؤولين كبار نانا عاينت لي مسافة : انتي سالتي ستو ؟ = ايوة سكتت مسافة وقالت : ما كان تعملي كدة يا ليا ! = ليه ؟ بابا كمان قال لي اني ما اسئل حد ! نانا : ياريتك سمعتي نصيحته ! حسيت بتوتر : في شنو انا ما عارفة يا نانا ! ليه انتي وبابا ما عايزين اسأل !وبعدين ستو اكيد مح تكذب علي و ..قاطعتني بعصبية : م تذكري الاسم ده قدامي ..= نانا ليه بتكرهيها ؟ ليه دايمًا بتضايقي لمن اجيب سيرتها رجعت لهدوئها : كلام كبار ما تهتمي بيه .. نحنا الاثنين ما بنطيق بعض= غيرة حبوبات يعني ! ضحكت ..كملت : انتي ما كلمتي لي قصة خالي ! نانا : ليا = نعم يا نانا نانا : اوعك تبيني ليها انك مهتمة لسه بقصة ضرغام حاضر يا يمة ؟ يفضل تقفلي السيرة دي تمامًاهزيت راسي ايجابًا : طيب ..سكتنا بس راسي ما سكت ! وفضولي اتجاه ستو زاد وبقيت عايزة اعرف اللي وراها .. خوف بابا ونانا من اني افتح السيرة دي .. بزيد فضولي باني اعرف اللي هما عايزين يخبوه . خلصت الامتحانات ومع نهايتها اتذكرت اني من لما جيت ما شوفت كديسي ! سالت تميم : انت اتخلصت منه صح ؟ تميم : اتخلص منه كيف يعني ؟ كل القصة انه طلع يشوف حياته بكون خالط واحدة من كدايس الجيران ديل .. بكرة بجيكي بعياله قال الجملة دي وهو بكتب في الاب توب وما مركز معاي ..ضحكت وما كملت ضحكتي الكديس جا جاري .. شلتو ختيتوا في حضني : وين كنت انت يا حلو ♡ اتململ بين يديني و لاحظت لتميم بعاين ليه بنظرات غريبة ..= تميم ! انت بتغير منه ؟ تميم عاين لي بطرف عينه وما رد لي .. عاينت للكديس : شكلو ما بحبك انا من الاول شكيت يا .. سكت مسافة اتذكرت اني ما سميته لغاية الان != صحي هسي اسميك منو ؟ اسميك غارفل ؟ تميم : اشمعنا ؟ = متذكر القط غارفل المسلسل العبيط داك الكنا بنصحى ليه من 7ص ضحك : كنتي بتحبي شديد وانتي البتصحيني من الفجر عشانه التقول ما عندكم في بيتكم تلفزيون ! ضحكتا : صح ؛ وانت كنت بتفتح لي التلفزيون وبتنوم .. وماما ليلى بتجهز لينا سندوتشات المدرسة وكانت بتتعب لمن تجي تصحيك .. تميم بنبرة حزينة : ويجي تيم اخوي و لدن ينطوا في السرير ويكوركوا فيني عشان اصحى ما كنت بحصى ليهم = كنت نوام بطريقة ما عادية ..عاينت لي لقيته وش حزين ..= متأكدة انهم في مكان احسن ♡ متذكر لمن حكيت ليك اني حلمت بيهم مبسوطين ؟ تميم :وانا كمان حلمت بلدن مبسوطة و تيم قال لي انو مكانه حلو وانو ربنا رزقه مكان احلا العبرة خنقته وعيونوا دمعت .. ما كان براه العيونه دمعت حتى الكديس عيونوا دمعت !! دايمًا كنت فاشلة في المواساة .. كل يوم بمر شوقه ليهم بزيد .. الفقدان صعب والموت حار .. الشخص اللي بيموت شخص غالي عليه مستحيل يرجع زي ما كان .. مستحيل قلبه يفضل نفسه .. صعب يتواسي ، صعب نبلسم جرحه .. الموت هو الجرح الوحيد اللي بيفضل صاحبه بينزف لغاية يلحق بالفاتو ! .رجعت بيتنا بعد اهلي رجعوا كلهم .. اخذت بنصيحة نانا وبقيت بقرا اذكار الصباح والمساء .. والامور كانت طيبة والاصوات اختفت بس الحصل بعدها ما كان كويس ابدًا ! __________ " حور" البطولة اتأجلت شهر قدام لاسباب غير معلومة ! بقدر ما كنت زعلانة لاني رجعت عشانها .. بقدر ما جاتني فرصة اقنع بابا اني اسافر اغير جو من الامتحانات واسوق عناب معاي .. بعد ما قدرت اخد تميم لصفي بقى ساهل علي اقنع بابا باي حاجة انا عايزاها ..و بمجرد ما اقترحت الفكرة بابا وافق على طول وما كان عنده مشكلة ابدًا .بقينا نسافر للشيخ زي ما طلب مننا وحالة عناب كل ما ليها ماشة في تحسن .. الشخص الوحيد اللي حالته كانت ماشة اسوء كانت ليا ! فجأة فكت الحجاب ولبسه بقى اكعب مما كانت قبل تلبسه .. انبسطت شديد لانو التزامه كان مُقرب تميم منها .. تميم اللي بقى بضايق لمن يشوفه او يسمع بيها وهي ماشة من حفلة لحلفة وصحبتها للاولاد كترت واكيد الحالة الوصلت ليها سهلت علي موضوع تميم جدًا .___________ " ليا " كنت قاعدة سهرانه مع اصحابي كالعادة .. فجأة الاقي يد بتجرني بقوة .. كان تميم اللي ركبني العربية بالغصب وساقني بيتنا ..! نزلت منه قدام باب البيت وانا بكورك فيه .. كيف يجرني من بين الناس بالطريقة المهينة دي ..تميم : انتي جنيتي ولا مالك ؟ واعية انتي ده شنو القرف الابسه دي .. في بت محترمة بتطلع من بيتهم لابسه لبسك ده= ما دخلك فيني البس الانا عايزة .. انت كيف بتجرأ تجرني من بين اصحابي بالطريقة دي ؟_ اصحابك ؟ بتقولي عن العرر القاعدهم مع اصحابك ؟ = ايوة اصحابي انا ما بسمح ليك تعاملني بالطريقة دي _ شوفتيهم بعاينوا ليكي كيف ؟ شوفتي نظراتهم لجسمك؟ كانوا حايكلوك اكل بعيونهم ..وانتي اخر همك = انت ما تدخل فيني انا حرة اعملي العايزة وامشي مع العايزة _ انتي عايزة تثبتي شنو ؟ انتي شوفتي روحك في المراية كيف اتقبلتي كدة ! = ما شغلتك انا حرة وتاني مرة اياك تتكلم عن اصحابي بالطريقة دي بزعل : اسمعي هنا يا ليا اذا بشوفك ماشة مع واحد فيهم قسمًا بالله يا ليا لتشوفي مني تصرف ما يعجبك ابدًا ! = انا بلبس اللي عايزاه و امشي معاه اللي عايزة كيفي يا تميم !_ لا ما كيفك ! واولاد الحرام ديل تاني مح تشوفيهم سامعة ولالا = والله امشي معاهم ؛ انووم معاهم انا ..وما كملت جُملتي لقيت تميم ضاربني كف ! _________كِلانا يسكنُ الآخر مهما حالَ بيننا كلَ شيء ![]()
______ " يتبع ..." تفتكروا ليا ماله ؟ وليه اتغيرت كدة !
